1 Mu kwuye kwɔngu Ɛsu irimo iyi kwogba ungwu oshi i yi mate emoko wewo umba bɔkɔ o ka mbaa odumudumu uwu okopo itomo akwɛyi o kwu itutula mba tee o bo kpolo ɔnu uwu okopo. 2 Ɛmɛ eko walɔ mba akwu alofo walɔ mba ba akwu wazeyi. 3 Alofo mbɔlɛ o kwu itutula mba ba ɔ za la anyi umbafo o kyo mo. 4 Wazeyi ba o o kwu itutula mba o kyo o za la anyi umbafo mu ɛgya mba. 5 Ɔnu uwu okopo ele e to kwuye e bo efya mo, akwɛyi lɛɛbi mba o fye mu ondo ilemo nzhii ba o kpondo.

6 Akwɛyi <<Mu utu uwɛka o pwa ɔ tanu tee: <Ɔnu uwu okopo e bo-o loo! La lu wɔ kwudu kaa lo kpolo wu!>

7 <<Akwɛyi emoko wewo mbɔlɛ lɛɛbi o nyeyimo, o nɔngɔ itutula mba ma. 8 Akwɛyi emoko alofo mbɔlɛ o za la wazeyi tee, <La lu gyi anyi la lu shi nzu nɛ moo itutula nzu i yi mu inyima-a.>

9 Wazeyi mbɔlɛ ba o gba mba opwu tee, <Ayimo,> <Anyi o do nzu mo mbala yi mo. La lu so kaa lu ya umbayi mbaa wa ya anyi ma.>

10 <<Te o yimo o sheye mbaa anyi iyama, akwɛyi ɔnu uwu okopo e ngyi. Emoko wazeyi mbɔlɛ o fyemo mu ugu uwu odumudumu, akwɛyi o koko riku mo.

11 <<Kwuye mbwɛ akwɛyi emoko alofo mbɔlɛ o ngyi tete akwɛyi o le mu iyama tee, <Ada, ada! Wa nzu riku mo nɛ!>

12 <<ɔnu uwu okopo ba a gba mba opwu tee, <Ongbulolo gba mi so yi le, mi yi yi mo.>

13 <<Kwuwo kwɔngu la lu ngbɛndu, moo lu yitu iyi kwɔfyi mbala kwuyengwu mi gbama mo.

14 Tete kpɔ <<Ɛsu irimo iyi oshi i yi kyamate onzu uwufo uwu e sheye mu luzɛ mu kizɛ ingyi indama akwɛyi a ya ɛmɛgba wu ma, akwɛyi e shi mbo kiya ingyi kwuwo wu kaa lɔ bɔ eyi mangyi. 15 E shi ukpɛnyi ɛtalɛnti ɛlɔ, e shi uwufo ɛtalɛnti epo, uwufo ba e shi wu kwo talɛnti kwunyi, onzonzu o shi wu mate bɔkɔ ekpasu wu i bɔ. Akwɛyi e yi mo a ka luzɛ. 16 Umɛgba uwu a na ɛtalɛnti ɛlɔ awu a ngbɛ kwuye mo, akwɛyi e le mu ewo ifulomo ma yi akwɛyi a fya ɛtalɛnti ɛlɔ e kyo kadu. 17 Tete umɛgba uwu a na ɛtalɛnti epo awu a fya ɛtalɛnti epo e kyo kadu. 18 Umɛgba uwu a na kwo talɛnti kwukpɛnyi awu ba a ka vu kwuvɔ mɛzhi akwɛyi e nvye eduwo iyi ada kwogba wu ma.

19 <<Ada kwogba uwu ɛmɛgba mbamba e to kwuye gyɔɔ dɛ gba a gbama le. Akwɛyi a ya mba ma mu idu wu kaa onzonzu le so iyi e wo mu ɛtalɛnti iyi bɔkɔ a na. 20 Umɛgba uwu a na ɛtalɛnti ɛlɔ awu e bo la ɛtalɛnti ɛlɔ iyifo e kyo kadu. Akwɛyi a za laa ada kwogba wu tee, <Ada kwogba,> <ŋɔ shi mi ɛtalɛnti ɛlo. Yese, mi fya ɛtalɛnti ɛlɔ mi kyo kadu.>

21 <<Akwɛyi ada kwogba wu a za wu tee, <Gbagba uwu ɛduma, umɛgba uwoshi, uwu o fulo idu mawu! Kwuwongwu ŋɔ wo ongbulolo mu apula bwɛ le, mi lo ŋɔ apula guruguru mɔwu. Bo kaa mwɔnyɛ mbala ada kwogba ŋa!>

22 <<Umɛgba uwu a na ɛtalɛnti epo awu e bo tete. A zɔ tee, <Ada kwogba,> <ŋɔ shi mi ɛtalɛnti epo. Yese, mi fya ɛtalɛnti epo mi kyo kadu.>

23 <<Akwɛyi ada kwogba wu a za wu tee, <Gbagba uwu ɛduma, umɛgba uwoshi, uwu o fulo idu mawu! Kwuwongwu ŋɔ wo ongbulolo mu apula bwɛ le, mi lo ŋɔ apula guruguru mɔwu. Bo kaa mwɔnyɛ mbala ada kwogba ŋa!>

24 <<Akwɛyi umɛgba uwu a na kwɔtalɛnti kwukpɛnyi awu e bo akwɛyi a za wu tee, <Ada kwogba, mi yitu te ŋɔ kɔma, ŋɔɔ lɔ mbaa ŋɔ somo mo, ŋɔ kpala ɛlu mbaa ŋɔ to eyi mo. 25 Ɛlɛ gba i lo mi iyi le gba mi nvye eduwo ŋɔ mo mɛzhi le. Yese! Na kya ŋa.>

26 Akwɛyi ada kwogba wu a za wu tee, <Umɛgba u mwakɔ ma, ulofo ele! Ŋɔ yitu tee mii lɔ mbaa mi somo mo, mi gba mi kpala ɛlu mbaa mi to eyi le mo? 27 Ba la ŋɔ bi shi eduwo mi mba wafulewo, kaa kwuyengwu mi gbama akwɛyi mi na yi mbala kwule yi.

28 Akwɛyi a zɔ tee, la lu na wu eduwo ɛnyi ma kaa lu shi yi onzu uwu e yi ɛtalɛnti uwo awu! 29 Moo uwewe uwu e yi kiya, o kyo wu ngyi mo kaa le yi ngyi gyɔɔ. Onzu uwu e yi ngyi mo ba, ɛkɛkyi iyi e yi yi awu lala o gba oo na wu yi ma. 30 La lu to umɛgba uwu umbwa le mo kaa lu ta wu mu kwudu, mu ipwu, mu riyi ingyi ɛga ilomo mbala ɛnyi ilamesu.>

31 <<Ɔnuwu Umɛ uwu Onzu a ba nyɔ mu inzumbɛku wu, mbala alɔgbulɔ umba Ukpo lɛɛbi, a ŋɔ mu ukpa wu mu inzubɛkwu iyoshi. 32 Lunzu undu kwudu kwɔlɛ lɛɛbi lu kpala ɛlu mu idu wu, akwɛyi a ka mba ma mbala esu kyamate u pya luzhi bɔkɔ a ka ilɔ mbala ɛmu ma ta yi. 33 E shi enzu watoto mu kwuwo ungwu ungyi wu, washimo ba e shi mbo mu kwuwo ungwu ɔzu wu.

34 Akwɛyi Ɔsu a za laa enzu umba o yi mu kwuwo ungyi wu tee, <La lu bo, lunyi umba lu fya esheshi iyi Adami! La lu bo kaa lu na ogu uwu irɛsu iyi bɔkɔ o nɔngɔ kwuwo yi ngba mu iyemo iyi kwudu kwɔlɛ awu. 35 Moo kwuyengwu mi yi lonzu, lu shi mi kiya mi ri, ugbembyi u wo mi mo, lu shi mi embyi mi wo, mi kwu ugboga, lu na mi ewo epo mogba yi, 36 mi yi rewa ingyi ekpayi, lu shi mi, mi pwu ofya lu yese mbaa mi, o ta mi mu ugu ugyi lu ka lu ma mi.

37 <<Akwɛyi enzu umba ototo o gba wu opwu tee, <Ɔkwu, ɔnuwuna bɔkɔ ki ma ŋa te ŋɔ yi lonzu akwɛyi ki shi ŋɔ kiya ŋɔ ri, na ugbembyi u wo ŋɔ mo akwɛyi ki shi ŋɔ embyi ŋɔ wo? 38 Ɔnuwuna bɔkɔ ki ma ŋa ugboga bɔkɔ ki na ŋa ewo epo mogba nzu, naa ŋɔ yi ugɔ uwu ekpayi akwɛyi ki kpo ŋɔ ekpayi? 39 Ɔnuwuna bɔkɔ ki ma ŋa mu ofya ipwuma naa o ta ŋa mu ugu ugyi akwɛyi ki ka ki ma ŋa?>

40 Akwɛyi Ɔsu awu a gba mba opwu tee, <Ongbulolo gba mi so yi le tee, kiya ingyinangyina ingyi lu wo laa ukpɛnyi umbwambwa mu ɛmɛnɛ mi mbɔlɛ, lu wo mi!> 41 <<Akwɛyi a za laa umba bɔkɔ o yi mu ɔzu wu awu tee, <La lu zɛ gboo lu she mi kizɛ lunyi umba bɔkɔ Ukpo a ta yi kenzu-o! La lu fye mɔyi uwu o nɔngɔ laa Onzu uwoyi mbala alɔgbulɔ wu! 42 Moo kwuyengwu lonzu lu wo mi mo, lu shi mi kiya te la mi ri mo, ugbembyi u wo mi mo ba lu shi mi embyi te la mi wo mo; 43 mi kwu ugboga mogba yi ba lu na mi mo, mi yi ugɔ uwu ekpayi lu shi mi mo; mi pwu ofya, o gba o ta mi mu ugu ugyi, ba lu yese mbaa mi mo.>

44 <<Umba tete o gba wu opwu tee, <Ɔkwu, ɔnuwuna bɔkɔ ki ma ŋa te lonzu lu wo ŋɔ mo, naa laa ugbembyi naa ŋɔ kwu ugboga naa ŋɔ yi ugɔ uwu ekpayi naa ŋɔ pwu ofya naa o ta ŋa mu ugu ugyi ba ki mbwaŋama mo?>

45 Akwɛyi Osu awu a gba mba opwu tee, <Mi so yi ongbulolo, kiya ingyinangyina ingyi bɔkɔ lu towo iwomo laa ukpɛnyi umbwambwa uwu mbɔlɛ mo, lu wo mi mo.>

46 <<Akwɛyi Ukpo e fu enzu umba bɔkɔ o wo iyi ira mu riyi ingyi inyashi iyɔkpɔɔ, enzu umba ototo ba Ukpo e shi mbo mu riyi ingyi kwunyɔ ungwɔkpɔ.>>