1 Ɔzhizɔsi a za laa Wavɔngɔkiya wu tee: <<Onzu uwu kwuwo uwufo e yi onzu uwu bɔkɔ a bɔ eyi mu kiya wu. Onzu uwu kwuwo ele a ŋɔ te akwɛyi o kawu laa iso tee onzu u bɔ eyi mu kiya wu awu e yi mu kiya wu ɛdɔ ingbɛma, 2 akwɛyi a ya wu ma e yo wu tee, <Kimbe ba mi yi mu ipwama mu reshi ŋɔ te? So mi ewo iyi ŋɔ yi mu iwomo mbala kiya mi, moo ŋɔ kwu u bɔ eyi mu kiya mi fo.> 3 Akwɛyi u bɔ eyi mu kiya ele a za la ɛnwu tee, <Mi wo tee kekelele bɔkɔ adakwogba mi a ŋa ramima mu ɛduma mi le? Mi yi ekpasu iyi egba mo, Imi ba mi wo lovya undu kwoya indama. 4 Mi yitu kiya ingyi mi wo! Akwɛyi gba o ra mi ma mu ɛduma munɛ, mi yi ɛmɛza umba bɔkɔ o na mi mu agba mba.> 5 Akwɛyi a ya enzu ma lɛɛbi umba bɔkɔ o kwo laa kwokpa ungwu ada kwogba awu. E yo onzu uwu kwonze tee, <Ŋɔ kwo laa kwokpa ungwu ada kwogba mi ungwu ɛvɔ?> 6 <<A gba wu opwu tee, <Egalo oderi iyi anyi umba ɔlifu.> Akwɛyi u bɔ eyi mu kiya ele a za wu tee, <Na kwupu, ŋɔma, ka te uwo ɛkpɛlɔ.> 7 <Akwɛyi e yo onzu uwopo tee, < Uŋɔ kɔ kwokpa ŋa akwu ɛvɔ?> A gba wu opwu tee, <<Eburuma odubu ukpɛnyi iyi owiti.>> <<U bɔ eyi mu kiya ele a za wu tee, <Na kwupu, ka tee ederi eranda.>>> 8 <<Akwɛyi adakwogba a pwɔ Umɛgba u rɔzawu ele ma kwuwongu kwuwoyo wu; Moo enzu umba kwudu kwɔlɛ o yi kwuwoyɔ iwomo iyi luzɛ izɛma mbala ɛmanyi mba umba kwudu kwɔlɛ o ka enzu umba ɛbɛ ma.>> 9 Akwɛyi Ɔzhizɔsi e so wu mu isomo tee, <<Mi so yi ele, la lu fya ɛmɛza lɛnwu yi mu kiya ingyi kwuwo ingyi kwudu kwɔlɛ, kwuwongu kaa gba ki bomo, o na ŋa mu kwogba ungwɔkpɔ.

10 <<Onzu uwunawuna uwu bɔkɔ o nyama la wu mu apula iyɛri, o nyama la wu mu apula iyɛku tete; onzu uwunawuna uwu bɔkɔ e wo ongbulolo mu apula iyɛri mo, e wo ongbulolo mu apula iyɛku mo tete. 11 Gba o nyama la ŋa mu i bɔ eyi mu kiya ingyi kwuwo ingyi kwudu kwɔlɛ mo, uwe ba a ra la kiya ingyi kwuwo ingyi ongbulolo e lo ŋɔ mɔ wu? 12 Tetee, gba lu bɔ eyi ɔnyɛnyɛ mu apula iyi onzu mo, uwe ba e shi yi apula iyi afyi yi?

13 <<Onzu ukpɛnyi akwu umɛgba uwu ada umba kwogba wepo mo; moo e towo ukpɛnyi ma akwɛyi ba a gyi uwufo, naa e lo ukpɛnyi mo akwɛyi ba a zhi uwufo mo. Ŋɔ do te ŋɔ gbo ɔya la Ukpo mbala eduwo kwuye kwunyi mo.>>

14 Kwuye ungwu Afarisi o pwa ɛlɛ lɛɛbi, akwɛyi o wo Ɔzhizɔsi kwuwongu umba o kpoluku undu eduwo. 15 Ɔzhizɔsi a za mba tee, <Lunyi gba lu zɔ enzu tee lu kwu watoto le; Ukpo ba e yitu iyi egbo yi. Apula iyi bɔkɔ enzu o to yi laa igba, akwu kiya kinyinyi mo umba Ukpo.

16 <<Ɛrɛma iyi Omosisi mbala ɛzɔ iyi anukenzu umbu Ukpo gba enzu o mbwalu le nzhii ba kwuyengwu Ɔzhɔnu u wo obatisima e bo. Ngbaa tayi awu gba iso iyeshi iyi irɛsu iyi Ukpo o ye yi mu anu itama le, onzu uwunawuna ba e yi mu i bɔ kyikyi te le fye mo. 17 Itomo iyi oshi mbala ɛzhi i ka fulele laa kwulakyɛ ungwu Ɛrama iyi Omosisi tee li tomo. 18 <<Onzu uwunawuna uwu a ra laa oko wu ma akwɛyi e to oko awa, a yama; onzu uwu e to oko uwu o ra wu ma, a yama tete.

19 <<O yi Onzu uwufo mekyi uwu e yi kwuwo uwu e lo eriga iyi i ka abwa le ba e yi mu ɔnyɛ kwɔfyi kwɔfyi. 20 Ɔyirɛwa uwufo o ya wu tee Ɔlazarɔ, uwu bɔkɔ ɛnwu lɛɛbi akwu ashinakpa. O koko bo wu o shi mu kenzugwu unga kwogba ungwu onzu uwu kwuwo ele kaa la nda kwoya, 21 uwu ba a gyikpɔ tee le ri kiya ingyi irimo ingyi onzu uwu kwuwo ele e yi mu irimo akwɛyi ki fumo mɛzhi. Izu lala o bo o lɛ ashinakpa wu ma. 22 <<Kwuye kwu bo ungwu bɔkɔ Ɔlazarɔ e kpomo akwɛyi alɔgbulɔ umba Ukpo o to wu mo o ka wu kaa la ŋɔma mbala Aburamu mu oshi. Onzu uwu kwuwo ele e kpomo tete akwɛyi o pwuwumo. 23 E yi mu kwogba ungwu ɔyi mbaa bɔkɔ e yi mu inyashi imama iyɛku, e yi eyefaa akwɛyi a ma Aburamu shaaru mbala Ɔlazarɔ. 24 Akwɛyi a yama, <Ada Aburamu! Ma inyashi mi kaa lɔ Ɔlazarɔ kaa le lo ɛfyi wu mu embyi kaa la la mi mu ɔtunɛ le gbo mi ugbɛmbyi mo, moo mi yi mu inyashi imama mu ɔyi ɔlɛ!> 25 <<Aburamu ba a za wu tee, <Umɛ mi, lolo mu kwuyengwu bɔkɔ ŋɔ ye la kwunyɔ, ŋɔ yi kiya ingyinangyina ingyesheshi, Ɔlazarɔ ba a ma inyashi. Kekelele ɛnwu i ye wu mu igbomo munɛ-ɛ uŋɔ ba ŋɔ yi mu inyashi imama. 26 Akwu inyi kɛɛkyi mo, kwuvɔ ungwɔkwu kwu yi mekeka iyi kinzu mbala yi, kaa onzu uwu bɔkɔ e yi munɛ uwu a gyi tee la sama le so munyi i wo wu mo mo, naa onzu e do mo tee a wo munyi yi a sama a nyɔ munyi nzu.>

27 Akwɛyi onzu uwu kwuwo ele a zɔ tee, <Ada mi kpa ŋa ɛshɛku, ba lɔ Ɔlazarɔ kaa le so mu kwogba ungwu ada mi, 28 moo mi yi ɛmɛnɛ anzɔnu walɔ mɔmɔ. Le so le so mbo tee lo gboshoshi, kaa umba tete lo bo mu kizɛ ngyi wɔnu ngyɛlɛ mo.> 29 <<Aburamu ba a gba opwu tee, <Ɛmɛnɛ ŋɔ o yi ɛrama iyi Omosisi mbala ɛzɔ iyi anukenzu umba Ukpo; umba lo shi alu mu iso mbo.> 30 Onzu uwu kwuwo ele a zɔ tee, <<<I yi tayi mo, ada Aburamu! Gba onzu uwufo a wɔ mu aleku a ka munyi mbo, o ta mɛzhi.>

31 Akwɛyi Aburamu a za wu tee, <<Gba enzu mbɔlɛ o pwa iso iyi Omosisi mbala anukenzu umba Ukpo mo, onzu uwu e kpomo ba a gba laa iyimo lala o nyama laa iso wu mo.>>>