1 Mizhikembo iyi kwɔfyi ungwu ɛnwu igbomo, Omeri Omagadali mbala Omeri anyi wu Ozhemisi mbala Osalomi, o ya apula iyi umbwɔ ferere, kaa lo so lo ngbɛ ukpɛzhi uwu Ɔzhizɔsi. 2 Mu kwoto mu kwoto ɔnu uwu kwonze ungwu rishi, kwuyengwu ɔnu u yi mu iwɔma bɛnɛ, o zɛ o sheyimo mbaa ogariwu. 3 Akwɛyi o le mu esu eyo iyomo te, <<Uwe ba a fya nzu kwokyi ungwu ku yi mu kenzu unga ogariwu awu ma ngyɔɔ?>>

4 Tabɔkɔ o yi eyi mbo faa, akwɛyi o ma te kwokyi ungwɔku kwɔngu o fya ngwu ma mu kenzugu unga ogariwu ma-a. 5 Tabɔkɔ o fye mu ogariwu, akwɛyi o ma onzu uwufo uwu bɔkɔ e lo ekpayi iruwu, a ŋɔma mu emba akwɛyi izele i yi mbo mo.

6 Akwɛyi a za mba te, <<La lu wiyi mo.>> <<Lu yi mu Ɔzhizɔsi uwu Ɔnazarɛti uwu bɔkɔ o kpawu mu kuwɛyi awu ikagyima. E yimo mu kwuvɔ-ɔ! E yi munɛ fo. La lu yese mɔgɔ uwu o shi wu. 7 Lunyi ba la lu so kaa la lu za la Wavɔngɔkiya wu mbala Opita te, <E to keyi la mba a ka mu Ogalili-e. Lu ma wu mɔmɔ kyamate bɔkɔ e so yi e shi mɛzhi tayi.> >>

8 Akwɛyi o fulomo efyefya mbaa ogariwu la iyi mbala ɛnwu ipulama. O so onzu ukpɛnyi iso mo kuwongwu iyi i wo mbo mo.

9 Kwuye ungwu Ɔzhizɔsi e yimo mu kwuvɔ mu kwoto ungwu kwɔfyi ungwu kwonze ungwu rishi, a zɔ ɛnwu wu ma la Omeri Omagadali, uwu bɔkɔ a ra wu la eyo umbeyi werewo awu ma. 10 Akwɛyi a ka za la enzu umba bɔkɔ o yi mbala wu ba o yi mu obobyi iwomo mbala oga wu ilomo awu. 11 Kwuye ungwu o pwa te Ɔzhizɔsi e yi la reyi, ba Omeri Omagadali la a ma wu, o nyama mo.

12 Mizhikembo iyi ɛnyi, Ɔzhizɔsi a zɔ ɛnwu ma la enzu wepo mu ɔgwuzɛ ɔwa kwuyengwu o yi mu luzɛ o she mu kwuse. 13 Enzu wepo mbamba o gbama o ka mba Wavɔngɔkiya umba bɔkɔ o shi mo awu o ko so mbo; Umba ba o nya mba ma mo.

14 Mizhikembo iyi Ɔzhizɔsi a zɔ ɛnwu ma la Wavɔngɔkiya wewo la Ukpɛnyi umba bɔkɔ o shimo awu, kwuye ungwu o yi mu kiya irimo; e tu mbo mo kuwongwu o kwu idu lu fulo mo ba o towo iso iyi enzu umba bɔkɔ o ma wu mizhikembo iyi e yimo mu lukwu awu mo.

15 A za mba te, <<La lu so mu kwudu kwɔlɛ kaa la lu tanu iyi ilɔ iyesheshi la enzu. 16 Onzu uwunawuna uwu bɔkɔ a nyama ba o wo wu obatisima o sa wu ma, onzu uwunawuna uwu bɔkɔ a nyama mo o zɔ ombu wu. 17 Lɔzɔ luu mbwalu enzu umba bɔkɔ o nyama: Mu ɛnyi mi o rala eyombeyi mo o wɔ kwudu; oo so lunzu undopo; 18 o kwu akwu mewo mbo akwɛyi kwuyengwu o wo ɛtu, i wo mbo kiya mo; o fulo ewo mbo mu enzu umba bɔkɔ o yi mu efya ipwama akwɛyi efya mba i bomo.>>

19 Mizhikembo iyi Ɔkwu Ɔzhizɔsi a mbwa mba iso ɛnyi isomo, o to wu mo a ka moshi a ka ŋɔma mu kuwo ungwungyi ungu Ukpo. 20 Akwɛyi Wavɔngɔkiya o ka mu anu itama munamuna mu kwudu, Ɔkwu e wo ɛduma mbala mba akwɛyi a zɔ ɛduma wu ma mu lɔzɔ izɔma.