1 Afarisi mbala wa zɔ ɛrama iyi Omosisi umbafo o wɔ mu Ɔzhɛrusalɛ o bo o kpala ɛlu mu idu iyi Ɔzhizɔsi akwɛyi 2 o ma ta bɔkɔ Wavɔngɔkiya wu o ri kiya la ewo iyi <<ɛnyinyi,>> inyi gba akwu tee, ewo mbo iyi sɛsɛ mo kyamate ukwu uwu ɛdɔ mba u so. 3 Uzhi uwu Afarisi mbala umba Azhu lɛɛbi o shishi ewo mo sɛsɛ dɛ gba o ri kiya le, moo o rala ukwu uwu enzumbakɔ mba; 4 Akwiyi gba o gbama mu rishi oo womo dɛ gba o ri kiya le. Umba o bɔ eyi mu ukwu uwu ɛdɔ mba gyɔɔ, apula i gbɔma mate ɛkɔpu, lu wu, ebuta, mbala egodo tayi.)

5 Akwɛyi uzhi uwu Farisi mbala wa zɔ ɛrama iyi Omosisi o yo Ɔzhizɔsi kwuyo tee,<<I wote bɔkɔ Wavɔngɔkiya ŋa o mbwalu ukwu uwɛdɔ uwu enzumbakɔ nzu mo bɔkɔ o ri kiya la ewo iyi bɔkɔ i yi,<Sɛsɛ mo?>>

6 Ɔzhizɔsi a gba mba opwu tee, lunyi wa mwangba mbɔlɛ; <<Anukenzu Azaya a zɔ riwɔ ɔnyɛ mu reshi yi, bɔkɔ a ka te lu kwu wamwangba:

<< <Enzu mbɔlɛ o shi mi inzumbɛku mu kenzu,

idu mbo ba indama mbaa mi.

7 O gbo mi oya uwu umbwa bi; kiya ingyi bɔkɔ umba o zɔ akwu ɛzɔ iyi onzu iyidɔɔ bi.>

8 Lunyi lu lafya la ɔkpa uwu bɔkɔ Ukpo a ta la onzu ba lu rala ukwu uwu umbete yi.>>

9 Akwɛyi Ɔzhizɔsi a za mba te:<<Lunyi lu yi amasa iyi bɔkɔ lu shi ɔkpa uwu Ukpo mɛmba ba lu mbwalu ukwu uwu umbete yi! 10 Moo Omosisi a zɔ te, <Onzu le lo ete wu mbala anyi wu ma,> ba, <Onzu uwunawuna uwu bɔkɔ e pe ete wu nana anyi wu ari, akwu mɛga ka lo ngbɛ wu ma.> 11 Lunyi ba lu zɔ tee, gba onzu a za la ete wu nana anyi wu tee,<Kiya ngyɛlɛ ŋɔ fya ngyi ma fo, moo akwu okoruba,>(akwu rɛshi ingyi Ukpo), 12 akwɛyi lu nyama te le wo kiya laa ete wu mbala anyi wu fo. 13 Tegba lu ngbɛ ɔkpa uwu Ukpo ɛdɔ ma le, akwɛyi lu zɔ ukwu uwɛdɔ yi, ba lu wo apula ɛlɛ te gyɔɔ.>>

14 Ɔzhizɔsi a gbala enzu gyɔɔ iyama kpɔ o bo munyi wu akwɛyi a zɔ tee,<<Uwewe la ngbɛ alu munyi mi, ka la pwa ɛlɛ. 15 Kiya ingyi bɔkɔ onzu e ri ki zhi wu <ɛnyinyi> umba Ukpo mo. Kiya ingyi ki wɔ mɛmi iyi onzu gba ki <tutu wu mo mbaa Ukpo le.>>> 16 Onzu uwu bɔkɔ e yi alu ba la pwa.

17 Tabɔkɔ Ɔzhizɔsi e fulomo a lafya la riba ngyɛngyi akwɛyi e fye mogba, Wavɔngɔkiya wu o bo o yo wu kwuyo meka iyi kwoba kwɔlɛ. 18 E yo mbo te, <<Lunyi tete lu zɔngɔ yi ma mo re?>> Lu yitu tee kiya ingyi bɔkɔ onzu e ri ki ka mu ubwu ki <tutu wu mo mbaa Ukpo> mo mo re? 19 Moo kiya ingyirimo ingyi bɔkɔ onzu e ri ki fu mu egbo wu mo, ki fu mu ubwu wu akwɛyi ki wɔkwudu mu ɛnwu wu.>> (Ɔzhizɔsi bɔkɔ e so ɛlɛ awu, i zɔ te kiya ingyirimo ingyinangyina ki tutu onzu mo mbaa Ukpo mo>>.)

20 E siso a ka keyi tee:<<Kiya ungyi bɔkɔ ki wɔ mu ɛmi iyi onzu gba ki zhi wu <ɛnyinyi> le. 21 Moo mu akɔ iyi onzu gba amasa iyira ii wɔ le, amasa iyi iyama, ɛlɔ, onzu ingbɛma, 22 kaya itomo,ekweyi, akɔ iyira, kwukyoro, i yi lovya mo, enzu ikyɛma, enzu i tutumo, i fulo ɛmba kadu mbala erondo. 23 Ɛlɛ lɛɛbi i wɔ mɛmi iyi onzu akwɛyi <I shi onzu e yi ɛnyinyi,>>

24 Ɔzhizɔsi a lafya la mɔmɔ akwɛyi a ka mu kwuko ungwu Otaya. E fye mu kwogba ungufo ba a gyi te onzu ukpukpɛnyi le yitu mo. Tetete enzu o yitu te e yi mɔmɔ. 25 Okokpayi ukpɛnyi uwu bɔkɔ umɛ wu okokpayi e yi ɛndu iyira a pwa te Ɔzhizɔsi e yi mɔmɔ, kɛlɛlɛ e bo e kwumo mu idu wu. 26 Okokpayi ele akwu onzu uwu Azhu mo, o mba wu mu kwuko ungwu Ofonisiya mu ɛzhi iyi Osiriya. A kpa Ɔzhizɔsi ɛshɛku ka la ra la ɛndu iyira ma li shi umɛ wu.

27 Ɔzhizɔsi a za wu tee, <<Rima kaa ɛmɛ lo ri keyi dɛ,>> <<moo ishoshi te lo to kiya ingyirimo ingyi ɛmɛ, kaa lo fu la izu mo.>>

28 Oko awu a gba opwu tee, <<Tegba i yi le Ɔkwu,>> <<Izu umba bɔkɔ o kpomo mu idu iyi oteburu awu lala o ri ebwebwede iyi bɔkɔ i fumo mu ɛzhi awu.>>

29 Akwɛyi a za wu tee,<<Kwuwongwu opwu uwoshoshi uwu ŋɔ gba wu o le, sheyimo bi ŋa, ɛndu iyira ɛnyi i lafya la umɛ ŋɔ-ɔ.>>

30 Oko ele a kama mogba akwɛyi e du tee, ɛndu iyira ɛnyi i lafya la umɛ wu aa, a nɔma mu kwugodo.

31 Akwɛyi Ɔzhizɔsi a lafya la kwuko ungwu Otaya a zɛ mu Ɔsidɔ, nzhii ba a ka mu risu ingyi Ogalili mu ɛzhi iyi Odikapoli(Iluma yi iyi tee Ese Uwo), 32 Enzu umba mɔmɔ o ka wu la onzu uwu bɔkɔ a pwa alu mo ba e siso ego mo, akwɛyi o kpa wu ɛshɛku te la pwa wu afyi ka le bo wu ofya ma.

33 Ɔzhizɔsi e to onzu ele mo a ka wu memba, akwɛyi e lo ɛfyi wu mu alu iyi onzu ele. A gba a la ɔtɛ akwɛyi a pwafyi mu ɔtinɛ uwu onzu ele. 34 Ɔzhizɔsi e yese moshi akwɛyi e fu ɛnyɔ faa akwɛyi a zɔ tee, <<Efata,>> inyi gba akwu tee,<<Wuma Gboo!>> 35 Mu atata ɛnyi, alu iyi onzu awu i wuma, ɔtinɛ wu ba a vuvuma akwɛyi e siso kyoriri.

36 Ɔzhizɔsi e so enzu mbamba tee, iyi bɔkɔ uwu e wo le lo so yi la ɔzɛnzɛnyi te mo.Tabɔkɔ e so la enzu te lo so mo awu, tegba ba o yi mu isomo la enzu le. 37 Enzu o ya kenzu gyɔɔ ba o zɔ te. <<E wo iyinayina marimari,>> Wa salu lala e shi mbo te lo pwama, wa tukenzu ba o zɔ rɛnu.>>