1 Ɔnuwu kwɔfyi ungwu kwonze mu orondo mu kwoto mu kwoto, eko mbamba o kwu apula iyi umbwɔ ferere iyi bɔkɔ o nɔngɔ awu o ka mu ogariwu. 2 Akwɛyi o du tee o fya kwoki kwɔngu ma mu kenzu unga ogariwu awu, 3 akwɛyi o fyemo mɛmi; ɛnwu iyi Ɔkwu Ɔzhizɔsi ba o ma yi mo. 4 Tabɔkɔ o ri mɔmɔ laa kenzu iyama iyi kiya ngyɛlɛ, akwɛyi mu kwotota o ma enzu wepo umba ekpayi mba i lemo puratata o ri kɛlɛɛ mbala mba. 5 Ekokpayi mbamba o wiyi gyɔɔ akwɛyi o lo reshi mɛzhi, akwɛyi enzu mbamba o yo mbo tee, <<Kimbe ki shi bɔkɔ lu gagyi onzu ureyi mbaa ɛkpɛzhi? 6 E yi munɛ mo; e yi mo-o. La lu lolo iso iyi bɔkɔ e so yi kwuyengwu bɔkɔ e e degbo mu Ogalili awu tee: 7 <Mega Umɛ uwu Onzu o ra wu o shi enzu umba ingbomo, akwɛyi o kpawu iba, akwɛyi ɔnuwu kwɔfyi ungwɔla a gba laa iyimo.>>> 8 Akwɛyi eko mbamba o lolo iso iyi bɔkɔ Ɔzhizɔsi e so mbo.

9 Kwuye ungwu bɔkɔ eko mbamba o gbama mbaa Ogariwu, o so Wavɔngɔkiya wewo la ukpɛnyi mbala enzu umbafo, apula iyi i wo lɛɛbi. 10 Akwu Omeri Omagadali, mbala Ozhuwana, mbala Omeri anyi wu Ozhemisi mbala enzu umbafo umba o yi mbala mba gba o so wa zɛ ilɔ iso ɛlɛ lɛɛbi le. 11 Wa zɛ ilɔ mbamba ba o to tee iso iyi eko mbamba akwu iso iyumbwa, akwɛyi o nyama la yi mo. 12 Opita ba e yimo kpara a rɛnya a ka mu ogariwu awu; e lemo, e kpeyi akwɛyi a ma okpayi uwu ɔlinɛ awu tee o shiwu mɛmba uwidɔ. Akwɛyi a gba a kama mogba iyawu laa kenzu iyama iyi kiya ingyi ki wo le.

13 Mu kwɔfyi kwɔngu pwa enzu wepo wa mbwalu Ɔzhizɔsi o yi mu luzɛ o sheyi mu kwuse ungwu o ya ngwu tee ɛmawɔsu, ungwu indama ngwu mbala Ɔzhɛrusalɛ i yi mate emelu erewo te, 14 o za laa ɛza ibama mbala esu mekeka iyi apula iyi i wo lɛɛbi. 15 Tabɔkɔ o yi mu ɛza iyi apula ɛlɛ ibama mbala esu, kporo ba Ɔzhizɔsi mafyi wu e turu a gba mba akwɛyi a zɛ mbala mba; 16 umba o mawu, ɔbulɛ o zɔngɔma wu ma mo. 17 Akwɛyi Ɔzhizɔsi e yo mbo tee, <<Kimbe ba lu yi mu ɛza ngyi ibama mbala esu tabɔkɔ lu yi mu luzɛ le?>>

Akwɛyi o rima la eyi ishishimo. 18 Onzu ukpɛnyi mba, uwu o ya wu tee Okilopasi awu, e yo wu kwuyo tee, <<Akwu uŋɔ kɛɛkyi gba ŋɔ kwu ugboga mu Ɔzhɛrusalɛ bɔkɔ ŋɔ yitu iyi bɔkɔ i wo mɔmɔ afyi ɛlɛ mo le?>>

19 Akwɛyi e yo mbo kwuyo tee, <<Apula iyina ŋa?>>

O gba wu opwu tee, <<Iso iyi Ɔzhizɔsi uwu Ɔnazarɛti,>> <<Onzu ele akwu anukenzu, iso wu mbala iwomo wu i yi ekpasu mu idu iyi Ukpo mbala enzu lɛɛbi. 20 Ebwoshi umbakɔ mbala watokeyi nzu o to wu o shi kaa lo ngbɛ wu ombu uwu lukwu akwɛyi o bɔ wu iba mu kwuwɛyi ungwu lukwu. 21 Kinzu ba ki fulo eyi tee uwu gba a sa Izirɛ ma le! Ɔnɛnɛ akwu kwɔfyi ungwola bɔkɔ kiya ngyɛlɛ ki wo. 22 Eko nzu umbafo o shi nzu kenzu iyama; o ka mu Ogariwu mu eyifumo, 23 ba o ma ukpɛzhi wu mo. O gbama o za nzu tee, umba o ma alɔgbulɔ umba Ukpo mu ɛbɛ umba ɔ za mba tee e yi la reyi. 24 Umbafo mu uzhi nzu o ka mu Ogariwu mɔmɔ, umba tete o du ogariwu uwidɔ kyamate eko mbamba o so.>>

25 Akwɛyi Ɔzhizɔsi a za mba tee, <<Lunyi efyo mbɔlɛ, kimbe wo ba lu kirɛnwu iyi ikwidu fulo mu apula iyinaiyina iyi bɔkɔ anukenzu o so le! 26 Akwu mega ka Omezaya la ma wɔnu dɛ kaa le fye mu inzumbɛku wu le mo o?>> 27 I yo yoo mu ekpo iyi Omosisi mbala ɛzu iyi anukenzu lɛɛbi, Ɔzhizɔsi so mbo lɛɛbi kiya ingyi bɔkɔ o so mu kwokpo ungwu Iso iyi Ukpo mu reshi wu.

28 Tabɔkɔ o bo kɛlɛɛ mbala kwuse ungwu bɔkɔ o sheyimo, akwɛyi Ɔzhizɔsi e wo kyamate a ŋa pikama tayi; 29 umba ba o kpa wu ɛshɛku tee, <<Ŋɔma mbala nzu te; moo ɔnu u bo-o, utu ba u ndafo.>> Akwɛyi e fyemo a ŋɔ mbala mba. 30 Kwuye ungwu a ŋɔma kaa le ri kiya mbala mba, e to kwoburedi, a gbɛlɛ Ukpo ɛnyi, a mu ngwu ma akwɛyi e shi mbo. 31 Akwɛyi eyi mbo i wuma akwɛyi o zɔngɔma wu ma, uwu ba e to ndii e shi mbo. 32 O yo esu kwuyo tee, <<Idu nzu i wo mate ɔyi u ye yi mu ipwumo kwuyengwu e yi mu iso isomo mbala nzu mu ɔgwuzɛ bɔkɔ a ya nzu iso iyi Ukpo mo awu mo?>>

33 Akwɛyi o yimo kpara o gba o ka mu Ɔzhɛrusalɛ akwɛyi o du Wavɔngɔkiya wewo la ukpɛnyi mbala enzu umba o yi mbala mba awu, o kpala esu elu mɔmɔ 34 akwɛyi o zɔ tee, <<Te gba i yi le kego! Ɔkwu e yimo-o! Uwu ba a wɔ nduu la Ɔsamɔ!>>

35 Akwɛyi enzu wepo mbamba o so kiya ingyi ki wo mu ɔgwuzɛ, mbala ewo iyi bɔkɔ umba ɔ zɔngɔma Ɔkwu ma kwuyengwu a mu kwoburedi ma.

36 Tabɔkɔ enzu wepo mbamba o ye mbo mu iso ɛnyi isomo, akwɛyi kporo ba o gele Ɔkwu mafyi wu a rima mekeka mba akwɛyi a za mba tee, <<Oloto lu yi mbala yi.>>

37 Iyi i wo mbo mo gyɔɔ akwɛyi le mu ipwulama, moo o ma kyamate tee umba o ma kwundu. 38 Uwu ba e yo mbo tee, <<Kimbe ki shi bɔkɔ lu wiyi te? Kwuwongwu kwuwongumbe bɔkɔ lu byi egbo epepo te? 39 La lu yese ewo mbala alɛ mi akwɛyi lu zɔngɔma tee akwu Imi mafyi mi gba mi ŋɔ le. La lu pwu mi afyi kaa la lu ma, moo kwundu kwu yi ɛnwu mbala ekwu, ta lu ma mi yi yi ele mo.>>

40 Tabɔkɔ e so ɛlɛ, akwɛyi a zɔ mba ewo wu mbala alɛ wu. 41 Tetete o nyama mo kwuwongu ɔnyɛ mbala izele; akwɛyi e yo mbo tee, << Lu yi kiya ingyirimo munɛ?>> 42 Akwɛyi o to umu uwu bɔkɔ o pwuwumo o shi wu, 43 akwɛyi a na e kwu meyi mbo.

44 Akwɛyi a za mba tee, <<Kiya ingyi mi za yi kwuyengwu mi yi mbala yi awu gba ki ŋɔ le: apula iyinayina iyi bɔkɔ o ka mu reshi mi mu Ɛrama iyi Omosisi mbala ɛzu iyi anukenzu mbala kwokpo ungwu amu awu, akwu mega i nyɔlɔma.>>

45 Akwɛyi a wu mba egbo ma kaa la zɔngɔma iso iyi Ukpo ma, 46 akwɛyi a za mba tee, <<Ɛlɛ gba o ka o shi mɛzhi le tee: Omezaya, mega a ma wɔnu akwɛyi e yi mo mu kuvɔ ɔnuwu kwɔfyi ungwɔla, 47 akwɛyi o ra laa ɛnyi wu o tanu iyi i kwu ira ɔsu mbala i gba laa ingbomo i kpa mu kwudu kwɔlɛ lɛɛbi, i yo yoo mu Ɔzhɛrusalɛ. 48 Lunyi lu kwu azɔgɔ umba apula ɛlɛ. 49 Imi mafyi mi mi lɔ yi laa kiya ingyi bɔkɔ Ada mi e so e shi mɛzhi. Lunyi ba la lu ŋɔ mu kwuse kwɔlɛ kaa ekpasu li wɔ moshi li fye ma yi dɛ.>>

50 Akwɛyi a wa mba kwudu ungwu kwuse nzhii ba o ka mu kwuse ungwu Ɔbɛtani. Akwɛyi e yi ewo wu ma mu oshi akwɛyi e shi mbo esheshi. 51 Tabɔkɔ e ye mbo mu esheshi ishimo, akwɛyi a lu mba afyima akwɛyi o to wu o ka mu oshi. 52 O gbo wu ɔya akwɛyi o gba o kama iyamba mu Ɔzhɛrusalɛ laa ɔnyɛ uwakwuu. 53 Kwɔfyi kwɔfyi o mu Ɔtɛpu mbaa Ukpo ɛnyigbɛlɛma.