1 Tabɔkɔ Ɔzhizɔsi a ma riba ingyi enzu, akwɛyi a yama mu odudu a ŋɔma. Wa vɔngɔ kiya wu o ya ma o du wu o fula wu ma 2 akwɛyi e le mbo mu ɛzɔ izɔma tee:

3 Ɔnyɛ akwu uwu umba bɔkɔ o yitu tee umba ɔ kwu ayirɛwa mu kwundu;

kwuwongu irɛsu iyoshi akwu iyamba!

4 Ɔnyɛ akwu uwu umba bɔkɔ o yi mu ubwu ugyi iwomo;

moo Ukpo e gbo mbo idu mo!

5 Ɔnyɛ akwu uwu umba bɔkɔ o to ɛmba o fulo kadu mo;

moo oo fya kiya ingyi bɔkɔ Ukpo a zɔ tee ee shi mbo awu!

6 Ɔnyɛ akwu uwu umba bɔkɔ egbo mbo akwiyi lo wo iyi bɔkɔ Ukpo a gyi;

moo Ukpo a sa mba igɔ mba ma ndii!

7 Ɔnyɛ akwu uwu umba bɔkɔ o ma eyembembyi iyi enzu,

moo Ukpo a ma eyembembyi mbo tete!

8 Ɔnyɛ akwu uwu umba bɔkɔ akɔ mba i yi sɛsɛ,

moo o ma Ukpo!

9 Ɔnyɛ akwu uwu umba bɔkɔ o gyi iŋɔma iyi oloto;

moo Ukpo a ya mba tee ɛmɛ wu!

10 Ɔnyɛ akwu uwu umba bɔkɔ o lo mbo inyashi kwuwongu o wo iyi Ukpo a gyi,

moo irɛsu iyoshi akwu iyamba!

11 Ɔnyɛ akwu uwayi lunyi, kwuyengwu enzu o kpa yi ari, o lo yi inyashi, o mulo yi iyira kwuwongu lu kwu wa mbwalu mi. 12 La lu mwɔnyɛ gyɔ, moo rigbɛ ingyɛku ri rigbo yi moshi. Te gba o lo anukenzu umba o to keyi la yi inyashi le tete.

13 Lunyi lu yi kyamate otopwa tayi mu kwudu kwɔlɛ. Gba otopwa e yi rɛnu fo, ɔgwuzɛ uwu o wo kaa laa gba laa rɛnu u yi mo. Oo fuwumo akwɛyi enzu oo kpa wu ata bi ŋa moo e yi rimbu fo.

14 Lunyi lu yi kyamate ɛbɛ iyi kwudu kwɔlɛ tayi. Kwuse ungwu kwu yi mu kadu unga lɔwa kwu nvyemo mo. 15 Tatayi ɔ byi kambwu ɔyi o kpo ngo kiya mo. Oo shi ngo mu kana unga ɔyi kaa onzonzu la ma ɛbɛ mogba. 16 Tegba i fa te ɛbɛ yi li lemo mba enzu le, kaa lo ma ɛduma yi iyeshi akwɛyi ɔɔ du Ete yi uwoshi ma.

17 Akwɛyi Ɔzhizɔsi a za mba tee, <<La lu byi egbo tee, mi bo tee la mi ngbɛ Ɛrama iyi Omosisi naa ɛzɔ iyi umba anukenzu ma mo. Imi mi bo tee la mi ngbɛ yi ma mo, Imi mi bo tee la mi nyɔlɔ yi ma. 18 Ongbulolo gba mi so yi ele tee, nzhii ba kwudu kwɔlɛ mbala oshi ii bo mo, kwɔzu kwukpɛnyi naa kwulakyɛ ungwu Ɛrama iyi Ukpo ɛlɛ o ngbɛ yi ma mo, kpɛkpɛyi i nyɔlɔ ma. 19 Kwuwo kwɔlɛ, onzu uwunawuna uwu e towo imbwambwa iyi ɔkpa ɛlɛ imbwaluma, akwɛyi a gba a zɔ umbafo tete kaa lo mbwalu mo, onzu awu aakwu umbwambwa mu Irɛsu iyoshi. Tatayi, onzu uwunawuna uwu a mbwalu Ɛrama ɛlɛ akwɛyi a gba a zɔ umbafo tete tee lo mbwalu yi , onzu awu aakwu onzu uwakwu Irɛsu iyoshi. 20 Kwuwo kwɔlɛ, la mi so yi tee, gba ototo yi a pyika uwu Afarisi mbala uwu Wazɔ ɛrama ma mo, lu fye mu Irɛsu iyoshi gbee mo.

21 <<Lu pwa o za laa enzu mekyi tee, <La lu ngbɛ onzu mo; onzu uwu a ngbɛ onzu o zɔ wu ombu uwoyi.> 22 Imi ba mi gyite la mi za yi tee: onzu uwunawuna uwu e wo amba mbala umanyi wu, o zɔ wu ombu uwoyi, onzu uwunawuna uwu a ya umanyiwu tee, <Onzu uwumbwa ele!> o ya wu ma mu udaba uwu ɔsu, onzu uwunawuna uwu a ya umanyi wu tee, orondo ele, e yi mu kwumbɛ ungwu kwoba ungwu ɔyi. 23 Kwuwo kwɔlɛ, gba ŋɔ ka laa Ukpo rɛshi mu rɛbɛ ingyi Ukpo, ŋɔ yɔmɔ akwɛyi ŋɔ lolo tee umɛnɛ ŋɔ a ra laa amba ŋa mu akɔ, 24 lafya laa rɛshi ŋɔ mu rɛbɛ mɔmɔ kaa so la lu lo mesu, la lu zɔ rɛnu yi ma dɛ akwɛyi gba bo mbaa rɛshi ŋɔ iwomo laa Ukpo.

25 Gba onzu uwufo lo ewa ŋa akwɛyi e to ŋɔ e sheye mu ɔkwɔtu, kpapyi kaa lo mesu mbala wu kwuyengwu lu du ba mu ɔkwɔtu mo. Moo akwu tayi mo e do te aa ra ŋa e lo u zɔ ombu mɔwu akwɛyi a ra ŋa e shi ɔlɔgbulɔ kaa la ta ŋa mu ugu ugyi. 26 Mi so ŋɔ, ŋɔɔ ŋɔ mɔmɔ nzhii ba eduwo iyi ŋɔ yi yi, ŋɔɔ mbwa yi iwama dɛ gba oo wa ŋa ma mu ugu ugyi awu le.

27 <<Lu pwa ɔ zɔ tee, <Lo yama mo>. 28 Imi ba mi za yi te, gba onzu e yese okokpayi la egbo iyi inɔma mbalawu, a mbwa wu iyama mu egbo wu oo. 29 Kwuwo kwɔlɛ, gba kwuyi ŋɔ ungwu ungyi kwunu shi ŋɔ ŋɔɔ ngbomo, wa la ngwu tama! I shoshi te kiya ngyi ɛnwu ŋɔ kikpɛnyi la ki to mo i shi ika iyi bɔkɔ o to ɛnwu ŋɔ ngyɔɔ oo ta mu kwogba ungwu ɔyi. 30 Gba kwuwo ungwu ungyi ŋɔ kwuu shi ŋɔ ŋɔɔ ngbomo, kpolo ngwu ta ngwu ma! I shoshi kaa kwɔlɛ ŋɔ kwukpɛnyi laa ku tomo kaa ɛnwu ŋɔ ngyɔɔ i bi fye mu kwogba ungwu ɔyi mo.

31 Lu pwa <<ɔ zɔ tee, <Onzu uwunawuna uwu a ra la oko wu ma, ba mɛga le shi wu kwupwu ungwu irama.> 32 Imi ba mi za yi tee: gba onzu a ra la oko wu ma, ba akwu kwuwo ungwu kaya itomo mo, e yi kwungbɛ kwuwongu a ta wu kaya itomo gba oko awu a ya ɔnu ɔwa; onzu uwu e to oko uwu o ra wu ma, ba e yi mu kaya itomo tete.

33 Lu gba lu pwa kpɔ tee, mekyi o za la enzu tee, <La lu fo ishi iyi bɔkɔ lu to mu idu iyi Ukpo ma mo, la lu nyɔlɔ ishi iyi lu to mu idu iyi Ɔkwu.> 34 Imi ba mi so yi tee: la lu vungɔma mo ndii gba lu to ishi. La lu vungɔma laa oshi mo, moo oshi akwu ukpa uwu ɛsu iyi Ukpo; 35 naa laa ɛzhi ŋa, moo ɛzhi akwu kiya ingyi alɛ ifulomo wu; naa Ɔzhɛrusalɛ ŋa, moo akwu kwuse ungwu Ɔsu uwakwuu. 36 Uŋɔ lala ki to laa reshi ŋɔ mo, kwuwongu uŋɔ ŋɔ do tee ŋɔ wo kwunyi ŋɔ kwukpɛnyi te kwuruwu naa kwugyi mo. 37 Kaa <Ee> yi la kwu ee, <Aayimo> yi ba la kwu Aayimo - iyi ŋɔ so i pyika ɛlɛ ma i wɔ mba Onzu uwoyi.

38 <<Lu pwa o zɔ tee, <Gba onzu a ngbɛ kwuyi ungwu onzu uwufo mo, ungwa wu tete o ngbɛ ngwu ma, gba onzu a mu onzu uwufo kwunyi ma, o mu wu ungwa wu ma tete.> 39 Imi ba mi za yi tee: la lu wakwusa laa onzu uwu e ngbo yi mo mo. Gba onzu a kpa ŋa afyi mu kwɔngba ungwungyi, shi wu kwɔngba ungwɔzu tete. 40 Gba onzu e lo ewa ŋa kaa la na ŋa ɔmu ma, lafya laa origa ŋa ka shi wu tete. 41 Gba osozha a kpa ŋa mɛga te to ewulo iyi ewa wu kaa mbwalu wu nzhii ba kwomelu kwunyi, so mbala wu emelu epo. 42 Onzu uwu a nda ŋa kiya, shi wu; ki kwu wu onzu uwu e bo tee aa na kwokpa munyi ŋɔ ɔsu mo.

43 <<Lu pwa mate bɔkɔ o so yi mekyi tee, <Pwu idɛnyi iyi onzu uwu a nɔ a kpa ŋa, wo anya iyi ogewa ŋa.> 44 Imi ba mi so yi tee: la lu pwu idɛnyi iyi agewa yi, la lu lɛ Ukpo kwuwongu enzu umba bɔkɔ o lo yi inyashi, 45 iwomo ɛlɛ i zɔ tee lunyi lu kwu ɛmɛ shɛ umba Ete yi uwu e yi moshi. Uwu ee shi kaa ɔnu wu lu lama lu shi enzu umba ira mbala umbeshi, a gba e shi embyi laa enzu umba o wo iyeshi mbala umba o wo iyira. 46 Gba lu pwu idɛnyi iyi enzu umba bɔkɔ o pwu idɛnyi yi kɛɛkyi, kwuwongu kwuwongumbe bɔkɔ Ukpo e shi yi rigbɛ? Wa na oba uwɛzhi lala o wo ɛlɛ tete! 47 Gba lu gbɛlɛ ɛmanyi yi kɛɛkyi ɛnyi, kimbe ba lu yi mu iwomo iyi bɔkɔ i ka iyi enzu umbafo mo? Enzu umba o mbwalu Ukpo mo lala oo wo ɛlɛ tete! 48 La lu yi kwungbɛ mo - kyamate bɔkɔ Ete yi uwoshi e yi kwungbɛ mo awu!