1 Mizhikembo iyi Ɔzhizɔsi a mbwa iso ɛlɛ isomo, e yese moshi akwɛyi a zɔ tee: <<Ada mi, kwuye kwu bo-o. Shi Umɛ ŋɔ inzumbɛku, kaa Umɛ ŋɔ ba le shi ŋɔ inzumbɛku tete. 2 Moo ŋɔ shi wu idomo meka iyi enzu lɛɛbi kaa le shi enzu lɛɛbi umba bɔkɔ ŋɔ shi wu awu kwunyɔ ungwɔkpɔ. 3 Kwunyɔ ungwɔkpɔ kwɔlɛ: akwu kaa lo yitu ŋɔ te, uŋɔ kɛɛkyi gba ŋɔ kwu Ukpo ongbulolo le, mbala Ɔzhizɔsi Okrasi, uwu bɔkɔ ŋɔ lɔ. 4 Mi bo la inzumbɛku mu kwudu kwɔlɛ i zɛ meka iyi ɛduma iyi bɔkɔ ŋɔ shi mi te kaa la mi wo. 5 Kekelele, Ada, shi mi inzumbɛku midu ŋɔ mbala inzumbɛku iyi bɔkɔ mi yi yi mbala ŋa keyi ngba mu iyemo iyi kwudu kwɔlɛ awu.

6 <<Mi ra ŋa mi zɔ umba bɔkɔ ŋɔ ra mba ŋɔ shi mi mu kwudu kwɔlɛ le. O kwu umba ŋa; ŋɔ shi mi mbo akwɛyi umba ba o lo iso ŋɔ mo. 7 Kekelele o yitu te apula lɛɛbi iyi bɔkɔ ŋɔ shi mi i wɔ munyi ŋɔ. 8 Moo mi shi mbo rɛnu ingyi bɔkɔ ŋɔ shi mi akwɛyi o na ngyi ma. O yitu yi marimari te mi wɔ munyi ŋɔ, akwɛyi o na yi ma te uŋɔ gba ŋɔ lɔ mi ma le iyesheshi. 9 Mii lɛ Ukpo kwuwo mbo. Imi mi yi mu Ukpo ilɛma kwuwongu enzu umba kwudu kwɔlɛ mo, Imi mii lɛ kwuwongu enzu umba bɔkɔ ŋɔ shi mi mbo le, moo o kwu umba ŋa. 10 I yi bɔkɔ mi yi yi lɛɛbi akwu iyaŋa, iyi bɔkɔ ŋɔ yi yi lɛɛbi ba akwu iya mi. Akwɛyi inzumbɛku i bo munyi mi i zɛ meka mba. 11 Mi yi mu kwudu kwɔlɛ fo, umba ba o yi mu kwudu kwɔlɛ bɛnɛ, Imi mi yi mu inyɔma munyi ŋɔ. Ada Ɔkɛrikɛri, gbo mbo mo meka iyi ekpasu iyi ɛnyi ŋɔ ɛnyi iyi bɔkɔ ŋɔ shi mi kwuwongu kaa lo kwu wakpɛnyi kyamate bɔkɔ uŋɔ mbala mi ki kwu wakpɛnyi awu. 12 Kwuye ungwu bɔkɔ mi yi mbala mba bɛnɛ, Mi gbo mbo mo, mi gba mi sa mba ma mu ɛnyi iyi bɔkɔ ŋɔ shi mi awu. Onzu ukpukpɛnyi mba te e tomo mo, uwu bɔkɔ o ka te e tomo awu kɛɛkyi kaa kwokpo ungwu Ukpo lakwu nyɔlɔma . 13 <<Mi yi mu inyɔma munyi ŋɔ kekelele-e, Imi ba mi so apula ɛlɛ kwuyengwu bɔkɔ mi yi mu kwudu kwɔlɛ bɛnɛ, kwuwongu ka lo yi inyɔlɔma iyi ɔnyɛ mi meka mba. 14 Mi shi mbo rɛnu ŋɔ akwɛyi kwudu kwɔlɛ ba kwu towo mbo mo, moo umba o kwu umba kwudu kwɔlɛ fo, kyamate bɔkɔ Imi mi kwu uwu kwudu kwɔlɛ mo awu. 15 Mi lɛ te ka wa mba ma mu kwudu kwɔlɛ mo, uŋɔ ba gbo mbo mo mba Onzu uwoyi awu. 16 O kwu umba kwudu kwɔlɛ mo, kyamate Imi mi kwu uwu kwudu kwɔlɛ mo awu. 17 Wulu mba ma mu ongbulolo; iso ŋɔ akwu ongbulolo uwu iso ŋɔ izɔma. 18 Tabɔkɔ ŋɔ lɔ mi ma mi bo mu kwudu kwɔlɛ awu, mi lɔ mba ma kaa lo so mu kwudu kwɔlɛ tete. 19 Akwu kwuwo mbo gba mi wulu ɛnwu mi ma le, kaa umba tete lo wuluma shɛ.

20 <<Ukpo ilɛma mi akwu kwuwo mbo kɛɛkyi mo. Mi lɛ Ukpo kwuwongu enzu umba bɔkɔ o kwu idu lu fulo ma mi i zɛ mu ilɔ iyesheshi mba. 21 Mi lɛ Ukpo te lɛɛbi mba o kwu wakpɛnyi. Ada, kyamate bɔkɔ uŋɔ ŋɔ yi meka mi, Imi ba mi yi meka ŋa awu, umba tete lo yi meka nzu kaa kwudu kwɔlɛ lakwu kwu idu lu fulo te uŋɔ ŋɔ lɔ mi ma. 22 Mi shi mbo inzumbɛku iyi bɔkɔ ŋɔ shi mi awu, kaa lo kwu wakpɛnyi kyamate bɔkɔ uŋɔ mbala mi ki kwu wakpɛnyi awu: 23 Imi mi yi ma ŋa, uŋɔ ba ŋɔ yi ma mi. Kwuwongwu kaa lo kwu wakpɛnyi kaa kwudu kwɔlɛ lakwu yitu te ŋɔ lɔ mi ma akwɛyi mi pwu idɛnyi mba kyamate bɔkɔ ŋɔ pwu idɛnyi mi tayi.

24 <<Ada, imi gyi te enzu umba bɔkɔ ŋɔ shi mi mbo kaa lo yi mbala mi mba bɔkɔ Mi yi, ka lo ma inzumbɛku mi, inzumbɛku iyi bɔkɔ ŋɔ shi mi kwuwongu ŋɔ pwu idɛnyi mi keyi kaa wo kwudu kwɔlɛ awu. 25 <<Ada mi Ototo! Enzu umba kwudu kwɔlɛ o yitu ŋɔ mo, tetete imi mi yitu ŋɔ, umba ba o yitu te uŋɔ gba ŋɔ lɔ mi le. 26 Mi zɔ ŋɔ ma la enzu-o, mi koko mi zɔ ŋɔ ma kaa idɛnyi iyi bɔkɔ ŋɔ yi yi kwuwo mi awu li yi ma mba kaa Imi mafyi mi la mi yi mamba.>>