1 Ɔnu uwu kwɔfyi ungwu ɛnwu igbomo kwukpɛnyi, Ɔzhizɔsi a ka te e ri kiya mogba uwu u to keyi uwu Afarisi uwufo; enzu ba o yewu mu eyi ibɔma. 2 Onzu uwufo uwu bɔkɔ alɛ wu mbala ewo wu i nyɛma e bo mbaa Ɔzhizɔsi, 3 akwɛyi Ɔzhizɔsi e yo Afarisi mbala wa zɔ Ɛrama iyi Omosisi kwuyo tee, <<Ɛrama nzu i nyama tee lo bo onzu ofya ma ɔnu uwu kwɔfyi ungwu ɛnwu igbomo nana i nyima ŋa?>> 4 Enzu mbɔlɛ ba o gba wu opwu mo. Akwɛyi Ɔzhizɔsi e towu, e bo wu ofya ma akwɛyi a za wu tee lakwuluzɛ wu.

5 Akwɛyi Ɔzhizɔsi e yo mbo kwuyo tee, <<Gba onzu ukpenyi e yi umɛshɛri naa e yi ɔzɛki uwu bɔkɔ a ta mu ɔbwuga ɔnu kwɔfyi ungwu ɛnwu igbomo, e yimo kpara a wa wu ma mo?>> 6 Enzu mbamba ba o yi opwu uwu o gbawu mu kwuyo kwɔlɛ mo.

7 Tabɔkɔ Ɔzhizɔsi a ma tee agboga ɔ mulɛ riyi ingyi inzumbɛku, akwɛyi a ba mba kwoba kwɔlɛ tee: 8 <<Gba onzu a lɔ la ŋa tee bo mbaa odumudumu uwu oko itomo, ki to riyi ingyi iŋɔma ingyi inzumbɛku mo. Igboshimo onzu uwu bɔkɔ a ka ŋa inzumbɛku ma o lɔ la wu tete. 9 Gba akwu tayi, onzu uwu bɔkɔ a lɔ la yi awu a nyɔ akwɛyi a za ŋa tee, <Shi onzu ele kagyi ŋɔ.> Akwɛyi lovya lu wo ŋɔ mo, akwɛyi ŋɔ bi to kagyi unga kembo. 10 Gba ba ɔ lɔ la ŋa mbaa odumudumu, to kagyi unga kembo, kaa kwuyengwu bɔkɔ ɔkwu uwu odumudumu e bo, a za ŋa tee, <Umɛza mi, bo ka ŋɔma mu riyi ingyesheshi.> Akwɛyi agboga umba bɔkɔ o yi mɔmɔ o shi ŋɔ igba iyɛkuu. 11 Moo onzu uwu bɔkɔ e to ɛnwu e fulo kadu, o kala wu ma; onzu uwu a gyi ɛnwu ma ba o fulo wu mu kadu.>>

12 Akwɛyi Ɔzhizɔsi a za laa onzu uwu a lɔ laa wu awu tee, <<Gba ŋɔ lɔ laa enzu mbaa kiya irimo ingyi ɔnɔnda naa ingyi onoyo, ki lɔ laa ɛmɛza ŋa mo, naa ɛmɛnɛ ŋɔ naa enzu umba kwɔmba ŋa, naa wanɔkpa ŋa umba o yi kwuwo mo, kwuwongu gba ŋɔ wo tayi, umba o gba ɔ lɔ la ŋa tete akwɛyi o waŋa kwusa ungwu kiya ingyi ŋɔ wo mbo. 13 Gba ŋɔ ŋi lɔ laa enzu mbaa odumudumu, lɔ laa ayirewa, wa mu alɛ ma, umba kinyɛ mbala epeyi; 14 akwɛyi ŋɔ fya esheshi ma kwuwongu enzu mbɔlɛ o do ŋɔ kwusa iwama mo. Ukpo gba a waŋa kwusa le ɔnu uwu bɔkɔ enzu umba ototo o bo yimo mu kwuvɔ awu.>>

15 Tabɔkɔ Ɔzhizɔsi a mbwa iso isomo, akwɛyi onzu uwufo uwu bɔkɔ e yi mu kiya irimo mbala wu, a pwa iso ɛlɛ, a za laa Ɔzhizɔsi tee, <<Ɔnyɛ akwu uwu onzu uwu e be ri kiya mu odumudumu uwu Ɛsu irimo iyi Ukpo!>>

16 Ɔzhizɔsi a gba opwu tee: <<Onzu uwufo e wo odumudumu uwakwu akwɛyi a lɔ laa enzu guruguru. 17 Tabɔkɔ kwuyengwu odumudumu kwu wo mo, akwɛyi a lɔ umɛgba wu kaa la za laa agboga wu tee, <La lu bo ŋa, moo o mbwa ingyinangyina ma-a!>

18 <<Enzu mbɔlɛ lɛɛbi ba o le mu opwu ishimo kɛnyi kɛnyi. Onzu uwu kwonze a za laa umɛgba awu tee, <Mi ya utu afyi ɛlɛ, mi ri mi bi yese wu mo dɛ; shɔɔkɔ ki wo amba mo moo mi ba mo.>

19 <<Uwufo ba a zɔ tee, <Mi ya endo wewo umba egba afyi ɛlɛ, mi ri mi bi pwa mba ma dɛ; shɔɔkɔ ki wo amba mo moo mi ba mo.>

20 <<Uwufo kpɔ a zɔ tee, <Mi to oko afyi ɛlɛ, kwuwo kwɔlɛ, mi fya kapa mi nyɔ mo.>

21 <<Umɛgba ele a gba yi e so adakwogba wu lɛɛbi. Amba o wo adakwogba wu ma akwɛyi a za laa umɛgba wu awu tee, <Gyakpɔ wɔ kwudu kaa so mu ɛgwuzɛ mbala agbulɔ iyi kwuse, kaa ngye laa ayirewa, wa mu alɛ ma, epeyi mbala umba kinyɛ.> 22 I to kwuye mo akwɛyi umɛgba awu a gbama akwɛyi a za laa ada kwogba wu tee, <Ada kwogba, iyi bɔkɔ ŋɔ lɔ mi mi wo ye-e, riyi ba ri shimo kpɔ.> 23 Akwɛyi ada kwogba ele a za laa umɛgba awu tee, <So mu ɛgwuzɛ iyɛku mbala iyɛri, kaa za laa enzu tee lo bo, kaa kwogba mi lakwu nyɔlɔma. 24 Mi so yi, enzu umba bɔkɔ mi lɔ la mba kenze awu lɛɛbi, onzu ukpukpɛnyi mba e kyo mu odumudumu mi ele mo.>>>

25 Ɔnu uwufo enzu gyɔɔ o yi mu luzɛ mbala Ɔzhizɔsi, e gele eyi munyi mbo akwɛyi a za mba tee, 26 <<Gba onzu uwu bɔkɔ a nyɔ minyi mi kaa lakwu u vɔngɔ kiya mi ba e towo ete wu mbala anyi wu ma mo, naa oko wu mbala ɛmɛ wu, naa ɛmanyi wu anzɔnu mbala ɛmanyi wu eko, i kyo kwunyɔ wu ma tete mo, e domo tee akwu u vɔngɔ kiya mi mo. 27 Onzu uwu e to kwuwɛyi ungwu lukwu wu ma kaa la mbwalu mi mo, e do tee akwu u vɔngɔ kiya mi mo.

28 <<Gba onzu meka yi a gyi tee le mbo kwogba ungwu oshi ba a ŋɔma e lo eduwo wu mesu kaa la ma shi i do wu ɛduma imbwama lɛɛbi dɛ mo? 29 Gba e wo tayi mo, a fala ugu awu imbwama mizhikembo iyi a ka kwosa; akwɛyi onzu uwunawuna uwu bɔkɔ a ma ngwu a nyɔngɔ wu ma. 30 Ɔzɔ tee, <<Onzu ele e ye kambwu iyi kwogba imbomo ba a fangwa laa imbwama.>

31 Gba ɔsu uwu e yi asozha edubu uwo e sheye mbaa ewa itomo mbala ɔsu uwufo uwu e yi asozha edubu uwo ekpepo, a ŋɔma e yese yi mo dɛ kaa la ma shi asozha wu edubu uwo mbɔlɛ o do ewa itomo mbala ɔsu uwu asozha edubu uwo ekpepo ele. 32 Gba e do tee e to ewa ɛlɛ ma mo, tabɔkɔ enzu mbamba o ndama bɛnɛ, a lɔ alɔgbulɔ mbaa ɔsu uwufo awu kaa lo lomesu. 33 Akwɛyi Ɔzhizɔsi a mbwa yi tee, <<Tatayi onzu uwunawuna meka yi uwu bɔkɔ a lafya laa kiya ingyinangyina ingyi bɔkɔ e yi ngyi mo, e do tee akwu u vɔngɔ kiya mi mo.

34 <<Otopwa akwu kiya ingyeshi, tetete gba e bo rɛnu ma, kiya ingyi o wo wu kaa la gba laa rɛnu ma ki yi mo. 35 O fu wu mo moo e sheshi tee lo fu wu mu utu naa kwoza fo. Kwuwo kwɔlɛ, onzu uwu e yi alu iyi ipwama ba la pwa!>>

<< Onzu uwu eyi alu iyi ipwama, la pwa.>>