1 Mu kwoto biri, ebwoshi umbakɔ mbala enzu umbakɔ umba Azhu lɛɛbi o wo okwura kaa lɔ ngbɛ Ɔzhizɔsi ma. 2 O kpawakyi, akwɛyi o to wu o ka o ra wu o shi Opayileti, ɔgɔmina uwu Oromu.

3 Kwuye ungwu Ozhuda, uwu bɔkɔ e to Ɔzhizɔsi a yama awu, a ma tee Azhu ɔ ngbɛ Ɔzhizɔsi ombu uwoyi ee, akwɛyi e shi ɛnwu wu kwungbɛ akwɛyi a gba laa esiliva uwekpela iyi a na awu a ka laa ebwoshi umbakɔ mbala enzu umbakɔ. 4 Akwɛyi a zɔ tee, <<Mi ngbomo, moo mi to onzu ɔsɛkɛnɛ mi yama kaa lɔ ngbɛ wu ma.>>

Mba ba o gba wu opwu tee, <<Kimbe ki ta nzu?>> <<Ɛnyi akwu ewo ŋɔ.>>

5 Akwɛyi Ozhuda e to eduwo ɛnyi pyo mu Ɔtɛpu akwɛyi e fulo mo mɔmɔ a ka sa ɛwu karende.

6 Eboshi umbakɔ o kwu eduwo ɛnyi ma, akwɛyi ɔ zɔ tee, << Kaza nzu ka nyama kaa lo ta eduwo ɛlɛ mu kakyɔ unga Ɔtɛpu mo, kwuwongu akwu eduwo iyi ɛnzhi.>> 7 Akwɛyi ɔ ka amasa ɔ nyama akwɛyi ɔ ra la eduwo ɛnyi o ya ɛzhi, o ya yi tee, ɛzhi iyi onzu u mbo lu wu, kaa lo koko lo pwu ɛkpɛzhi agboga. 8 Ɛlɛ gba i shi enzu o ya kizɛ ngyɛngyi tee <<Ɛzhi iyi Ɛnzhii>> le nzhii ba ɔnɛ te.

9 Iwomo ɛlɛ i nyɔlɔ iso iyi bɔkɔ anukenzu Ozheremaya e so tee: <<Ɔ kwu esiliva uwekpela ɛnyi ma, inyi gba akwu eduwo iyi enzu umba Izirɛ o shi mu reshi wu le, 10 akwɛyi o ra yi o ya ɛzhi iyi onzu u mbo lu wu mate Ɔkwu a za mi tee la mi wo awu.>>

11 Kwuye kwɔngu Ɔzhizɔsi a rima mu keyi unga ogomina uwu Oromu, ogomina e yo wu tee, <<Uŋɔ gba ŋɔ kwu ɔsu uwu Azhu lee?>>

Ɔzhizɔsi a gba wu opwu tee, <<Ee, ŋɔ so yi ee lo.>>

12 Uwu ba a gba opwu mu imwilo iyi bɔkɔ ebwoshi umbakɔ mbala enzu umbakɔ ɔ mu o lo wu mo. 13 Akwɛyi Opayileti e yo wu tee <<Ŋɔ pwa izɔgɔ iyi bɔkɔ ɔ na o fulo ŋɔ le mo re?>> 14 Ɔzhizɔsi ba e towo opwu igbama mu kiya ingyinangyina ingyi bɔkɔ o mu o fulo wu. Ɛlɛ i shi ogomina kenzu iyama iyɛkɔkɔ.

15 Kwuye kwɔngu, ɔnu uwu kwɔfyi ungwu Odumudumu uwu Ikalama uwunawuna, ogomina e koko aa wa la onzu uwu ɛyɛ ukpɛnyi uwu bɔkɔ riba ingyi enzu ri mulɛ mu ugu ugyi ma. 16 Mu kwuye kwɔngu o yi onzu uwu ɛyɛ ukpɛnyi uwu bɔkɔ e ri kwɔdu ungwura, o ya wu tee Ɔzhizɔsi Obarabasi. 17 Akwɛyi kwuyengwu bɔkɔ riba ingyi enzu o kpala ɛlu, Opayileti e yo mbo tee, <<Uwe bɔkɔ lu gyi te la mi wawuma mu ugu ugyi kaa la mi shi yi? Ɔzhizɔsi Obarabasi naa Ɔzhizɔsi uwu bɔkɔ o ya wu tee Omezaya awu ŋa?>> 18 Opayileti ba a zɔngɔma tee Atekeyi umba Azhu o wo rise ingyi Ɔzhizɔsi gba o ra wu o shi wu le.

19 Kwuye ungwu Opayileti a ŋɔma mu ukpa uwu ombu izɔma, oko wu a lɔma la wu a za wu tee: <<Wa laakwuwo ŋɔ mu iso iyi onzu ɔsɛkɛnɛ awu, moo mi ma kinɔ gyɔɔ ɔnɛnɛ meka iyi ondo umbwu bɔkɔ mi wolo kwuwo wu.>>

20 Eboshi umbakɔ mbala enzu umbakɔ ba o bɔ riba ingyi enzu mbamba ewo kaa lo nda Opayileti kaa la wala Obarabasi ma, Ɔzhizɔsi ba lɔ ngbɛwu ma.

21 Opayileti e yo mbo kwuyo tee, <<Uwuna meka iyi enzu wepo mbɔlɛ bɔkɔ lu gyi te la mi wawuyima?>>

O gba wu opwu tee, << Obarabasi.>>

22 Akwɛyi Opayileti e yo mbo tee, <<Kimbe ba mi wo fo mbala Ɔzhizɔsi uwu bɔkɔ o ya wu tee Omezaya le?>>

Lɛɛbi mba o gba wu opwu tee, <<Lo kpa wu iba!>>

23 Opayileti ba e yo mbo tee, <<Ira iyina bɔkɔ onzu ele e wo?>>

Umba ba o kyo uzhi mo gbɔrɔrɔ, o zɔ tee, <<Lo kpa wu iba!>>

24 Tabɔkɔ Opayileti a ma ingyi e wo fo, moo ovyo gba aa ŋe yimo le biŋa, akwɛyi e to embyi e shishi ewo wu mo leyi iyi enzu wariba mbamba, akwɛyi a zɔ tee <<Kwuwo mi kwu kyo meka iyi lukwu undu onzu ele mo! Ɛlɛ akwu iwomo iyayi!>>

25 Enzu mbamba lɛɛbi o gba wu opwu tee, <<Ɛnzhii wu lo yi mu reshi nzu mbala ɛmɛ nzu!>>

26 Akwɛyi Opayileti a wa laa Obarabasi ma mu ugu ugyi e shi mbo; akwɛyi mizhikembo iyi o kpa Ɔzhizɔsi ikpa, a ra wu e shi tee lɔ bɔ wu iba.

27 Akwɛyi asozha umba ogomina o to Ɔzhizɔsi o ka wu mu udaba uwu ogomina akwɛyi o ya uzhi uwu asozha ma lɛɛbi te lo wu kwukpo. 28 O lu wu ekpayi wu ma akwɛyi o kpo wu ɛkiri ufyobyo. 29 O ndo ipulɛshi iyi awula o lo wu mu reshi. O to upi o lo wu mu kwuwo ungwu ungyi, akwɛyi o kwumo mu idu wu akwɛyi o wo wu ɛnɛ, o za wu te,<<Bagayidu, reshi ŋɔ lakwu ɔwu, ɔsu uwu Azhu!>> 30 O kpo wu ɔtɛ akwɛyi o na upi awu ma akwɛyi o le wu mu ifyama mu reshi. 31 Mizhikembo iyi o mbwa wu ɛnɛ iwomo mo, o lu wu ɛkiri awu ma akwɛyi o gba la ɛriga wu o lo wu, akwɛyi o ka wu ma kaa lo so kpa wu mu kwuwɛyi ungwu lukwu.

32 Tabɔkɔ o wɔ kwudu o sheyi mo, o ma onzu uwu Osarini ɛnyi wu o ya wu tee Ɔsamɔ akwɛyi o kpa wu mɛga kaa le shi kwuwɛyi ungwu lukwu ungwu Ɔzhizɔsi kwɔngu. 33 O bo mu riyi rikpɛnyi ingyi bɔkɔ o ya ngyi tee Ɔgɔlugɔta, iyi bɔkɔ iluma yi akwu tee <<Riyi ingyi Kwukɔgɔ ungwu reshi>> awu. 34 Mɔmɔ gba o to owanyi akwɛyi o yoro mbo mo mbala izɛwɔnu o shi Ɔzhizɔsi kaa le wo; tabɔkɔ a pwa mba kenzu, akwɛyi e towo mbo iwomo. 35 Mizhikembo iyi o bɔ wu iba, o nyi ɛpwu akwɛyi o ka ekpayi wu ma mbala esu. 36 Akwɛyi o ŋɔma o bɔ wu eyi mɔmɔ. 37 Akwɛyi mu kadu mbaa reshi wu, o ka ingyi bɔkɔ o kwu o fulo le tee: <<Ele akwu Ɔzhizɔsi, Ɔsu uwu Azhu 38 Awɛlɔ wa zɛ kpɔ wepo o kpa mba iba mbala Ɔzhizɔsi tete, ukpɛnyi mu kwuwo ungwungyi wu, ukpɛnyi ba mu kwuwo ungwɔzu wu.

39 Enzu umba o kaka mɔmɔ o mi reshi o kpa Ɔzhizɔsi ari: 40 akwɛyi ɔ zɔ tee, <<Uŋɔ uwu bɔkɔ ŋɔ zɔ tee ŋɔ shiri Ɔtɛpu mo akwɛyi ŋɔ gbawa laa imbomo mu afyi ɛla! Sa ɛnwu ŋɔ ma ŋa nɛ gba ŋɔ kwu umɛ uwu Ukpo! Kalama mu kwuwɛyi ungwu lukwu nɛ!>>

41 Tegba ebwoshi umbakɔ mbala wa zɔ Ɛrama mbala enzu umbakɔ o wo wu ɛnɛ le tete. 42 O zɔ tee: <<A sa enzu umbafo ma ba e do ɛnwu wu isama mo! Akwu Ɔsu uwu Izirɛ mo re? Gba a kalama mu kwuwɛyi ungwu lukwu kekelele, kinzu ki kwidu ki fulo mawu! 43 E fulo idu mu Ukpo akwɛyi a zɔ tee wakwu Umɛ uwu Ukpo. La ki ma ŋanɛ shi Ukpo a gyi tee la sa wu ma kekelele. 44 Tegba awɛlɔ wa zɛ kpɔ umba bɔkɔ o bɔ mba iba mbala wu awu o la wu kwuzu ungwu ari le tete.

45 Ina mu ɔnɔnda nzhii ba ɔnu u selemo ipwu i kpo mɛzhi ɛnyi lɛɛbi. 46 Mu kwuye ungwu ɔnu u selemo, Ɔzhizɔsi e lo oga mu opwu uwɔkwu a zɔ tee, <<Ɛlɔyi, Ɛlɔyi, lama sabatani?>> iyi o lu yi tee, <<Ukpo mi Ukpo mi, i wo te ŋɔ lu mi afyima te?>>

47 Mate bɔ umbafo mba bɔ o rima mɔmɔ o pwa ɛlɛ, ɔ zɔ tee, <<E yi mu Elazha iyama!>> 48 Mataata ɛnyi onzu ɛnyi meka mba a ri ɛnya a ka e ke to amegbere, a nyɔlɔ ngwu ma mbala owanyi uwu iwuma, a bɔ ngwu mu kwuwɛyi, akwɛyi e shi Ɔzhizɔsi kaa le wo.

49 Enzu umba bɔkɔ o shimo ba o zɔ tee, <<Shiwobi kaa la ki mate Elazha a nyɔ a ba sa wu ma!>>

50 Akwɛyi Ɔzhizɔsi e wo anu mu opwu uwɔkwu kpɔ, akwɛyi a ta kwunyɔ ma.

51 Mu kwotota kwɔngu okpayi uwu bɔkɔ e se kenzugwu unga Ɔtɛpu ma a tarama epo i wɔ mu kadu nzhii ba mu undu. Ɛzhi i wo akpa, ekyi i tarama, 52 agariwu i wuma akwɛyi enzu umba Ukpo riba umba bɔkɔ o kpomo, o yi mbo laa reyi. 53 O wɔ kwudu mu agariwu, akwɛyi mizhikembo iyi iyimo iyi Ɔzhizɔsi, o fye mu Kwuse kwɔ Kɛrikɛri, enzu riba o ma mba.

54 Kwuye ungwu bɔkɔ u to keyi uwu asozha mbala umba bɔkɔ o yi mbala wu mu Ɔzhizɔsi igboshimo o ma te ɛzhi i wo akpa mbala ingyi ri wo lɛɛbi, o wiyi akwɛyi o zɔ tee, <<Ele akwu Umɛ uwu Ukpo kego!>>

55 Ekokpayi riba o yi mɔmɔ o yi mu iyesemo shaaru, umba bɔkɔ o mbwalu Ɔzhizɔsi kwuyengwu a wɔ mu Ogalili kaa lɔ mbwa wu ma. 56 Omeri Omagadali e yi mekeka mba, mbala Omeri anyi wu Ozhemisi mbala Ɔzhɔsɛfu mbala anyi wu ɛmɛ umba Ɔzɛbɛdi.

57 Bɔkɔ ɔnu u gbomo, onzu uwu kiya ingyi kwuwo a wɔ mu Arimatiya e bo; ɛnyi wu o ya wu tee Ɔzhɔsɛfu, uwu tete akwu u vɔngɔ kiya uwu Ɔzhizɔsi. 58 A ka mbaa Opayileti akwɛyi a nda tee lo shi wu ukpɛzhi uwu Ɔzhizɔsi. Akwɛyi Opayileti a zɔ tee lo shi wu wu. 59 Akwɛyi Ɔzhɔsɛfu e to ukpɛzhi awu ma, e wuwumo mu okpayi uwu ɔlinɛ uwu bɔkɔ a wuluma sɛsɛsɛ, 60 akwɛyi e to wu a ke shi mu Ogariwu wu uwepo uwu bɔkɔ a vu mu ɔzɔ. A mbiri kwokyi ungwɔkwu e se mu kenzu unga Ogariwu awu akwɛyi a kama iyawu. 61 Omeri Omagadali mbala Omeri uwufo o ŋɔma mu ɛsɛnyi o shi eyi mu Ogariwu awu.

62 Eyi i lama ba, akwu Kwɔfyi ungwu Ɛnwu Igbomo ungwu Azhu, akwɛyi ebwoshi umbakɔ mbala Afarisi o ko fu ɛlu mbala Opayileti,

63 akwɛyi o za wu tee, <<Ada>> ki lolo kwuyengwu bɔkɔ ukyoro enzu mo awu e degbo e yi la reyi, a zɔ tee, <Mizhikembo iyi afyi ɛla mi yimo mu kwuvɔ la reyi.> 64 Kwuwo kwɔlɛ, shi kaza kaa Ogariwu awu lo gbɔ wu mo iyɛkɔkɔ nzhii ba kwɔfyi ungwɔla, kaa Wavɔngɔkiya wu lo so lo to ukpɛzhi awu ma akwɛyi o za la enzu te e yimo mu lukwu mo. Kwukyoro ungwu kembo kwɔlɛ kwu ka ira laa ungwu kwonze ma gyɔɔ.>>

65 Akwɛyi Opayileti za mba tee, <<La lu to u gbomo, lu so lu gbo Ogariwu awu ma mate bɔkɔ ekpasu yi i bɔ.>> 66 Akwɛyi o kama o gbo Ogariwu awu ma shɛ. o wo kɛzɔ unga ɔsu mu kwokyi kwɔngu akwɛyi o shi u gbomo mɔmɔ.