1 Ɔnu uwufo kpɔ, Ɔzhizɔsi e le mu enzu apula izɔma mu kenzu unga risu ingyi Ogalili. Riba ingyi enzu ɔ gba o bo, o fula wu ma. Kwuwo kwɔlɛ, e fye mu kwoda a ŋɔma mu embyi tayi enzu ba ɔ ri mu kenzu unga embyi o she wu eyi. 2 A zɔ mba apula gyɔɔ mu aba. A za mba te: 3 <<La lu pwa! Ɔnɛgba uwufo a ka mba isomo mu utu. 4 Tabɔkɔ e le mu eyi iyi ewiri itomo, iyifo i fu mu ɔgwuzɛ akwɛyi afyi ɔ wɔ o koyimo. 5 Iyifo i fu mu kizɛ ingyi ekyi. Kwuwongwu umbwuru u yi gyɔɔ mo awu, i wɔma iyayi efyefya bi. 6 Ɔbulɛ ŋa tabɔkɔ ɔnu u le mu ilama, i shirima kwuwongu akpa yi i fyemo i ka mɛzhɛzhi mo. 7 Eyi iyifo i fu mu kizɛ ingyi awula. Awula i ma yi ma kpakyikpakyi nzhii ba i fa la imuma. 8 Eyi iyifo ba i fu mu ɛzhi iyesheshi akwɛyi i wɔma, i bulɔma akwɛyi i muma gyɔɔ; iyifo i muma izhi uwo ɛkpɛla, iyifo izhi uwo ɛkpɛrɛnyi, iyifo ba oderi.>>

9 Akwɛyi Ɔzhizɔsi a mbwa a za mba te, <<Onzu uwu e yi alu iyi ipwama, ba la pwa!>>

10 kwuye ungwu enzu o kama akwɛyi i shi wu kɛɛkyi wu mbala Wavɔngɔkiya wu wewo la wepo mbamba mbala wa mbwalu umbafo, akwɛyi o za wu te le shɔkɔ la lu mba aba ɛnyi ma. 11 Akwɛyi a za mba te, lunyi wa mbwalu, kwunvyeru ungwu irɛsu iyi oshi, Ukpo a wu yi ngwu ma-a. Enzu umba bɔkɔ o yi mu kwudu ba, akwu mu aba gba mi so mbo iso le 12 kaa,

<< <iyi bɔkɔ o ma lala ba, lo zɔngɔ yi ma mo,

iyi bɔkɔ o pwa ba lo zɔngɔ yi ma mo tete,

kwuwongu o bɔ ta mɛzhi akwɛyi Ukpo a gba yi kpa mba!>>>

13 Akwɛyi Ɔzhizɔsi e yo mbo te <<Lu zɔngɔ kwoba kwɔlɛ ma mo? Ba lu wo te bɔkɔ lu zɔngɔ aba iyifo ɛlɛ ma? La lu ngbɛ alu ŋa nɛ kaa la lu pwa iluma iyi kwoba kwɔngu: 14 Ɔnɛgba u somo e yi kyamate onzu u tanu iyi iso iyi Ukpo tayi. 15 Enzu umbafo o yi kyamate eyi iyi bɔkɔ i fu mu ɔgwuzɛ tayi. Tabɔkɔ o pwa iso iyi Ukpo, mu kwɔtɔta kwɔngu onzu uwoyi e bo akwɛyi e to iso ɛnyi ma mu egbo iyi akɔ mba. 16 Umbafo o yi kyamate eyi iyi bɔkɔ i fu mu kizɛ ingyi ekyi tayi. O na iso iyi Ukpo efyefya la ɔnyɛ. 17 Ɔbulɛ ŋa o do irima mo kwuwongu o nyama te lo ra la iso iyi Ukpo ngiri mo. kwuye ungwu o ma inyashi bwɛɛ kwuwongu iso iyi Ukpo imbwaluma, o gba kembo. 18 Umbafo kpɔ, o yi kyamate eyi iyi bɔkɔ i fu mu kizɛ ingyi awula tayi o pwa iso iyi Ukpo; 19 ɔbulɛ egbo gidigidi iyi ɛnwu, mbala igyikpɔɔ kaa lo yi eduwo, mbala ekweyi iyi apula iyi kwudu kwɔlɛ i to mbo egbo mo akwɛyi iso iyi Ukpo i fya riyi mu akɔ mba kaa li shi mbo lo wo ɛduma iyeshi mo. 20 Umbafo ba o yi kyamate eyi iyi bɔkɔ i fu mu ɛzhi iyɔlu tayi. O pwa iso iyi Ukpo, o na yi ma, akwɛyi o wa la imuma iyeshi, iyifo i muma izhi uwekpela, iyifo uwɛkpɛrɛnyi, iyifo ba oderi.>>

21 Ɔzhizɔsi a gba a ba mba kwoba ungufo kpɔ te, <<Onzu a bi upitula ɔyi akwɛyi e kpo wu kiya, nana e shi wu mu ubwu uwu kwugodo o? E fulo wu mu kiya mu kadu mo? 22 Tatayi iyinayina iyi bɔkɔ i nvyemo, Ukpo a ta yanduu mu kwudu memowu, iyinayina iyi bɔkɔ o koko yi mo, ba o wu yi ma. 23 Onzu uwu bɔkɔ e yi alu iyi pwama, ba la pwa.>>

24 Akwɛyi a za mba te, <<La lu ngbɛndu marimari mu iso iyi bɔkɔ lu pwa le lɛɛbi.>> <<Moo omudu uwu ŋɔ rawu ŋɔ mondo awu, mawu gba o mondo ŋɔ le tete, uwu bɔkɔ a ka ele mo lala, o mondo ŋɔ mawu bi. 25 Moo onzu uwunawuna uwu bɔkɔ e yi kiya, o gba o kyo wu ngyi mo kpɔ, onzu uwu bɔkɔ e yi ngyi mo ba, rikɛkyi ingyi e yi ngyi lala o na wu ngyi ma.>>

26 Ɔzhizɔsi e kyo a za mba te <<Ɛsu irimo iyi Ukpo i yi kyamate ɔnɛgba e to eyi fyafya mɛzhi tayi. 27 La utu la ɔnu, shi e yi mu ondo, shi e yi la reyi, eyi ɛnyi i kpama akwɛyi i le mu ibulɔma, u wu ba e yitu iyi bɔkɔ i wo dɛɛ ba eyi i kpama akwɛyi i le mu ibulɔma mo. 28 Ɛzhi lɛyilɛyi gba i shi eyi i kpama akwɛyi i le mu ibulɔma nzhii ba i muma le. Anga gba i gwo la iwɔma le, akwɛyi reshi ri mbwalu akwɛyi eyi i wɔ. 29 Kwuye ngwu eyi i kɔma, ee le mu ilɔma mu kworize kwɔngu akwu kwuye ngwu ilɔma .>>

30 Ɔzhizɔsi a gba a za mba te, <<Kimbe bɔkɔ ki masa ngyi mbala ɛsu irimo iyi Ukpo , nana kwoba ungwu na bɔkɔ ki ba ungwu bɔkɔ kwu zɔ ɛsu irimo iyoshi? 31 I yi kyamate kwuyi ungwu omusita ungwu kwu ka kɛɛkyi laa kwuyi ungwunanguna mu kwudu kwɔlɛ akwɛyi e so ngwu mo mɛzhi tayi. 32 Tetete, o so ngwu mo, kwu bulɔma kwu ka moshi akwɛyi kwu ka ɛwɛyi iyi utu mo lɛɛbi. Kwu bɔ ende iyɛku akwɛyi afyi o lo rigwu mu kwundu yi.>>

33 Mu aba ɛlɛ te gba Ɔzhizɔsi a ma mba mu iso iyi Ukpo izɔma le mu ɔgwuzɛ uwu bɔkɔ o do yi izɔngɔma. 34 Kwuye ungwunanguna bɔkɔ e so iso mbala mba, e so mu aba. kwuye ungwu e yi kɛɛkyi wu mbala Wavɔngɔkiya wu ba, a la mba aba ɛnyi ma lɛɛbi.

35 Mu onoyo ɔnungawu, Ɔzhizɔsi a za la Wavɔngɔkiya wu te <<La ki sama so mu ɛsɛnyi iyi risu.>> 36 Akwɛyi o lafya la riba ingyi enzu mbamba akwɛyi o fye mu kwoda mbala Ɔzhizɔsi akwɛyi o le mu luzɛ. Ada iyi embyi iyifo i yi mbala wu tete. 37 Tabɔkɔ o yi mu luzɛ mu risu, akwɛyi kporo ba kwokpo ungwɔkwu kwu ngyi akwɛyi kwu shi embyi o le mu ifyemo mu kwoda nzhii ba i shi te kwoda lakwu dingbi mu embyi tayi. 38 Kwuye kwɔngu ba Ɔzhizɔsi e yi mizhikembo iyi kwoda mu ondo ikpolomo iyawu, e fulo reshi mu gagyi. Akwɛyi Wavɔngɔkiya wu o yimo la oga o ka o nyi wu eyimo akwɛyi o yo wu te, <<Adakwogba i shi ŋɔ taka te kinzu ki ŋi tomo mo?>>

39 Akwɛyi Ɔzhizɔsi e yimo a kpa kwokpo kwɔngu ɛyi akwɛyi a za la agba iyi embyi ɛnyi te, <<Gbomo! Ki wo akpa fo!>> Kwotota kwɔngu kwokpo kwu lafyima akwɛyi kizɛ ki gbo ndii.

40 Akwɛyi e yo mbo te, <<Kimbe ki shi bɔkɔ lu wiyi te? Lunyi lu du kwu idu lu fulo mo kpɔɔ?>>

41 Izele mbala iyi i wo mbo mo gyɔɔ akwɛyi o le mu esu kwuyo iyomo te, <<Onzu ele akwu uwe bɔkɔ kwokpo mbala agba iyi embyi lala i lo wu mo te?>>