1 Akwɛyi Wa zɔ ɛrama iyi Omosisi mbala Afarisi umbafo o wɔ mu Ɔzhɛrusalɛ o bo mbaa Ɔzhizɔsi, akwɛyi o yo wu tee, 2 <<Iwote bɔkɔ Wavɔngɔkiya ŋa o fo ɛrama iyi asɔkwu nzu ma? O shishi ewo mo dɛ gba o ri kiya le mo!>>

3 Ɔzhizɔsi, ba a gba mba opwu tee, <<Iwote ba lunyi lu fo ɛrama iyi Ukpo mo kwuwo ungwu ukwu yi? 4 Moo Ukpo a zɔ tee, <Lomo laa ada ŋa mbala ɛnɛ ŋɔ,> <Onzu uwunawuna uwu e pe ete wu nana anyi wu ari, mega o ngbɛ wu ma.> 5 Lunyi ba lu zɔ tee gba onzu a za laa ete wu nana anyi wu te, <Ogbo uwu lu bu fya munyi mi akwu rɛshi ingyi o shi ngyi laa Ukpo,> 6 e lo ete wu mo fo, kwuwongu ukwu uwu ɛdɔ yi, iso iyi Ukpo lu mbwaya ra. 7 Lunyi enzu umba angba mbɔlɛ! Anukenzu Azaya e so kyaa kwuye ungwu e siso iyi Ukpo mu reshi yi tee!

8 << <Ukpo a zɔ tee, enzu mbɔlɛ o lo mi mo mu kenzu mbo bi,

egbo mbo ba i ndama mbaa mi.

9 Umba oo gbo mi oya shaa;

ɛzɔ mba akwu ikama iyi enzu, moo akwu iyi Ukpo mo!>

10 Akwɛyi Ɔzhizɔsi a ya riba ingyi enzu mo akwɛyi a za mba tee, <<La lu ngbɛ alu kaa la lu zɔngɔ yi ma! 11 Akwu kiya ingyi ki fye mu kenzu unga onzu gba ki tutu wu mo le mo, kiya ingyi ki wɔ mu kenzu wu gba ki tutu wu mo le.>>

12 Akwɛyi Wavɔngɔkiya wu o bo munyi wu akwɛyi o za wu tee, <<Ŋɔ yitu tee Afarisi o wo amba tabɔkɔ o pwa iso ɛlɛ?>>

13 Akwɛyi Ɔzhizɔsi a gba mba opwu tee, <<Kwuwɛyi ungwunanguna ungwu bɔkɔ akwu Adami uwu e yi moshi awu gba e gwungwu le mo, o ngbɛngwa buu.>> 14 <<La lu lu mba afyima! Umba akwu epeyi wa zɔ epeyi ɔgwuzɛ; gba upeyi a zɔ upeyi uwufo ɔgwuzɛ wepepo mbo o fu mu kwuvɔ.>>

15 Akwɛyi Opita a za wu tee, <<La nzu kwoba kwɔlɛ ma.>>

16 Ɔzhizɔsi e yo mbo tee, <<Lunyi lu degbo lu du zɔngɔ iyi bɔkɔ mi yeyi mu isomo le mo kpɔɔ? 17 Lunyi lu yitu mo? Kiya ingyinangyina ingyi ki fye mu kenzu ki re mu ubwu akwɛyi o wa ngyi ma mɛnwu. 18 Kiya ingyi ki wɔ mu kenzu ba akwu te ki wɔ mu akɔ, ingyi gba ki tutu onzu mo le. 19 Moo akwu mu akɔ gba amasa iyira iyi i bo laa onzu ingbɛma, kaya itomo, inyama, ɛlɔ, izɔgɔ itomo iyi iso iyira mbala enzu itutumo ii wɔ le. 20 Ɛlɛ gba i tutu onzu mo le. Kiya irimo mu kwuwo ungwu ɛnyinyi ki tutu onzu mo mo.>>

21 Akwɛyi Ɔzhizɔsi a lafya laa kizɛ ngyɛngyi akwɛyi a ka mu ɛzhi iyi i yi kɛlɛlɛ mbala ese iyi Otaya mbala Ɔsidɔ. 22 Okokpayi uwu Okena uwu a wɔ mu ɛzhi e bo munyi wu, laa ɔga ilomo tee, << Umɛ uwu Odevidi!>> <<Shɔɔkɔ ma eyembembyi mi nɛ Adakwogba! Umɛ mi okokpayi e yi ɛndu iyira e yi mu inyashi imama gyɔɔ.>>

23 Ɔzhizɔsi ba a gba wu opwu mo. Akwɛyi Wavɔngɔkiya wu o bo munyi wu akwɛyi o kpawu ɛshɛku o za wu tee, <<Ra wu ma! Moo aa mbwalu nzu la oga, e wo nzu uzhi!>>

24 Akwɛyi Ɔzhizɔsi gba wu opwu tee, <<Ɔ lɔ mi mbaa enzu umba Izirɛ umba o yi kyamate ilɔ umba o tomo tayi awu kɛɛkyi.>>

25 Mɔmɔɔmɔ oko awu e bo, e kwumo mu idu wu laa ɛshɛku ikpama. A za wu tee <<Adakwogba shɔɔkɔ mbwa mi ma!>>

26 Ɔzhizɔsi a gba opwu tee, <<ishoshi tee lo to kiya ingyirimo ingyi ɛmɛ umba enzu kaa lo ta ngyi laa izu mo.>>

27 Oko awu a gba opwu tee, <<Ee tegba i yi le, Adakwogba,>> <<tetete izu o ri iyi bɔkɔ i fu mɛzhi mu idu iyi adakwogba mba.>>

28 Akwɛyi Ɔzhizɔsi a gba wu opwu tee, <<Oko ele, ikwu idu lu fulo ŋɔ i mbulama! O pwa kwoya ŋa-a.>> Akwɛyi ofya mbu umɛ wu u bomo mu kwotata kwɔngwu.

29 Ɔzhizɔsi a lafya laa mɔmɔ a zɛ mu kenzu unga Risu ingyi Ogalili. Akwɛyi a yama a ka ŋɔma mu odudu. 30 Enzu riba riba o bo munyi wu, laa wa mu alɛ ma, epeyi, umba kinyɛ, wa tukenzu, mbala umbafo gyɔɔ uma ofya, o bo o shi mbo mu idu wu akwɛyi e bo mbo ofya ma. 31 Enzu o ya kenzu kwuwongu o ma wa tukenzu mu iso isomo, umba kinyɛ o ŋɔ gɛlɛ, wa mu alɛ ma o zɛma, wa peyi o ma ɛbɛ, akwɛyi enzu o gbo Ukpo oya uwu Izirɛ ma.

32 Ɔzhizɔsi a ya Wavɔngɔkiya wu ma akwɛyi a za mba tee, <<Eyembembyi iyi enzu mbɔlɛ i wo mi mo, moo o yi mbala mi afyi ela-a ba o yi kiya ingyirimo mo. Mi gyi tee la mi za mba lo sheyimo laa lonzu mo kwuwongu o bo kpo igbashi mu ɔgwuzɛ.>>

33 Wa vɔngɔ kiya wu o yo wu kwuyo tee, <<Muna ba ki fya kiya ingyirimo mu ɛzhi ɛngbarara kwɔlɛ ingyi ki shi riba ingyi enzu mbɔlɛ kaa ki do mbo mo?>>

34 Akwɛyi Ɔzhizɔsi e yo mbo tee, <<Lu yi ɛvɔ eburedi ?>>

O gba wu opwu tee, <<Eburedi erewo mbala emu bwɛ umbɛri.>>

35 Akwɛyi Ɔzhizɔsi za laa riba ingyi enzu mbamba tee lo ŋɔma mɛzhi. 36 Akwɛyi e to eburedi erewo mbala emu mbamba, a gbɛlɛ Ukpo ɛnyi, a mu yi ma akwɛyi e shi Wavɔngɔkiya wu, akwɛyi o ka enzu. 37 Enzu lɛɛbi o ri ubwu e do mbo mo. Mizhikembo iyi ɛnyi, Wavɔngɔkiya wu o kwu iyi bɔkɔ o ri i shimo i nyɔlɔ lubiri lorowo ma. 38 Enzu umba bɔkɔ o ri akwu enzu edubu endo, eko mbala ɛmɛshɛri o kyo o wa mba mo.

39 Tabɔkɔ Ɔzhizɔsi e wo enzu mbamba ungbo akwɛyi e fye mu kwoda a ka mu ɛzhi iyi Omagadani.