1 Mu kwoto mu kwoto ɔnu uwu kwɔfyi ungwu kwonze, mu eyifumo, Omeri uwu a wɔ mu Omagadali a ka mbaa Ogariwu akwɛyi e du te o turu kwokyi mo-o mu kenzu unga ogariwu. 2 Akwɛyi a renya a ka mba Ɔsamɔ Opita mbala u vɔngɔ kiya uwu fo, uwu bɔkɔ Ɔzhizɔsi e pwu idɛnyi wu awu, a za wu te o to Ɔkwu ma mu ogariwu oo, kinzu ba ki yitu mɔgɔ uwu bɔkɔ oshi wu mo!>>

3 Akwɛyi Opita mbala u vɔngɔ kiya uwufo o fulomo o ka mba ogariwu. 4 Umba wepepo mba o yi mu enya irima, u vɔngɔ kiya uwufo awu ba e to keyi la Opita akwɛyi a ka mu ogariwu keyi. 5 E lemo akwɛyi e kpeyi mɛmi akwɛyi a ma okpayi uwu ɔlinɛ a ta mɛzhi mɔmɔ uwu ba e fyemo mɛmi mo. 6 Akwɛyi Ɔsamɔ Opita, uwu bɔkɔ e yi mu inyɔma mizhikembo, e bomo akwɛyi e fyemo mɛmi iyi ogariwu. A ma okpayi uwu ɔlinɛ mɔmɔ, 7 i kyo okpayi uwu bɔkɔ o tɛ Ɔzhizɔsi mu reshi. Okpayi awu e kwumo a ta ikikɔ la okpayi uwu ɔlinɛ. 8 Mu imbwama yi u vɔngɔ kiya uwu bɔkɔ e shi mo, uwu bɔkɔ a ka mu ogariwu keyi awu, uwu tete e fyemo mɛmi. A ma akwɛyi e kwu idu lu fulo. 9 (Umba ba o zɔngɔma yi ma mo kpɔ iyi bɔkɔ iso iyi Ukpo i so te Ɔzhizɔsi ee yimo mu kwuvɔ mɛga awu).

10 Akwɛyi Wavɔngɔkiya o gbama o ka ma mogba ,

11 Omeri ba a rima mu kwudu ungwu ogariwu mu oga ilomo. Tabɔkɔ e yi mu oga ilomo, e lemo kaa le yese mɛmi iyi ogariwu 12 akwɛyi a ma alɔgbulɔ umba Ukpo wepo laa ɛriga iruwu, o ŋɔma mba bɔkɔ o shi ukpɛzhi uwu Ɔzhizɔsi le, ukpɛnyi a ŋɔ mba reshi wu, akwɛyi uwufo ba a ŋɔ mba alɛ.

13 O yo wu kwuyo te, <<Okokpayi, kimbe ki wo bɔkɔ ŋɔ lo oga?>>

A zɔ te, <<O to Ɔkwu mi ma o ka wu ma-a,>> <<Imi ba mi yitu mba bɔkɔ o shi wu mo.>> 14 Tabɔkɔ e so tayi, akwɛyi e gele eyi akwɛyi a ma Ɔzhizɔsi te a rima mɔmɔ, uwu ba a zɔngɔma wu ma te akwu Ɔzhizɔsi mo.

15 Ɔzhizɔsi a za wu te, <<Ɛnɛ uwu kwogba,>> <<Kimbe ki wo bɔkɔ ŋɔ lo oga? Ŋɔ kagyi uwe?>>

A ma kyamate akwu onzu wu bɔ eyi mu utu uwu ogariwu ŋa akwɛyi a za wu te, <<Adakwogba, akwiyi gba uŋɔ gba ŋɔ to wu mo le de ba, zɔ mi mɔgɔ uwu ŋɔ shi wu, akwɛyi mi to wu mo.>>

16 Ɔzhizɔsi a ya wu ma te, <<Omeri!>>

E fulo biri e sele wu eyi akwɛyi a ta oga kpa mu kenzu unga Iburu te, <<Oraboni!>> (iyi bɔkɔ o lu yi te, <<U zɔ kiya.>>)

17 Ɔzhizɔsi a za wu te, <<Kwu pwa mi afyi mo, moo mi ka mba Ada mo bɛnɛ. So mba ɛmɛmbɛnɛ mi ka za mba te, <Mi gba mi sheyimo mba Ada mi mbala ete yi, mba Ukpo mi mbala Ukpo yi.> >>

18 Omeri uwu a wɔ mu Omagadali a ka mbaa wavɔvɔngɔ kiya laa eza ɛlɛ te: <<Imi mi ma Ɔkwu-a!>> Akwɛyi a ba mba eza i yi apula ɛlɛ lɛɛbi iyi bɔkɔ Ɔkwu e so wu.

19 Mu onoyo uwu ɔnu uwu kwɔfyi ungwu kwonze, kwuye ungwu Wavɔngɔkiya o kpala ɛlu, akwɛyi o koko riku mo kwuwongu o wiyi iyi Azhu, Ɔzhizɔsi e bo akwɛyi a rima mekeka mba akwɛyi a zɔ te, <<Idigbomo li yi mbala yi!>> 20 Mizhikembo iyi Ɔzhizɔsi e so ɛlɛ, akwɛyi a zɔ mba ewo wu mbala kamba wu. Wa vɔngɔ kiya o nyɔlɔma la ɔnyɛ tabɔkɔ o ma Ɔkwu.

21 Ɔzhizɔsi a gba a zɔ kpɔ te, <<Idigbomo li yi mbala yi! Kyamate bɔkɔ Ada a lɔ mi, ta yi gba mi ye yi mu ilɔma le.>> 22 Akwɛyi a fya mba ɛnyɔ a zɔ te, <<La lu na Kwundu uwu Ukpo. 23 Akwiyi gba lu gbala ingbomo iyi onzu uwunawuna lu kpa wu, o gba yi o kpa mba; akwiyi gba lu gba yi lu kpa mba mo, o gba yi o kpa mba mo.>>

24 Akwɛyi Otoma (iyi bɔkɔ o lu yi te apiri), onzu ukpɛnyi mekeka iyi wewo la wepo mbamba, e yi mbala Wavɔngɔkiya kwuye ungwu Ɔzhizɔsi e bo le mo. 25 Akwɛyi Wavɔngɔkiya umba bɔkɔ o shimo awu o za wu te <<Ki ma Ɔkwu a!>>

Uwu ba a za mba te, <<akwiyi gba mi ma kɛzɔ unga iba iyi bɔkɔ o bɔ wu yi mu kwuwo akwɛyi mi lo ɛfyi mi mɔgɔ uwu iba ɛnyi, kaa la mi lo ɛfyi mi mu kamba wu mo, Imi mi kwu idu lu fulo ma yi mo.>> 26 Mizhikembo iyi osati ukpɛnyi Wavɔngɔkiya o gba o ŋɔ mu ugu kpɔ, Otoma ba e yi mbala mba. Riku ba ri lomo, Ɔzhizɔsi e bo akwɛyi a rima mekeka mba akwɛyi a zɔ te, <<Idigbomo li yi mbala yi!>> 27 Akwɛyi Ɔzhizɔsi a za la Otoma tee, <<Lo ɛfyi ŋɔ munɛ; yese ewo mi. Nda kwuwo ŋɔ shaa ka lo ngwu mu kamba mi. Lafya la kambu irimo ka kwu idu lu fulo.>> 28 Akwɛyi Otoma a za wu tee, <<Ɔkwu mi mbala Ukpo mi!>> 29 Akwɛyi Ɔzhizɔsi a za la Otoma te, <<Kwuwongwu ŋɔ ma mi-a le, gba ŋɔ kwu idu lu fulo le? Ɔnyɛ akwu uwu enzu umba bɔkɔ o ma mi mo ba o kwu idu lu fulo.>>

30 Ɔzhizɔsi e wo apula amɛ gyɔɔ meyi iyi Wavɔngɔkiya wu, iyi bɔkɔ o ka yi ma mu kwokpo kwɔlɛ mo. 31 Ɛlɛ ba o ka yi ma ka la lu kwu idu lu fulo te Ɔzhizɔsi akwu Okrasi, Umɛ uwu Ukpo, akwiyi gba lu kwu idu lu fulo ma wu lu yi kwunyɔ.