1 Kwuye kwowa Ɔzhizɔsi e fye mu udaba uwu Azhu akwɛyi e du onzu uwufo mɔmɔ uwu bɔkɔ kwuwo wu kwu kpokapiya. 2 Enzu umbafo mɔmɔ ba o yi mu kwuyi igagyima kaa lo yi Ɔzhizɔsi mo la ingbomo. kwuwo ngwɔlɛ o le mu eyi lomo kaa lo ma shi Ɔzhizɔsi e bo onzu ele ofya ma ɔnuwu kwɔfyi ungwu ɛnwu igbomo. 3 Ɔzhizɔsi a za la onzu uwu ofya awu te <<Bo kaa rima mu keyi te.>>

4 Akwɛyi Ɔzhizɔsi e yo enzu mbamba te <<Iyina bɔkɔ ishoshi te lo wo ɔnuwu kwɔfyi ungwu ɛnwu igbomo: lo wo iyeshi nana lo wo iyira ŋa, lɔ sa kwunyɔ nana lɔ ngbɛngwu ma ŋa?>> Umba ba o kpala kenzu mo.

5 Ɔzhizɔsi a bɔ mba eyeshii la amba kwuwongu egbo iyira mba, akwɛyi a za la onzu awu te <<Ndakwuwo ŋɔ ma.>> Tabɔkɔ onzu awu a ndakwuwo wu ma, akwɛyi kwuwo kwɔngu kwu gba odedengwu. 6 Tabɔkɔ Afarisi ɔ ma tayi, akwɛyi ɔ wɔ kwudu mu kwotota kwɔngu akwɛyi o le mu amasa ikama mbala enzu umba Ɛrɔdu kaa lɔ ngbɛ Ɔzhizɔsi ma.

7 Ɔzhizɔsi mbala Wavɔngɔkiya wu o yimo o ka mu risu ingyi Ogalili akwɛyi enzu guruguru mu Ogalili mbala Ozhudiya, 8 Ɔzhɛrusalɛ, Idumiya, mbala ɛzhi iyi ɔ sa risu ingyi Ɔzhɔda ma, mbala ese iyi Otaya mbala Ɔsidɔ o bo kwuwongu ɔ pwa iyi bɔkɔ Ɔzhizɔsi e yi mu iwomo lɛɛbi le. 9 Kwuwongwu a gyi te enzu lo kpa wu ma mo, akwɛyi Ɔzhizɔsi a za la Wavɔngɔkiya wu te lo gagyi kwoda ungwu embyi ungwɛri kaa lo ka wu. 10 Ɛlɛ e wo te kwuwongu enzu umba ofya guruguru o yi mu ishiri o ka munyi wu kaa lɔ pwa wu afyi, moo e bo enzu gyɔɔ efya ma-a. 11 Kwuye ungwunanguna bɔkɔ enzu umba ɛndu iyira ɔ ma Ɔzhizɔsi, o fumo mɛzhi mu idu wu la oga itarama te, <<Uŋɔ ŋɔ kwu Umɛ uwu Ukpo.>> 12 Ɔzhizɔsi ba a ta mba okpa te lo so onzu uwunawuna te uwu akwu onzu ele te mo.

13 Akwɛyi Ɔzhizɔsi e yimo a ka mu lɔwa akwɛyi a lɔ la enzu umba bɔkɔ uwu a gyi akwɛyi ɔ ka. 14 A ŋa enzu wewo la wepo mekeka mba kaa lo kwu wa zɛ ilɔ wu, kaa lo yi mbala wu, kaa le koko la lɔ mba ma mbaa anu itama iyi i so wu. 15 Ɔzhizɔsi e kyo e shi mbo ekpasu kaa lɔ ra la ɛndu iyira ma mu ɛnwu iyi enzu. 16 Ɛnyi iyi enzu wewo la wepo umba bɔkɔ Ɔzhizɔsi a ŋa gba i ŋɔ le: Ɔsamɔ(uwu bɔkɔ e kpo wu ɛnyi te Opita awu); 17 Ozhemisi, umɛ uwu Ɔzɛbɛdi mbala umanyiwu, Ɔzhɔnu(umba bɔkɔ e kpo mbo ɛnyi te Abonagi, iyi bɔkɔ iluma yi i yi te Ɛmɛ umba Ina awu); 18 Anduru, Ofilipu, Obatolomi, Omatiyu, Otoma, Ozhemisi umɛ uwu Alufiyɔ, Ɔtadiyɔ, Ɔsamɔ Ɔzilɔtu 19 mbala Ozhuda Isikariyɔ uwu bɔkɔ e to Ɔzhizɔsi a ya wu ma awu.

20 Akwɛyi Ɔzhizɔsi mbala Wavɔngɔkiya wu o yimo o ka mu riyɔga mba mu Okapanawu. Enzu guruguru o gba o gyiri wu ma kpɔ nzhii ba uwu mbala Wavɔngɔkiya wu o fya kwuye ka lo ri kiya mo. 21 Tabɔkɔ ɛmanyi wu o pwa tayi akwɛyi o ka kaa lo ngye wu, moo enzu umbafo o yi mu isomo te <<Ɔzhizɔsi e kporishi-e.>> 22 Akwɛyi wa zɔ ɛrama iyi Omosisi umba bɔkɔ o ngyi mu Ɔzhɛrusalɛ awu o le mu enzu isomo te <<Ɔbɛɛzɛbu, u to keyi uwu ɛndu iyira e fye mu Ɔzhizɔsi-e! Inyi gba i shi wu ekpasu gba a wa la ɛndu iyira ma mu ɛnwu iyi enzu le.>>

23 kwuwo ngwɔlɛ, Ɔzhizɔsi a ya mba ma akwɛyi e so mbo iso mu aba te, <<Onzu uwoyi e do te a ra la Onzu uwoyi umanyiwu ma? 24 Gba enzu umba ɛzhi ikpɛnyi o to ewa mbala esu, ɛzhi ɛnyi i rima mo. 25 Gba enzu umba kwogba kwukpɛnyi kwu to ewa mbala esu iyɔkpɔɔ, kwogba kwɔngu kwu kpomo. 26 Tayi, gba onzu uwoyi e to ewa mbala onzu uwoyi akwɛyi ɔ kama yɛyɛ, de ba e kpɛdɔ ma. 27 Onzu uwu bɔkɔ e fye mu kwogba ungwu onzu uwu ekpasu akwɛyi akwu wu apula ma ba a kpa wu akyi dɛ mo, e yi mo. 28 Imi la mi so yi ongbulolo tee, ingbomo iyinayina iyi onzu e ngbo, mbala Ukpo ari ipemo, o gba yi okpa wu. 29 Onzu uwunawuna uwu bɔkɔ e pe Kwundu Ɔkɛrikɛri ari ba i gba yi kpa wu iyi gbee mo. Moo ingbomo wu ɛnyi akwu iyɔkpɔɔ.>>

30 E so tayi kwuwongu o yi mu isomo te <<Ɔzhizɔsi e yi kwundu ungwura.>>

31 Mizhikembo iyi ɛnyi akwɛyi ɛmanyi mba Ɔzhizɔsi mbala anyi mba o ngyi o ri mu kwudu. Akwɛyi o lɔ onzu te la ya mba Ɔzhizɔsi ma. 32 Akwɛyi riba ingyi enzu umba o fula wu ma o za wu te <<Ɛnɛ ŋɔ mbala ɛmɛnɛ ŋɔ anzɔnu mbala ekokpayi o yi mu kwudu o gyi te lo ma ŋa.>>

33 Akwɛyi e yo mbo te <<Umbana bɔkɔ akwu ɛnɛ mi mbala ɛmɛnɛ mi?>>

34 Akwɛyi e yese enzu umba o fula wu ma awu akwɛyi a zɔ te, <<Ɛnɛ mi mbala ɛmɛnɛ mi gba o ŋɔ le! 35 Onzu uwunawuna uwu bɔkɔ e wo iyi bɔkɔ Ukpo a gyi gba akwu ɛnɛ mi mbala umɛnɛ mi le.>>