1 Akwɛyi Ɔzhizɔsi a za mba te, <<Ongbulolo gba mi so yi le, enzu umbafo umba bɔkɔ o ri munɛ o kpomo dɛ ishi o ma irɛsu iyi Ukpo la ekpasu meka iyi enzu wu le mo.>>

2 Mizhikembo iyi afyi ɛrɛnyi, akwɛyi Ɔzhizɔsi e to Opita, mbala Ozhemisi mbala Ɔzhɔnu akwɛyi a ka mba mu kadu unga lowa lu wɔzhi, o ka o kɔ ŋɔma kɛɛkyi mba mɔmɔ. Mu eyi mbo akwɛyi Ɔzhizɔsi a vindɔma. 3 Akwɛyi ɛriga wu akwu iruwu puratata i ka kiya ingyinangyina mu kwudu kwɔlɛ ma. 4 Kporo byi akwɛyi o ma Elazha mbala Omosisi te o wɔ o yi mu iso isomo mbala Ɔzhizɔsi.

5 Akwɛyi Opita a za la Ɔzhizɔsi te, <<U zɔ kiya, ishoshi bɔkɔ ki yi munɛ le. Kinzu ki la ɛnu ela, kwukpɛnyi la ŋa, kwukpɛnyi la Omosisi kwukpɛnyi ba lakwu ungwu Elazha.>> 6 (Opita e yitu iyi kiya ingyi bɔkɔ e so mo, kwuwongu iyi i wo mbo mo gyɔɔ.)

7 Akwɛyi kwɔmu kwu wɔ akwɛyi kwu koko mbo mo, akwɛyi opwu u wɔ mu kwɔmu kwɔngu u zɔ te: <<Ele akwu Umɛ mi uwu mi pwu idɛnyi wu. Lunyi la lu ngbɛ alu munyi wu!

8 Kporo akwɛyi o gele eyi akwɛyi o ma ɔzɛnzɛnyi mba fo, Ɔzhizɔsi kɛɛki wu gba e yi mbala mba le ŋa.

9 Tabɔkɔ o yi mu ikalama mu lowa, akwɛyi Ɔzhizɔsi e shi mbo okpa te lo za la uwewe kiya ingyi bɔkɔ umba o ma le mo, nzhii ba Umɛ uwu Onzu o yi wu mo mu kwuvɔ dɛ. 10 Wa vɔngɔ kiya mbɔlɛ o ba ɛza ɛlɛ mbala uwewe mo, iyi bɔkɔ umba o le mu isomo mayi gba akwu meka iyi iluma iyi iso iyi bɔkɔ Ɔzhizɔsi a zɔ, tee, <<O gba la iyimo la kwunyɔ.>>

11 Akwɛyi o yo wu kwuyo te, <<I wo te bɔkɔ wa zɔ ɛrama iyi Omosisi o ka te akwu mega te Elazha a nyɔ keyi dɛ?

12 Ɔzhizɔsi a gba opwu te, <<Ee te gba i yi le, Elazha a nyɔ keyi ka la nɔngɔ iyinayina ma dɛ. Tetete, i wo la bɔkɔ kwokpo ungwu Ukpo kwu zɔ te, Umɛ uwu Onzu ee yidu mu inyashi imama iyɛku akwɛyi enzu ba o towo wu mo awu? 13 Imi ba mi za yi te, Elazha e bo-o, enzu ba o wo wu kiya ingyi egbo mbo i gyi byi, mate bɔkɔ Ukpo e shi o ka mu reshi wu tayi.>>

14 Kwuye ungwu bɔkɔ o bo o du Wavɔngɔkiya umbafo mbamba, enzu guru o fula mba ma, wa zɔ ɛrama iyi Omosisi ba o yi mu kaambu irimo mbala mba. 15 tabɔkɔ enzu lɛɛbi o ma Ɔzhizɔsi, kɛlɛlɛ akwɛyi o ya kenzu gyɔ akwɛyi o rɛnya o ko bwa wu ma.

16 Ɔzhizɔsi e yo mbo kwuyo te, <<Lu ri Kaambu mbala mba i se te ?>>

17 Akwɛyi onzu uwufo meka iyi enzu umba riba mbamba e to opwu te, <<U zɔ kiya, mi ka ŋa la umɛ mi uwu e yi ɛnyɔ iyira ba e siso kego mo. 18 Kwuye ungwunaguna bɔkɔ ɛnyɔ iyira ɛlɛ i yi wu, i fya wu mɛzhi pwu, akwɛyi a wa la kwɔnzhɛ mu kenzu, akwɛyi e le mu ɛnyi ilama mesu akwɛyi i kpalama mesu tiriri. Imi mi ka wu la Wavɔngɔkiya ŋa te lo ra la eyo ɛnyɔ iyira ɛlɛ ma, umba ba o fɔma.>>

19 Ɔzhizɔsi a gba opwu te, <<Lunyi ɔyi uwu bɔkɔ lu yi ikwu idu lu fulo mo mbɔlɛ, <<Mi ŋɔ mbala yi ngbɛɛ ba kwuyengwuna? Imi mi yidu mbala yi nzhii ba kwuyengwuna>>? Akwɛyi a zɔ te, <<La lu ka mi la umɛshɛri ɔnzɔnu ele>>.

20 Akwɛyi o ka wu la umɛshɛri ɔnzɔnu ele. tabɔkɔ ɛndu iyira ɛlɛ i ma Ɔzhizɔsi, akwɛyi i shi umɛ ele, e le mu ipulama iyɛkɔkɔ, akwɛyi a ta mɛzhi akwɛyi e le mu inzomo mɛzhi la kwɔnzhɛ mu kenzu.

21 Akwɛyi Ɔzhizɔsi e yo ete wu umɛ ele te, <<Umɛ ele e yi mu ofya mbɔlɛ ipuma ngbaa kwuyengwuna>>?

A gba wu opwu te, <<Ngbaa mu imɛshɛri wu.>> 22 <<ɛnyɔ iyira i koko i ta wu mu ɔyi naa mu embyi kaa la kwu ngbɛ wu ma. Akwiyi gba ŋɔ do kiya iwomo, shɔɔkɔ ma inyashi nzu kaa mbwa la umɛ ele ma.>>

23 Ɔzhizɔsi a za mba te, lu zɔ te, <<Akwiyi gba ŋɔ do yi iwomo?>> <<Onzu e do ingyinangyina iwomo gba e kwu idu fulo mu Ukpo.>>

24 Kɛlɛlɛ akwɛyi ete wu umɛ awu e to opwu uwakwu te, <<Imi mi kwidufulo; shɔɔkɔ shi kaa ikwidufulo mi li kyomo!>> 25 Ɔzhizɔsi a ma te enzu riba o yi mu ɛnya irima iyi ɔ nyɔ munyi wu, akwɛyi a kpa kwundu ungwura kwɔngu ɛyi te, <<Uŋɔ kwundu ungwu kwu se enzu alu ma kwu gba kwu shi enzu o siso kego mo awu, mi za ŋa te, wɔma mu ɛnwu iyi umɛ ele, ki gba ki fye ma wu gbee fo.>>

26 Kwundu ungwura kwɔlɛ kwu tara ikyakwokwo akwɛyi kwu shi umɛ ele a pulama iyɛkɔkɔ, akwɛyi kwu wɔma mu ɛnwu iyi umɛ ele. Umɛ ele a nɔ mɛzhi mate ukpɛzhi tayi, akwɛyi enzu o le mu isomo te, <<Umɛ ele e kpo-o.>> 27 Akwɛyi Ɔzhizɔsi e yi umɛ ele mɔwu akwɛyi e yi wo faa akwɛyi umɛ ele e yimo a rima.

28 Mizhikembo iyi ɛnyi, akwɛyi Ɔzhizɔsi e fye mu kwogba ungufo, akwɛyi Wavɔngɔkiya wu o yo wu kwuyo kyokyokyo te, <<I wo te bɔkɔ kinzu ki fa lakwundu ungwura kwɔngu iwɔma?>>

29 Ɔzhizɔsi a gba mba opwu te, <<A kwu mu Ukpo ilɛma kɛɛkyi gba kwundu kwɔlɛ te kwu wɔma mu ɛnwu iyi onzu le.>>

30 Akwɛyi Ɔzhizɔsi mbala Wavɔngɔkiya wu o lafya la riyi ngyɛngyi akwɛyi o zɛ mu ɛzhi iyi Ogalili. Ɔzhizɔsi ba a gyi te onzu uwunawuna le yitu mba bɔkɔ umba o yi mo, 31 kwuwongu e yi mu Wavɔngɔkiya wu ɛzɔ izɔma. A za mba te, <<Ɔ ŋɔ ya kwoya ungwu Umɛ uwu Onzu la enzu, o ngbɛ wu ma, akwɛyi mizhikembo iyi afyi ela a gba la iyimo mu kwuvɔ.>> 32 Umba ba o zɔngɔ iso wu ma mo, umba ba o wiyi iyi o yo wu kwuyo iyi iluma iyi iso ɛnyi.

33 Akwɛyi Ɔzhizɔsi mbala Wavɔngɔkiya o ka mu Okapanawu. Kwuye ungwu bɔkɔ e fyemo mogba, akwɛyi Ɔzhizɔsi e yo mbo kwuyo te, <<Kaambu lu ri unga mbe mu ɔgwuzɛ?>> 34 Umba ba o gba wu opwu mo, kwuwongu mu ɔgwuzɛ ɔ ŋɔ mu kaambu irimo te uwe meka mba bɔ a ka.

35 Akwɛyi Ɔzhizɔsi a ŋɔma , akwɛyi a za la Wavɔngɔkiya wu te, <<Gba onzu a gyi te la ka le, akwu mega le to ɛwu te a ka kɛkyi le, la gba le yi kyamate umɛgba uwu enzu lɛɛbi tayi.>>

36 Akwɛyi e to umɛshɛri e shi wu a rima meka mba, akwɛyi e yi wu a kpa midu, akwɛyi a za mba te, 37 <<Onzu uwunawuna uwu bɔkɔ e wo esheshi la umɛshɛri mate ele te kwuwongu ɛnyi mi, esheshi ɛnyi e wo mi; onzu uwu bɔ a na mi, akwu imi gba a na le mo, a na onzu uwu bɔkɔ a lɔ mi le.>>

38 Akwɛyi Ɔzhɔnu a za la Ɔzhizɔsi te, <<U zɔ kiya, ki ma onzu uwufo a ra la eyombeyi mo mu enzu mu ɛnyi ŋɔ, akwɛyi ki za wu te la lafyima kwuwongu e kyo mbala nzu mo.>>

39 Ɔzhizɔsi a za mba te, <<La lu nyi wu ma mo. Kwuwongwu gba onzu ee wo apula iyi amɛ mu ɛnyi mi, kɛlɛlɛ a gba e siso iyira mi mo.>> 40 Moo onzu uwu bɔkɔ akwu ogewa nzu mo, onzu awu akwu uwanzu. 41 Imi mi so yi ongbulolo, gba onzu e shi yi omudu uwu embyi kwuwongu lu kwu umba Ɔzhizɔsi Okrasi, onzu awu a fa la rigbɛ wu inama mo.

42 <<Gba onzu e shi onzu ukpɛnyi meka iyi ɛmɛshɛri mbɔlɛ umba bɔkɔ o kwu idu lu fulo mami le te la tama, lo ma wu riko ingyɛkwu mu kwɔrɔ ka lo ta wu mu risu ishika. 43 Akwiyi gba kwuwo ŋɔ kwuu shi ŋɔ kaa ngbomo, kpolo ngwu mo. Ishoshi i ka le kaa fyemo la kwunyɔ mbaa Ukpo la kuwo kwukpɛnyi bɔkɔ ŋɔ bi fye mu ɔyi uwu bɔkɔ u nyima mo la ewo epo awu, 44 mbaa bɔkɔ ezhizhiri o kpomo mo, ɔyi ba u nyima mo. 45 Akwiyi gba kwɔlɛ ŋɔ kwuu shi ŋɔ kaa ngbomo, kpolo ngwu mo. Ishoshi i ka le kaa fye la kwunyɔ mbaa Ukpo la kwɔlɛ kwukpɛnyi bɔkɔ ŋɔ bi fye mu ɔyi uwu bɔkɔ uu nyima mo la alɛ epepo yi, 46 mbaa bɔkɔ ɛzhizhiri o kpomo mo, ɔyi ba u nyima mo. 47 Tetete, akwiyi gba kwuyi ŋɔ kwuu shi ŋɔ kaa ngbomo, wala ngwu ma. Ishoshi i ka le kaa fye la kwunyɔ mbaa Ukpo la kwuyi kwukpɛnyi bɔkɔ o bo ta ŋa mu ɔyi la eyi epepo yi, 48 mbaa bɔkɔ egbongbo umba bɔkɔ o kwu mbo mo oo kpomo mo ɔyi ba uu nyima mo.

49 Moo onzu uwunawuna o wulu wu ma mu ɔyi mate bɔkɔ isabɔ o wulu yi ma mu otopwa tayi.

50 <<Otopwa e sheshi, akwiyi gba otopwa a nyima fo, ŋɔɔ wo wu te bɔkɔ a gba aa nyima kpɔ? La lu yi kyamate otopwa tayi ka la lu ŋɔ moloto mbala enzu.>>