1 Tabɔkɔ Ɔzhizɔsi e yi mu luzɛ e sheyimo, a ma onzu ukpɛnyi uwu bɔkɔ o mba wu laa ipeyi. 2 Wa vɔngɔ kiya wu o yo wu kwuyo tee, <<U zɔ kiya, uwe bɔkɔ e ngbomo, uwu nana umba bɔkɔ o mba wu le ŋa, bɔkɔ o mba wu upeyi awu?>> 3 Ɔzhizɔsi a zɔ tee, <<Laa uwu laa enzu wu o ngbomo mo,>> <<Ɛlɛ i wo te kaa Ukpo la zɔ ekpasu wu ma wu. 4 Akwu mɛga kaa la ki wo ɛduma iyi Ukpo uwu bɔkɔ a lɔ mi ma le, tabɔkɔ ki yi mu ononda le. moo utu uu kpomo, akwɛyi ɔzɛnzɛnyi e do te e wo ɛduma fo. 5 Tabɔkɔ mi yi mu kwudu kwɔlɛ le, Imi gba mi kwu ɛbɛ iyi kwudu kwɔlɛ le.>>

6 Tabɔkɔ Ɔzhizɔsi mbwa iso ɛlɛ isomo, akwɛyi e fu ɔtɛ mɛzhi, a za ɔtɔtɔ ma, akwɛyi e nzo onzu ele meyi. 7 A za wu tee, <<So kaa vye eyi ŋɔ mo mu kwubu ungwu Osilo>> (iluma yi gba akwu tee ilɔma). Akwɛyi onzu awu a ka e vye eyi mo ba a gba e bo mogba la ɛbɛ imama.

8 Wa nɔ kpa wu mbala umba bɔkɔ o yitu wu la kwoya indama dɛɛ awu o yo kwuyo tee, <<Akwu onzu uwu bɔkɔ e koko a ŋɔma bɔkɔ a nda kwoya awu gba a ŋɔ le mo re?>>

9 Umbafo o zɔ tee akwu uwu.

Umbafo ba o zɔ tee, <<Ayimo a wɔ wu le bi.>>

Uwu mafyi wu ba a zɔ tee, <<Akwu Imi.>>

10 Akwɛyi o yo wu kwuyo tee, <<I wote bɔkɔ eyi ŋɔ i wuma?>>

11 A za mba tee, <<Onzu uwu bɔkɔ o ya wu te Ɔzhizɔsi awu a za ɔtɔtɔ akwɛyi e nzo mi wu meyi. A za mi tee so mu kwubu ngwu Osilo kaa vye eyi mo. Akwɛyi mi ka mi ki vye eyi mo, gba mi yi mu ɛbɛ imama ŋa le.>>

12 O yo wu kwuyo tee, <<Onzu awu e yi muna?>>

A za mba tee, <<Mi yitu mo.>>

13 Akwɛyi enzu o to onzu uwu bɔkɔ e peyi dɛɛ awu o ka wu la Afarisi. 14 Kwɔfyi ungu bɔkɔ Ɔzhizɔsi e nzo ɔtɔtɔ bɔkɔ e bo ofya umbwu onzu awu ma le akwu kwɔfyi ungu ɛnwu igbomo. 15 Akwɛyi Afarisi tete o yo onzu awu kwuyo kpɔ te ewo iyi na bɔkɔ a zɛ dɛɛ bɔkɔ a ma ɛbɛ. Onzu awu a zɔ tee, <<E nzo ɔtɔtɔ mu eyi mi>> <<Akwɛyi mi ka mi vye eyi mo, gba mi yi mu ɛbɛ imama ŋa le.>>

16 Afarisi umbafo o zɔ tee, <<Onzu ele a bɔ eyi mu Kwɔfyi ungwu ɛnwu igbomo mo, a wɔ mbaa Ukpo mo.>>

Umbafo ba o yo tee, <<I wote bɔkɔ onzu uwu ingbomo bɔkɔ ee wo ɛduma iyi amɛ ɛlɛ te?>> Akwɛyi o ka epo.

17 Akwɛyi Afarisi o yo onzu ele kwuyo kpɔ tee, << Uŋɔ gba a wu ŋɔ eyi mo le, ŋɔ zɔ te meka wu?>>

Onzu awu a gba opwu tee, <<Akwu anukenzu.>>

18 Azhu o nyama tee onzu ele akwu upeyi dɛɛ gba a gba la ɛbɛ imama le mo, nzhii ba o ya enzu umba bɔkɔ o mba wu le ma dɛ. 19 O yo mbo kwuyo te, <<Ele akwu umɛ yi uwu bɔkɔ lu zɔ te lu mba wu la ipeyi lee? I wo te bɔkɔ e yi mu ɛbɛ imama kekelele?>>

20 Enzu umba bɔkɔ o mba wu le o gba opwu tee, <<Ki yitu tee, akwu umɛ nzu, ba ki yitu te o mba wu la ipeyi. 21 Ewo iyi bɔkɔ a ma ɛbɛ kekelele ŋa le ki yitu mo, naa onzu uwu bɔkɔ a wu wu eyi mo ki yitu mo, la lu yo wu kwuyo. Akwu umɛshɛri fo; A gba opwu mafyi wu ego!>> 22 Enzu wu o so ɛlɛ kwuwongu bɔkɔ o riyi iyi wa to keyi umba Azhu, moo Azhu o so kyaa te onzu uwunawuna uwu bɔkɔ a nyama te Ɔzhizɔsi akwu Okrasi o ra wu ma o shi ugu uwu ɛlu ikpalama uwu Azhu. 23 Ɛlɛ gba i shi gba enzu umba bɔkɔ o mba wu le o zɔ tee, <<Akwu umɛshɛri fo; la lu yo wu kwuyo le!>>

24 O gba la onzu uwu bɔkɔ e peyi dɛɛ awu la iyama akwɛyi o za wu tee, <<So nzu ongbulolo kwuwongu Ukpo! Mo ki yitu te onzu ele akwu onzu uwu ingbomo.>>

25 A gba mba opwu tee, <<Ta akwu onzu uwu ingbomo loo, ta akwu tayi mo, mi yitu mo.>> <<Kiya ki kpɛnyi gba mi yitu le te. Mi kwu upeyi dɛ, kekelele mi ma ɛbɛ-ɛ!>>

26 Akwɛyi o za wu tee,<<E wo ŋɔ te? E wo te bɔkɔ a wu ŋɔ eyi mo?>>

27 A gba opwu tee, <<Mi za yi aa ba lu nya yi mo. Kimbe ki wo bɔkɔ lu gyi te la lu pwa yi kpɔ le? Lu gyi te la lu kwu Wavɔngɔkiya wu, tete re?>>

28 Akwɛyi wa to keyi umba Azhu o kpa wu ari tee, <<Uŋɔ gba ŋɔ kwu u vɔngɔ kiya uwu onzu awu le loo! Kinzu ba ki kwu Wavɔngɔkiya umba Omosisi! 29 Kinzu ki yitu tee Ukpo e siso mbala Omosisi, akwiyi onzu ele ba ki yi mbaa bɔkɔ a wɔ mo.>>

30 Onzu awu a gba opwu tee, <<Ɛlɛ gba akwu kiya ingyi kenzu iyama le! Lu yi mba bɔkɔ a wɔ mo, ba a wu mi eyi mo. 31 Ki yitu tee Ukpo a pwa enzu umba ingbomo mo. Aa pwa enzu umba bɔkɔ o wo iyi bɔkɔ a gyi. 32 Ngbaa mekyeki ɔzɛnzɛnyi te a pwa te o wu eyi iyi onzu uwu bɔkɔ o mba wu la ipeyi ma dɛɛ mo. 33 Gba onzu ele la wɔ mbaa Ukpo mo, e do tee e wo kiya kinyinyi te mo.>>

34 O gba wu opwu tee, << O mba ŋa mu ingbomo fɔrɔ; uŋɔ gba ŋɔ zɔ nzu le?>> Akwɛyi o ra wu ma.

35 kwuyengwu Ɔzhizɔsi a pwa tee o wa la onzu ele o ta kwudu, tabɔkɔ a ma wu, a za wu tee, <<Ŋɔ fulo idu ma mi Umɛ uwu Onzu?>>

36 Onzu awu e yo kwuyo tee, <<Ada, onzu awu akwu uwe?>> << Za mi kaa la mi kwu idu lu fulo mawu.>>

37 Ɔzhizɔsi a za wu tee, <<Ŋɔ ma wu aa; uwu gba e yi mu iso isomo mbala ŋa le.>>

38 Akwɛyi onzu a wu a zɔ tee, <<Ɔkwu mi kwu idu lu fulo,>> akwɛyi e kwumo e gbo wu ɔya.

39 Ɔzhizɔsi a zɔ te, <<Kwuwongwu ombu izɔma gba mi bo mu kwudu kwɔlɛ le, kaa wa peyi lo ma ɛbɛ, wa ma ɛbɛ ba lo peyi.>>

40 Afarisi umbafo umba bɔkɔ o yi mɔmɔ o pwa te e so ɛlɛ akwɛyi o yo wu kwuyo te, <<Kimbe le! Kinzu tete ki kwu wa peyi ŋa moo?>>

41 Ɔzhizɔsi a za mba tee, <<Gba la lu peyi Ukpo a ba ngbɛ yi ombu uwoyi te lu kwu enzu umba ingbomo mo; kekelele ba lu zɔ te lu ma ɛbɛ, ingbomo yi i degbo bɛnɛ.