1 Mizhikembo iyi afyi bwɛ akwɛyi Ɔzhizɔsi a gba a ka mu Okapanawu, kwuse wu akwɛyi enzu o pwa yi. 2 Enzu guruguru o ko du wu mu kwogba mbaa bɔkɔ e yi awu. Kwɔgba kwu nyɔlɔma kpakiri i kyo kenzugwu, akwɛyi Ɔzhizɔsi a ta mba anu iyi iso iyi Ukpo. 3 Enzu umbafo wendo o to ukpokapiya o ka wu mbaa Ɔzhizɔsi. 4 Kwuwongwu riba ingyi enzu, o fya ɔgwuzɛ kaa lo so la onzu uwu ofya ele mbaa Ɔzhizɔsi mo. Kwuwo kwɔlɛ, o lu kwɔtu mu kɛnu unga ugu mbaa Ɔzhizɔsi a ŋɔ akwɛyi o ngye la onzu ukpokapiya ele nzhii ba o shi wu mu idu iyi Ɔzhizɔsi la ɔkyɔ uwu inɔma wu ngyɔɔ . 5 tabɔkɔ Ɔzhizɔsi a ma ikwu idu lu fulo mbo, akwɛyi a za la ukpokapiya awu te, <<Umɛ mi, o gba la ingbomo ŋɔ o kpa ŋa.>>

6 Akwɛyi wa zɔ ɛrama iyi Omosisi umba bɔkɔ o yi mɔmɔ, o le mu anu izɔma mu egbo mbo te, 7 <<Kimbe ki shi onzu ele e siso ɛlɛ te? Ɛlɛ akwu ari! A kwu Ukpo kɛɛkyi moo uwe bɔkɔ e do te a gba la ingbomo iyi onzu a kpa?>>

8 Mu kwotota, Ɔzhizɔsi a wa iyi bɔkɔ i yi mu egbo mbo akwɛyi e yo mbo te <<Kimbe ki shi lu byi egbo ɛlɛ mu akɔ yi? 9 Iyina i ka fulele le, I za la onzu ukpokapiya ele te <Yimo, to ɔkyɔ ŋɔ ma kaa ku luzɛ ŋɔ,> nana i za wu te, <Ingbomo ŋɔ o gba yi o kpa ŋa>? 10 Kekelele mi gyi te la mi zɔ yi kaa la lu yitu te Imi, Umɛ uwu Onzu mi yi ekpasu iyi mi gba la ingbomo iyi onzu mi kpa mu kwudu kwɔlɛ....>> Akwɛyi a za la ukpokapiya awu te, 11 <<Yimo, to ɔkyɔ ŋɔ ma kaa sheye mogba.>> 12 Akwɛyi e yimo, e to ɔkyɔ wu ma akwɛyi akwu luzɛ wu gedegede la eyi mbo lɛɛbi. Ɛlɛ i shi uwewe izele akwɛyi enzu o le mu Ukpo iduma , ɔ zɔ te <<Ki di ma ɛlɛ te dɛ mo!>>

13 Ɔzhizɔsi a gba a wɔ kwudu a ka mu kenzu unga risu ingyi Ogalili. Enzu gyɔɔ o mbwalu wu mɔmɔ akwɛyi e le mbo mu iso iyi Ukpo izɔma. 14 Tabɔkɔ e yi mu luzɛ mu kenzu unga risu ngyɛngyi, akwɛyi a ma Olevi, umɛ uwu Alufiyɔ te a ŋɔma mu kwunu ungwu ɔba uwu ɛzhi inama. Akwɛyi Ɔzhizɔsi a za wu te, <<Yimo ka mbwalu mi,>> akwɛyi Olevayi e yimo a mbwalu wu.

15 Kwuye ungwu bɔkɔ Ɔzhizɔsi mbala Wavɔngɔkiya wu o ka mogba uwu Olevayi te kaa lo ri kiya ingyi onoyo, enzu gyɔɔ o mbwalu wu akwɛyi enzu wa na oba uwɛzhi mbala enzu umba ingbomo tete o le mu kiya irimo mbala Ɔzhizɔsi mbala Wavɔngɔkiya wu. 16 kwuye ungwu enzu wa zɔ ɛrama iyi Omosisi umba bɔkɔ o wɔ mu uzhi uwu Afarisi umba bɔkɔ o yi mɔmɔ, o ma te Ɔzhizɔsi e yi mu kiya irimo mbala <<enzu umba ingbomo>> mbala enzu wa na ɔba uwɛzhi, akwɛyi o yo Wavɔngɔkiya umba Ɔzhizɔsi te: <<Kimbe ki shi e ri kiya mbala enzu wa na oba uwɛzhi mbala <enzu umba ingbomo>?>>

17 Tabɔkɔ Ɔzhizɔsi a pwa, a za mba te, <<Onzu uwu bɔkɔ a mwɔnyɛ mo gba a gagyi u lo epu le, moo akwu onzu uwu bɔkɔ e yi ɔkpara uwu ɛnwu mo. Imi mi bo le, akwu kwuwo ungwu enzu umba ingbomo, moo akwu kwuwo ungwu enzu umba ototo mo.>>

18 Ɔnu uwufo Wavɔngɔkiya umba Ɔzhɔnu u wo obatisima mbala Wavɔngɔkiya umba Afarisi o ra la kenyo. Akwɛyi enzu umbafo o bo mbaa Ɔzhizɔsi akwɛyi o yo wu te, <<Kimbe ki wo bɔkɔ Wavɔngɔkiya umba Ɔzhɔnu u wo obatisima mbala Wavɔngɔkiya umba Afarisi o ra la kenyo, umba ŋa ba o ra la kenyo mo?>>

19 Akwɛyi Ɔzhizɔsi a gba mba opwu e yo mbo te, << I shoshi te ɛmɛza umba ɔnu uwu okopo lo to kenyo kwuyengwu e yi mbala mba? O do te o wo tayi mo nzhii ba kwuyengwu e yi mbala mba fo. 20 Kwuye kwu yi mu inyɔma memowu bɔkɔ o to ɔnu uwu okopo awu ma munyi mbo, mu ɔnungawu gba o to kenyo le.

21 <<Onzu e kpolo kwukokpayi mu okpayi uwepo akwɛyi a ki ngwu mu okpayi uwekyi mo. Moo gba e wo tayi, kwukokpayi ungwepo kwɔngu kwu tara okpayi uwekyi awu makwu kyo. 22 Tatayi onzu e fu ubyi uwu inyima uwepo mu ogya uwekyi mo. Moo gba e wo tayi, ubyi uwu inyima uwepo ɔnwu u yi mo akwɛyi ɔgya awu e kpo kpaa akwɛyi ubyi uwu inyima uwu ɔgya uwu ɔnwu u fu mo mɛzhi shaa. Ubyi uwepo gba o fu mu ɔgya uwepo le.>>

23 Ɔnuwu kwɔfyi ungwu ɛnwu igbomo ungufo, Ɔzhizɔsi mbala Wavɔngɔkiya wu o yi mu luzɛ mu utu uwu awa akwɛyi o mu imwuma iyi ewiri iyi utu o le mu irimo. 24 Tabɔkɔ Afarisi umba bɔkɔ o yi mɔmɔ o ma mba, akwɛyi o ko yo Ɔzhizɔsi te, <<Kimbe ki shi Wavɔngɔkiya ŋa o wo kiya ingyi bɔkɔ ɛrama i nyama te lo wo ɔnuwu kwɔfyi ungwu ɛnwu igbomo?>>

25 Ɔzhizɔsi ba a gba mba opwu e yo mbo te, <<Lu du wa yi dɛ mo re, kiya ingyi Odevidi e wo kwuyengwu bɔkɔ uwu mbala enzu umba bɔkɔ o yi mbala wu bɔkɔ lonzu lu wo mbo mo akwɛyi o gagyi kiya kaa lo ri? 26 Akwɛyi e fye mu ugu uwu Ukpo akwɛyi e to kwoburodi ungwu bɔkɔ obwoshi uwakɔ kɛɛkyi gba i fa te le ri le akwɛyi Odevidi e ri akwɛyi e shi enzu umba bɔkɔ o yi mbala wu awu o ri tete. Ɛlɛ i wo kwuye ungwu bɔkɔ Abiyata gba akwu obwoshi uwakɔ le awu.>>

27 Akwɛyi a za mba te, <<Kwɔfyi ungwu ɛnwu igbomo o wo ngwu kwuwongu onzu, moo o wo onzu kwuwongu kwɔfyi ungwu ɛnwu igbomo mo 28 Kwuwo kwɔlɛ , Umɛ uwu Onzu, gba kwu Ɔkwu uwu Kwɔfyi ungwu ɛnwu igbomo le tete.>>