1 Mizhikembo iyi ɛlɛ Ɔkwu a ŋa enzu uwekperewo la wepo mbafo akwɛyi a lɔ mba ma wepo wepo tee lo to keyi la wu lo so mu ese iyɛku mbala iyɛri mbaa bɔkɔ uwu a gyi tee le so. 2 Ɔzhizɔsi a za mba tee, <<Ɛduma iyi ewiri ilɔma i yi gyɔɔ, enzu umba ɛduma ba o yi gyɔɔ mo. Kwuwo kwɔlɛ la lu nda ɔkwu uwu utu kaa la lɔ enzu umba ɛduma le fu mu utu wu. 3 La lu so! Imi mi lɔ yi ma kyamate ilɔ tayi meka iyi lɔngbɔga. 4 La lu to kwolamba naa kwongara naa ekpoyata mo; ba la lu ngbɛ kwuye gyɔɔ mu ɛnyi igbɛlɛma mu ɔgwuzɛ mo. 5 <<Kwɔgba ungwunanguna bɔkɔ lu fye, la lu ta ɔlɛ dɛ, la lu zɔ tee, << Oloto lu fye mu kwogba kwɔlɛ loo.> 6 Gba onzu uwu a gyi oloto e yi mu kwogba kwɔngu, ɛnyi igbɛlɛma yi iyi oloto li yi mbala wu; gba akwu tayi mo, ba ɛnyi igbɛlɛma yi iyi oloto li gba li du yi. 7 La lu ŋɔ mu kwogba kwɔngu kaa la lu ri, la lu wo kiya ingyinangyina bɔkɔ o shi yi, moo onzu uwu ɛduma e do rigbɛ wu ma. La lu kpa ɛvyɛ mu agba agba mo.

8 Gba lu fye mu kwuse ba o na yi ma, kiya ingyinangyina ingyi bɔkɔ o shi yi la lu ri, 9 enzu umba bɔkɔ o yi ofya mɔmɔ la lu bo mbu mo akwɛyi lu za mba tee, <Irɛsu iyi Ukpo i bo kɛlɛ mbala yi-e.> 10 Gba lu fye mu kwuse ba o na yi mo, la lu so mu ɛgwuzɛ iyi kwuse kwɔngu kaa la lu zɔ tee, 11 <Kwumburu ungwu kwuse yi ungwu kwu kpo mu alɛ nzu lala ki bulɔ ngwu ma ki kpo yi ngwu. Tetete la lu yitu tee Irɛsu iyi Ukpo i bo kɛlɛ mbala yi-e!> 12 Imi la mi so yi kpeke tee Ɔnu uwu Kwɔfyi ungwu Ombwu Izɔma Ukpo a ma inyashi iyi Ɔsɔdɔmu aa ka kwuse kwɔngu ma!

13 <<Gbetu ŋɔ, Okorazi! Gbetu ŋɔ tete Ɔbɛsayida! Gba ɛduma iyi kenzu iyama iyi bɔkɔ o wo ma ŋa le gba lo wo yi mu Otaya mbala Ɔsidɔ, enzu mɔmɔ lo bo ŋɔma, o kpo ashɔgiri mbala kwulɔ mu ɛnwu kaa li zɔ tee o kwu ira mba ɔsu ngba didiri ee! 14 Ɔnu uwu Ombwu Izɔma Ukpo a ma inyashi iyi Otaya mbala Ɔsidɔ a ka yi ma. 15 Uŋɔ kɔ Okapanawu? Ŋɔ mate o to ŋɔ o fulo moshi re? Ayi mo, o to ŋɔ ɔ ta mu aleku!

16 Ɔzhizɔsi a za laa Wavɔngɔkiya wu tee, <<Onzu uwunawuna uwu a pwa iso yi, iso mi gba a pwa le; onzu uwunawuna uwu bɔkɔ e towo yi mo, Imi gba e towo mi mo le; onzu uwunawuna uwu ba e towo mi mo, e towo onzu uwu bɔkɔ a lɔ mi ma le.>>

17 Enzu uwo ekperewo laa wepo mbamba o gbama laa ɔnyɛ uwakwuu. Akwɛyi ɔ zɔ tee, <<Ɔkwu, eyo umbeyi lala o ta nzu mɛzhi tabɔkɔ ki ya ɛnyi ŋɔ!>>

18 Ɔzhizɔsi a gba mba opwu tee, <<Mi ma onzu uwoyi tee a kalama moshi a tama kyamate imingɔma iyi kawu tayi.

19 La lu pwa! Mi shi yi idomo kaa la lu kpa ata mu akwu mbala ana kaa ekpasu iyi onzu uwoyi awu la lu shiri yi mo lɛɛbi; kiya kinyinyi tee ki wo yi mo. 20 Tetete la lu mwɔnyɛ kwuwongu ɛndu iyira i ta yi mɛzhi mo; la lu mwɔnyɛ kwuwongu o ka ɛnyi ma moshi.>>

21 Mu kwuye kwɔngu Kwundu uwu Ukpo e shi Ɔzhizɔsi a nyɔlɔma mbala ɔnyɛ akwɛyi a zɔ tee, <<Ada, Ɔkwu uwoshi mbala ɛzhi! Mi ngbede kwuwongu ŋɔ nvye apula ɛlɛ ma laa enzu umba amasa mbala wayitu, ba ŋɔ wu yi ma laa umba bɔkɔ o yi yitu mo. Ee, Ada, ɛlɛ i she ŋɔ woshi gba ŋɔ wo yi tayi le.

22 <<Ada mi e lo mi apula ɛlɛ lɛɛbi mɔwu-o. Onzu uwu e yitu Umɛ le e yi mo Ada kɛɛkyi gba e yitu le, onzu uwu ba e yitu Ada e yi mo Umɛ kɛɛkyi mbala enzu umba bɔkɔ Umɛ a ŋa tee laa zɔ wu ma laa mba.>> 23 Akwɛyi Ɔzhizɔsi e geleyi e yese Wavɔngɔkiya wu akwɛyi e so mbo wɛrɛrɛ tee, ɔnyɛ akwu uwayi lunyi umba bɔkɔ eyi yi i ma apula iyi ɛlɛ! 24 Mi gyi tee lami so yi tee anukenzu mbala asu riba riba o gyi tee lo ma kiya ingyi lu yi mu imama le ba o ma mo, o gyi tee lo pwa iyi lu yi mu ipwama le ba o pwa mo.>>

25 Kwuye kwunyi onzu uwufo uwu e yi iyitu iyi Ɛrama iyi Omosisi e yimo kaa la pwa Ɔzhizɔsi ma. E yo wu tee, <<Omale, mi wo tee bɔkɔ mi fya kwunyɔ ungwu ɔkpɔ ma?>>

26 Ɔzhizɔsi a gba wu opwu tee, <<Kimbe bɔkɔ o ka mu Ɛrama iyi Omosisi? Ŋɔ lunyi tee?>>

27 Onzu awu a gba wu opwu tee: Kwokpo ungwu Ukpo kwu zɔ tee, <<<Pwu idɛnyi iyi Ɔkwu Ukpo ŋɔ mu akɔ ŋɔ lɛɛbi mbala idu iyi anana ŋa lɛɛbi mbala ekpasu ŋɔ lɛɛbi mbala egbo ŋɔ lɛɛbi;> ka gba, <Pwu idɛnyi iyi onzu unukpaŋa ta ɛnwu ŋɔ tayi.>>>

28 Ɔzhizɔsi a za wu tee, <<Ŋɔ gba opwu mamari,>> so kaa wo tayi akwɛyi ŋɔ yi kwunyɔ.>>

29 Omale uwu Ɛrama iyi Omosisi awu ba a gyi tee laa zɔ tee uwu e yi ingbomo mo, akwɛyi e yo Ɔzhizɔsi tee, <<Uwe ba akwu unukpa mi?>>

30 Akwɛyi Ɔzhizɔsi a gba wu opwu tee: <<Onzu uwufo a wɔ mu Ɔzhɛrusalɛ e sheye mu Ozheriko akwɛyi e fye mɔwu uwu awɛlɔ, o lu wu ekpayi ma, o kpa wu ɛmwu akwɛyi o kama kyamba, o lu wu afyima mate ukpɛzhi tayi. 31 Obwoshi uwu Ukpo uwufo a zɛ mu ɔgwuzɛ ɔwu tete; akwɛyi tee bɔkɔ a ma onzu awu, akwɛyi a zɛ mɛmba a kama iya wu. 32 Tatayi gba onzu uwu ɛdɔ iyi Olevi tee bɔkɔ e bo mu riyi ngyɛngyi akwɛyi a ma onzu awu, a zɛ mɛmba a kama iya wu. 33 Onzu uwu Osamariya uwufo ba e yi mu luzɛ mu ɔgwuzɛ ɔwu tete akwɛyi e bo mbaa bɔkɔ onzu ele e yi, akwɛyi tabɔkɔ a ma wu, inyashi wu i wowu mo. 34 A ka munyi wu, a la wu anyi mbala epu mu efya wu akwɛyi a ma yi kukokpayi; akwɛyi e to onzu awu e fulo mu ɔzɛki uwawu, akwɛyi a ka wu mu riyoga akwɛyi e yese mbaa wu. 35 Mu eyi i lama a wa laa esepo epo iyi esiliva e shi onzu uwu bɔkɔ a bɔ eyi mu riyoga awu akwɛyi a za wu tee, <Yese mbaa wu, <kwuyengwu mi gbama, mi wa ŋa kwɔkpa ungwu bɔkɔ kwu kyomo ma.>

36 Imbwama yi, Ɔzhizɔsi e yo wu tee, <<Enzu wala mbɔlɛ uwu na bɔkɔ ŋɔ ma tee akwu unukpa uwu onzu uwu bɔkɔ e fye mu ewo iyi awɛlɔ mbɔlɛ?>> 37 Omale uwu Ɛrama iyi Omosisi ele a gba opwu tee, <<Onzu uwu a ma inyashi wu awu.>> Akwɛyi Ɔzhizɔsi a za wu tee, <<Uŋɔ tete so kaa wo tayi.>>

38 Tabɔkɔ Ɔzhizɔsi mbala Wavɔngɔkiya wu o yi mu luzɛ, akwɛyi o bo mu kwuse ungufo mbaa bɔkɔ okokpayi uwu o ya wu tee Omata awu a lɔ la wu tee le bo le gbo wu riyi oga. 39 E yi umɛnɛ okokpayi o ya wu tee Omeri, uwu a ŋɔma mu idu iyi Ɔzhizɔsi e shi alu mu iso iyi e so. 40 Omata ba e shi egbo wu mbaa kiya ingyirimo iwomo. Amba o wo wu mo akwɛyi e bo mbaa Ɔzhizɔsi akwɛyi e yo wu tee, <<Ɔkwu, ŋɔ fu eyi laa umɛnɛ mi a lu mi afyima ba mi yi mu ɛduma iwomo kɛɛkyɛkyi mi? Za wu kaa le bo la mbwa mi ma!>>

41 Ɔkwu a gba wu opwu tee, <<Omata, Omata! Ŋɔ wo idu gidigidi mu apula riba riba ŋɔ gama, 42 kiya kikpɛnyi gba o yi ugɔ ngyi le. Omeri ba a mulɛ ingyi bɔkɔ ri koshi, o do wu ngyi inama mo.>>