1 Mizhikembo iyi kwɔfyi ungwu ɛnwu igbomo, ɔnuwu aladi, Omeri Omagadali mbala Omeri uwufo awu o ka kaa lo kpo eyi mu Ogariwu.

2 Kporo ba ɛzhi i wo akpa iyɛkɔkɔ; kwuwongu ɔlɔgbulɔ uwu Ɔkwu a wɔ moshi a ka mu Ogariwu awu, a pya kwokyi mo mu kenzu unga Ogariwu, akwɛyi a ŋɔma mangwu. 3 Ɔlɔgbulɔ awu e lemo mate imingɔma iyi kawu tayi, ekpayi wu i wuluma purɛtɛtɛ mate owuru tayi. 4 Asozha umba o gbo Ogariwu awu o wiyi gyɔɔ laa ipwulama akwɛyi o fu mɛzhi mate ɛkpɛzhi umba enzu tayi. 5 Akwɛyi ɔlɔgbulɔ awu a za laa ekokpayi mbamba tee, <<La lu wiyi mo.>> <<Mi yitu tee Ɔzhizɔsi, uwu bɔkɔ ɔ bɔ wu iba awu gba lu yi mu igagyima le. 6 E yi munɛ fo; e yimo o, mate bɔkɔ e so awu. La lu bo kaa lu ma mbaa bɔkɔ a nɔ. 7 La lu so efyefya kaa lu za laa Wavɔngɔkiya wu tee: <E yimo mu kwuvɔ ɔ, E to keyi la yi a kaawu mu Ogalili; lu ma wu mɔmɔ!> La lu lolo iso iyi mi so yi ele.>> 8 Akwɛyi eko mbamba o lafya laa Ogariwu efyefya, laa iyi mu akɔ, tetete kwuwongu ɔnyɛ a ga mba ma, akwɛyi o ri ɛnya kaa lo so lo so Wavɔngɔkiya wu kiya ingyi ri wo. 9 Tabɔkɔ o sheyimo, akwɛyi Ɔzhizɔsi e kpolo mbo kporo akwɛyi a za mba tee, <<Egbo-mɛzhi li yi mbala yi loo.>> Akwɛyi o ka kɛlɛ mbaa wu, o fulo wu ewo mu ata wu akwɛyi o gbo wu ɔya. 10 Akwɛyi Ɔzhizɔsi a za mba tee, <<La lu wiyi mo.>> <<La lu so kaa lu za laa ɛmɛnɛ mi tee lo so mu Ogalili, ɔ ma mi mɔmɔ.>>

11 Tabɔkɔ eko mbamba o degbo mu ɔgwuzɛ bɛnɛ, akwɛyi asozha umbafo umba o kyo mu igbomo iyi Ogariwu awu ba o fye mɛmi iyi kwuse o ka o za laa ebwoshi umbakɔ apula iyi i wo lɛɛbi. 12 Akwɛyi ebwoshi umbakɔ mbala enzu umbakɔ umba Azhu, ɔ ŋɔma o ka amasa; akwɛyi o shi asozha mbamba eduwo iyɛku 13 akwɛyi o za mba tee, <<La lu zɔ tee, <<Wa vɔngɔ kiya wu o bo mu utuwɔkɔ akwɛyi o to ukpɛzhi wu ma mɛlɔ o ka wu ma kwuyengwu ki yi mu ondo. 14 Gba iso ɛlɛ i ka mu alu iyi Ogomina, kinzu ki na wu egbo ma, akwɛyi lu fye mu rɛnu mo.>> 15 Akwɛyi asozha mbamba o na eduwo ɛnyi ma akwɛyi o wo mate bɔkɔ o so mbo awu. Ɛza ɛlɛ gba Azhu ɔ gayi munamuna le nzhii ba kwɔfyi ungwu ɔnɛ.

16 Wa vɔngɔ kiya wewo laa upkɛnyi mbamba, o ka mu lɔwa mu Ogalili mbaa bɔkɔ Ɔzhizɔsi e so mbo tee lo so awu. 17 Tabɔkɔ o ma wu, akwɛyi o gbo wu ɔya, umbafo ba ɔ nyama tee akwu uwu mo. 18 Ɔzhizɔsi e turu a gba mba akwɛyi a za mba tee, <<Idomo mu oshi mbala ɛzhi lɛɛbi o shi mi yi-e. 19 Kwuwo kwɔlɛ la lu so mbaa enzu umba kwudu kwɔlɛ lɛɛbi kaa lu wo mbo Wavɔngɔkiya mi: la lu wo mbo obatisima mu ɛnyi iyi Ada, mbala iyi Umɛ, mbala iyi Kwundu uwu Ukpo, 20 la lu zɔ mba kaa lo lomo laa ɔkpa uwu bɔkɔ mi shi yi lɛɛbi. Imi mi yi mbala yi iyɔkpɔɔ nzhii ba ibomo iyi kwudu kwɔlɛ.>>