1 Enzu gyɔɔ o wo ekpasu ɔ ka apula iyi bɔkɔ i wo mekeka nzu. 2 O kya iyi bɔkɔ enzu umba bɔkɔ o ma apula ɛlɛ mu eyi mbo ngbaa mu iyemo o so nzu akwɛyi o tanu iyi iso iyi Ukpo ɛlɛ. 3 Kwuwo kwɔlɛ, Onzu Uwakwu Ɔtiyɔfilɔ, Imi uwu mi mbwalu undu uwu apula ɛlɛ lɛɛbi ngbaa miyemo awu gba mi ma tee i shoshi kaa la mi ka ŋa iyi bɔkɔ i wo nɛrinɛri. 4 Mi wo ɛlɛ kaa la ŋɔ yitu ongbulolo uwu apula lɛɛbi iyi ɔ zɔ ŋɔ awu.

5 Kwuye ungwu Ɛrɔdu akwu ɔsu uwu Ozhudiya awu, obwoshi uwu Ukpo uwufo uwu o ya wu tee Ozakaraya, uwu a wɔ mu ɛdɔ iyi ebwoshi umba Abizha e yi mɔmɔ. Oko wu ɔ ya wu tee Ɛlizabɛti; uwu a wɔ mu ɛdɔ iyi Ɛrɔnu. 6 Ozakaraya mbala oko wu Ɛlizabɛti wepepo mbo, ɔ kwu enzu umba ototo mu idu iyi Ukpo, ɔ mbwalu ɛrama iyi Ɔkwu lɛɛbi. 7 Enzu mbɔlɛ ba o yi ɛmɛ mo kwuwongu Ɛlizabɛti akwu odogyi, wepepo mbo ba ɔ wuma a.

8 Ɔnu uwufo Ozakaraya e yi mu ɛduma iyi ebwoshi umba Ukpo iwomo mu Ɔtɛpu. 9 Akwɛyi kyamate bɔkɔ ukwu uwu ebwoshi umba Ukpo u zɔ tee lo wo, o nyɛpwu akwɛyi ɔ ŋa Ɔzakariya tee le fye mu Ɔtɛpu kaa le pwu apula iyi umbwɔ ferere mu ɔla. Kwuwo kwɔlɛ e fyemo mu Ɔtɛpu uwu Ɔkwu, 10 riba ingyi enzu ba ri kpala ɛlu mu kwudu mu Ukpo ilɛma kwuyengwu e yi mu apula iyi umbwɔ ferere ipwumo. 11 Akwɛyi e gele ɔlɔgbulɔ uwu Ɔkwu mu idu wu, a rima mu kwuwo ungwungyi ungwu kwubwu ungwu isabɔ mbaa bɔkɔ o pwu apula iyi umbwɔ ferere. 12 Kwuye ungwu Ozakaraya a ma wu, iyi i wo wu mo gyɔɔ. 13 Ɔlɔgbulɔ uwu Ukpo awu ba a za wu tee, <<Ozakaraya, ki wiyi mo! Ukpo a pwa kwoya ŋa-a, oko ŋɔ Ɛlizabɛti a mba ŋa umɛ ɔnzɔnu. Ŋɔ kpo wu ɛnyi tee Ɔzhɔnu. 14 Umɛ ele aa kwaŋa kiya ingyi ɔnyɛ mbala egbo iruwu, enzu gyɔɔ ɔ mwɔnyɛ kwuwo ungwu kwɔmba wu! 15 Ɔzhɔnu aakwu onzu uwakwu mu idu iyi Ɔkwu. E wo atɛ mo ba e wo embyi umba iyimo umbanambana mo. Kwundu uwu Ukpo e yi mbala wu ngbaa mu ubwu uwu anyi wu, 16 akwɛyi aa gba la Ɛmɛ umba Izirɛ gyɔɔ ma a nya mba mbaa Ɔkwu Ukpo mba. 17 Ee yi mu keyi unga Ɔkwu laa ekpasu kyamate anukenzu Elazha tayi. Aa gba laa umba ada mbala ɛmɛ e lomesu; ee shi enzu umba bɔkɔ o lomo laa Ukpo mo kaa lo mbwalu ɔgwuzɛ uwu enzu umba ototo; ee wo ɛlɛ kaa enzu umba Ɔkwu lo yi ɛnwu ma lo rigbo wu.>>

18 Akwɛyi Ozakaraya e yo ɔlɔgbulɔ uwu Ukpo awu tee, <<Mi wo la mi yitu tee ɛlɛ ii wo mo? Imi mi wuma-a, oko mi tete a wuma-a.>>

19 Akwɛyi ɔlɔgbulɔ uwu Ukpo awu a gba wu opwu tee, <<Imi mi kwu Ɔgɛburɛ, mi ri mu idu iyi Ukpo, uwu a lɔ mi tee la mi so ŋɔ iso kaa la mi ba ŋa ɛza iyesheshi ɛlɛ. 20 Kwuwongwu bɔkɔ ŋɔ kwu idu fulo mu iso mi mo awu, kenzu ŋɔ kee kokomo, ŋɔ so iso kego fo nzhii ba kwuyengwu iso ɛlɛ i nyɔlɔma dɛ.>>

21 Enzu umba ɔ rigbo Ozakaraya mu kwudu awu ba o le mu kenzu iyama iyi ishimo iyi Ozakaraya mu Ɔtɛpu. 22 kwuyengwu a ba wɔ kwudu, e so iso mbala mba ego fo, akwɛyi ɔ zɔngɔma tee a ma ɛbɛ mu Ɔtɛpu. Akwɛyi akwu mu ewo gba e so iso mbala mba le ŋa.

23 Kwuye ungwu Ozakaraya a mbwa ɛduma wu ma mu Ɔtɛpu, akwɛyi a ka mogba. 24 Mizhikembo iyi kwuye bwɛ, akwɛyi oko wu, Ɛlizabɛti e to rifo mo akwɛyi e nvye ɛnwu ma mogba nzhii ba evya ɛlɔ. 25 Ɛlizabɛti a zɔ tee, <<Ɔkwu e shɔɔkɔ a mbwa mi ma-a.>> <<A ma eyembembyi mi akwɛyi e to mi lovya ma mu eyi iyi enzu.>>

26 Mu ɔvya uwɔrɛnyi uwu rifo ingyi Ɛlizabɛti, Ukpo a lɔ ɔlɔgbulɔ wu, Ɔgɛburɛ mu kwuse ungwu Ɔnazarɛti mu ɛzhi iyi Ogalili. 27 A lɔ wu ma mbaa umesheko uwu e de yitu iyi ɔnzɔnu dɛ mo, uwu bɔkɔ Ɔzhɔsɛfu uwu a wɔ mu ɛdɔ iyi Ɔsu Odevidi awu, e yi mu anu wu ishimo. Umesheko ele o ya wu tee Omeri. 28 Ɔlɔgbulɔ uwu Ukpo a bo mbaa wu akwɛyi a za wu tee, <<Mi gbɛlɛ ŋɔ ɛnyi loo oko u she la Ukpo! Ɔkwu e yi mbala ŋa looǃ>>

29 Ɛlɛ i shi Omeri e wo ubugyi gyɔɔ akwɛyi e le mu egbo ibyima mekeka iyi iluma iyi ɛnyi igbɛlɛma ɛlɛ. 30 Akwɛyi ɔlɔgbulɔ uwu Ukpo awu a za wu tee, <<Omeri; ki wiyi mo, ŋɔ fya esheshi ma-a mbaa Ukpo. 31 Ŋɔ shi rifo ŋɔ mba umɛ ɔnzɔnu, akwɛyi ŋɔ kpowu ɛnyi tee Ɔzhizɔsi. 32 Aakwu onzu uwakwu, akwɛyi o ya wu tee Umɛ uwu Ukpo Edego. Ɔkwu Ukpo e shi wu akwu ɔsu kyamate usɔkwu wu Ɔdɛvidi tayi, 33 akwɛyi akwu ɔsu uwu ɛdɔ iyi Ɔzhɛkɔbu iyɔkpɔɔ; irɛsu wu i bɔ mo!>>

34 Omeri a za laa ɔlɔgbulɔ uwu Ukpo tee, <<Imi ba mi di yitu iyi ɔzɔnu dɛ mo le, ɛlɛ i wo la ba i womo?>>

35 Akwɛyi ɔlɔgbulɔ uwu Ukpo a gba wu opwu tee, <<Kwundu uwu Ukpo e fye ma ŋa akwɛyi ekpasu iyi Ukpo i kpo ŋɔ kwundu. Kwuwo kwɔlɛ umɛ uwu ŋɔ bi mba le, aakwu Ɔkɛrikɛri akwɛyi o ya wu tee Umɛ uwu Ukpo. 36 Onzu ŋɔ, Ɛlizabɛti, uwu bɔkɔ enzu o ya wu tee odogyi awu, la iwuma wu lala a ra la rifo ingyi evya ɛrɛnyi. 37 Moo kiya ingyi ki ga Ukpo iwomo ki yi mo.>>

38 Akwɛyi Omeri a zɔ tee, <<Imi mi kwu umɛgba uwu Ɔkwu, iyi ŋɔ so awu li yi tayi.>> Akwɛyi ɔlɔgbulɔ uwu Ukpo awu a lu wu afyima.

39 Mu afyi ɛnyi Omeri e yimo efyefya a ka mu kwuse ungufo mu ɛzhi iyi Ozhudiya, ɛzhi iyi lɔwa. 40 E fye mogba uwu Ozakaraya akwɛyi a gbɛlɛ Ɛlizabɛti ɛnyi. 41 Tabɔkɔ Ɛlizabɛti a pwa ɛnyi igbɛlɛma iyi Omeri, akwɛyi umɛ mu ubwu wu e wo akpa kwuwongu ɔnyɛ imwuma. Akwɛyi Kwundu uwu Ukpo e fye mu Ɛlizabɛti 42 akwɛyi a ta oga kpaa uwu ɔnyɛ, a zɔ tee, <<Esheshi iyi bɔkɔ Ukpo e wo ŋɔ le, i ka iyi eko lɛɛbi ma, esheshi ɛlɛ i yi mbala umɛ uwu ŋɔ bi mba le tete! 43 Mi wo kwuwongumbe iyi bɔkɔ i do tee anyi wu Ɔkwu mi a nyɔ mbaa mi kaa le gbo mi oga? 44 Moo tabɔkɔ mi pwa ɛnyi igbɛlɛma ŋa, akwɛyi umɛ mu ubwu mi e wo akpa kwuwongu ɔnyɛ. 45 Ɔnyɛ akwu uwaŋa kwuwongu bɔkɔ ŋɔ kwu idu fulo tee ɛlɔgbulɔ iyi bɔkɔ Ɔkwu a lɔ minyi ŋɔ awu i nyɔlɔma!>>

46 Akwɛyi Omeri a zɔ tee,

Kwundu mi kwu du Ɔkwu ma;

47 Kwundu mi kwu mwɔnyɛ kwuwongu Ukpo Usama mi,

48 moo e lolo mbaa mi, Imi

umɛgba wu uwu mi kwu kiya kinyinyi mo!

Te i na mu kwɔfyi ungwɔnɛ enzu lɛɛbi o ya mi tee onzu uwesheshi,

49 kwuwongu Ukpo Uwakwu e wo mi apula iyɛku.

Ɛnyi wu akwu ɛkɛrikɛri;

50 Mu ɔyi uwunawuna a ma eyembembyi iyi enzu umba bɔkɔ o wiyi wu.

51 E wo apula iyɛku mu ewo wu

akwɛyi enzu umba bɔkɔ o to ɛmba o fulo kadu, a kpa mba shaa mbala ikama iyi egbo mbo.

52 A kala asu umbakwu ma mu ikpa iyi ɛsu mba,

akwɛyi umba bɔkɔ ɔ zhi mba ma awu ba, e wo mbo enzu umbakwu.

53 Ukpo ee shi enzu umba lonzu apula iyi irimo iyeshi,

umba bɔkɔ o yi kwuwo ba a ra mba ma laa ewo iyidɔ.

54 Ishi iyi bɔkɔ e to laa asɔkwu nzu, a nyɔlɔ yi ma-a, e bo te kaa la mbwama laa umɛgba wu Izirɛ.

55 E lolo akwɛyi a ma eyembembyi iyi Aburamu mbala ɛdɔ wu lɛɛbi iyɔkpɔɔ!>>

56 Omeri a ŋɔ mbala Ɛlizabɛti nzhii ba evya ɛla dɛ gba a gba a kama mogba wu le.

57 Kwuye ungwu kwɔmba ungwu Ɛlizabɛti kwu wo mo akwɛyi a mba umɛ ɔnzɔnu. 58 Enzu umba ɔ nɔ o kpa wu mbala enzu umba ɛdɔ wu lɛɛbi o pwa iyeshi iyi Ɔkwu e wo wu, akwɛyi o mbwa wu ma mu ɔnyɛ imwuma.

59 Ɔnuwu kwɔfyi ungwɔranda, o bo tee lɔ zɛ umɛ awu ɛsɔ ma akwɛyi ɔ gyi tee lo kpo wu ɛnyi iyi ete wu, Ɔzakariya. 60 Anyi wu ba a zɔ tee, << Aayimo! Ɛnyi wu o ya wu tee Ɔzhɔnu.>>

61 Akwɛyi ɔ za wu tee, <<Lunyi ba lu yi onzu uwu o ya ɛnyi ɛlɛ mu ɛdɔ yi mo le kɔ!>> 62 Akwɛyi o yo ete wu kwuyo mu ewo iwomo kaa lo pwa ɛnyi iyi a gyi tee le kpo umɛ awu.

63 Ɔzakariya e wo ewo tee lo shi wu kiya ingyi ɛzu ikama, akwɛyi a ka tee, <<Ɛnyi wu akwu Ɔzhɔnu.>> Ɛlɛ i shi uwewe kenzu iyama. 64 Mɔmɔɔmɔ kenzu unga Ozakaraya ka gba laa iwuma akwɛyi e le mu iso isomo, akwɛyi e le mu Ukpo iduma. 65 Iyi i wo enzu wa nɔ kpamba ma lɛɛbi, akwɛyi munamuna mu ɛzhi iyi Ozhudiya iso ɛlɛ gba enzu o ma mu isomo le. 66 Onzu uwunawuna uwu bɔkɔ a pwa iso ɛlɛ, a byi egbo gyɔɔ akwɛyi o yo tee, <<Umɛ ele e be yimo le a ŋa akwu umbe ngyɔ?>> Moo i zɔ gedegede tee ekpasu iyi Ɔkwu i yi mbala wu.

67 Kwundu uwu Ukpo e fye mu ete wu Ɔzhɔnu, Ɔzakariya akwɛyi a zɔ rɛnu ingyi Ukpo tee:

68 <<Iduma akwiyi Ɔkwu, Ukpo uwu Izirɛ!

E bo te kaa la mbwama laa enzu wu ma, akwɛyi a wamba ma mu rinye.

69 E shi nzu Usama uwakwuu-o,

mu ɛdɔ iyi umɛgba wu, Odevidi.

70 E to ishi mu lunzu undu anukenzu wu wakɛrikɛri ngbaa mekyi

71 tee a sa nzu ma mu ewo iyi agewa nzu,

mbala enzu lɛɛbi umba bɔkɔ o gyi nzu mo awu.

72 A zɔ tee a ma eyembembyi iyi asɔkwu nzu

akwɛyi e lolo iso iyi ɔkɛrikɛri iyi bɔkɔ e so e shi mɛzhi awu.

73 A vungɔma laa usɔkwu nzu Aburamu tee,

74 a wa nzu ma mu ewo iyi agewa nzu,

kaa la ki fya ekpasu iyi ki gbo wu ɔya laa idu kpu mo,

75 kaa la ki gbo wu ɔya mu ɔkɛrikɛri mbala ototo nzhii ba lukwu nzu.

76 <<Umɛ mi, uŋɔ ba enzu o ya ŋa tee anukenzu uwu Ukpo Uwakwuu uwoshi.

Ŋɔ to keyi laa Ɔkwu kaa bi nɔngɔ wu ɔgwuzɛ ma,

77 kaa za laa enzu wu tee o sa mba ma gba ɔ gbɔ mba ingbomo mba ma.

78 Kuwongwu eyembembyi iyi iyi Ukpo nzu,

ee shi ɔnu uwu isama u ngyi moshi u nyɔ munyi nzu,

79 kaa lu shi ɛbɛ laa umba o yi mu ipwu iyi kwundu,

mbala enzu umba bɔkɔ o wo ubugyi kwuwongu egbo ibyima iyi lukwu awu,

kaa la pya nzu le so mu ɔgwuzɛ uwu oloto.>>

80 Akwɛyi Ɔzhɔnu a bulɔma a kɔma mu kwundu; a ka ŋɔ mu ɛzhi ɛngbarara nzhii ba kwuye kwu bo ungwu bɔkɔ a zɔ ɛwu ma laa enzu umba Izirɛ.