1 Tabɔkɔ Ɔzhizɔsi mbala Wavɔngɔkiya wu o bo kɛlɛ mbala Ɔzhɛrusalɛ, mbala ese iyi Ɔbɛtifagi mbala Ɔbɛtani mbaa odudu uwu Olifu, akwɛyi Ɔzhizɔsi a lɔ Wavɔngɔkiya wu ma wepo, 2 a za mba te, <<La lu so mu kwuse ungwu bɔkɔ kwu yi mu keyi yi awu, ta bɔkɔ lu yi mu ifyemo mu kwuse kwɔngu, lu ma umɛ uwu ɔzɛki te o lo wu uri o ma wu ma mu kwuwɛyi, uwu bɔkɔ onzu a da ya mawu dɛɛ mo. La lu vuvu wu ma, ka la lu ka mi munɛ. 3 Gba onzu e yo yi kwuyo te, <Kimbe ki wo ba luu vuvu wu ma?> La lu za wu te Ɔkwu, e yi ugɔ wu, a ngbɛ kwuye mo, aa gba wu ma kekelele. 4 Wa vɔngɔ kiya wepo mbɔlɛ o ka mɔmɔ akwɛyi o du umɛ uwu ɔzɛki te o lo wu uri mu kwudu mbaa kenzugwu unga kwogba. tabɔkɔ o yi mu ɔzɛki awu ivuvuma, 5 akwɛyi enzu umbafo umba o rima mɔmɔ, o yo mbo te, <<Kimbe ki wo bɔkɔ luu vuvu umɛ uwu ɔzɛki ele ma?>> 6 O gba mba opwu mate bɔkɔ Ɔzhizɔsi a lɔ mba awu, akwɛyi enzu mbamba o shibobi o ka la umɛ uwu ɔzɛki ele ma. 7 Akwɛyi Wavɔngɔkiya wepo mbɔlɛ o to umɛ uwu ɔzɛki ele o ka wu la Ɔzhizɔsi, akwɛyi o fulo ekpayi mba mu kadu unga ɔzɛki akwɛyi Ɔzhizɔsi a ya mawu. 8 Enzu guruguru o fu ekpayi mba mɛzhi, umbafo ba o bɛ epu iyi bɔkɔ o bɛ mu ɔsɛ akwɛyi o fu mu ɔgwuzɛ. 9 Enzu umba bɔkɔ o yi mu keyi mbala umba bɔkɔ o yi mizhikembo o le wu mu ɛnyitomo ɔ zɔ te,

<<Osana!

<<Ɔnyɛ akwu uwu onzu uwu bɔkɔ e bo mu ɛnyi iyi Ɔkwu!>>

10 <<Ɔnyɛ akwu ɛsu irimo iyi ete nzu Odevidi iyi bɔkɔ i yi mu inyɔma!>>

<<Iduma akwiyi Ukpo moshi>>

11 Akwɛyi Ɔzhizɔsi e fye mu Ɔzhɛrusalɛ akwɛyi a ka mu ɔtɛpu. tabɔkɔ e yese ingyinangyina mɔmɔ, ba a ma te ɔnu u bo-o, akwɛyi uwu mbala Wavɔngɔkiya wu wewo la wepo mbamba o ka mu Ɔbɛtani.

12 Eyi ilama, akwɛyi Ɔzhizɔsi mbala Wavɔngɔkiya wu o lafya la kwuse ungwu Ɔbɛtani, akwɛyi lonzu lu wo wu mo. 13 E yi eyefaa akwɛyi a ma uwɛyi uwu oboriyo uwu u kpo epu biri mu keyi taayi, akwɛyi e turu a gba wu te igboshimo e du wu la imuma. Tabɔkɔ a ka kɛlɛ mu idu wu, a ma wu te u kpo epu byi, moo u muma mo kwuwongu akwu kwuyengwu imuma ngwu mo. 14 Akwɛyi a za la uwɛyi awu te, <<Onzu a gba e ri imuma iya ŋa gbee fo.>> Iyi bɔkɔ e so le, i fu Wavɔngɔkiya wu mu alu.

15 Tabɔkɔ o fyemo mu Ɔzhɛrusalɛ akwɛyi Ɔzhizɔsi a ka mu okepe uwu ɔtɛpu, akwɛyi e le mu enzu umba bɔkɔ o yi mu rishi iyama mɔmɔ irama. Eteburu mbala abɛ iyi iŋɔma iyi enzu umba bɔkɔ o ŋanga eduwo mbala umba bɔkɔ o ya atatabiri ma awu e fulo yi pɛndɛ pɛndɛ, 16 Ɔzhizɔsi a nyama kaa enzu umba o ga la ewulo awu lo zɛ mu ekepe iyi ɔtɛpu awu mo. 17 Akwɛyi e le mbo mu ɛzu izɔma, a za mba te, <<O ka mu kwokpo ungwu Ukpo te:

<<<Ɔtɛpu mi akwu

Ugu uwu bɔkɔ enzu lɛɛbi o lɛ Ukpo mawu>>

Lunyi ba lu wo ngwu mate kwofyo ungwu awɛlɔ tayi. 18 Kwuye ungwu bɔkɔ ebwoshi umbakɔ mbala wa zɔ ɛzu iyi ɛrama iyi Omosisi o pwa ɛlɛ, akwɛyi o le mu ɔgwuzɛ igagyima kaa lo ngbɛ wu ma, moo o wiyi wu, kwuwongu enzu lɛɛbi izele i wo mbo mo kwuwongu ɛzɔ wu. 19 Tabɔkɔ ɔnu u bomo, akwɛyi Ɔzhizɔsi mbala Wavɔngɔkiya wu o lafya la kwuse kwɔngu.

20 Tabɔkɔ Ɔzhizɔsi mbala Wavɔngɔkiya wu o yi mu pikama mu eyi i lama mukwoto, akwɛyi o ma uwɛyi uwu oboriyo ɔlɛ te u shirima nzhii ba mu akpa. 21 Akwɛyi Opita e lolo, akwɛyi a za la Ɔzhizɔsi te, <<U zɔ kiya, yese! Uwɛyi uwu oboriyo uwu ŋɔ ta wu kenzu ele, u shirima-a!>> 22 Akwɛyi Ɔzhizɔsi a gba mba opwu te, <<La lu kwu idu fulo mu Ukpo.>> 23 <<Imi mi so yi ongbulolo te, onzu uwunawuna uwu a za la kwoki kwɔlɛ te, <Ngbɛbwu ka so ka ta mu risu, akwiyi gba egbo iyi onzu awu i ka epo mo, uwu ba e kwu idu lu fulo te tayi gba ii wo le, Ukpo ee wo wu yi tayi. 24 Kwuwongwɔlɛ Imi mi so yi te mɛɛ, akwiyi gba lu nda Ukpo kiya inginangyina, la lu shi egbo te luu fya ngyi ma, akwɛyi Ukpo ba ee shi yi ngyi. 25 Tatayi, gba lu lɛ Ukpo kwuye ngwunangwuna, gba lu ra la amba umba onzu, la lu gba yi lu kpa wu, kaa ete yi uwoshi la gba la ingbomo yi la kpa yi tete. 26 Akwiyi gba lu gba la ingbomo iyi enzu lu kpa mba mo, tete gba ete yi uwoshi a gba la ingbomo yi aa kpa yi mo le.>>

27 Akwɛyi Ɔzhizɔsi mbala Wavɔngɔkiya wu o gba o ka mu Ɔzhɛrusalɛ. Tabɔkɔ Ɔzhizɔsi e yi mu luzɛ mɛmi iyi Ɔtɛpu, akwɛyi ebwoshi umbakɔ mbala wa zɔ ɛrama iyi Omosisi, ikyo mbala enzu umbakɔ umba Azhu, o bo o du wu. 28 Akwɛyi o yo wu te, <<So nzu, mu idomo iyi uwe bɔkɔ ŋɔ wo ɛlɛ?>> <<Uwe bɔkɔ e shi ŋɔ ekpasu te wo ɛlɛ?>>

29 Akwɛyi Ɔzhizɔsi a gba mba opwu te <<Imi tete mi yo yi kwuyo kwukpɛnyi: Gba lu gba mi opwu, Imi ba mi so yi mba mi fya idomo iyi apula ɛlɛ iwomo. 30 La lu so mi! Obatisima uwu Ɔzhɔnu e ngyi mu na? E ngyi moshi naa e ngyi mba enzu ŋa?>>

31 Akwɛyi enzu mbɔlɛ o ta amasa mbala esu te, <<Gba ki za wu te <E ngyi moshi,> ee yo nzu te <Kimbe ki shi lu nyama la iso wu mo?> 32 Ishi gba ki zɔ te, <E ngyi mbaa enzu kɔ ...>>> (O wiyi iyi enzu, moo enzu lɛɛbi ɔ nyama te Ɔzhɔnu akwu anukenzu uwu Ukpo ureyi.) 33 Kwuwo kwɔngu, ɔ gba Ɔzhizɔsi opwu te << Ki yitu mo.>> Akwɛyi a za mba te, <<Imi tete mi zɔ yi mbaa mi fya idomo iyi apula ɛlɛ iwomo mo.>>