1 Ɔzhizɔsi a ya Wavɔngɔkiya wu wewo la wepo ma akwɛyi e shi mbo ekpasu kaa lo wa la ɛndu iyira ma mbala ofya umbunambuna ibomo. 2 Ɛnyi iyi wa zɛ ilɔ wewo la wepo mbɔlɛ o ya yi tee: Uwu kwonze akwu, Ɔsayimɔ (uwu o ya wu tee Opita awu) mbala umanyiwu Anduru; Ozhemisi umɛ uwu Ɔzɛbɛdi, mbala umanyiwu Ɔzhɔnu; 3 Ofilipu mbala Obatolomi; Otoma mbala Omatiyu u na Oba uwɛzhi; Ozhemisi umɛ uwu Alufiyɔ, mbala Ɔtadiyɔ; 4 Ɔsayimɔ Ɔzilɔti mbala Ozhudasi Isikariyɔ, uwu bɔkɔ e to Ɔzhizɔsi a yama awu.

5 Enzu wewo la wepo mbɔlɛ gba Ɔzhizɔsi a lɔ mba ma la kaza kɛlɛ le tee: << La lu fye mɛzhi iyi enzu umba bɔkɔ o kwu Azhu mo naa kwuse ungwu Osamariya ungwunanguna mo. 6 La lu so mbaa enzu umba Izirɛ umba bɔkɔ o yi kyamate ilɔ umba bɔkɔ o tomo awu. 7 Gba lu kama, la lu za mba tee, <Irɛsu iyi Oshi i ndafo!> 8 Enzu umba o mwɔnyɛ mo, la lu bo mbo ofya ma, umba o kpo mo, la lu yi mbo mo, la lu bo enzu umba o pwu ofya umbu embyi umbɔyi ma, la lu ra la ɛndu iyira ma. Rɛshi gba lu na le, rɛshi gba ba la lu shi le tete. 9 La lu za la egolu mbala esiliva mbala eduwo mu angara yi mo; 10 la lu za la kwongara mu luzɛ yi ndɔlɛ mo, la ɛriga epo mo, la ekpoyata, la upi uwu luzɛ mo, kwuwongu u wo ɛduma e do rigbɛ wu ma.

11 <<Kwuse ungwunanguna ungwu bɔkɔ lu fye mangwu, la ungwɔkwu la ungwɛri, la lu gagyi onzu uwu kwuyi mɔmɔ kaa la lu ŋɔ mbala wu nzhii ba kwuyengwu lu lafya laa kizɛ ngyɛngyi. 12 Kwuye ungwu lu fye mu kwogba kwɔngu, la lu ta mba ɔlɛ 13 Gba enzu umba kwogba kwɔngu o na yi, esheshi iyi Ukpo ii ŋɔ mu kwogba kwɔngu, gba enzu umba kwogba kwɔngu ba o na yi mo, esheshi iyi Ukpo i ŋɔ mu kwogba kwɔngu mo. 14 Kwogba naa kwuse ungwunanguna ungwu bɔkɔ kwu na yi mo, ba kwu pwa iso yi mo, gba lu wɔma mu kwogba naa kwuse kwɔngu, la lu bulɔ kwumburu ungwu alɛ yi ma kaa la lu lafya la kizɛ ngyɛngyi. 15 Mi so yi ongbulolo, Ɔnuwu Ombwu Izɔma, Ukpo a ma eyembembyi iyi Ɔsɔdɔmu mbala Ogomora a ka iyi enzu umba kwuse kwɔngwu ma!

16 <<La lu pwa! Mi lɔ yi ma mate ilɔ mekeka iyi lɔngbɔga tayi. Kwuwongwu ɔlɛ la lu kwu enzu umba ilikwu mate akwu, la lu kwu enzu umba egbo mɛzhi mate atatabiri tayi. 17 La lu ngbɛndu, moo o yi yi mo akwɛyi o reye mu idaba iyi ombu ifumo, akwɛyi o kpa yi ikpa mu idaba iyi ɛlu ikpalama iyi Azhu. 18 Kwuwo mi o pyipyi yi o reye mbaa agomina mbala asu umba ɛzhi kaa lɔ zɔ yi ombu, akwɛyi lu so mbo mbala umba bɔkɔ akwu Azhu mo iso iyeshi iyami. 19 Kwuye ungwu o yi yi mo kaa lɔ zɔ yi ombu, la lu ta aka iyi iso iyi lu bu so mo mbala ewo iyi lu bu so yi mo; moo gba kwuye kwɔngu kwu bo, oo shi yi iso iyi lu bu so. 20 Moo akwu lunyi gba lu so le mo; Kwundu uwu Ete yi gba a zɛ ma yi gba e so le.

21 <<Umɛnɛ ee shi umanyi wu te lo ngbɛ wu ma, ada tete ee shi umɛ wu; ɛmɛ o shi umba ete mbo eyi akwɛyi oo shi te lo ngbɛ umba ete mbo mo. 22 Enzu lɛɛbi oo towo yi mo kwuwo mi. Onzu uwu a rima ngiri nzhii ba ibomo iyi kwuye, o sa wu ma. 23 Gba o lo yi inyashi mu kwuse kwɔlɛ, la lu rima la lu so mu kwuse ngwufo. Mi so yi ongbulolo, lu mbwa ifulama mu ese iyi Izirɛ lɛɛbi dɛ mo akwɛyi Umɛ uwu Onzu aa gbama.

24 <<Uvɔngɔkiya a ka u zɔ wu kiya ma mo; unye tete a ka ada kwogba wu ma mo. 25 Ishoshi tee u vɔngɔ kiya le yi kyamate u zɔ wu kiya tayi, unye ba le yi kyamate ada kwogba wu tete. Gba ada kwogba lala o ya wu tee Obelezebu, enzu umba kwogba wu ba o ya mba ɛnyi iyira iyi bɔkɔ i ka ɛlɛ ma moo?

26 << Kwuwo kwɔlɛ la lu riyi mo. Moo kiya ingyinangyina ingyi bɔkɔ o koko ngyi mo kekelele, o ta ngyi kwudu, ingyi bɔkɔ o nvye ngyi mo ba o wu ngyi ma laa enzu lɛɛbi. 27 Iso iyi mi so yi mu ipwu ele, la lu ta yi anu mɔnɔnda; iyi bɔkɔ o kpo yi kenzu mu kwɔlu gba o so yi le, la lu ta yi anu mu kadu unga kɛnu. 28 La lu riyi iyi enzu wa ngbɛ ɛnwu ba o do te o ngbɛ kwundu mo; la lu riyi iyi Ukpo uwu e domo te a ngbɛ ɛnwu e kyo kwundu a ta ngwu mu kwogba ungwɔyi. 29 Epuru wepo o ya mba ma mu kwokobo kwukpɛnyi bi mo re? Ukpɛnyi mba ba a tama mɛzhi ba Ete yi e yitu mo mo. 30 Inyi iyi reshi yi lɛɛbi lala Ukpo e yi riba yi. 31 Kwuwo kwɔle la lu riyi mo; moo lunyi lu ka igba laa epuru riba ma.

32 << Onzu uwu a zɔ izɔgɔ mi mu idu iyi enzu, Imi mi zɔ izɔgɔ wu mu idu iyi Ada mi uwu e yi mu oshi. 33 Onzu uwu ba a zɔ kwu zɔ mi mu idu iyi enzu, Imi mi zɔ kwu zɔ wu mu idu iyi Ada mi uwu e yi mu oshi.

34 <<La lu bi egbo tee mi bo tee kaa la mi shi yi oloto mu kwudu kwɔlɛ mo. Ukpandɛrɛ gba mi bo wu le moo akwu oloto mo. 35 Mi bo tee kaa, <<<Umɛ lakwu ogewa uwu ete wu, Umoko lakwu ogewa uwu anyi wu, Oko uwu umɛ lakwu ogewa uwu anyɔnu wu. 36 Agewa umba onzu akwu enzu umba kwogba wu.>

37 Onzu uwu bɔkɔ e pwu idɛnyi iyi anyi wu naa ete wu a ka mi ma, a fa ma mi mo; onzu uwu bɔkɔ e pwu idɛnyi iyi umɛ wu ɔnzɔnu naa umoko a ka mi ma, a fa ma mi mo. 38 Onzu uwu bɔkɔ e to kwuwɛyi ungwu lukwu wu a mbwalu mi mo, a fa ma mi mo. 39 Onzu uwu bɔkɔ a gyi kwunyɔ wu, kwunyɔ wu kwu tomo; onzu uwu bɔkɔ kwunyɔ wu ku tomo kwuwo mi, a gba a fyangwu ma.

40 << Onzu uwunawuna uwu bɔkɔ a na yi, a na mi tete; onzu uwunawuna uwu a na mi, a na onzu uwu a lɔ mi. 41 Onzu uwunawuna uwu a na anukenzu uwu Ukpo kwuwongu akwu anu kenzu, Ukpo e shi wu rigbɛ ingyi o shi anukenzu. Onzu uwunawuna uwu a na onzu uwu ototo kwuwongu akwu onzu uwu ototo, Ukpo e shi wu rigbɛ ingyi o shi onzu uwu ototo. 42 Ongbulolo gba mi so yi le tee onzu uwunawuna uwu e shi u mbwambwa ukpɛnyi mekeka iyi enzu wa mbwalu mi mbɔlɛ omudu uwu embyi umba oloto kwuwongu akwu wa mbwalu mi kaka lala, aa fa la rigbɛ i nama mo.>>