1 kwuye ungwu odumudumu uwu ikalama uwu kiya ingyi rimo ingyi bɔkɔ ki yi otutu mo, ku shi kyamate afyi epo te akwɛyi ebwoshi umbakɔ mbala wa zɔ ɛrama iyi Omosisi, o le mu amasa ikama iyi o yi Ɔzhizɔsi mo wɛrɛrɛ kaa lo ngbɛ wu ma. 2 Umba ba o so mbala esu tee, <<Lakwu kwuyengwu odumudumu mo, moo ovyo e be yimo mekeka iyi enzu mo.>>

3 Ɔzhizɔsi ba e yi mu Ɔbɛtani mu kwogba ungwu Ɔsamɔ, onzu uwu bɔkɔ e yi ofya umbu embyi umbɔyi dɛ awu. Kwuye ungwu kiya ingyirimo ingyi onoyo, okokpayi uwufo e bo la ogya uwu anyi umba abwa, umba umbwɔ ferere, anyi mbamba o wo mbo mu uwɛyi uwu o ya wu te onadi, a wu mba ma akwɛyi e fu mbo Ɔzhizɔsi mu reshi.

4 Enzu umbafo umba bɔkɔ o yi mbala Ɔzhizɔsi mɔmɔ awu o wo amba gyɔɔ akwɛyi o so mbala esu te, <<Kimbe ki shi bɔkɔ anyi umba abwa mbɔlɛ o wo mbo ishi te? 5 Anyi mbɔlɛ gba o ya mba ma o yi eduwo iyi kari iyi onzu uwu ɛduma ma kwuyengwu Ɔzhizɔsi, akwɛyi eduwo ɛnyi o shi yi ayirewa.>> O tu okokpayi awu ma gyɔɔ.

6 Ɔzhizɔsi ba a gba mba opwu te, <<La lu lu wu afyima kyoo,>> <<Kimbe ki wo bɔkɔ lu towu mo? E wo kiya ingyesheshi e shi mi. 7 Lunyi lu yi mbala ayirewa kwuye ungunanguna ba lu mbwa mba ma kwuye ungunanguna ba lu gyi, imi ba mi yi mbala yi kwuye ungunanguna mo. 8 E wo kiya ingyi bɔkɔ i fate le wo, e fulo anyi mbɔlɛ e fu mi mɛnwu, e wo ɛlɛ kaa la nɔngɔ ukpɛzhi mi ma keyi laa ipumo mi. 9 Ongbulolo gba mi so yi le te, munamuna bɔkɔ o tanu iyi ilɔ iyesheshi ɛlɛ mu kwudu kwɔlɛ lɛɛbi o so kiya ingyi okokpayi ele e wo, kaa la ku ilolomo wu.

10 Akwɛyi Ozhuda Isikariyɔ, onzu ukpɛnyi mekeka iyi Wavɔngɔkiya wewo la wepo mbamba, a ka mbaa ebwoshi umbakɔ kaa la ya la Ɔzhizɔsi ma le shi mbo. 11 Tabɔkɔ e so mbo tayi, o mwɔnyɛ akwɛyi o gyiri kenzu mo te o shi wu eduwo. Akwɛyi e le mu ɔgwuzɛ ikagyima uwu bɔkɔ e yi Ɔzhizɔsi e shi mbo.

12 Mu kwɔfyi ungwu kwonze ungwu odumudumu uwu oburedi uwu bɔkɔ e yi otutu mo, kwuye ungwu bɔkɔ o wo isabɔ iyi oturukpe uwu ikalama, akwɛyi Wavɔngɔkiya umba Ɔzhizɔsi o yo wu kwuyo te <<Muna bɔkɔ ŋɔ gyi te la ki so kaa la ki nɔngɔ ŋɔ kizɛ mɔgɔ uwu bɔkɔ ŋɔ ri kiya ingyi ikalama?>>

13 Akwɛyi a lɔ Wavɔngɔkiya wu wepo ma, a za mba te, <<La lu so mɛmi iyi kwuse, lu ma onzu uwufo ta a za la kudu ungwu embi, la lu mbwalu wu. 14 La lu za la ɔkwu uwu kwogba ungwu e fye te, <U zɔ kiya a zɔ te: Muna ba akwu ugu uwu agboga, muna ba mi ri kiya ingyirimo ingyi ikalama mbala Wavɔngɔkiya mi? 15 Ee to yi e re ye mu ugwu uwoshi uwakuu uwu bɔkɔ o fu wu lɔgyi-a. La lu nɔngɔ wu nzu ma mɔmɔ.>> 16 Wa vɔngɔ kiya wu mbɔlɛ o ka mɛmi iyi kwuse akwɛyi o ko ma apula kyamate bɔkɔ Ɔzhizɔsi e so mbo awu. Akwɛyi o nɔngɔ kiya ingyirimo ingyi ikalama ma.

17 kwuyengwu onoyo, Ɔzhizɔsi a ka mɔmɔ mbala wavɔngɔ kiya wu wewo la wepo mbamba. 18 Tabɔkɔ o yi mu kiya irimo mu oteburu akwɛyi Ɔzhizɔsi za mba te, <<Mi so yi ongbulolo mɛɛ, onzu ukpɛnyi meka yi a ya mi ma, onzu uwu bɔkɔ e yi mu kiya irimo mbala mi.>>

19 Idu mbo i tutu mo iyɛkɛkɔ akwɛyi o le wo mu kwuyo i yomo kɛnyi kɛnyi te, <<Aku imi re?>>

20 A gba mba opwu te, <<Akwu onzu ukpɛnyi meka yi wewo la wepo mbɔlɛ,>> <<Onzu uwu bɔkɔ e lo kwuwo mu kaatu mbala mi. 21 Umɛ uwu Onzu e ri mo kyamate bɔkɔ o ka o ta mɛzhi tayi. Ikyakwokwo akwu iyi onzu uwu bɔkɔ e to Umɛ uwu Onzu a yama! Lo mba wu mo lala i bi ka wu woshi le.>>

22 Tabɔkɔ o yi mu kiya irimo bɛnɛ, Ɔzhizɔsi e to kwoburedi akwɛyi a gbɛlɛ ɛnyi, a mu ngu ma akwɛyi e shi Wavɔngɔkiya wu, a zɔ te, <<La lu na kaa lu ri. Ɛlɛ akwu ɛnwu mi .>>

23 Akwɛyi e to ago, a gbɛlɛ ɛnyi akwɛyi e shi mbo, akwɛyi lɛɛbi mba o wo.

24 Akwɛyi a za mba te, <<Mbɔlɛ o yi kyamate ɛnzhi mi umba kenzu igyirima, umba bɔkɔ o fumo kuwongwu enzu lɛɛbi tayi.>> 25 <<Mi so yi ongbulolo te, mi gba mi wo embyi umba imuma iyi ɛwɛyi mbɔlɛ fo, nzhii ba kwɔfyi kwɔngu bɔkɔ mi bi wo umbepo kwuyengwu irɛsu iyi Ukpo moshi.>>

26 O so kwɔmu akwɛyi o ka mu Lɔwa ungwu Ɔlifu.

27 Ɔzhizɔsi a za mba te, <<Lɛɛbi yi, lu gba kembo,>> <<moo o ka yi o ta mɛzhi te:

<< <Mi fya u gbo ilɔ kiya,

akwɛyi ilɔ mbamba o kpashaa.>

28 Mizhikembo iyi bɔkɔ mi yi mo mu kwuvɔ, mi to keyi la yi mi re mu Ogalili.>>

29 Akwɛyi Opita a zɔ te, <<Akwiyi gba enzu lɛɛbi o gba kembo lala, Imi mi gba kembo mo.>>

30 Ɔzhizɔsi a gba wu opwu te, <<Mi so ŋɔ ongbulolo mɛɛ, mutu uwɔnɛ, uŋɔ Opita ŋɔ zɔ kwu zɔ mi izhela dɛgba okuru e to ɛyi izhepo le.>>

31 Opita ba a kyakpɔ mu isomo gedegede te, <<Akwiyi gba mi kpomo mbala ŋa lala, mi zɔ ku zɔ ŋɔ mo.>> Te gba Wavɔngɔkiya umba bɔkɔ o shimo awu o so le tete.

32 Ɔzhizɔsi mbala Wavɔngɔkiya wu o bo mu kizɛ ingyi bɔkɔ o ya ngyi te Ɔgɛsɛmani, akwɛyi Ɔzhizɔsi a za la Wavɔngɔkiya wu te, <<La lu ŋɔma munɛ kaa la mi so tayi kaa la mi lɛ Ukpo.>> 33 E to Opita, Ozhemisi mbala Ɔzhɔnu mbala wu, akwɛyi e le mu ubugyi iwomo, egbo wu i fomo gyɔɔ. 34 Ɔzhizɔsi a za mba te, <<kwundu mi ku wo ubugyi nzhii ika mba lukwu,>> <<La lu ŋɔ munɛ, kaa la lu gbomo mbala mi.>>

35 Tabɔkɔ e turu a ka keyi bwɛɛ, akwɛyi e kpo eyi mɛzhi akwɛyi a lɛ Ukpo te, gba iwomo, kwuye ngwɔlɛ lakwu pika wu ma. 36 A zɔ te, <<Ada, Ada>> <<apula lɛɛbi i ka ŋa ma mo. To ago ɛlɛ ma munyi mi. Tetete, la kwiyi bɔkɔ mi gyi le mo, la kwiyi bɔkɔ ŋɔ gyi le.>> 37 Akwɛyi a gba a ka mbaa Wavɔngɔkiya wu akwɛyi e du mbo te o yi mu ondo ikpolomo. Akwɛyi a za la Opita te, <<Ɔsamɔ,>> <<Uŋɔ ŋɔ yi mu ondo ikpolomo? Ŋɔ do te ŋɔ gbomo kwuye bwɛɛ moo? 38 La lu rima mu igbomo kaa la lu lɛ Ukpo kaa la lu fye meka iyi imondo mo. Kwundu kwu gyi kpɔɔ, ɛnwu ba i finyashi.>>

39 A gba a ka ma mba Ukpo ilɛma kpɔɔ, a lɛ kyamate e koko e wo awu. 40 Kwuye ungwu bɔkɔ a gbama, a gba e du mbo mu ondo kpɔɔ, kuwongwu eyi mbo akwiyi ondo. O yitu iyi kiya ingyi bɔkɔ o so mo.

41 Tabɔkɔ Ɔzhizɔsi a gbama ungwola akwɛyi a za mba te, <<Lu yi mu ondo ikpolomo mbala ɛnwu ingbomo bɛnɛ? Ikpo kya ŋa! Moo kwuye kwu bo kɛlɛ-ɛ. La lu yese, Umɛ uwu Onzu o ya wu ma la enzu umba ingbomo-o. 42 La lu yimo! La ki sheyimo! Onzu uwu e to mi e shi mbo le a nyɔ le!>>

43 Tabɔkɔ e yi mu iso isomo bɛnɛ akwɛyi Ozhuda, uwu bɔkɔ akwu ukpɛnyi mekeka iyi Wavɔngɔkiya umba Ɔzhizɔsi wewo la wepo mbamba, e ngyi mbala riba ingyi asozha. O za la lopo undu ewa itomo mbala engbule, ebwoshi umbakɔ mbala wa zɔ ɛrama iyi Omosisi gba o lɔ mba le. 44 U to onzu u yama awu e shi mbo kɛzɔ kpeke te: <<Onzu uwu bɔkɔ mi kpa wu idu, uwu gba a ŋawu; La lu yi wu mo kaa la lu sheyimo.>> 45 Ozhuda a ngbɛ ngbulolo mbaa Ɔzhizɔsi akwɛyi a zɔ te, <<Gbɛgyɛ loo U zɔ kiya,>> akwɛyi a kpa wu idu. 46 Enzu mbamba o yi Ɔzhizɔsi mo akwɛyi o ra wu gbagiri. 47 Akwɛyi onzu ukpɛnyi meka iyi umba bɔkɔ o rima mɔmɔ a ka la kuwo mbaa kepo wu, a wa nga ma akwɛyi e kpolo umɛgba uwu obwoshi uwakɔ kwɔlu ma.

48 Akwɛyi Ɔzhizɔsi e yo mbo te, <<Imi mi kwu uwɛlɔ re bɔkɔ lu wɔ kudu la lopo undewa mbala engbule kaa la lu yi mi moo? 49 Ɔzhizɔsi a za mba te, kwɔfyi kwɔfyi mi yi mbala yi mu ɔtɛpu, lunyi ba lu yi mi mo. Iso iyi bɔkɔ Ukpo e so, ba i nyɔlɔma mega.>> 50 Akwɛyi Wavɔngɔkiya wu lɛɛbi o renya o shi wu. 51 Ulugbaga ɔnzɔnu uwufo uwu bɔkɔ e lo okpayi uwu ɔlinɛ bi a mbwalu Ɔzhizɔsi mizhikembo. Kwuye ungwu o yi wu mo, 52 uwu ba a lu apula wu e fu mɛzhi akwɛyi a renya a kama la uzhi uwidɔ.

53 Akwɛyi o to Ɔzhizɔsi o ka mu kwogba ungu obwoshi uwakɔ, mbaa ebwoshi umbakɔ mbala enzu umbakɔ mbala wazɔ kiya ingyi ɛrama o kpala ɛlu. 54 Opita ba a mbwalu wu sharu nzhii ba a ka mu okpulo uwu ebwoshi umbakɔ. Mɔmɔ Opita a ka ŋɔma mbala adakari mu ɔyi ivyemo.

55 Eboshi umbakɔ mbala wa to keyi lɛɛbi umba bɔkɔ o yi mɔmɔ awu o kagyi izɔgɔ iyi bɔkɔ i shi kaa lo ngbɛ Ɔzhizɔsi ma, umba ba o fya mo. 56 Enzu gyɔɔ o zɔ izɔgɔ iyi imulo, iso mbo ba akwu ongbulolo mo.

57 Akwɛyi onzu uwufo e yimo akwɛyi a mulo Ɔzhizɔsi: 58 <<Ki pwa ta bɔkɔ a zɔ te, <Mi shiri ɔtɛpu uwu bɔkɔ onzu e mbo le mo akwɛyi mu afyi ela mi gbala uwufo imbomo uwu bɔkɔ akwu uwu onzu e mbo le fo.> >> 59 Tetete izɔgɔ mba akwu engbulolo mo.

60 Akwɛyi obwoshi uwakɔ e yi a rima mu keyi mbo akwɛyi e yo Ɔzhizɔsi kwuyo te, <<Imulo iyi bɔkɔ enzu mbɔlɛ o mu o lo ŋɔ le, ŋɔ gba opwu ma yi mo re?>> 61 Ɔzhizɔsi ba a ŋɔ kyoo, a gba opwu mo.

Obwoshi uwakɔ e yo wu kwuyo kpɔ, <<Uŋɔ gba ŋɔ kwu Okrasi, Umɛ uwu Ukpo uwu esheshi le?>>

62 Ɔzhizɔsi a gba wu opwu te, <<Ee akwu imi.>> <<Ŋɔ ma Umɛ uwu Onzu te a ŋɔma mu kwuwo ngungyi ungwu Edego-ala, te a zɛ mu amwu iyoshi a nyɔ.>>

63 Oboshi uwakɔ a tara ɔmu wu ma akwɛyi a zɔ te. <<Ki kagyi izɔgɔ iyina kpɔɔ?>> 64 <<Lu pwa mate bɔkɔ e pe Ukpo ari. Amasa yi i yi te?>>

O nyama kyaa o zɔ te e do lukwu mo. 65 Akwɛyi umbafo o kwo wo mɔtɛ ikpomo; o ma wu eyi mo, o kpa wu afyi akwɛyi o za wu te, <<So nzu, onzu uwu bɔkɔ a kpa ŋa afyi!>> Adakari o to wu mo akwɛyi o kpa wu ɛmu.

66 Tabɔkɔ Opita a ŋɔma mu okpulo akwɛyi Umɛgba okokpayi uwu obwoshi uwakɔ ukpɛnyi e bo. 67 Tabɔkɔ a ma Opita te e yi mu ɔyi ivyemo, e yese wu marimari.

Akwɛyi a za wu te, << Uŋɔ ŋɔ yi mbala Ɔzhizɔsi uwu Ɔnazɛrɛti awu tete.>>

68 Uwu ba a zɔma. A zɔ te, <<Mi yitu mo ba mi zɔngɔma iso iyi bɔkɔ ŋɔ yi mu isomo mo,>> akwɛyi a wɔ kwudu iyawu mu kenzugu kɛlɛlɛ okuru e tɛyi.

69 Kwuye ungwu Umɛgba okokpayi ele a ma wu mɔmɔ, a za la enzu umba bɔkɔ o rima kɛlɛ mɔmɔ awu kpɔ te, <<Onzu ele akwu onzu ukpɛnyi mekeka mba.>> 70 Opita a zɔma kpɔ.

Kwuye bwɛɛ, enzu umba bɔkɔ o rima kɛlɛ mbala wu awu o za wu te, <<Iyesheshi ŋɔ kwu onzu ukpɛnyi meka mba, moo ŋɔ kwu onzu uwu umba Ogalili.>>

71 Akwɛyi Opita ele mu ivungɔma te iyira li du wu, akwɛyi e to la kiya te, <<Onzu ele mi yi wu mo!>>

72 Mu kwotota kwɔngu okwuru e to ɛyi ungwopo. Akwɛyi Opita e lolo iso iyi bɔkɔ Ɔzhzhizɔsi e so wu awu te: <<Keyi kaa okwuru le to ɛyi izhepo, ŋɔ zɔ kwu zɔ mi izhela.>> ɛnwu ikpo wu mo akwɛyi e le mu oga ilomo.