1 Ɔzhizɔsi ba a ka mu lɔwa ungwu Olifu 2 Mu eyifumo a gba e bo mu okpulo uwu ɔtɛpu, enzu lɛɛbi o kpala ɛlu munyi wu, akwɛyi a ŋɔma ba e le mbo mu kiya i zɔma. 3 Wa zɔ ɛrama iyi Omosisi mbala Afarisi o yi okokpayi ɛnyi ma mu kaya itomo akwɛyi o bo wu. O shi wu a rima mu keyi, 4 akwɛyi o za la Ɔzhizɔsi tee, <<U zɔ kiya, o yi oko ele mo mu kaya itomo. 5 Omosisi a ta nzu okpa mu ɛrama tee, mbɔlɛ te lo kpa mba ekyi. Kekelele ŋɔ zɔ te? 6 O yo wu kwuyo kwɔlɛ kaa lo kpa wu kwoda kaa lo yi wu mo. Ɔzhizɔsi ba e lemo akwɛyi a rala ɛfyi wu a ka ɛzu mɛzhi. 7 Tabɔkɔ o le wo mu eyo i yomo, e yimo fa akwɛyi a za mba tee, <<Onzu uwu bɔkɔ e yi ingbomo mo, la kpa wu kwokyi keyi.>> 8 Akwɛyi e lemo a ka ɛzu mɛzhi kpɔ.

9 Tabɔkɔ o pwa ɛlɛ o fulomo kɛnyi kɛnyi ina mu onzu uwakɔ keyi, nzhii ba i shi Ɔzhizɔsi mbala oko awu kɛɛkyi a rima mɔmɔ. 10 Ɔzhizɔsi e yimo fa a rima akwɛyi e yo wu kwuyo tee, << Okokpayi, o yi muna? Onzu uwu bɔkɔ a ngbɛ ŋɔ ombu uwu o yi meka mba mo re?>>

11 Oko ele a gba opwu tee, <<Ada, ɔnzɛnzɛnyi te mo. Ɔzhizɔsi a zɔ tee. <<Imi tete mi ngbɛ ŋɔ ombu uwoyi mo.>> <<Sheyimo iyaŋa ki ngbomo fo.>>

12 Kwuye ungu bɔkɔ Ɔzhizɔsi a gba e siso mbala enzu, a zɔ tee, <<Imi gba mi kwu ɛbɛ iyi kwudu le. Onzu uwunawuna uwu bɔkɔ a mbwalu mi a zɛma mu ipu mo, ba ee yi ɛbɛ iyi kwunyɔ.>>

13 Afarisi o za wu tee, <<Uŋɔ ŋɔɔ zɔ izɔgɔ la ɛŋɔ le; izɔgɔ ŋɔ akwu ongbulolo mo.>>

14 Ɔzhizɔsi a zɔ tee, <<Gba mi zɔ izɔgɔ la ɛmi lala, izɔgɔ mi akwu ongbulolo, moo mi yi mbaa mi wɔ ba mi yi mba mi sheyimo. Lunyi ba lu yi mba mi wɔ mo ba lu yi mba mi sheyimo mo. 15 Lu ra la amasa iyi onzu gba lu zɔ ombu le; Imi ba mi zɔ ombu uwu onzu uwunawuna mo. 16 Gba ba mi zɔ ombu lala, mi zɔ ongbulolo, moo mi yi kɛɛkyi mi mo. Mi yi mbala Ada, uwu bɔkɔ a lɔ mi ma le. 17 O ka yi ma mu ɛrama yi tee, izɔgɔ iyi enzu wepo akwu ongbulolo. 18 Imi mi zɔ izɔgɔ laa ɛmi; Ada mi uwu bɔkɔ a lɔ mi ma le, akwu uzɔgɔ mi uwufo.>>

19 Akwɛyi o yo wu kwuyo tee, <<Ada ŋa e yi muna?>>

Ɔzhizɔsi a gba mba opwu tee, <<Lu yitu mi naa Ada mi mo,>> <<Gba la lu yitu mi, lubu yitu iyi Ada mi tete.>> 20 Ɔzhizɔsi e so iso ɛlɛ kwuye ungu bɔkɔ e yi mu kiya izɔma mu ɔtɛpu kɛlɛ mba bɔkɔ o ta rɛshi awu. Ɔnzɛnzɛnyi te ba e yu wu mo mo, kwuwongu kwuye wu kwu du bo mo.

21 Ɔzhizɔsi a gba a za mba kpɔ tee, <<Imi mi sheyimo, ba luu kagyi mi ba lu kpomo mu ingbomo yi. Mbaa mi sheyimo le, lu do te lu nyɔ mɔmɔ mo.>>

22 Ɛlɛ i shi Azhu o yo kwuyo tee,<<A ngbɛ ɛwu ma re? Bɔkɔ e so tee, <<Mbaa bɔkɔ mi sheyimo le, lu do te lu nyɔ mɔmɔ mo le>?>>

23 Ɔzhizɔsi ba za mba tee, <<Lu kwu umba ɛzhi munɛ; Imi ba mi wɔ moshi. Lu kwu umba kwudu kwɔlɛ; imi ba mi kwu uwu kwudu kwɔlɛ mo. 24 Mi za yi te lu kpomo mu ingbomo yi; gba lu fulo idu tee Imi gba mi ŋɔ le mo, lu kpomo yi kego.>>

25 O yo kwuyo tee, <<Uŋɔ Ŋɔ kwu uwe?>> Ɔzhizɔsi a za mba tee, <<Tabɔkɔ mi so yi mu iyomo awu te gba mi yi le.>> 26 Mi yi apula gyɔɔ iyi bɔkɔ mii ra yi mi ngbɛ yi ombu uwoyi. Ada uwu bɔkɔ a lɔ mi ma le ba akwu ongbulolo, ba iyi bɔkɔ mi pwa munyi wu gba mi so kwudu kwɔlɛ le.>>

27 O zɔngɔma yi ma tee, iso iyi Ada gba Ɔzhizɔsi e ye mbo mu isomo le mo. 28 Akwɛyi Ɔzhizɔsi a za mba tee, <<Kwuye ungwu bɔkɔ lu yi Umɛ uwu Onzu mo faa, akwɛyi lu yitu tee Imi gba mi ŋɔ le ba mi wo ingyi mi ma bi mo, kyamate Ada a zɔ mi awu gba mii wo le. 29 Ada uwu bɔkɔ a lɔ mi ma le e yi mbala mi; a lu mi afyima kɛɛkyi mo, moo mi koko mi wo iyi bɔkɔ uwu a gyi.>> 30 Tabɔkɔ e yi mu iso ɛlɛ isomo awu, enzu gyɔɔ umba bɔkɔ o pwa iso ɛlɛ o fulo idu ma wu.

31 Ɔzhizɔsi a za la umba bɔkɔ o fulo idu ma wu tee, <<Akwiyi gba lu ra la ɛzɔ mi, de ba lu kwu Wavɔngɔkiya mi kego. 32 Akwɛyi lu yitu iyi ongbulolo, ongbulolo awu ba aa wa yi ma.>>

33 O gba wu opwu tee, <<Kinzu ki kwu eye umba Aburamu ba ki di gbo rinye la ɔnzɛnzɛnyi dɛɛ mo. I wo te bɔkɔ ŋɔ zɔ te, kii wɔma mu rinye le?>>

34 Ɔzhizɔsi a gba mba opwu tee, <<Mi so yi ongbulolo, onzu uwunawuna uwu bɔkɔ e koko ee ngbomo akwu unye uwu ingbomo. 35 Unye e yi kizɛ ingyi i ŋɔma ngbɛɛ mu kwogba mo, umɛ ba akwu uwu kwogba iyi ɔkpɔɔ. 36 Akwiyi gba umɛ a wa yi ma, de ba lu wɔma kego. 37 Mi yitu te lu kwu eye umba Aburamu. Ɔbulɛ ŋa lu gyi te la lu ngbɛ mi ma, kwuwongu lu towo ɛzɔ mi ma. 38 Imi mi so iyi bɔkɔ mi ma mbaa Ada mi, lunyi ba lu wo iyi bɔkɔ lu pwa mbaa ete yi.>>

39 O gba opwu tee,<<Aburamu gba akwu ete nzu le.>>

<<Ɔzhizɔsi a gba opwu tee, <<Gba la lu kwu ɛmɛ mba Aburamu.>> ba lu bu wo iyi bɔkɔ Aburamu ewo awu. 40 Kekelele lu gyi te la lu ngbɛ mi ma, iyi bɔkɔ mi so yi le ba akwu ongbulolo uwu bɔkɔ mi pwa mbaa Ukpo. Aburamu ba e wo ɛlɛ te mo. 41 Kiya ingyi ete yi e koko wo gba lu yi mu i womo le.>>

O gba opwu tee, <<Kinzu ki kwu ɛmɛ umba kaya mo.>> <<Ukpo kɛɛkyi gba akwu ete nzu le.>>

42 Ɔzhizɔsi a gba mba opwu tee, <<Ukpo gba lakwu ete yi, lu bu pwu idɛnyi mi, moo mi wɔ mba ada gba mi ŋɔ le. Imi ba mi bo la ɛmi mo; uwu gba a lɔ mi le. 43 Kimbe ki shi bɔkɔ lu zɔngɔma iso mi ma mo le? Kwuwongu bɔkɔ lu nyama te la lu ngbɛ alu mu iso mi mo le. 44 Lu kwu ɛmɛ umba ete yi onzu uwoyi, gba lu gyi te la lu wo ɛduma iyi ete yi a gyi le. Uwu akwu u ngbɛ onzu ngbaa mu iyemo, e yi ongbulolo mo, kwuwongu ongbulolo e yi ma wu mo. kwuye ungu bɔkɔ a mulo, ɛduma wu gba e yi mu iwomo le, moo akwu u mulo ngbaa mu iyemo. 45 Imi ba kwuwongu bɔkɔ mi so yi ongbulolo le, gba lu nyama la mi mo le! 46 Uwe meka yi bɔkɔ e do te aa zɔ tee mi yi ingbomo? Akwiyi bɔkɔ mi so yi ongbulolo le, kimbe ki shi bɔkɔ lu kwu idu lu fulo ma mi mo? 47 Onzu uwu bɔkɔ akwu uwu Ukpo a pwa iso iyi bɔkɔ Ukpo e so. Lunyi kwu umba Ukpo mo gba lu pwa iyi Ukpo mo le.>>

48 Azhu o gba Ɔzhizɔsi opwu tee,<<Ki so kya lo bɔkɔ ki zɔ tee ŋɔ kwu onzu uwu Osamariya ba ŋɔ yi eyombeyi le.>> 49 Ɔzhizɔsi a gba mba opwu tee, Imi mi yi iyo uwoyi mo, Mi lo Ada mi ma lunyi ba lu lo mi mo mo. 50 Imi mi gyi inzumbɛku laa ɛmi mo, onzu uwu bɔkɔ a gya mi yi e yɔmɔ, uwu gba ba e to mi ombu le. 51 Mi so yi ongbulolo, onzu uwunauwuna uwu bɔkɔ a ra la iso mi aa ma lukwu gbee mo.>>

52 Azhu o zɔ tee, <<kekelele gba ki yitu tee ŋɔ yi eyombeyi le! Aburamu e kpomo la Anukenzu o kpomo uŋɔ ba ŋɔ zɔ tee, onzu uwu bɔkɔ a na iso mi e kpomo mo. 53 Uŋɔ ŋɔ ka ete nzu Aburamu ma re? Uwu loo, la Anukenzu loo o kpomo. Uŋɔ ŋɔ ma ɛŋɔ tee ŋɔ kwu uwe?>>

54 Ɔzhizɔsi a gba mba opwu tee, <<Akwiyi gba mi shi ɛmi inzumbɛku, inzumbɛku mi ɛnyi akwu kiya mo. Ada mi, uwu bɔkɔ lu ya wu tee Ukpo yi awu, uwu gba e shi mi inzumbɛku le. 55 Lunyi lala lu yitu wu mo, Imi mi yitu wu. Gba mi zɔ te mi yitu wu mo, mi bi kwu u mulo kyamate lunyi te, Mi yitu wu ba mii mbwalu iso wu. 56 Ete yi Aburamu a mu ɔnyɛ kaa la ma kwɔfyi ungu ibomo mi; a mangwu akwɛyi a mu ɔnyɛ.>>

57 Azhu o za wu tee, <<Uŋɔ ŋɔ ba lɔri uwɛkpɛlɔ mo,>> <<Gba ŋɔ ma Aburamu oo le!>>

58 Ɔzhizɔsi a gba mba opwu tee, ongbulolo gba mi so yi le <<Mi yɔmɔ keyi dɛɛ, gba o mba Aburamu le,>> 59 Akwɛyi o kwu ekyi kaa lo kpa wu, Ɔzhizɔsi ba e nvyemo akwɛyi e wirima e shi ɔtɛpu.