1 Ɔnu uwufo, kwuye ungwu bɔkɔ Ɔzhizɔsi e yi mu enzu ɛzu izɔma mu Ɔtɛpu mbala anu itama iyi Iso Iyesheshi ɛlɛ, akwɛyi ebwoshi umbakɔ mbala wazɔ Ɛrama iyi Omosisi, i kyo mbala enzu umbakɔ umba Azhu, o bo munyi wu, 2 akwɛyi o za wu tee, <<So nzu, ekpasu iyina bɔkɔ ŋɔ yi yi bɔkɔ ŋɔ wo apula ɛlɛ le? <<Uwe bɔkɔ e shi ŋɔ ekpasu ɛlɛ?>>

3 Ɔzhizɔsi a gba mba opwu tee, <<Imi tete mi yo yi kwuyo. La lu so mi, 4 ekpasu iyi obatisima iwomo iyi Ɔzhɔnu wɔ mbaa Ukpo nana mbaa enzu ŋa?>>

5 Akwɛyi o le mu amasa ikama mbala esu, akwɛyi ɔ zɔ tee <<Inyete ki so wu te? Gba ki zɔ tee, <I wɔ mbaa Ukpo,> e yo nzu tee, <Kimbe ki wo ba lu nyama laa iso iyi Ɔzhɔnu mo?> 6 Ishi gba ki zɔ tee, <Iwɔ mbaa enzu,> enzu mbɔlɛ lɛɛbi o kpa nzu ekyi kwuwongu o yitu mamari tee Ɔzhɔnu akwu anukenzu uwu Ukpo.>> 7 <<Kwuwo kwɔlɛ, o gba wu opwu tee, <<Ki yitu mbaa bɔkɔ a wɔ mo.>>

8 Akwɛyi Ɔzhizɔsi a za mba tee, <<Imi tete mi so yi mu ekpasu iyi na bɔkɔ mi wo apula ɛlɛ mo.>>

9 Akwɛyi Ɔzhizɔsi a ba mba kwoba kwɔlɛ tee: <<Onzu uwufo a gba utu uwu ovanyi akwɛyi a ra wu e shi asukpo umbafo akwɛyi a kama iyawu mu luzɛ shaaru, e to kwuye mɔmɔ gyɔɔ. 10 Kwuye ungwu ewiri ilɔma kwu bo akwɛyi a lɔ umɛgba wu tee le so mbaa asukpo mbamba kaa lo shi wu ogbo wu uwu imuma iyi utu. Asukpo mbamba ba o kpa wu ɛmu akwɛyi o rawu ma laa ewo iyidɔ. 11 Akwɛyi ɔkwu uwu utu ɔnwu a gba a lɔ umɛgba uwufo kpɔ; uwu tete asukpo mbamba o bi wu ɛmu o kpa wu ari, akwɛyi o rawu ma laa ewo iyidɔ. 12 Akwɛyi a gba a lɔ umɛgba uwɔla kpɔ; uwu tete o nɛ wu kanɛ akwɛyi o to wu o ta wu mu kwudu. 13 <<Kwuye ungwu bɔkɔ ɔkwu uwu utu ɔnwu a pwa ɛlɛ, akwɛyi a za la ɛnwu tee, <Inyete mi wo te? Mi lɔ umɛ mi uwu mi pwu idɛnyi wu; mi yitu tee o lowumo!> 14 Tabɔkɔ asukpo mbamba o ma wu, akwɛyi o so esu tee, <Ele gba akwu umɛ uwu ɔkwu uwu utu le. <La ki ngbɛ wu ma kaa kiya ingyi ogu wu lakwu ingyanzu!> 15 Akwɛyi o wawu kwudu mu utu akwɛyi o ngbɛ wu ma.

Akwɛyi Ɔzhizɔsi e yo tee, <<Mu imama yi, ɔkwu uwu utu ɔnwu e wo asukpo mbamba te? 16 <<A nyɔ akwɛyi a ngbɛ asukpo mbamba ma akwɛyi a ralaa utu ɔnwu e shi asukpo umbafo.>>

Kwuye ungwu enzu o pwa tayi, akwɛyi ɔ zɔ tee, <<Ukpo le shi la ki ma ɛlɛ mo!>>

17 Ɔzhizɔsi a bɔ mba eyi shii akwɛyi e yo kwuyo tee, <<Kimbe bɔkɔ akwu iluma iyi iso iyi Ukpo ɛlɛ?

<<Tee kwokyi ungwu wa mbo ugu o towo ngwu mo tee akwu ungwu umbwa.

gba vindɔ kwokyi ungwu kwu ra la ugu le.> 18 Onzu uwunawuna uwu bɔkɔ a kpa mu kwokyi kwɔngu a muma kpɛrɛkpɛrɛ; gba kwokyi kwɔngu kwu ta mu onzu, kwu nya wu ma tɛrɛtɛrɛ mate umbu tayi.>>

19 Wazɔ Ɛrama iyi Omosisi mbala ebwoshi umbakɔ o kagyi ɔgwuzɛ kaa lo yi wu mo mu kwotota kwɔngu, kwuwongu o yitu tee kwuwo mbo gba a ba kwoba kwɔngu le; umba ba o wiyi iyi enzu. 20 Akwɛyi o le wu mu igbomo, o shi enzu umbafo kaa lo bɔ wu eyi, enzu mbamba o wo kwuwoyo kyamate enzu umba kwuyi tayi. O lo mba kaa lo kpa kwoda laa Ɔzhizɔsi mu eyo iyomo kaa lo ra wu lo shi enzu umba idomo mbala Ogwomina uwu Oromu. 21 Enzu umba bɔkɔ o lɔ mba le o yo Ɔzhizɔsi kwuyo tee: <<Omale, ki yitu tee kiya ingyi ŋɔ so mbala ingyi ŋɔ zɔ akwu ongbulolo. Uŋɔ ŋɔ yi kusɛ mo, uŋɔ ŋɔ zɔ ɔgwuzɛ uwu Ukpo mu ongbulolo. 22 So nzu, Ɛrama nzu i nyima nana i nyama ŋa tee la ki shi Oba uwɛzhi laa Ɔsu uwu Oromu?>>

23 Ɔzhizɔsi ba e yitu iyi kwukyoro mbo akwɛyi a za mba tee, 24 <<La lu zɔ mi kwoso ungwu esiliva kwukpɛnyi. Ureyi mbala ɛnyi iyi uwe bi kpa mangwu?>>

Ɔ gba opwu tee, <<Akwiyi Ɔsu uwu Oromu>>

25 <<Akwɛyi Ɔzhizɔsi a za mba tee, <<La lu shi Ɔsu uwu Oromu ingyi akwu ingyi Ɔsu uwu Oromu, la lu shi Ukpo ingyi akwu ingyi Ukpo.>>

26 Mɔmɔ leyi iyi enzu gedegede o fawa laa iyimo mu iso wu. Opwu i gbama wu i shi mbo kenzu iyama akwɛyi o kpala kenzu mbo mo.

27 Akwɛyi Asadusi umbafo, umba bɔkɔ o zɔ tee iyimo mu kwuvɔ i yi mo, o bo mbaa Ɔzhizɔsi la kwuyo. 28 O yo wu tee <<Omale, Omosisi a ka nzu ɛrama tee, <Gba umanyi uwu onzu e kpomo e shi oko, oko awu ba e yi ɛmɛ mo, umanyi wu e to oko awu ma mɛga kaa la mba ɛmɛ la umanyi wu uwu bɔkɔ e kpomo awu. 29 Ɛmɛnɛ werewo o yi munɛ. Uwakɔ e to oko akwɛyi e kpomo, oko ele ba a mba wu umɛ dɛ mo. 30 Akwɛyi umɛnɛ uwopo e to oko awu, 31 umɛnɛ uwɔla tete, tayi gba i wo le nzhii umba ɛmɛnɛ werewo mbamba o kpomo, ba o shi ɛmɛ mbala oko awu mo. 32 Mu imbwama yi oko ele e kpomo tete. 33 Kekelele ɔnu uwu kwɔfyi ungwu iyimo mu kwuvɔ, oko ele akwu oko uwu uwe mekeka mba? Moo lɛɛbi mba o towu akwu oko mbo.>>

34 Ɔzhizɔsi a gba mba opwu tee, <<Enzu umba kwudu kwɔlɛ o to eko, o ya o anu, 35 enzu umba bɔkɔ Ukpo a nya mba ma tee lo yimo mu kwuvɔ akwɛyi o kyo mu ɔyi uwu bu nyɔ awu o to oko mo ba o ya anu mo. 36 O yi mate alɔgbulɔ umba Ukpo tayi ba o kpomo mo. O kwu ɛmɛ umbu Ukpo, kwuwongu o yimo mu kwuvɔ. 37 Omosisi lala a zɔ gedegede tee umba bɔkɔ o kpomo o yimo. Mu ɛza iyi ɛzhi ingbarara ipwumo, e siso meka iyi Ɔkwu tee, < uwu gba akwu Ukpo uwu Aburamu, Ukpo uwu Aziki, mbala Ukpo uwu Ɔzhɛkɔbu le.> 38 Uwu akwu Ukpo uwu enzu wareyi, moo akwu uwu ɛkpɛzhi mo, moo munyi wu enzu lɛɛbi o ye la reyi.>> 39 Wazɔ Ɛrɛma iyi Omosisi umbafo o gba wu opwu tee, <<uzɔ kiya ŋɔ gba opwu ɔnyɛ!>> 40 Akwɛyi onzu ɛnyɛnyi te e yo wu kwuyo fo.

41 Ɔzhizɔsi ba e yo mbo tee, <<I wo tee bɔkɔ o zɔ tee Omezaya akwu umɛ uwu Odevidi? 42 Moo Odevidi mafyi wu e so mu Kwokpo ungwu Amu tee,

<Ɔkwu a za laa Ɔkwu mi tee:

Ŋɔma munɛ mu kwuwo ungwungyi mi

43 kaa la mi ralaa agewa ŋa la mi wo mbo kagyi unga alɛ ifulomo ŋɔ dɛ.> 44 Odevidi a ya wu tee <Ɔkwu>; i wo te ba Ɔmɛzaya akwu umɛ Odevidi?>>

45 Tabɔkɔ enzu lɛɛbi o yi mu alu ingbɛma munyi wu, akwɛyi Ɔzhizɔsi a za laa Wavɔngɔkiya wu tee, 46 <<La lu gbɛndu mbala wazɔ Ɛrama, umba o gyi ifulama mu ɛriga iyɛkwu, o gyi tee enzu lo gbɛlɛ mba ɛnyi mu rishi; o gyi kizɛ ingyi iŋɔma ingyeshi mu idaba iyi ɛlu ikpala ma, mbala riyi ingyi inzumbɛku mbaa odumudumu iwomo; 47 o wo eko wakpanuma ma iri mu agba mba, akwɛyi o to kwuye gbulɔlɔ mu Ukpo ilɛma kaa lo ma mba! Enzu mbɔlɛ wɔnu imama mba u ka le lɛɛbi!>>