1 Ɔnu uwufo wana Oba uwɛzhi guruguru mbala enzu umba ingbomo o bo mbaa Ɔzhizɔsi kaa lo pwa ɛzu izɔma wu, 2 akwɛyi Afarisi mbala wazɔ Ɛrama iyi Omosisi o le mu anu izɔma tee, <<Onzu ele a na enzu umba ingbomo ba a gba e ri kiya mbala mba bi!>> 3 Akwɛyi Ɔzhizɔsi a ba mba kwoba kwɔlɛ tee: 4 <<Gba onzu ukpɛnyi yi e yi ilɔ o deri akwɛyi ukpenyi mba e tomo. Onzu ele a lafya laa uwekperendo laa werendo mu ɔsɛ akwɛyi a ba gagyi ukpɛnyi ele nzhii ba e fye wu mo dɛ. 5 Gba e fye wu mo, laa ɔnyɛ e fulo wu mu esuwo wu 6 akwɛyi e re wu mogba. A ya ɛmɛza wu ma mbala wanɔkpawu akwɛyi a za mba tee, <La lu bo kaa lu mwɔnyɛ mbala mi moo ilɔ mi uwu bɔkɔ e tomo awu mi fye wu mo-o!> 7 Tatayi, mi so yi, ɔnyɛ uwakwu uwu e yi moshi kwuwongu onzu ɛnyi uwu ingbomo uwu bɔkɔ a ta mɛzhi a ka uwu enzu uwekperendo laa werendo umba ototo umba bɔkɔ o yi ugɔ uwu itamɛzhi mo.

8 <<Nana mate okokpayi e yi esuwo iyi esiliva akwɛyi kwukpɛnyi kwu ta wu ma--oko ele e wo tee? A ta kambu ɔyi, a vyɛ kwogba wu ma akwɛyi e yesemo munamuna nzhii ba e fye ngwu mo. 9 Gba e fye ngwu mo, a ya emoko wu ma mbala wanɔkpa wu akwɛyi a zɔ tee, <La lu bo kaa lu mwɔnyɛ mbala mi moo kwosiliva kwukpɛnyi mi ungwu kwu tami ma le mi fye ngwu mo-o.> 10 Mi so yi ele, tee gba ii yi le, alɔgbulɔ umba Ukpo ɔ mwɔnyɛ kwuwongu onzu uwu ingbomo ɛnyi uwu a ta mɛzhi.>>

11 Ɔzhizɔsi a gba a zɔ tee, <<Onzu uwufo e yi ɛmɛ wepo. 12 Umɛ uwɛri awu a za laa eto wu tee, <Ada, shi mi ogbo uwami uwu apula ŋa kekelele.> Akwɛyi ete mbo a ka mba apula wu ma. 13 <Kwuye bwɛ akwɛyi umɛ uwɛri ele akwu apula ma lɛɛbi iyi bɔkɔ akwu iyawu, akwɛyi e to ɔgwuzɛ wu a ka mu kwuse ungwu indama. Mɔmɔ gba e tutu eduwo wu ma mu apula iyi umbwa iwomo le. 14 Tabɔkɔ a mbwa kiya ingyinangyina wu ingbɛma, akwɛyi lonzu ndɔkwu lu fye mu ɛzhi ɛnyi lɛɛbi, akwɛyi e yi kiya kinyinyi fo. 15 Akwɛyi a ka gagyi ɛduma mbaa onzu uwufo uwu kusɛ kwɔngu, uwu ba e shi wu ɛduma mu utu uwu erusu ifyemo. 16 A gyikpɔɔ tee le ri kiya ingyi bɔkɔ erusu o yi mu irimo awu, ba a fya onzu uwu e shi wu mo. 17 <<Kwuye ungwu bɔkɔ egbo wu i gbama, akwɛyi a za lɛnwu wu tee, <Ɛmɛgba lɛɛbi umba bɔkɔ o wo ɛduma la ada lala, o ri kiya o shimo, Imi ba mi yi munɛ lonzu lu ngbɛ mi ma! 18 Mi yimo mi gba mi re mbaa adami akwɛyi mii za wu tee, <<Ada, mi ngbo Ukpo mo, mi ngbo ŋɔ mo tete. 19 Mi fate lo ya mi tee umɛ ŋɔ fo; wo mi mate onzu uwu ɛduma ŋa ukpɛnyi tayi.>>> 20 Akwɛyi e yimo a ka mbaa ete wu.

<<Tabɔkɔ ete wu a ma wu shaaru tee e yi mu inyɔma; akwɛyi inyashi wu i wo wu mo, a rɛnya a ma umɛ wu ele gbamu akwɛyi a kpa wu idu. 21 <<Akwɛyi umɛ ele a za la ete wu tee, <Ada, mi ngbo Ukpo mo, mi ngbo ŋɔ mo tete. Mi fa te lo ya mi tee umɛ ŋɔ fo.> 22 Ete wu ba a ya ɛmɛgba wu ma akwɛyi a za mba tee, <La lu gyakpɔ! La lu bo la origa uwu bɔkɔ e sheshi a ka le la lu lo wu. La lu lo wu karika mu ɛfyi wu mbala ekpoyata mu alɛ wu. 23 La lu bo la endo uwakwu la lu ngbɛ wu ma. La ki wo odumudumu la ki mwɔnyɛ. 24 Moo umɛ mi ele e kpomo, ba a gba la kwunyɔ; e tomo ba o gba o ma wu-o.> Akwɛyi o le mu odumudumu iwomo.

25 Kwuye kwɔngu umɛ uwakɔ ba e yi mu utu. Tabɔkɔ e bo kɛlɛ mbala kwogba, akwɛyi a pwa anu iyi anga mbala eko. 26 Akwɛyi a ya umɛgba ukpenyi ma akwɛyi e yo wu tee, <Kimbe ba ki yi mu iwomo munɛ?> 27 Akwɛyi umɛgba awu a gba wu opwu tee, <Umɛnɛ ŋɔ a gbama e bo mogba-a, ada ŋa ba a ngbɛ wu endo uwakwu kwuwongu umɛnɛ ŋɔ a gbama moloto mbala okpara uwɛmu.>

28 <<Umɛ uwakɔ ele e wo amba akwɛyi e towu ifyemo mogba; eto wu a wɔ kwudu akwɛyi a kpawu ɛshɛku tee le fyemo mogba. 29 Uwu ba a gba ete wu opwu tee, <Ada yese! Lɔri ndɔlɛ gyɔɔ undu mi ye ŋɔ mu ɛduma iwomo mate unye tayi ba mi ye ŋɔ mu ilomo. Ŋɔ shi mi mbe dɛ-ɛ? Ɔniyi te ŋɔ di shi mi umɛ uwɛmu te la mi ngbɛ ma kaa la mi mwɔnyɛ mbala ɛmɛza mi mo! 30 Umɛ ŋɔ ele uwu bɔkɔ a ka ngbɛ kiya ŋa ɛdɔ ma mbala wato kaya ba a gbama mogba, akwɛyi ŋɔ ngbɛ wu endo uwakwu!> 31 Ete wu ba a za wu tee, <Umɛ mi,> <uŋɔ ŋɔ yi mbala mi munɛ kwuyengwunanguna, kiya ingyinangyina bɔkɔ mi yi ngyi akwu ingyaŋa. 32 Ishoshi tee la ki mwɔnyɛ la ki yi ubwu uruwu, moo umɛnɛ ŋɔ ele e kpomo akwɛyi a gba lakwunyɔ; e tomo ba o gba o fye wu mo.>>>