1 Ɔzhizɔsi e fulomo mɔmɔ a ka mu kwogba mba mu Ɔnazarɛti, Wavɔngɔkiya wu ba o kama mbala wu. 2 Tabɔkɔ eyi i lama mu kwɔfyi ungwu ɛnwu igbomo, Ɔzhizɔsi e le mbo mu ɛzu izɔma mu udaba uwu ɛlu ikpalama iyi Azhu, enzu gyɔɔ umba bɔkɔ o pwa iso wu o ya kenzu.

Enzu o yo kwuyo tee, Onzu ele a vɔngɔ ɛlɛ muna? Uwe bɔkɔ e shi wu ilukwu ɛlɛ bɔkɔ e wo apula iyi amɛ ɛlɛ le! 3 Ele akwu Okapita umanyi wu Ozhemisi, Ozhosesi, Ozhuda mbala Ɔsamɔ, ɛmɛ umba Omeri mo re? Ɛmanyi wu ekokpayi o ŋɔ mbala nzu le mo re? Akwɛyi o towo wu mo.

4 Ɔzhizɔsi a za mba te, <<Anukenzu e yi inzumbɛku mu kwuse wu la mekeka iyi enzu wu la mu kwogba wu mo.>> 5 Enzu bwɛɛ te gba a pwu mba afyi gba e bo mbo ofya ma mɔmɔ le, moo e wo ɛduma iyi amɛ gyɔɔ mɔmɔ mo. 6 A kwa wu kenzu iyama bɔkɔ enzu wu o kwu idu lu fulo ma wu mo awu.

Akwɛyi Ɔzhizɔsi a fulama a ka mese mese mu ɛzu izɔma. 7 A ya Wavɔngɔkiya wu wewo la wepo mbamba ma akwɛyi a lɔ mba ma wepo wepo, e shi bo ekpasu kaa lo ra la ɛndu iyira ma.

8 A za mba te: <<La lu za la apula mu luzɛ yi ndɔlɛ mo. La lu to Upi kɛɛkyi. La lu za la kiya ingyirimo nana kwolamba naa eduwo mu amɛ yi mo, la lu za la upi kɛɛkyi. 9 La lu lo ekpoyata, la lu za la ɛriga ekpepo mo. 10 Kwogba ungwunanguna bɔkɔ o na yi, la lu ŋɔ mɔmɔ nzhii ba lu bu fulomo mu kwuse kwɔngu. 11 Kwuse ungwunaguna bɔkɔ o na yi mo ba o pwa iso yi mo, la lu bulɔ umburu umbu alɛ yi ma, kaa li za mba izɔgɔ.>>

12 Akwɛyi Wavɔngɔkiya o wɔ kwudu o ka mba anu itama te, enzu lo kwu ira ɔsu. 13 O ra la ɛndu iyira ma mu ɛnwu iyi enzu riba riba ba o ngbɛ enzu anyi umba olifu mu ɛnwu gyɔɔ ba ofya mba u bomo.

14 Ɔsu Ɛrɔdu ba a pwa iyi bɔkɔ Ɔzhizɔsi e yi mu iwomo awu, enzu gyɔɔ ba o yitu iyi Ɔzhizɔsi oo. Enzu umbafo o yi mu isomo tee, <<Ɔzhɔnu u wo obatisima gba e yimo mu kwuvɔ le, gba a fya ekpasu iyi bɔkɔ e wo apula iyi amɛ ɛlɛ te le.>>

15 Enzu umbafo o zɔ te, <<A kwu Elazha.>>

Umbafo ba o zɔ te, <<A kwu anukenzu awa, kyamate Anukenzu umbekyi tayi.>>

16 Kwuye ungwu bɔkɔ Ɛrɔdu a pwa iso iyi bɔkɔ enzu o yi mu isomo, akwɛyi a zɔ te, <<Ɛlɛ akwu Ɔzhɔnu uwu bɔkɔ mi kpolo wu kwoshi mo awu gba a gba e yimo le.>>

17 Moo Ɛrɔdu ele gba e shi te lo yi Ɔzhɔnu ma dɛɛ le, akwɛyi e shi te lo fu wu ɛyɛ kaa lo ta wu mugugyi le. Kwuwongwu e to Ɛrɔdiya oko uwu umanyi wu Ofilipu mo le gba e wo ɛlɛ le. 18 Moo Ɔzhɔnu e koko e so ɛrɔdu te, << Ɛrama iyi Omosisi i nyama ka to oko uwu umɛnɛ ŋɔ mo.>> 19 Kwuwongwɔlɛ Ɛrɔdiya a ra la Ɔzhɔnu makɔ, akwɛyi a gyi te la ngbɛ wu ma ba a fya kapa mo, 20 Ɛrɔdu a riyi iyi Ɔzhɔnu ba a gyi te le wo wu iyira mo, kwuwongu e yitu te akwu onzu ototo ba a zɛ luzɛ ɔnyɔnyɛ. Kwuye ungwunanguna bɔkɔ a pwa iso iyi Ɔzhɔnu e yi egbo mɛzhi mo; tetete ba a gyi te la pwa iso iyi Ɔzhɔnu.

21 Ɔnu ukpɛnyi, Ɛrɔdiya a fya kapa ma kaa la ngbɛ Ɔzhɔnu ma. Ɛrɔdu e wo odumudumu uwu kwɔfyi ungwu kwomba wu la ada umba reshi, la wa to keyi umba asozha mbala enzu umbakɔ umba Ogalili. 22 Kwuye ungwu bɔkɔ umokokpayi uwu Ɛrɔdiya a wɔ kwudu ungwu eko, akwɛyi e komo i she la Ɛrɔdu mbala agboga wu gyɔɔ.

Ɔsu ɛrɔdu a za la umokokpayi awu te,<<Kiya ingyinangyina ungyi bɔkɔ ŋɔ gyi za mi,mii shi ŋɔ ngyi.>> 23 Akwɛyi a vungɔma la umokokpayi awu te, <<Gba akwu i kama epo iyi ɛzhi mi gba ŋɔ nda le lala, mii shi ŋɔ ingyinangyina.>>

24 Akwɛyi a wɔ kwudu a ka za la anyi wu tee,<<Kimbe bɔkɔ mii nda?>>

A gba opwu te, <<Nda kwoshi ungwu Ɔzhɔnu uwo obatisima.>>

25 Umokokpayi ele a gbama la ɛnya kɛlɛlɛ a ka mbaa Ɔsu, akwɛyi a za wu te: <<Mi gyi te ka shi mi kwoshi ungwu Ɔzhɔnu uwo obatisima mu kaatu kekelele.>>

26 Egbo iyi Ɔsu i fomo gyɔɔ, ba a gyi te la nyi wu ma mo, kwuwongu ivungɔma wu mbala agboga umba bɔkɔ o yi mu odumudumu awu. 27 Akwɛyi ɔsu a lɔ odakari ɛnyi ma kɛlɛlɛ a za wu te, so kaa kpolo kwoshi ungwu Ɔzhɔnu u wo obatisima ma ka ka mi ngwu. Odakari awu a kama mu ugu ugyi, a ka e kpolo kwoshi ungwu Ɔzhɔnu ma, 28 ba a gba la kwoshi ungwu Ɔzhɔnu mu kaatu e bo ngwu e shi ngwu umɛ okokpayi awu akwɛyi a ka ngwu la Ɛrɔdiya anyi wu. 29 Tabɔkɔ Wavɔngɔkiya umba Ɔzhɔnu o pwa ɛlɛ, o bo to ukpɛzhi wu ma o ka o pwu wu mo mu ogariwu.

30 Wa zɛ ilɔ umba Ɔzhizɔsi o gbama o bo o kpalɛlu mu idu wu akwɛyi o zɛ wu ilɔ, mate bɔkɔ umba o wo ɛduma ba o zɔ enzu kiya. 31 Kwuye kwɔngu tabɔkɔ enzu gyɔɔ o kama o gbama kaa lo ma Ɔzhizɔsi awu, o fya kapa kaa lo ri kiya mo, akwɛyi a za mba te, <<Lunyi la lu bo mi mu riyi kpɛnyi kyoo, kaa ɛnwu li gbo yi mo.>>

32 Akwɛyi o fye mu kwoda o ka mu riyi ingyi kɛrɛrɛ. 33 Enzu gyɔɔ ba o ma mba kwuyengwu bɔkɔ o fulo mo awu, akwɛyi o wɔ mu ese ɛnyi lɛɛbi o renya malɛ o to keyi la mba o ka mɔmɔ. 34 Kwuye ungwu bɔkɔ Ɔzhizɔsi a kalama mu kwoda a ma enzu guruguru, akwɛyi inyashi mba i wo wu mo, kwuwongu o yi kyamate ilɔ umba bɔkɔ o yi u gbomo mo tayi. Akwɛyi e le mbo mu kiya riba riba izɔma.

35 Kwuye kwɔlɛ ɔnu u bo-o, akwɛyi Wavɔngɔkiya wu o bo munyi wu o za wu tee, <<Kizɛ ngyɛlɛ ri yi fɔrɔ, ɔnu ba u bo-o. 36 Uŋɔ shi enzu mbɔlɛ kaa lo so mu ɛnu mbala ese iyi bɔkɔ i yi munɛ kaa lo ya kiya la ɛmba lo ri.>>

37 Ɔzhizɔsi a gba mba opwu te, <<Lunyi la lu shi mbo kiya kaa lo ri.>>

Umba o gba wu opwu tee, <<Eduwo iyi rigbɛ ingyi onzu uwu ɛduma iyi evya ɛranda la kiya mɔsu gba ii domo le! La ki ngbɛ eduwo gyɔɔ tayi dɛɛ kaa ki ya kiya ingyirimo la ki shi mbo?>>

38 Ɔzhizɔsi e yo mbo kwuyo tee, <<Eri iyi eburedi ɛvɔ bɔkɔ lu za yi? La lu so ka lu yese.>>

Kwuye ungwu bɔkɔ o ka o yese yi mo, o za wu te, <<Eri ɛlɔ mbala emu wepo.>>

39 Akwɛyi Ɔzhizɔsi a za mba tee, lo shi enzu mbamba ka lo ŋɔma mu ɔsɛ uwu ewu ɔnwu. 40 Akwɛyi enzu mbamba o kpala izhi oderi oderi umbafo ba uwo ɛkpɛlɔ uwo ɛkpɛlɔ ba o ŋɔma lɛɛbi. 41 Ɔzhizɔsi e to eburedi ɛlɔ ɛnyi mbala emu wepo mbamba ma. Akwɛyi e yi reshe faa e yese moshi, a gbɛlɛ Ukpo ɛnyi, a mu yi ma. Akwɛyi e shi yi Wavɔngɔkiya wu kaa lo ka yi enzu. Tee gba a ka emu wepo mbamba ma la enzu mbamba lɛɛbi le tete. 42 Kpɛkpɛ mba o ri ubu e do mbo mo. 43 Lubiri luwo la lopo undu ebwebwede iyi eburedi mbala emu iyi bɔkɔ o ri ishimo, gba Wavɔngɔkiya o kpala yi ɛlu le. 44 Anzɔnu umba bɔkɔ o ri le akwu enzu edubu ɛlɔ.

45 Akwɛyi Ɔzhizɔsi a za la Wavɔngɔkiya wu te lo fye mu kwoda kɛlɛlɛ, kaa lo to keyi la wu lo sama lo so mu ɔbɛsayida, kaa uwu le shi enzu umba riba mbamba lo somo dɛ. 46 Tabɔkɔ e wo mbo ungbo, akwɛyi a ka a yama mu kadu unga lɔwa mba Ukpo ilɛma.

47 Kwuye ungwu bɔkɔ ɔnu u fyemo, kwoda kwu yi mu ekeka iyi embyi ee, Ɔzhizɔsi ba e yi kɛɛkyi wu mu ɛzhi bɛnɛ. 48 A ma te Wavɔngɔkiya wu o yi mu ebirigo igbomo mbala kwoda ipɛma, kwuwongu kwokpo kwu shi mbo eyi mɛnwu. Mu eyifumo Ɔzhizɔsi a zɛma mu kadu unga embyi a ka munyi bo, akwɛyi e wo mate a pyika munyi bo te. 49 Tabɔkɔ o mate te e yi mu luzɛ mu kadu unga embyi, o mate naa akwu ubana lo akwɛyi o byi ikyakwokwo, 50 moo tabɔkɔ lɛɛbi mba o ma wu awu, iyi i wo mbo mo.

Akwɛyi E so mbo iso kɛlɛlɛ te, <<Imi gba mi ŋɔ le, la lu yidu la lu riyi mo.>> 51 Akwɛyi e fye mu kwoda mbala mba, ba kwokpo kwu gbo ndii. Umba o ya kenzu gyɔɔ, 52 moo umba o zɔngɔ kiya ingyirimo ingyi bɔkɔ Ɔzhizɔsi e shi enzu o ri awu ma mo, kwuwongu egbo mbo ikɔma.

53 Kwuye ungwu bɔkɔ o sa embyi ma, o bo mu ɛzhi iyi Ɔgɛnɛsarɛ akwɛyi o ma kwoda ma mɔmɔ. 54 Enzu umba mɔmɔ o zɔngɔ Ɔzhizɔsi ma kɛlɛlɛ, tabɔkɔ a kalama mu kwoda awu. 55 O le mu enya irima o fye munamuna mu ɛzhi ɛnyi, o kwu enzu umba efya mu ɛkyɔ o ka mba munamuna mba bɔkɔ o pwa te e yi. 56 Munamuna mbaa bɔkɔ Ɔzhizɔsi e fye, la ese iyɛri, la ese iyɛku la ɛnu, o shi enzu umba efya mu okpulo. O kpa wu ɛshɛku tee kaa enzu umba ofya lo pwu afyi mu ɛtu iyi okpayi wu kaka, ba enzu umba bɔkɔ o pwu afyi mu okpayi wu le ofya mba u bomo.