1 Mizhikembo iyi ɛlɛ, Ɔzhizɔsi a sa risu (ingyi Ogalili ma, ingyi gba akwu risu ingyi Otaberiya le), 2 akwɛyi enzu riba o mbwalu wu kwuwongu o ma lɔzɔ undu amɛ undu bɔkɔ e wo la enzu umba ofya. 3 Akwɛyi Ɔzhizɔsi a ya mu lɔwa a ŋɔma mbala Wavɔngɔkiya wu. 4 Odumudumu uwu ikalama uwu Azhu ba a ndama fo.

5 Tabɔkɔ Ɔzhizɔsi a ma enzu riba te o yi mu inyɔma ma munyi wu, akwɛyi a za la Ofilipu te, <<Ki ya kiya ingyirimo muna bɔkɔ kii shi enzu mbɔlɛ kaa lo ri?>> 6 E so ɛlɛ kaa la pwa wu ma le bi moo uwu e yitu iyi kiya ingyi bɔkɔ ee wo. 7 Ofilipu a gba wu opwu tee, <<Kiya ingyi irimo ingyi edinari ederi epo lala ki domo kaa uwewe la fya bwɛbwɛ mo!>> 8 Anduru, umanyi uwu Ɔsamɔ Opita, uvɔngɔkiya wu uwufo a to opwu tee, 9 <<Umɔnzɔnu uwufo munɛ e yi eburedi ɛlɔ mbala emu wepo munɛ, ɛlɛ kɔ i do kimbe mo mu riba ngyɛlɛ?>>

10 Ɔsɛ u yi gyɔɔ mɔmɔ, Ɔzhizɔsi a zɔ tee, <<La lu shi enzu mbɔlɛ lo ŋɔma mɛzhi.>> akwɛyi anzɔnu mate edubu ɛlɔ te o ŋɔma. 11 Ɔzhizɔsi e to eburedi ɛlɛ ma, akwɛyi a gbɛlɛ Ukpo ɛnyi akwɛyi a ka ngwu ma la enzu umba bɔkɔ ɔ ŋɔma mɔmɔ, i kyo emu tete. Uwewe a fya mate egbo wu i gyi.

12 Tabɔkɔ o ri bɔkɔ ubu e do mbo mo, Ɔzhizɔsi a za la Wavɔngɔkiya wu tee, <<La lu kpala ebwebwede iyi bɔkɔ i shimo awu ɛlu kaa lo fu mbo mo mo.>> 13 Akwɛyi o kpala ebwebwede iyi eburedi iyi bɔkɔ enzu mbamba o ri o shimo awu ɛlu, i nyɔlɔ lubiri luwo la lopo ma. 14 Mizhikembo iyi enzu mbamba o ma lɔzɔ undu amɛ undu bɔkɔ Ɔzhizɔsi e wo, akwɛyi o le mu isomo tee, <<Ele gba akwu Anukenzu uwu bɔkɔ a nyɔ mu kwudu kwɔlɛ le kego.>> 15 Ɔzhizɔsi e yitu tee o gyi te lo to wu ɛsu mega, akwɛyi a gbama a ka mu lɔwa kɛɛkyi wu.

16 Tabɔkɔ ɔnu u gbomo awu, Wavɔngɔkiya wu o solofo o ka mu kenzu unga risu, 17 moo o fye mu kwoda mɔmɔ o sama o ka mu Ɔkapanawu. Ɔzhizɔsi e de bo mo, utu ba u kpomo-o. 18 Akwɛyi kwokpo ungwɔku kwu yimo akwɛyi embyi o wo agba. 19 kwuyengwu bɔkɔ o pɛ kwoda mate ata ederi ɛrɛnyi mbala erewo te, akwɛyi o ma Ɔzhizɔsi te e yi mu luzɛ mu kadu unga embi a gba mbaa kwoda; akwɛyi iyi i wo mbo mo. 20 Ɔzhizɔsi ba a za mba tee, << Akwu imi; la lu riyi mo.>> 21 Akwɛyi o nyama kaa le fye mu kwoda, akwɛyi kwoda kwu kpama mɛzhi mbaa bɔkɔ o sheyimo awu kɛlɛlɛ.

22 Mu eyi i lama, riba ingyi enzu umba bɔkɔ o yi mu ɛsɛnyi iyi risu awu, o ma te kwoda kwunyi gba kwu yi mɔmɔ le, Ɔzhizɔsi ba e fye mangwu mbala Wavɔngɔkiya mo, Wavɔngɔkiya wu gba o kama kɛɛkyi mba le. 23 Akwɛyi ada iyi embyi iyifo i wɔ mu Otaberiya i bo i kpama mɛzhi mu kenzu unga embi kɛlɛ mbala mbaa bɔkɔ Ɔzhizɔsi e shi enzu kiya ingyirimo e ri awu mizhikembo iyi a gbɛlɛ Ukpo ɛnyi. 24 Tabɔkɔ riba ingyi enzu mbamba o ma tee Ɔzhizɔsi mbala Wavɔngɔkiya wu o yi mɔmɔ fo a wu,o fye mu kwoda o ka mu Okapanawu mbaa Ɔzhizɔsi ikagyima.

25 Kwuye ungwu bɔkɔ enzu o ka o du wu mu ɛsɛnyi iyi risu, o yo wu tee, <<U zɔ kiya, ŋɔ bo munɛ kwuye ?>>

26 Ɔzhizɔsi a gba mba opwu tee, <<Mi so yi ongbulolo tee, akwu kwuwongu bɔkɔ lu ma apula iyi amɛ mbala lɔzɔ gba lu ye mi mu igagyima le mo, akwu kwuwongu bɔkɔ lu ri kiya ingyirimo bɔkɔ ubu e do yi mo le. 27 La lu wo ɛduma kwuwongu kiya ingyirimo ingyi bɔkɔ ki tutumo le mo, la lu wo ɛduma kwuwongu kiya ingyirimo ingyi bɔkɔ kii shi onzu kwunyɔ ungwɔkpɔ, Imi Umɛ uwu Onzu gba mii shi yi le. Moo Imi gba Ukpo Ada e shi mi ekpasu le.>>

28 Akwɛyi enzu mbamba o yo Ɔzhizɔsi tee, <<Ki wo te bɔkɔ kii wo iyi bɔkɔ Ukpo a gyi?>>

29 Ɔzhizɔsi a gba mba opwu tee, <<Ɛduma iyi Ukpo akwu tee: la lu kwu idu lu fulo mu onzu uwu bɔkɔ Ukpo a lɔ wu e bo awu.>>

30 Akwɛyi enzu mbamba o yo Ɔzhizɔsi tee, <<Kɛzɔ ungana bɔkɔ ŋɔ zɔ nzu dɛɛ kaa la ki nyama la ŋa? Kimbe bɔkɔ ŋɔɔ wo? 31 O ka yi ma mu kwokpo ungwu Ukpo tee, umba asɔkwu nzu o ri omana mu ɛzhi ɛngbarara uwɛwuru <Ukpo e shi mbo kiya ingyirimo ingyi bɔkɔ ki wɔ moshi awu o ri.> >>

32 Ɔzhizɔsi a gba mba opwu tee, <<La mi so yi ongbulolo tee, akwu Omosisi gba a shi yi kiya ingyirimo gba lu ri le mo, Ada mi gba ee shi yi kiya ingyirimo ingyi ki wɔ moshi ngboro le. 33 Moo onzu uwu bɔkɔ a wɔ moshi e bo le gba akwu kiya ingyirimo ungyi Ukpo le, uwu gba ba ee shi enzu umba kwudu kwɔlɛ kwunyɔ le.>>

34 Enzu mbamba o za wu tee, <<Ada,>> <<Ina mɔnɛ i sheye keyi koko ka shi nzu kiya ingyirimo ngyɛlɛ.>>

35 Akwɛyi Ɔzhizɔsi a gba mba opwu tee, <<Imi gba mi kwu kiya ingyirimo ingyi kii shi kwunyɔ le. Enzu uwu bɔkɔ e bo munyi mi lonzu lu ngbɛ wu ma mo, enzu umba bɔkɔ e fulo idu ma mi ugbembi u wo wu wu ma mo. 36 Lunyi ba lu ma mi, ba lu nyama la mi mo. 37 Enzu umba bɔkɔ Ada e shi mi lɛɛbi ɔ nyɔ munyi mi, Imi ba mii na onzu uwu bɔkɔ e bo munyi mi, 38 moo mi wɔ moshi mi bo le akwu te kaa la mi wo iyi egbo mi i gyi bi mo, akwu te kaa la mi wo iyi onzu uwu a lɔ mi. 39 Egbo iyi onzu uwu bɔkɔ a lɔ mi e bo le gba akwu tee, enzu umba bɔkɔ e shi mi lɛɛbi awu ukpɛnyi te le tomo mo, kaa la mi yi mbo mo mu kwuvɔ ɔnuwu imbwama. 40 Moo egbo iyi Ada mi i yi tee, onzu uwunawuna uwu bɔkɔ a bɔ eyi mu Umɛ awu bɔkɔ e fulo idu ma wu aa fya kwunyɔ ungwɔkpɔ, Imi ba mii yi wu mo ɔnu uwu kwɔfyi ungwu imbwama.>>

41 Tabɔkɔ e so ɛlɛ, enzu umba azhu o le mu anu izɔma, kwuwongu Ɔzhizɔsi a zɔ tee, << Imi gba mi kwu kiya ingyirimo ingyi bɔkɔ ki wɔ moshi ki bo mɛzhi le.>> 42 Akwɛyi o kwuyo tee, <<Ele akwu Ɔzhizɔsi umɛ uwu Ɔzhɔsɛfu, uwu bɔkɔ ki yitu iyi ete wu mbala anyi wu le mo re? I wo te bɔkɔ a zɔ tee, <Imi mi wɔ moshi>?>>

43 Ɔzhizɔsi a gba mba opwu tee, <<La lu lafyima la anu izɔma.>> 44 <<Gba akwu onzu uwu bɔkɔ Ada uwu bɔkɔ a lɔ mi awu a pya wu e bo munyi mi mo; i yi onzu uwu bɔkɔ a nyɔ munyi mi mo, Imi ba mii yi wu mo ɔnu uwu kwɔfyi ungwu imbwama. 45 Anukenzu o ka yi ma tee: <Ukpo a zɔ mba lɛɛbi.> Onzu uwunawuna uwu bɔkɔ e shi alu mbaa Ada akwɛyi a vɔngɔ mbaa wu a nyɔ munyi mi. 46 Onzu uwunawuna uwu bɔkɔ a ma Ada dɛɛ e yi mo, onzu uwu bɔkɔ e ngyi mbaa Ukpo awu kɛɛkyi; uwu kɛɛkyi gba a ma Ada dɛɛ le. 47 Imi mi so yi ongbulolo, onzu uwu bɔkɔ e kwu idu fulo e yi kwunyɔ ungwu ɔkpɔɔ. 48 Imi gba mi kwu kiya ingyirimo ingyi kwunyɔ le. 49 Umba ete yi o ri omana mu ɛzhi ɛngbarara tetete o kpomo. 50 Kiya ingyirimo ingyi bɔkɔ ki wɔ moshi awu ba ki ŋɔ le, onzu uwu bɔkɔ e ri ngyi e kpomo mo. 51 Imi gba mi kwu kiya ingyirimo ingyi kwunyɔ ingyi ri wɔ moshi. Onzu uwu bɔkɔ e ri kiya ingyirimo ngyɛngyi, ee yi kwunyɔ ungwu ɔkpɔ. Kiya ingyirimo ngyɛngyi gba akwu ɛnwu mi iyi bɔkɔ mii shi yi kaa enzu umba kwudu kwɔlɛ lo yi kwunyɔ le.>>

52 Akwɛyi enzu umba Azhu o le mu kaambu ungakwuu irimo mbala esu tee, i wo te bɔkɔ onzu ele e shi nzu ɛnwu wu kaa la ki kwu?>>

53 Ɔzhizɔsi a za mba tee, <<Mi so yi ongbulolo: onzu gba e kwu ivye iyi ɛnwu mi Umɛ uwu Onzu akwɛyi e wo ɛnzhi mi mo, e yi kwunyɔ mo. 54 Onzu uwunawuna uwu bɔkɔ e kwu ɛnwu mi ba e wo ɛnzhi mi mo e yi kwunyɔ, akwɛyi mii yi wu mo ɔnu wu imbwama. 55 Moo ɛnwu mi gba akwu kiya ingyirimo ngboro le ɛnzhi mi gba ba o gbo yi ugbembi mo ngboro le. 56 Onzu uwunawuna uwu bɔkɔ e kwu ɛnwu mi ba e wo ɛnzhi mi a ŋɔ mɛmi mi, Imi ba mii ŋɔ mɛmi wu. 57 Mate Ada uwu bɔkɔ e yi la reyi a lɔ mi ma ba mi yi reyi kwuwo wu awu, tatayi gba onzu uwu bɔkɔ e kwu ɛnwu mi ee yi kwunyɔ kwuwo mi le. 58 Imi gba mi kwu kiya ingyirimo ingyi bɔkɔ ki wɔ moshi le. Umbasɔku yi o ri omana ba o kpomo, onzu uwunawuna uwu bɔkɔ e ri kiya ingyirimo ngyɛlɛ e yi kwunyɔ ungwɔkpɔ.>> 59 Ɔzhizɔsi e so ɛlɛ kwuyengwu bɔkɔ e yi mu enzu kiya i zɔma mu ugu uwu ɛlu ikpalama uwu Azhu uwu bɔkɔ e yi mu Okapanawu awu.

60 Tabɔkɔ wambwalu wu gyɔɔ o pwa ɛlɛ, akwɛyi ɔ zɔ tee, << Ɛzɔ ɛlɛ i kɔma. Uwe e do te a na yi?>>

61 Ɔzhizɔsi e yitu tee wabwalu wu o yi anu izɔma kwuwongu ɛlɛ, akwɛyi a za mba tee, <<ɛzu ɛlɛ ii shi yi luu gba kembo re? 62 Gba lu bu ma Umɛ uwu Onzu te a ya kadu a ka mbaa bɔkɔ e yi dɛ le kɔ? 63 Kwundu uwu Ukpo gba ee shi kwunyɔ le; ɛnwu ba i do kiya kinyinyi i womo mo. Iso iyi mi so yi ele akwu Kwundu ba akwu kwunyɔ. 64 umbafo yi ba o kwidu fulo mami mo.>> (Moo Ɔzhizɔsi e yitu kpeke onzu uwu bɔkɔ e kwu idu lu fulo mo bɔkɔ e be to wu a ya ma.) 65 Ɔzhizɔsi e siso e kyo tee, <<Kwuwongu ɛlɛ gba mi so yi le tee, akwu onzu uwu bɔkɔ Ada e shi wu ekpasu mo a nyɔ munyi mi ego mo le.>>

66 Kwuwo kwɔlɛ, Wabwalu Ɔzhizɔsi gyɔɔ o lu o gbama akwɛyi i na mu kwuye kwɔngu o mbwalu wu fo. 67 Akwɛyi Ɔzhizɔsi e yo Wavɔngɔkiya wewo la wepo mbamba tee, <<lunyi kɔ luu fulomo tete re?>>

68 Ɔsamɔ Opita a gba wu pwu tee, <<Ɔkwu ki re mba we? Uŋɔ gba ŋɔ yi iso iyi kwunyɔ ngwɔkpɔɔ le. 69 Ki kwu idu fulo tee uŋɔ gba ŋɔ kwu Ɔkɛrikɛri uwu bɔkɔ a wɔ mbaa Ukpo le.>>

70 Akwɛyi Ɔzhizɔsi a gba opwu tee, <<Akwu Imi gba mi ŋa yi lunyi wewo la wepo le mo re? Tetete onzu ukpɛnyi meka yi akwu onzu uwoyi! 71 (E so awu akwu meka iyi Ozhudasi umɛ uwu Ɔsamɔ Isikariyɔ, uwu bɔkɔ akwu ukpɛnyi meka iyi wewo la wepo mbamba, uwu gba e be to Ɔzhizɔsi a ya ma le.)