1 Mizhikembo ɛlɛ, Ɔzhizɔsi a zɔ ɛnwu wu ma kpɔ laa Wavɔngɔkiya, mu kwuko ungwu risu ingyi Otaberiya. Te gba i wo le: 2 Ɔsamɔ Opita, Otoma (iyi bɔkɔ o lu yi te apiri), Ɔnataniyɛ uwu bɔkɔ a wɔ mu Okena mu Ogalili, umɛ uwu Ɔzɛbɛdi, mbala Wavɔngɔkiya wepo umbafo o yi mbala esu. 3 Ɔsamɔ Opita e so mbo te <<Imi mi sheyimo mbaa emu iyimo,>> akwɛyi o zɔ te, <<Ki rimo, mbala ŋa.>> Akwɛyi o kama mu kwudu o fyemo mu kwoda, mutu kwɔngu ba o yi kiya kinyinyi te mo. 4 Mu eyifumo, Ɔzhizɔsi a rimu kenzu unga risu, Wavɔngɔkiya ba o zɔngɔma ma te akwu Ɔzhizɔsi mo.

5 A ya mba ma akwɛyi a za mba te, <<Ɛmɛza mi, lu yi emu?>>

O gba wu opwu te, <<Ayi mo.>>

6 Akwɛyi Ɔzhizɔsi a za mba te, <<La lu to iya yi mu kwuwo ungwungyi ungwu kwoda yi de luu fya.>> Kwuye ungwu bɔkɔ o wo tayi, akwɛyi o do eya ɛnyi ipyipyimo mo kwuwongu o yi emu gyɔɔ.

7 Akwɛyi u vɔngɔ kiya uwu bɔkɔ Ɔzhizɔsi e pwu idɛnyi wu awu a za la Opita te, <<Ɛlɛ akwu Ɔkwu!>> Tabɔkɔ Opita a pwa te, <<Akwu Ɔkwu awu,>> Mu kwotota kwɔngu a gba e lo ɔmu wu mɛnwu (moo a lu wu ma kpeke) akwɛyi e yi mo a la mu embyi. 8 Wa vɔngɔ kiya umba bɔkɔ o shimo awu o mbwalu wu mu kwoda, o yi mu iya ipyipyimo inyi ba inyɔlɔma la emu, moo o ndama mbala ɛzhi mo, iyi kyamate ata oderi tayi. 9 Kwuye ungwu bɔkɔ o kalama, o ma ɔyi tabɔkɔ u yi mu izɛma mɔmɔ laa emu, mbala eburedi iyifo.

10 Akwɛyi Ɔzhizɔsi a za mba te, <<La lu bo la emu umbafo umba bɔkɔ lu yi kekelele awu.>>

11 Ɔsamɔ Opita a ya kadu akwɛyi e pyipyi iya e bo yi mu kenzu unga risu. Emu umbakwu o nyɔlɔma duduu, oderi la uwo ɛkpɛlɔ la ɛla, tetete bɔkɔ o yi gyɔɔ awu eya itarama mo. 12 Akwɛyi Ɔzhizɔsi a za mba te, <<La lu bo ka la ki ri kiya ingyirimo ingyi kwoto,>> Onzu ukpukpɛnyi te meka iyi Wavɔngɔkiya ba e yo wu kwuyo te, <<Ŋɔ kwu uwe mo?>> Moo o yitu te akwu Ɔkwu. 13 Ɔzhizɔsi e bo, e to oburedi akwɛyi e shi mbo, akwɛyi e wo tayi tete mɔgɔ uwu emu. 14 Ɛlɛ akwu ungwola bɔkɔ Ɔzhizɔsi a zɔ ɛnwu wu ma laa Wavɔngɔkiya wu mizhikembo iyi bɔkɔ e yimo mu lukwu.

15 Kwuye ungwu bɔkɔ o mbwa kiya irimo, Ɔzhizɔsi a za la Ɔsamɔ Opita te, <<Ɔsamɔ umɛ uwu Ɔzhɔnu, uŋɔ ŋɔ pwu idɛnyi mi ika ɛlɛ ma iyesheshi?>>

A zɔ te, <<Ee, Ɔkwu>> <<Ŋɔ yitu tee mi pwu idɛnyi ŋɔ.>>

Ɔzhizɔsi a zɔ te, <<Shi ilɔ mi kiya ingyirimo.>>

16 A kwɛyi Ɔzhizɔsi a gba e yo wu kwuyo ngwopo kpɔ te, <<Ɔsamɔ umɛ uwu Ɔzhɔnu, ŋɔ pwu idɛnyi mi ngboro?>>

A gba wu opwu te, <<Ee, Ɔkwu, ŋɔ yitu te mi pwu idɛnyi ŋɔ.>>

Ɔzhizɔsi a zɔ te, << Bɔ ilɔ mi eyi.>>

17 Ungwola a za wu te, <<Ɔsamɔ umɛ uwu Ɔzhɔnu, ŋɔ pwu idɛnyi mi?>>

Ubu uwu Opita e fomo kwuwongu Ɔzhizɔsi e yo wu kwuyo ungwola te, <<Ŋɔ pwu idɛnyi mi?>> A zɔ te Ɔkwu ŋɔ yitu iyi kiya lɛɛbi; ŋɔ yitu te mi pwu idɛnyi ŋɔ.>>

Ɔzhizɔsi a zɔ te, <<Shi ilɔ mi kiya ingyirimo. 18 Mi so yi ongbulolo, kwuyengwu bɔkɔ lu kwu alugbaga awu lu lo apula mɛnwu mafyi yi akwɛyi lu re mɔgɔ uwu bɔkɔ lu gyi; kwuyengwu bɔkɔ lu kwu enzumbakɔ ba lu nda ewo ye shaa, akwɛyi onzawa gba e lo yi apula mɛnwu le akwɛyi e re ye mu kizɛ ingyi bɔkɔ lu gyi te la lu so mo.>> 19 Ɔzhizɔsi e so ɛlɛ kaa li zɔ lukwu undu bɔkɔ Opita e bo kpo kaa le shi Ukpo inzumbɛku. Akwɛyi Ɔzhizɔsi a za wu te, <<Mbwalu mi!>>

20 Opita e fulo biri akwɛyi a ma u vɔngɔ kiya uwu bɔkɔ Ɔzhizɔsi e pwu idɛnyi wu awu te eye mbo mu imbwalu ma. (Ele akwu uwu bɔkɔ a wɛlɛ mu Ɔzhizɔsi kwuyengwu bɔkɔ o yi mu kiya ingyirimo ingyi onoyo awu akwɛyi a zɔ tee, <<Ɔkwu, uwe bɔkɔ e to ŋɔ a yama?>>) 21 Tabɔkɔ Opita a ma uwu bɔkɔ Ɔzhizɔsi e pwu idɛnyi wu awu, e yo Ɔzhizɔsi kwuyo te, <<Ɔkwu, ele kɔ?>>

22 Ɔzhizɔsi a gba wu opwu te, <<Akwiyi gba mi gyi te la ŋɔ nzhii ba mi gbama kɔ, i ta ŋa te? Uŋɔ mbwalu mi byi.>> 23 Kwuwo kwɔlɛ eza i kpashaa mekeka iyi ɛmɛnɛ te u vɔngɔ kiya uwu Ɔzhizɔsi ele ee kpomo mo. Ɔzhizɔsi ba e so te e kpomo mo mo; uwu de e so te, <<Akwiyi gba e yi kwunyɔ nzhii ba mi gba kɔ, i ta ŋa te?>>

24 U vɔngɔ kiya ele gba akwu u uzɔgɔ uwu apula ɛlɛ le akwɛyi a ka yi ma e shi mɛzhi. Ki yitu te izɔgɔ wu akwu ongbulolo.

25 Ɔzhizɔsi e wo apula iyi fo gyɔɔ tete. Gba lo zɔ te apula lɛɛbi lo ka yi ma shi mɛzhi kɛnyikɛnyi, Mi ma te kwudu kwɔlɛ lɛɛbi kwu yi ugu uwu bɔkɔ oo fu ekpo iyi bɔkɔ o bo ka le mo.