1 Akwɛyi Ɔzhizɔsi a ba kwoba la Wavɔngɔkiya wu kaa la zɔ mba tee lo koko lo lɛ Ukpo, lo fɛwo mo. 2 A za mba tee: <<Mu kwuse ungufo, o yi u zɔ ombu uwu bɔkɔ a riyi iyi Ukpo mo ba e lo enzu ma mo. 3 Oko u kpɔnuma uwufo e yi mu kwuse kwɔngu tete, uwu bɔkɔ e koko a ka mbaa u zɔ ombu ele a za wu tee, <To mi ombu mo mbala ɔgɛwa mi!>

4 <<U zɔ ombu ele e to kwuye gbulɔlɔ a nyama mo. Akwɛyi a mbwa a za la ɛnwu tee, <Imi mi yitu tee mi riyi iyi Ukpo mo ba mi lo enzu ma mo, 5 tete kwuwongu bɔkɔ oko ukpɔnuma ele a lu mi afyima mo le, mi to wu ombu mo, moo ee shi ɛnwu i gbo mi mo kwuwongu i bɔ kwushi wu!>>>

6 Akwɛyi Ɔkwu a zɔ tee, <<La lu pwa iyi u zɔ ombu uwura ele a zɔ. 7 Ba Ukpo e to ombu mo la umba bɔkɔ a ŋa mba bɔkɔ o lo wu oga utu la ɔnu kaa la mbwamba mo? Ee towo mbo mo iyɔkpɔ re? 8 Imi mi so yi, efyefya gba e to mbo ombu mo le. Ishi, kwuyengwu Umɛ uwu Onzu a ba nyɔ awu, a fya wakwu idu lu fulo mu kwudu kwɔlɛ mee?>>

9 Ɔzhizɔsi a ba mba kwoba meka iyi enzu umbafo bɔkɔ o ma ɛmba tee umba akwu enzu umba ototo akwɛyi o zhi uwewe ma. 10 <<Ɔnu uwufo enzu wepo o ka mu Ɔtɛpu mbaa Ukpo ilɛma: Ukpɛnyi akwu Ofarisi, uwufo ba akwu u na Oba uwɛzhi. 11 Ofarisi ele e yimo a rima akwɛyi a lɛ Ukpo a zɔ tee, <<Ukpo mi gbɛlɛ ŋɔ ɛnyi kwuwongu mi yi mate enzu umbafo mo; mi yi ekweyi mo, mi wɛlɔ mo, mi wo ira mo, mi yama mo. Mi ngbede mi yi mate u na oba uwɛzhi ele mo. 12 Mi wo kenyo izhepo mu orondo ukpɛnyi kiya ingyi bɔkɔ mi fya lɛɛbi mi shi Ukpo ogbo ukpɛnyi mekeka iyi uwo.

13 Ishi u na Oba uwɛzhi awu ba a rima shaaru. A nyama tee e yi eyefaa e yese mu oshi mo, e lo reshi mɛzhi akwɛyi a zɔ tee, <Ukpo, ma inyashi mi, Imi mi kwu onzu uwu ingbomo!>

14 Akwɛyi Ɔzhizɔsi a zɔ tee, <<Mi gyite la mi so yi tee, u na oba uwɛzhi ele gba a ka mogba laa ɔpɛriri mu idu iyi Ukpo le, moo akwu Ofarisi awu mo. Moo onzu uwunawuna uwu a ra la ɛnwu e fulo kadu, o gba wu mɛzhi, uwu ba a gba la ɛnwu mu ɛzhi o fulo wu kadu.>>

15 Enzu umbafo o bo laa ɛmɛ mba mbaa Ɔzhizɔsi tee le fulo mbo ewo mu reshi. Tabɔkɔ Wavɔngɔkiya wu o ma ɛlɛ, akwɛyi o kpamba ɛyi, 16 Ɔzhizɔsi ba a ya ɛmɛshɛri mbɔlɛ ma tee lo bo munyi wu akwɛyi a zɔ tee, <<La lu lafya laa ɛmɛshɛri lo bo mbaa mi, la lu nyi mba ma mo, moo Irɛsu iyi Ukpo akwiyi mbɔlɛ tee. 17 Ongbulolo gba mi so yi ele! Onzu uwunawuna uwu bɔkɔ a na Irɛsu iyi Ukpo mate umɛshɛri a na mo, e fye ma yi gbee mo.>>

18 U to keyi uwu Azhu uwufo e yo Ɔzhizɔsi kwuyo tee, <<Uzɔ kiya uwu eshi, kimbe ba mii wo kaa la mi fya kwunyɔ ungwu ɔkpɔ ma ŋa?>>

19 Ɔzhizɔsi ba e yo wu tee, <<Kimbe ki shi ŋɔ ya mi tee onzu uwu eshi?>> <<Onzu uwu eshi e yi mo, Ukpo kɛɛkyi gba e shoshi le. 20 Ŋɔ yi ɛrama lo: I zɔ tee, <Ki yama mo, ki ngbɛ onzu mo, ki wu ɛlɔ mo, ki to izɔgɔ iyi angba mo, lomo la ada ŋa mbala Ɛnɛ ŋɔ.>>>

21 Onzu awu ba a za la Ɔzhizɔsi tee, <<Ɛlɛ lɛɛbi mi mbwalu yi-e ngbaa te mi kwu umɛshɛri le.>>

22 Tabɔkɔ Ɔzhizɔsi a pwa ɛlɛ, akwɛyi a za wu te, <<Kiya ingyi fo ki shimo kpɔ. Ya ingyinangyina ingyi bɔ ŋɔ yi ngyi kaa shi ayirewa eduwo ɛnyi, akwɛyi ŋɔ yi kiya ingyi kwuwo moshi; akwɛyi bo kaa mbwalu mi.>>

23 Tabɔkɔ onzu ele a pwa tayi, e wo ubwu ugyi gyɔɔ, kwuwongu akwu onzu uwu kwuwo gyɔɔ. 24 Tabɔkɔ Ɔzhizɔsi a mawu tee ubwu wu e fomo, akwɛyi a zɔ tee, <<I kɔma kaa onzu uwu e yi kwuwo le fye mu Irɛsu iyi Ukpo! 25 I ka fulele le kaa Onyakurumi le fyemo mu ɔtu uwu keyi, la ifyemo iyi onzu uwu e yi kwuwo mu Irɛsu iyi Ukpo.>>

26 Enzu umba bɔkɔ o pwa iso ɛlɛ, o yo wu tee, <<Ba uwe bɔkɔ e do tee a fya isama ma ngyɔ?>>

27 Ɔzhizɔsi a gba opwu tee, <<Kiya ingyi onzu e do ngyi iwomo mo, Ukpo e do ngyi iwomo.>>

28 Akwɛyi Opita a za wu tee, <<Yese! Ki lafya laa agba nzu ki mbwalu ŋɔ!>>

29 Akwɛyi Ɔzhizɔsi a za mba tee, <<Ee mi yitu.>> Ongbulolo gba mi so yi le tee, <<Onzu uwunawuna uwu a lafya la kwogba wu naa oko wu, naa ɛmanyi wu, naa ete wu mbala anyi wu, naa ɛmɛ wu kwuwongu Irɛsu iyi Ukpo 30 bɔkɔ a na rigbɛ gyɔɔ mu ɔyi ɔlɛ mbala kwunyɔ ungwɔkpɔ mu ɔyi uwu u bu nyɔ awu mo mo.>>

31 Ɔzhizɔsi e to Wavɔngɔkiya wu wewo la wepo a kamba mɛmba, akwɛyi a za mba tee, <<La lu pwa! Kekelele ki sheye mu Ɔzhɛrusalɛ mbaa bɔkɔ apula iyi anukenzu o ka meka iyi Umɛ uwu Onzu awu lɛɛbi i nyɔlɔma. 32 Oo ra wu o shi enzu umba akwu Azhu mo, o wo wu ɛnɛ, o kpa wu ari, akwɛyi o kpo wu ɔtɛ. 33 O kpawu ikpa akwɛyi o ngbɛ wu ma, ɔnuwu kwɔfyi ungwɔla ba a gba la iyimo la kwunyɔ.>> 34 Wa vɔngɔ kiya wu ba ɔ zɔngɔma ikpikpɛnyi iyi bɔkɔ e so mbo le mo. Iluma yi invye mbo mo, o zɔngɔma iyi bɔkɔ Ɔzhizɔsi e so mbo le mo.

35 Tabɔkɔ Ɔzhizɔsi a nda la Ozheriko fo, akwɛyi a ma upeyi tee a ŋɔ mu kenzu unga ɔgwuzɛ a nda kwɔya. 36 Tabɔkɔ a pwa tee riba ingyi enzu o yi mu ikakama, akwɛyi e yo kwuyo tee, <<Kimbe ki yi mu iwomo munɛ?>> 37 O za wu tee, <<Ɔzhizɔsi uwu Ɔnazarɛti gba e yi mu ikakama le.>>

38 Akwɛyi a ta opwu kpaa tee, <<Ɔzhizɔsi, Umɛ uwu Odevidi, ma inyashi mi!>>

39 Enzu umba bɔkɔ o to keyi o kpa wu ɛyi akwɛyi o za wu tee la kpala kenzu mo. Uwu ba a kpakpɛɛ mu opwu itarama tee, <<Umɛ uwu Odevidi ma inyashi mi!>>

40 Akwɛyi Ɔzhizɔsi a rima akwɛyi a za mba tee, lo kawu laa onzu ele. Tabɔkɔ e bo kɛlɛ, akwɛyi Ɔzhizɔsi e yo wu kwuyo tee, 41 <<Kimbe ba ŋɔ gyi tee la mi wo ŋɔ?>>

A gba opwu tee, <<Adakwogba, mi gyi tee la mi gba laa ɛbɛ imama.>>

42 Ɔzhizɔsi a za wu tee, <<Gba laa ɛbɛ imama! Ikwidufulo ŋɔ i bo ŋɔ ofya ma-a.>> 43 Mɔmɔɔmɔ onzu awu a ma ɛbɛ akwɛyi a mbwalu Ɔzhizɔsi laa Ukpo iduma. Enzu lɛɛbi umba bɔkɔ o ma ɛlɛ, umba tete o du Ukpo ma.