1 Tabɔkɔ Ɔzhizɔsi a lafya la ɔtɛpu, akwɛyi uvɔngɔkiya wu ukpɛnyi a za wu te, <<U zɔ kiya yese! Ekyi iyɛku mbala igwu iyesheshi ɛlɛ!>>

2 Ɔzhizɔsi a gba wu opwu te. <<Ŋɔ ma igwu iyesheshi ɛlɛ?>> <<O lafya la kwoki kwukpupkɛnyi te kwu fulo mu kadu ungufo mo; Lɛɛbi yi o fu yi mɛzhi.>>

3 Tabɔkɔ a ŋɔma mu Lɔwa undu Ɔlifu undu lu shi eyi mu ɔtɛpu, akwɛyi Opita, Ozhemisi, Ɔzhɔnu mbala Anduru o bo munyi wu wɛrɛrɛ, 4 o yo kwuyo te, <<So nzu kwuyengwu bɔkɔ ɛlɛ lɛɛbi ii bi wo? Kimbe ba akwu lɔzɔ undu lu zɔ te ɛlɛ lɛɛbi i wo mɛga?>>

5 Ɔzhizɔsi a gba mba opwu a za mba te: <<La lu ngbɛndu kaa onzu ukpukpɛnyi le kyoro yi mo mo. 6 Enzu gyɔɔ o nyɔ mu ɛnyi mi, o zɔ te, <I mi gba mi kwu Okrasi le,> akwɛyi o kyoro enzu mo gyɔɔ. 7 Kwuye ungwu lu pwa eza iyi ewa mbala kwɔdu ungwu ewa, la lu wiyi mo, moo apula ɛlɛ lɛɛbi i wo mega, ibomo iyi kwudu kwɔlɛ ba i di bo mo bɛnɛ. 8 Ekeshi oo wala esu la ewa, kwuse ungufo kwu wa la ungufo la ewa. Ɛzhi inyagiri mu kizɛ ikikɔ ikikɔ mbala lonzu iyama. Apula ɛlɛ lɛɛbi i yi kyamate kambu iyemo bɛnɛ iyi ɛnyi iyimo iyi kwomba tayi.

9 <<Lunyi la lu rima ngiri, moo o kwu yi o lo wa to keyi mɔwu kaa lo kpa yi ikpa mu udaba uwu ɛlu ikpalama uwu Azhu. Kwuwo mi luu rima midu iyi agomina mbala asu, akwɛyi luu za mba rɛnu mi. 10 Akwɛyi ilɔ iyesheshi ɛlɛ, akwu mega o ta yi anu munamuna la enzu umba kwudu kwɔlɛ lɛɛbi keyi dɛ. 11 Kwuye ungwu bɔkɔ o yi yi mo akwɛyi o bo te oo fu yi mu ugu, la lu wo idu kpu iyi kiya ingyi lu bu so midu mbo mo. Lunyi ba la lu so iso iyinaiyina iyi bɔkɔ o shi yi te la lu so mu kwuye kwɔngu mo, moo akwu lunyi gba lu yi mu iso ɛnyi isomo le mo, Kwundu uwu Ukpo gba e yi mu iso isomo ma yi le.

12 <<Umɛnɛ e to umanyi wu a yama kaa lo ngbɛ wu ma, ada tete e wo mbala umɛ wu tayi. Ɛmɛ o sele umba ete mbo mbala umba anyi mba eyi akwɛyi o ngbɛ mba ma. 13 Enzu lɛɛbi o wo anya yi kwuwo mi, onzu uwunawuna uwu bɔkɔ a rima ngiri nzhii ba imbwama, gba Ukpo a sa wu ma le.

14 <<Gba lu ma <Apula iyi kashi mbala iyira> iyi bɔkɔ i rima mbaa bɔkɔ i fate li rima mo,>> de ba onzu uwu bɔkɔ e yi mu ɛzu ɛlɛ iwama la zɔngɔ yi ma, akwɛyi enzu umba bɔkɔ o yi mu Ozhudiya awu ba lo renya lo so mu lɔwa. 15 Onzu uwu bɔkɔ e yi moshi uwu kɛnu ba la kalama naa le fye mogba te e to kiya kikpikpɛnyi fo. 16 Onzu uwu e yi mu utu, le so mogba te le to ɔmu wu mo. 17 Afyi ɛnyi aakwu afyi iyi inyashi la eko umba rifo mbala eko umba o ra la ɛmɛ mu kwuwo. 18 La lu lɛ Ukpo kaa ɛnya irima yi, lakwu mu iwo mo, 19 moo aakwu afyi iyi inyashi iyɛkuu iyi o do ma yi dɛ mo ngbaa te Ukpo e wo kwudu kwɔlɛ le nzhii ba ɔnɛ, ba o gba o ma ɛlɛ te gbee fo. 20 Akwiyi gba afyi ɛnyi o gyi yi riba ma mo, onzu uwu e do irima e yi mo; Tetete kwuwongu enzu umba Ukpo a ŋa mba, afyi ɛnyi o gyi yi riba ma. 21 Mu kwuye kwɔngu, gba onzu uwunawuna a za yi te <La lu yese, Okrasi a ŋɔ munɛ ele!> naa a za yi te <A ŋɔ aawu!> la lu nyama mo. 22 Moo enzu umba o ya ɛmba te Okrasi mbala anukenzu umba angba oo wɔ, oo wo lɔzɔ undɔkwuu mbala apula iyi kenzu iyama kaa lo kyoro enzu umba bɔkɔ Ukpo a ŋa mba awu mo, gba i wo mbo mo. 23 Kwuwo kwɔlɛ la lu ngbɛndu; mi so yi apula lɛɛbi keyi-e.

24 <<Mizhikembo iyi inyashi ɛnyi akwɛyi,

<< <ɔnu uu lo ipwu,

ɔvya ba u lemo mo;

25 elovyo i kala i fu mɛzhi,

akwɛyi Ukpo e wo apula iyi oshi lɛɛbi akpa.>

26 <<Mu kwuye kwɔngu enzu o ma Umɛ uwu Onzu te e yi mu inyɔma, aa wɔ mu amu iyoshi, la ekpasu, mbala inzumbɛku. 27 Akwɛyi a lɔ alɔgbulɔ wu ma kaa lo kpala wa mbwalu Ɔzhizɔsi umba bɔkɔ o ŋa mba ɛlu, umba eko ekpendo iyi kwudu kwɔlɛ, i na mu imbwama iyi kwudu kwɔlɛ nzhii ba mu imbwama iyoshi.

28 <<La lu vɔngɔ kiya mu uwɛyi uwu oboriyo: Akwiyi gba u le mu epu itumo akwɛyi epu i le mu iwɔma, la lu yitu te iwo i ndafo. 29 Tatayi gba lu ma apula ɛlɛ lɛɛbi, la lu yitu te kwuye kwu ndafo, kwu bo kɛlɛɛ. 30 Ongbulolo gba mi so yi le te, ɔyi ɔlɛ u rimo mo nzhii ba ɛlɛ lɛɛbi ii wo dɛ. 31 Oshi mbala ɛzhi u bomo, iso mi ba i bomo mo.

32 <<Onzu uwunawuna e yitu iyi kwɔfyi naa kwuye mo, alɔgbulɔ umba Ukpo moshi lala o yitu mo, Umɛ tete e yitu mo, Ada kɛɛkyi gba e yitu le. 33 Kwuwo kwɔngu la lu ngbɛndu! La lu rima la lu gbomo! Moo lu yitu iyi kwuyengwu bɔkɔ kwɔfyi kwɔngu kwu nyɔ mo. 34 I yi kyamate onzu uwufo uwu bɔkɔ e sheye mu luzɛ tayi: A lafya la kwogba wu mewo iyi ɛmɛgba wu, akwɛyi e shi onzonzu ɛduma wu kaa le wo, akwɛyi a za la uwu bɔkɔ e yi mu kenzugwu awu te la ngbɛndu.

35 <<Kwuwo kwongwu la lu ngbɛndu, moo lu yitu iyi kwuyengwu Ɔkwu uwu kwogba a ba gbama mo, ta a ba kwu mu onoyo, naa mutu uweka, naa mutu uwu eyi i lama i lama, naa mu awalɔkyi. 36 Akwiyi gba e ngyi kporo, le du yi te lu yi mu ondo ikpolomo mo. 37 Kiya ingyi bɔkɔ mi so yi le, mi so la uwewe te: <La lu yɛnwu ma!>>