1 Ɔzhizɔsi a za mba tee, << Mi so yi apula ɛlɛ kwuwongu ka la lu gba kembo mo. 2 Moo o ra yi ma mu udaba uwu ɛlu ikpalama uwu Azhu; kwuye kwu yi mu inyɔma ungwu bɔkɔ onzu uwunawuna uwu bɔkɔ a ngbɛ yi ma e to tee e yi mu ɛduma iwomo laa Ukpo. 3 Oo wo apula ɛnyi kwuwongu o yitu iyi Ada naa Imi mo.

4 Mi so yi apula ɛlɛ, kwuwongu gba kwuye kwɔngu kwu bo ba o wo ɛlɛ, lunyi la lu lolo te mi so yi ɛlɛ. Mi so yi apula ɛlɛ kwuyengwu kwonze mo kwuwongu Imi mi yi mbala yi bɛnɛ.

5 Kekelele mi sheyimo mba onzu uwu a lɔ mi ma, ɔbulɛ ŋa onzu ukpukpɛnyi yi te e yo mi mba mi sheyimo mo. 6 Kwuwongwu mi so yi apula ɛlɛ le, akwɛyi lu nyɔlɔma la ubugyi. 7 Imi ba mi so yi ongbulolo: Akwu kwuwo yi gba mi sheyimo le. Moo mi kama mo, U mbwama awu a nyɔ mo; gba ba mi kama, mi lɔ wu akwɛyi a nyɔ munyi yi. 8 Kwuye ungwu bɔkɔ U mbwama awu e bo, a zɔ enzu umba kwudu kwɔlɛ ingbomo mbo mbala ototo mbala ombu izɔma uwu Ukpo: 9 meka iyi ingbomo mbo, kwuwongu o kwu idu lu fulo mami mo; 10 meka iyi ototo, kwuwongu Imi mi sheyimo mba Ada, mbaa bɔkɔ lu ma mi fo; 11 meka iyi ombu izɔma, kwuwongu utokeyi uwu kwudu kwɔlɛ o to ombu o ri wu-o. 12 <<Imi mi yi apula gyɔɔ i yi mi so yi, lunyi ba lu do yi irima kekele le mo. 13 Kwuye ungwu Kwundu uwu ongbulolo ba e bo, uwu a zɔ yi ongbulolo meka iyi Ukpo, e to yi keyi meka iyi ongbulolo lɛɛbi. Uwu e siso iyi afyi wu mo; e siso iyi bɔkɔ a pwa mbala iyi bɔkɔ i bi wo. 14 Ee shi mi inzumbɛku, kwuwongu e to iso iyi bɔkɔ mi so akwɛyi e so yi. 15 I yi bɔkɔ akwiyi Ada lɛɛbi akwu iya mi. Ɛlɛ gba i shi imi mi zɔ te Kwundu e to meka iyi kiya ingyi bɔkɔ akwu ingya mi akwɛyi a zɔ yi ngyi le.

16 Ɔzhizɔsi a za mba tee, <<Kwuye bwɛ lu ma mi fo, akwɛyi kwuye bwɛ lu gba lu ma mi.>>

17 Wambwalu wu umbafo o le mu esu kwuyo iyomo tee, <<Kimbe ba akwu iluma iyi iso iyi bɔkɔ a zɔ tee, <Kwuye kwu shi bwɛ luu ma mi fo, akwɛyi kwuye bwɛ lu gba lu ma mi,> <Kwuwongwu Imi mi sheyimo mba Ada> 18 O le mu eyo iyomo te, <<Kimbe ba akwu iluma iyi <kwuye bwɛ>? Ki zɔngɔma iso iyi bɔkɔ e yi mu isomo le ma mo.>>

19 Ɔzhizɔsi a ma te o gyi te lo yo kwuyo meka iyi ɛlɛ, akwɛyi a za mba te, <<Lu yi mu esu eyo iyomo iyi iluma iyi iso iyi Imi mi zɔ te, <Kwuye kwu shi bwɛ luu ma mi fo, akwɛyi kwuye bwɛ lu ma mi?> Ɛlɛ gba lu yi mu esu iyomo le? 20 Mi so yi ongbulolo, lu lo oga, lu wo obobyi, enzu umba kwudu kwɔlɛ ba ɔ mwɔnyɛ. Lu wo ubugyi, ubugyi awu ba aa vindɔ ɔnyɛ. 21 kwuyengwu oko e yi mu kwomba iwomo, a ma wɔnu mu kwuye kwɔngu; kwuyengwu bɔkɔ a mba umɛ ma ba a kala kuleyi la wɔnu umbwu a ma kwuwongu ɔnyɛ uwu umɛ uwu bɔkɔ a mba mu kwudu kwɔlɛ. 22 Tatayi gba i yi le munyi yi: kekelele akwu kwuyengwu ubugyi yi, Imi ba mi ma yi kpɔ akwɛyi lu mwɔnyɛ, onzu ukpukpɛnyi te ba a na yi ɔnyɛ awu ma mo. 23 Ɔnuwu bɔkɔ kwɔfyi kwɔngu ku bo, lu yo kwuyo ungwu kiya kikpikpɛnyi te fo. Mi so yi ongbulolo: Ada mi ee shi yi kiya ingyinangyina ingyi bɔkɔ lu nda mu ɛnyi mi. 24 Kekelele te lu du nda kiya ingyinangyina mu ɛnyi mi-aa mo. La lu nda akwɛyi luu na, akwɛyi lu mwɔnyɛ gyɔɔ.

25 <<Imi mi ye yi mu iso isomo mu aba, kwuye kwu yi mu inyɔma bɔkɔ mi so yi iso mu aba fo, Imi ba mi so yi iso kyoriri meka iyi Ada. 26 Mu kwɔfyi kwɔngu luu nda Ukpo meka iyi ɛnyi mi. Imi mi zɔ te mii nda Ada kwoya kwuwo yi mo, 27 moo Ada mafyi wu e pwu idɛnyi yi kwuwongu lu pwu idɛnyi mi, akwɛyi lu kwu idu lu fulo te mi wɔ mba Ukpo. 28 Mi wɔ mba Ada akwɛyi mi bo mu kwudu kwɔlɛ; kekelele mi ŋi lafya la kwudu kwɔlɛ akwɛyi mi gba mi sheye mba Ada.>>

29 Akwɛyi wa mbwalu wu o za wu tee, <<Kekelele gba ŋɔ yi mu iso isomo kyoriri ŋa le, ba akwu mu aba mo. 30 Kekelele ki yitu o te ŋɔ yitu iyi apula lɛɛbi; uŋɔ ŋɔ kagyi onzu ukpukpɛnyi te kaa le yo ŋɔ eyo mo. Ɛlɛ i shi nzu ki kwu idu ki fulo te ŋɔ wɔ mbaa Ukpo.>>

31 Akwɛyi Ɔzhizɔsi a gba mba opwu tee, <<Lu kwu idu fulo kekelele-e re? 32 Kwuye ba kwu yi mu inyɔma, ba kwu bo-o, lu kpashaa, onzonzu e re mogba wu akwɛyi ɔ lu mi afyima kɛɛkyi mi. Tetete mi yi kɛɛkyi mi mo, moo Ada mi e yi mbala mi.

33 <<Mi so yi apula ɛlɛ, kaa meka mi luu yi idigbomo. Mu kwudu kwɔlɛ lu ma inyashi. Lunyi ba la lu yi idu! Mi bi kwudu kwɔlɛ ma-a.>>