1 Kwuye ungwu bɔkɔ Ɔzhizɔsi a mbwa Ukpo ilɛma akwɛyi e fulomo mbala Wavɔngɔkiya wu o sa kwuvɔ ungwu Ɔkidirɔ ma. Mu kwuko ungufo mɔmɔ ba akwu utu uwepwu iyi ɔlifu, akwɛyi uwu mbala Wavɔngɔkiya wu o fye mɔmɔ.

2 Ozhuda uwu bɔkɔ a ya kwoya wu awu, e yitu iyi kizɛ ngyɛngyi, kwuwongu Ɔzhizɔsi e koko e kpolo esu mbala Wavɔngɔkiya wu mɔmɔ. 3 Kwuwo ngwɔlɛ Ozhuda a ka mu utu uwepwu mɔmɔ, mbala uzhi uwu asozha umba Oroma mbala wa gbo ɔtɛpu umbafo umba bɔkɔ o wɔ mba wa to keyi umba ebwoshi mbala Afarisi. O za la etoshi, kambyɔyi mbala ewulo iyi ewa.

4 Tabɔkɔ Ɔzhizɔsi e yitu lɛɛbi iyi bɔkɔ ii bi du wu awu, akwɛyi e turu a fa mba akwɛyi e yo mbo kwuyo te, <<Uwe bɔ lu kagyi?>>

5 O gba wu opwu o zɔ te, <<Ɔzhizɔsi uwu Ɔnazarɛti>>

Ɔzhizɔsi a za mba te, <<Imi gba mi ŋɔ le.>> (Ozhuda uwu bɔkɔ akwu u ya kwoya ungwu onzu awu a rima mɔmɔ mbala mba.) 6 Tabɔkɔ Ɔzhizɔsi a za mba te, <<Imi gba mi ŋɔ le>> akwɛyi o gba kembo akwɛyi o fu mɛzhi.

7 E yo mbo kwuyo kpɔ te, <<Uwe ba lu kagyi?>>

Akwɛyi o zɔ te, <<Ɔzhizɔsi uwu Ɔnazarɛti.>>

8 Ɔzhizɔsi a gba mba opwu tee, <<Mi za yi te, Imi gba mi ŋɔ le>> <<Akwiyi gba lu ye mye mu ikagyima, de ba la lu lafya la enzu mbɔlɛ ka lo sheyimo iya mba.>> 9 Ɛlɛ i wo te kaa iso iyi bɔkɔ e so awu li nyɔlɔma te: <<Umba bɔkɔ ŋɔ shi mi mbo awu o tomo mo.>>

10 Akwɛyi Ɔsayimɔ Opita, uwu bɔkɔ a rala Ɔkpadɛrɛ, a wala nga ma akwɛyi e kpolo kwɔlu ungwu ungyi ungwu unye uwu obwoshi uwakɔ ma. Unye awu o ya wu tee Ɔmalikɔ.

11 Ɔzhizɔsi a za la Opita te, <<Gba la Ɔkpadɛrɛ ŋɔ lo mu ayuwɛ nga! Mi wo ago iyi bɔkɔ Ada e shi mi le mo re?>>

12 Akwɛyi uzhi uwu Asozha mbala u to keyi mbo mbala wagbo ɔtɛpu umba Azhu o yi Ɔzhizɔsi ma. O ma wu ma 13 akwɛyi o bo wu mba Anasi keyi dɛ, uwu bɔkɔ akwu ete uwu oko uwu Okayafasi, uwu bɔkɔ akwu obwoshi uwakɔ kari kanga awu. 14 Okayafasi gba akwu onzu uwu bɔkɔ a ta wa to keyi mba Azhu amasa te, ishoshi ika akwiyi gba onzu ukpɛnyi e kpomo kwuwongu enzu lɛɛbi.

15 Ɔsayimɔ Opita mbala u vɔngɔ kiya uwufo o mbwalu Ɔzhizɔsi. Kwuwongwu Oboshi uwakɔ e yitu iyi u vɔngɔ kiya ele , a ka mbala Ɔzhizɔsi mu ufiri uwu obwoshi uwakɔ awu, 16 Opita ba a ri mu kwudu mba kenzugu. u vɔngɔ kiya uwufo uwu bɔkɔ obwoshi uwakɔ e yitu wu awu, a gba kembo, akwɛyi e siso mbala umɛ okokpayi uwu bɔkɔ e gbo kenzugu mɔmɔ awu akwɛyi o fye laa Opita ma mɛmi.

17 Umɛ okokpayi uwu bɔkɔ e gbo kenzugu awu e yo Opita kwuyo te, <<Ŋɔ kwu onzu ukpɛnyi meka iyi Wavɔngɔkiya umba onzu awu mo re?>>

Akwɛyi Opita a gba opwu te, <<Ayi mo.>>

18 Okpakyi e yi mu i yimo akwɛyi ɛmɛgba mbala adakari o kpala ɔyi uwu alanga o ri mu ivyemo . Opita a ka e rima mbala mba tete, mu ɔyi ivyemo.

19 Oboshi uwakɔ e yo Ɔzhizɔsi eyo meka iyi Wavɔngɔkiya wu mbala ɛzɔ wu.

20 Ɔzhizɔsi a gba mba opwu te, <<Mi koko mi zɔ enzu mbanambana ɛzu gedegede mu idaba iyi Ɛlukpalama mbala ɔtɛpu mba bɔkɔ Azhu lɛɛbi o kpalɛlu. Mi so iso ikpikpɛnyi mu invyemo mo. 21 Kimbe ki shi bɔkɔ luu yo mi eyo? La lu yo enzu umba bɔkɔ o pwa iso mi awu. O yitu shɛ iyi iso iyi mi so.>>

22 Tabɔkɔ Ɔzhizɔsi e so tayi, akwɛyi odakari uwu bɔkɔ a ri kɛlɛ mbala Ɔzhizɔsi a kpa wu afyi mu eyi. Akwɛyi a za wu te, <<Tegba ŋɔ gba opwu la obwoshi uwakɔ lee?>>

23 Ɔzhizɔsi a gba wu opwu tee, <<Akwiyi gba mi siso mi ta yi ma de ba za la onzu uwunawuna uwu bɔkɔ e yi munɛ kiya ingyi bɔkɔ akwu ingyira. Akwiyi gba ba mi so ongbulolo, kimbe ki shi bɔkɔ ŋɔ kpa mi afyi?>> 24 Akwɛyi Anasi a lɔ ma tee lo gba Ɔzhizɔsi akyi kaa lo so wu mbaa Okayafasi obwoshi uwakɔ

25 Tabɔkɔ Ɔsayimɔ Opita a rima mu ɔyi ivyemo, akwɛyi o yo wu kwuyo te, <<Ŋɔ kwu onzu ukpɛnyi meka iyi Wavɔngɔkiya mba onzu awu mo re?>> Opita ba a zɔma. Azɔ tee, <<Ayi mo.>>

26 Umɛgba uwu obwoshi uwakɔ ukpɛnyi, onzu uwu kwomba uwu onzu uwu bɔkɔ Opita e kpolo wu kwɔlu ma awu, e yo kwuyo tee,<<Mi ma ŋa mbala wu mu utu uwepwu iyi ɔlifu moo?>> 27 Opita a gba a zɔ kwu zɔ kpɔ. A zɔ tee <<Ayimo.>> Akwɛyi kɛlɛlɛ okuru e tɛyi.

28 Akwɛyi enzu umba Azhu o to Ɔzhizɔsi mo mbaa Okayafasi o kawa mu udaba uwu ogwomina uwu Oromu. Kwuye kwɔngu ba akwu kwoto bɛnɛ, kwuwo kwɔlɛ Azhu o fye mu udaba mo, moo o gyite lo wuluma sɛsɛ, kwuwongu ka lo ri kiya ingyirimo ingyi odumudumu uwu ikalama. 29 Akwɛyi Opayileti a wɔ kwudu e yo mbo kwuyo te, <<Kimbe ba onzu ele e wo bɔkɔ akwiyira?>>

30 O gba wu opwu tee, <<Akwiyi gba le ngbomo mo, ki ka ŋa wu mo.>>

31 Opayileti a zɔ tee, <<La lu to wu mo mafyi yi kaa la lu zɔ ombu wu mu ɛrama iya yi.>>

Umba Azhu o gba wu opwu tee, <<O shi kapa kaa la ki ngbɛ onzu ukpukpɛnyi ma mo.>> 32 Ɛlɛ i wo kaa iso iyi bɔkɔ Ɔzhizɔsi e so, kwuyengwu bɔkɔ a zɔ ewo iyi bɔkɔ uwu e be kpomo awu kaa li nyɔlɔma le.

33 Akwɛyi Opayileti a gba e fyemo iya wu mu udaba, a ya Ɔzhizɔsi ma akwɛyi e yo wu kwuyo te, <<Uŋɔ gba ŋɔ kwu ɔsu uwu Azhu lee?>>

34 Ɔzhizɔsi a gba wu opwu tee, <<Kwuyo kwɔlɛ kwu ngyi mba ŋa naa enzu umbafo gba o ba ŋa eza mi le ŋa?>> 35 Opayileti a gba wu opwu tee, <<Ŋɔ mate Imi mi kwu Ozhu re? Akwu enzu ŋɔ mbala ebwoshi umbakɔ gba o to ŋɔ o shi mi le. Kimbe bɔkɔ ŋɔ wo?>>

36 Ɔzhizɔsi a gba wu opwu te, <<Ɛsu mi akwiyi kwudu kwɔlɛ mo. Gba la kwiyi kwudu kwɔlɛ, wa mbwalu mi o bo kiri ewa kaa lo sa mi ma mu ewo iyi Azhu mbɔlɛ. Kekelele ba ɛsu mi akwiyi kwudu kwɔlɛ mo.>>

37 Akwɛyi Opayileti e yo wu tee, <<Inyete ŋɔ kwu ɔsu ŋa mo?>>

Ɔzhizɔsi a gba wu opwu a zɔ tee <<ongbulolo gba ŋɔ so le te Imi mi kwu ɔsu. Yese de, kwuwo kwɔlɛ gba o mba mi le, a gba akwu kwuwo kwɔlɛ gba mi bo mu kwudu kwɔlɛ le kaa mi zɔ izɔgɔ iyi ongbulolo. Onzu uwunawuna uwu bɔkɔ e yi mu kwuko ungwu ongbulolo ee shi alu mba mi.>>

38 Opayileti e yo wu kwuyo tee, <<Kimbe ba akwu ongbulolo?>> Akwɛyi a wɔ kwudu kpɔ a ka mɔgɔ uwu Azhu akwɛyi a za mba te, <<E ri ombu uwoyi ukpukpɛnyi te mo. 39 Lunyi ba lu yi ukwu uwu bɔkɔ mi koko mi lafya la onzu ukpɛnyi mi shi yi kaa la wɔ ma mu ugu ugyi kwuyengwu odumudumu uwu ikalama. Lu gyi te la mi lafya la <ɔsu uwu Azhu?>>

40 O wo ovyo iyɛkɔkɔ tee, <<Ayimo, akwu wu mo! Shi nzu Obarabasi!>> Obarabasi awu ba akwu u zɛ kpɔ.