1 Mu afyi ɛnyi, enzu gyɔɔ o gba o kpala ɛlu. Kiya ingyirimo ba ki yi mo, akwɛyi Ɔzhizɔsi a ya Wavɔngɔkiya wu ma o kpala ɛlu akwɛyi a za mba tee, 2 <<Enzu mbɔlɛ o yi mbala mi afyi ela-a ba o yi kiya ingyirimo mo, eyembembyi mbo i wo mi mo. 3 Umbafo mbo o wɔ sharu, akwiyi gba mi zɔ tee lo sheyimo la lonzu, ewo i zɛ mba ma mu ɔgwuzɛ.>>

4 Wa vɔngɔ kiya wu ba o gba wu opwu tee, i do te o fya kiya ingyirimo ingyi bɔkɔ ki do enzu gyɔɔ te mo mu ɛzhi ɛngbarara munɛ mo. 5 Ɔzhizɔsi e yo mbo kwuyo tee, <<Lu yi eburodi ɛvɔ?<< O gba wu opwu tee,

<<Erewo.>>

6 Ɔzhizɔsi a za la enzu mbamba tee, lo ŋɔma mu ɛzhi, akwɛyi e to eburedi erewo ɛnyi ma, a gbɛlɛ Ukpo ɛnyi a mu yi ma akwɛyi e shi yi Wavɔngɔkiya wu kaa lo ka enzu guruguru mbamba, akwɛyi o ka yi ma. 7 O yi emu bwɛɛ tete; Ɔzhizɔsi a gbɛlɛ Ukpo ɛnyi akwɛyi a za la Wavɔngɔkiya wu tee, lo ka yi mba ma. 8 Enzu mbamba lɛɛbi o ri i do mbo mo. Wa vɔngɔ kiya wu o kwu lobiri lu nyɔlɔma undu ebwebwede lorowo. 9 Anzɔnu mate edubu endo te gba o ri le. tabɔkɔ e shi enzu o kama, 10 Ɔzhizɔsi a ya mu kwoda mbala Wavɔngɔkiya wu o ka mu kwuko ungwu Odalamanuta.

11 Afarisi umbafo o bo o yo Ɔzhizɔsi kwuyo te ka lo pwa wu ma. O za wu tee le shi mbo kɛzɔ u nga ka wɔ moshi. 12 E fu ɛnyɔ faa akwɛyi a zɔ tee, <<I wo te bɔkɔ enzu umba ɔyi ɔlɛ o gyi kɛzɔ te? Mi so yi ongbulolo te mii shi yi kɛzɔ ka kpɛnyɛnyi mo.>> 13 Akwɛyi Ɔzhizɔsi a lafya la enzu mbamba e fyemo mu kwoda mbala Wavɔngɔkiya wu o sama o ka mu ɛsɛnyi.

14 Wa vɔngɔ kiya umba Ɔzhizɔsi o kalakwuleyi o za la eburedi gyɔɔ mo, ba o za la kukpɛnyi mu kwoda. 15 Ɔzhizɔsi a za mba tee, <<La lu ngbɛndu.>> La lu bɔ eyi kwudu kwuwongu otutu owuna uwu umba Afarisi mbala umba Ɛrɔdu.>>

16 O so mbala esu tee, << Akwu kwuwogu bɔkɔ ki za la eburedi gyɔɔ mo le gba e so le.>>

17 Ɔzhizɔsi e yitu iyi iso iyi bɔkɔ o yi mu isomo mbala esu, akwɛyi e yo mbo tee: <<Lu ma ɛbɛ mo kpɔ re na lu zɔngɔma mo ŋa bɔkɔ lu siso iyi eburedi le? Egbo yi i kɔ mu kiya inzɔngɔma te lee? 18 Lu ka la kwuleyi re? Lu yi eyi lu ma ɛbɛ mo?, Lu yi alu ba lu pwama mo? 19 Kwuye ungwu bɔkɔ mi mu eburedi ɛlɔ la enzu edubu ɛlɔ awu, lu kwu inyɔlɔma iyi lubiri undu ebwebwede luvɔ?

<<O gba wu opwu tee, <<Luwo la lopo.>>

20 << Kwuye ungwu bɔkɔ mi mu eburedi erewo awu kɔ,inyɔlɔma iyi lubiri undu ebwebwede luvɔ bɔkɔ lu shimo?>> O gba wu opwu tee <<Lorowo.>>

21 Ɔzhizɔsi a gba mba opwu tee, ifate la lu zɔngɔ yi ma ŋa moo?>>

22 Ɔzhizɔsi mbala wa mbwalu wu o bo mu Ɔbɛsayida, enzu umba mɔmɔ o bo laa upeyi, akwɛyi o kpa wu ɛshɛku tee la pwa wu afyi. 23 Ɔzhizɔsi e yi upeyi awu mu kwuwo akwɛyi a wa wu kwudu mu kwuse. E kpo wu ɔtɛ mu eyi akwɛyi e fulo wu kwuwo, akwɛyi e yo wu kwuyo tee, <<Ŋɔ ma kimbe?>>

24 Upeyi awu e yi eyi mo faa, akwɛyi a zɔ tee, <<Mi ma enzu, o yi kyamate ɛwɛyi iyi bɔkɔ i yi mu luzɛ tayi.>>

25 Ɔzhizɔsi a gba a pwa wu afyi mu eyi kpɔ. Akwɛyi ofya wu u bomo, a ya eyi wu ma akwɛyi a gba la ɛbɛ imama marimari. 26 Ɔzhizɔsi a za wu tee, sheyimo mogba, <<Kwu fye mu ese ɛlɛ mo.>>

27 Kwuye ngwu Ɔzhizɔsi a zɛ mbala Wavɔngɔkiya wu o sheye mu kwuko ungwu Oseseriya Ofilipiya, e yo mbo kwuyo mu ɔgwuzɛ tee, <<Enzu o zɔ te mi kwu uwe?>>

28 Wa vɔngɔ kiya wu o gba wu opwu tee,<<Umbafo o zɔ tee ŋɔ kwu Ɔzhɔnu u wo obatisima; umbafo ba o zɔ tee ŋɔ kwu Elazha; umbafo kpɔ o zɔ tee ŋɔ kwu anukenzu uwufo.>>

29 Ɔzhizɔsi ba e yo mbo tee, <<Lunyi kɔ, lu zɔ tee mi kwu uwe?>>

Opita a gba opwu tee, <<Uŋɔ gba ŋɔ kwu Okrasi le.>>

30 Ɔzhizɔsi e yi mbo mu kwɔlu a za mba tee, lo so ɔnzɛnzɛnyi iso i ya wu mo.

31 Ɔzhizɔsi e le mu wa mbwalu wu isomo tee, o lo Umɛ uwu Onzu inyashi gyɔɔ. Enzu umbakɔ laa ebwoshi umbakɔ laa wa zɔ ɛrama iyi Omosisi o towo wu mo, o ngbɛ wu ma, ɔnuwu kwɔfyi ungwɔla aa gba la i yimo mu kwuvɔ. 32 Ɔzhizɔsi e siso ɛlɛ gedegede, akwɛyi Opita a ka wa mɛmba e le wu mu isomo tee le so iso ɛnyi fo.

33 Tabɔkɔ Ɔzhizɔsi e gele eyi e yese Wavɔngɔkiya wu, a kpa Opita ɛyi tee <<Onzu uwoyi, pyama ka she mi kizɛ!>> Egbo ŋɔ i zɛ kya mbala iyi Ukpo mo, i zɛ mbala iyi enzu.>>

34 Akwɛyi a ya enzu mo guruguru mbala Wavɔngɔkiya wu, akwɛyi a za mba tee: <<Akwiyi gba onzu uwunawuna a gyi te la mbwalu mi, a lafya la iyi bɔkɔ egbo wu igyi , e to kwuwɛyi ngwu lukwu wu e fulo mu kito kaa la mbwalu mi.>> 35 Moo onzu uwunawuna uwu bɔkɔ a gyi tee la sa kwunyɔ wu ma mu kwudu kwɔlɛ, kwunyɔ wu kwu tomo mba Ukpo, onzu uwu bɔkɔ e to kwunyɔ wu a tamakwuwo mi mbala ilɔ iyesheshi mi, a sa kwunyɔ wu ma. 36 Kimbe bɔkɔ akwu kwule ungwu bɔkɔ onzu a fya, gba a kpala apula iyi kwudu kwɔlɛ ɛlu ba a fya kwunyɔ mba Ukpo mo? 37 Naa kimbe bɔkɔ onzu a ra ngyi a ŋanga mbala kwunyɔ wu? 38 Onzu gba e wo lovya mi mu ɔyi uwu kaya mbala ingbomo ɔlɛ, kwuyengwu bɔkɔ Imi Umɛ uwu Onzu mi bi nyɔ la inzumbɛku iyi Ada mi mbala iyi alɔgbulɔ wa kɛrikɛri awu, mii wo lovya wu tete.>>