1 Ɛza iyesheshi iyi Ɔzhizɔsi Okrasi, Umɛ uwu Ukpo. 2 I ye kyamate bɔkɔ o ka mu kwokpo ungwu anukenzu Azaya awu tee:

<<Imi mi lɔ ɔlɔgbulɔ mi ma kaa le tekeyi la ŋa,

uwu bɔkɔ a ba ngbɛ ŋɔ ɔgwuzɛ>>

3 <<opwu uwu onzu u yi mu iyama mu ɛzhi ɛngbarara, u zɔ tee,

<La lu ngbɛ ɔgwuzɛ laa Ɔkwu,

la lu bɔ wu ɛgwuzɛ wu a shɛ.> >>

4 Akwɛyi Ɔzhɔnu a wɔ e le mu obatisima iwomo mu ɛzhi ɛngbarara mbala anu itama tee enzu lo tamɛzhi laa Ukpo kaa lo gba la ingbomo mbo lo kpa mba. 5 Enzu umba ɛzhi iyi Ozhudiya mbala umba Ɔzhɛrusalɛ lɛɛbi o wɔ kwudu o ka mbaa wu. Onzonzu e so ingbomo wu akwɛyi Ɔzhɔnu e wo mbo obatisima kpɛkpɛ mba mu ɔkwu uwu Ɔzhɔda. 6 Ɔzhɔnu e kpo ekpayi iyi bɔkɔ o fu mu inyi iyi Onyakurumi laa kwumamuzhi ungwu kwokpo ungwu izɔfyi. Kiya ingyirimo wu akwu eko mbala lotu undu ɔsɛ. 7 A tanu tee: <<Onzu uwufo uwu bɔkɔ a ka mi ekpasu ma e yi mu inyɔma mizhikembo mi. Ekyikyi iyi ekpoyata wu lala mi do te mi kwumo kaa la mi vuvu yi ma mo. 8 Imi mi ye yi mu obatisima iwomo mu embyi, uwu ba a ba nyɔ awu, ee wo yi obatisima mu Kwundu Ɔkɛrikɛri.>>

9 Mu kwuye kwɔngu Ɔzhizɔsi a wɔ mu Ɔnazarɛti mu ɛzhi iyi Ogalili akwɛyi a ka mbaa Ɔzhɔnu akwɛyi e wo wu obatisima mu ɔkwu uwu Ɔzhɔda. 10 Tabɔkɔ Ɔzhizɔsi e yi mu iwɔma mu embyi, akwɛyi a ma oshi te u wuma gboo akwɛyi Kwundu uwu Ukpo a wɔ moshi kyamate ogarikwokwo tayi akwɛyi e kwu mawu, 11 akwɛyi opwu u wɔ moshi u zɔ tee: <<Uŋɔ ŋɔ kwu Umɛ, uwu idɛnyi mi; Mi mwɔnyɛ mbala ŋa gyɔɔ.>>

12 Kɛlɛlɛ! Kwundu uwu Ukpo e to wu a ka wa mu ɛzhi ɛngbarara. 13 Ɔzhizɔsi a ŋɔ mu ɛzhi ɛngbarara mɔmɔ afyi uwekpendo. AKwɛyi Onzu uwoyi a pwa wu ma. Izɔfyi umbira oyi mɔmɔ, Alɔgbulɔ umba Ukpo gba o koko o mbwa wu ma le.

14 Mizhikembo iyi o ta Ɔzhɔnu mu ugu ugyi, akwɛyi Ɔzhizɔsi a ka mu ɛzhi iyi Ogalili la anu itama iyi ilɔ iyesheshi iyi Ukpo tee, 15 <<Kwuye kwu bo-o,>> <<Kwuye ungwu ɛsu irimo iyi Ukpo kwu ndafo. La lu kwu ira yi ɔsu, la lu kwu idu lu fulo mu ilɔ iyi iyesheshi ɛlɛ!>>

16 Ɔnu uwufo, Ɔzhizɔsi e yi mu luzɛ mu kenzu unga risu ingyi Ogalili akwɛyi a ma Ɔsamɔ mbala umanyiwu, Anduru te o yi mu ɛya ifumo mu risu, moo ɛduma mba akwu emu iyimo. 17 Akwɛyi Ɔzhizɔsi a za mba tee <<La lu bo kaa lu mbwalu mi akwɛyi mi zɔ yi ewo iyi lu nya la enzu munyi mi.>> 18 Akwɛyi mɔmɔɔmɔ, o lafya la iya mba akwɛyi o mbwalu wu.

19 Tabɔkɔ e turu a gba keyi bwɛɛ, akwɛyi a ma Ozhemisi umɛ uwu Ɔzɛbɛdi mbala umanyi wu, Ɔzhɔnu mu kwoda ungwu embyi mu iya mba inɔngɔma. 20 Umba tete Ɔzhizɔsi a ya mba ma te lo mbwalu wu. Ɔ ngbɛ kwuye mo ndii akwɛyi o lafya la ete mbo, Ɔzɛbɛdi mbala enzu umba ɛduma wu mu kwoda akwɛyi o mbwalu Ɔzhizɔsi.

21 Ɔzhizɔsi mbala Wavɔngɔkiya wu, o ka mu Okapanawu akwɛyi ɔnuwu kwɔfyi ungwu ɛnwu igbomo ungwu Azhu, o fye mu udaba uwu Azhu akwɛyi Ɔzhizɔsi e le mu enzu ɛzu izɔma mɔmɔ. 22 Izele i yi enzu ma gyɔɔ kwuwongu ɛzu izɔma iyi Ɔzhizɔsi ɛlɛ, moo a zɔ mba ɛzu la ekpasu kyamate onzu uwu bɔkɔ e yi idomo tayi, akwu kyamate wa zɔ ɛrama iyi Omosisi mo. 23 Kporo ba onzu uwufo meka mba uwu bɔkɔ e yi kwundu ungwura e fye mu udaba uwu Azhu akwɛyi a tara oga kpaa a zɔ tee, 24 <<Uŋɔ Ɔzhizɔsi uwu Ɔnazarɛti, i ta ŋa te mbala nzu? Ŋɔ bo te kaa ngbɛ nzu ma re? Imi mi yitu ŋɔ. Uŋɔ ŋɔ kwu Ɔkɛrikɛri uwu Ukpo!>>

25 Akwɛyi Ɔzhizɔsi a kpa wu ɛyi, a za wu tee <<Kpala kenzu mo! Wɔma mu ɛnwu wu kekelele!>> 26 Akwɛyi kwundu ungwura kwɔngu kwu wo onzu awu akpa kwu fya wu mu ɛzhi, akwɛyi kwu wɔ ma mu ɛnwu wu la oga itarama.

27 Izele i yi enzu umba bɔkɔ o yi mɔmɔ ma gyɔɔ akwɛyi o le mu esu kwuyo iyomo tee, <<Ɛlɛ ba akwumbe ngyɔɔ? Ele akwu onzu a zɔ ɛzɔ iyepo la idomo le! Ɛndu iyira lala a kpa yi ɛyi ba i lo wu moo.>> 28 Ɛza wu i le mu ifulama efyefya mu ɛzhi iyi Ogalili lɛɛbi.

29 Tabɔkɔ o yimo mu udaba uwu Azhu awu, akwɛyi Ɔzhizɔsi mbala Ozhemisi mbala Ɔzhɔnu o ka mu kwogba ungwu Ɔsamɔ mbala Anduru. 30 Akwɛyi mu kwotota kwɔngu o za la Ɔzhizɔsi tee anyi wu oko uwu Ɔsamɔ, a mwɔnyɛ mo, a nɔma la okpakyi. 31 Akwɛyi Ɔzhizɔsi a ka mbaa wu, e yi wu mu kwuwo akwɛyi e yi wu mo a rima. Mu kwotota kwɔngu okpakyi wu e bomo akwɛyi e le mbo mu kiya ingyirimo iwomo.

32 Mu eyikpomo iyi ɔnungawu, o ka la Ɔzhizɔsi enzu umba efya mbala umba bɔkɔ o yi ɛndu iyira. 33 Enzu umba kwuse lɛɛbi o kpala ɛlu mu kenzugu unga kwogba kwɔngu. 34 Akwɛyi umba bɔkɔ o yi efya ikikɔ ikikɔ, Ɔzhizɔsi e bo yi mbo mo lɛɛbi. E kyo a wa la ɛndu iyira ma mu ɛnwu iyi enzu. Ɛndu iyira ɛnyi i yitu te Ɔzhizɔsi akwu umɛ uwu Ukpo. Tetete Ɔzhizɔsi a nya yi ma te li siso mo.

35 Mu kwoto mu kwoto kwuyengwu eyi i di mbwa iyama mo, Ɔzhizɔsi e yimo a lafya la kwogba akwɛyi a ka mu kizɛ ingyifo kɛɛkyi wu mbaa Ukpo ilɛma. 36 Tabɔkɔ Ɔsamɔ mbala enzu umba bɔkɔ o yi mbala wu o ma Ɔzhizɔsi mo, akwɛyi ɔ wɔ kaa lo gagyi wu. 37 kwuyengwu bɔkɔ o ma wu, o za wu te: << Onzu uwunawuna e ye ŋɔ mu igagyima!>>

38 Ɔzhizɔsi ba a gba mba opwu a za mba tee, <<La ki so mu kizɛ ingyifo ŋa, la ki so mu ese iyifo ɛkɛlɛkɛlɛ kaa la mi tanu iyi iso iyi Ukpo mɔmɔ tete, moo akwu kwuwo ngwɔlɛ gba mi bo le.>> 39 Mizhikembo iyi ɛlɛ, Ɔzhizɔsi a kpa ɛvyɛ mu ɛzhi iyi Ogalili lɛɛbi la anu itama mu idaba iyi Azhu la ɛndu iyira irama mu ɛnwu iyi enzu.

40 Ɔnu uwufo onzu uwufo uwu e yi ofya umbwu embyi umbɔyi a ka mbaa Ɔzhizɔsi, e kwumo, a bɔ epunu mɛzhi akwɛyi a kpa wu ɛshɛku, a za wu tee, <<Ada, gba ŋɔ nyama, ŋɔ do te ŋɔ bo ofya mi mbɔlɛ ma.>>

41 Inyashi wu i wo Ɔzhizɔsi mo gyɔɔ akwɛyi Ɔzhizɔsi a wa la kwuwo akwɛyi a pwa wu afyi. A za wu tee, <<Mi nyama.>> <<Ofya ŋa u bo o!>> 42 Mɔmɔ-ɔmɔ ofya wu umbu embibɔyi u bomo, akwɛyi ɛnwu wu i wulu ma.

43 Akwɛyi Ɔzhizɔsi a za wu te le sheyimo iyawu akwɛyi a ta wu ɔkpa te, 44 <<Ki so onzu uwunawuna iso ɛlɛ mo. Uŋɔ ba so kaa zɔ ɛŋɔ ma mbaa obwoshi uwu Ukpo akwɛyi ŋɔ wo isabɔ iyi bɔkɔ Omosisi a ta okpa te lo wo awu kaa lakwu kɛzɔ unga ibomo iyi ofya ŋa.>> 45 Tetete, onzu ele a wɔ kwudu akwɛyi e le mu enzu ebwu ifumo iyi bɔkɔ Ɔzhizɔsi e wo wu. Ɛlɛ i shi Ɔzhizɔsi e fye mu kwuse gedegede fo kwuwongu riba ingyi enzu. A ka ŋɔ mizhikembo iyi kwuse mbaa bɔkɔ enzu o yi mo. Tetete enzu ɔ wɔ mu ɛzhi ikikɔ ikikɔ o ka munyi wu.