1 Akwɛyi Ɔzhizɔsi a za la riba ingyi enzu mbala Wavɔngɔkiya wu tee: 2 <<Wa zɔ ɛrama iyi Ukpo mbala Afarisi gba o shi mbo ekpasu iyi iluma iyi Ɛrɛma iyi Omosisi le.>> 3 Kwuwo kwɔngu la lu lo mbo mo, la lu wo iyi o so yi lɛɛbi; lunyi ba la lu lu wo apula iyi bɔkɔ umba o wo mo, moo o wo iyi bɔkɔ umba o so mo. 4 Umba oo ma ewulo iyɔlu akwɛyi o fulo yi enzu mu igyɔsu mba, umba ba o nyamate tee lo ngiri yi ɛfyi kaa lo mbwamba ma lo to ewulo ɛnyi mo. 5 <<O wo kiya ingyinangyina kaa enzu lo ma mba: O lo ipwulɛshi iyɛku iyi iso iyi Ukpo; o kyo o lo ɛriga iyɛku laa ɛzu iyi iso iyi Ukpo ma yi! 6 O gyi iŋɔma mu riyi ingyɛkwu mbaa odumudumu mbala udaba uwu ɛlu ikpalama uwu Azhu; 7 gba o fye mu rishi, o gyi tee uwewe la gbɛlɛ mba ɛnyi, lo to mbo ɛnyi tee <U zɔ kiya.>

8 Ɔzhizɔsi a za la Wavɔngɔkiya tee,<<Lunyi ba enzu lo ya yi tee <U zɔ kiya mo,> kwuwongu U zɔ kiya akwu ukpɛnyi bi gba lu yi wu le, lunyi ba lu kwu imɛnɛ kpɛkpɛyi. 9 La lu ya onzu uwunawuna mu kwudu kwɔlɛ tee <Ada> mo, moo lu yi Ada ukpɛnyi bi uwu e yi moshi awu. 10 Lunyi ba enzu lo ya yi te <U to keyi> mo, kwuwongu u to keyi yi akwu ukpɛnyi bi, gba akwu Omezaya le. 11 Onzu uwu a ka le meka yi, aakwu umɛgba yi mɛga. 12 Onzu uwunawuna uwu e to ɛnwu e fulo kadu, o gba wu ɔ nyɔ mɛzhi, onzu uwunawuna uwu ba e to ɛnwu tee akwu kiya mo, o to wu o fulo mu kadu.

13 <<Inyashi iyɛku i rigbo yi, lunyi wazɔ ɛrama iyi Ukpo mbala lunyi Afarisi! Lunyi wamwangba mbɔlɛ! Lu se enzu ɔgwuzɛ uwu ɛsu irimo iyi oshi ma. Lunyi lu fye mo, enzu umba ɔ gyi tee lo fye ba lu nyi mba ma. 14 <<Gbetu yi, lunyi wazɔ ɛrama iyi Ukpo mbala lunyi Afarisi, lunyi wamwangba mbɔlɛ! Lu na agba iyi eko umba o kpo anu ma akwɛyi lu koko ira yi ɛlɛ ma mu Ukpo ilɛma gbulɔlɔ. Kwuwo ngwɔlɛ, inyashi iya yi i ka le.

15 <<Inyashi iyɛku i rigbo yi, lunyi wa zɔ ɛrama iyi Ukpo mbala lunyi Afarisi, lunyi wamwangba mbɔlɛ! Lu kpa ɛvyɛ lu fula ɛzhi ma, lu sa risu kaa la lu fya u mbwalu ukpɛnyi shooshosho, gba lu fya ma-a, lunyi ba lu gba lu wo wu umɛ uwu kwogba ungwu ɔyi uwu a ka yi ma izhepo!

16 Inyashi iyɛku i rigbo yi, lunyi epeyi wazɔ epeyi ɔgwuzɛ! Lu zɔ ɛzɔ tee, <Gba onzu a vungɔma laa Ɔtɛpu, akwu kiya mo, onzu uwu a vungɔma laa ogolu uwu e yi mu Ɔtɛpu, gba ivungɔma ɛnyi i rima le.> 17 Epeyi erendo mbɔlɛ! Iyina i ka: ogolu nana Ɔtɛpu uwu a wulu ogolu ma kɛrikɛri awu ŋa? 18 Lu kyo lu zɔ mu ɛzɔ yi tee <Gba onzu a vungɔma laa kwɔla ungwu isabɔ, akwu kiya kinyinyi mo, onzu ba a vungɔma laa rɛshi ingyi o fulo mu kwɔla ungwu isabɔ awu gba ivungɔma ɛnyi i rima le.> 19 Lunyi epeyi mbɔlɛ! Iyina i ka: rɛshi nana kwɔla ungwu isabɔ ungwu kwu wulu rɛshi ma kɛrikɛri awu ŋa? 20 Kwuwo kwɔngu, onzu uwu a vungɔma laa kwɔla ungwu isabɔ, a vungɔma e kyo mbala rɛshi ingyi o fulo mu kwɔla kwɔngu; 21 tatayi onzu uwu a vungɔma laa Ɔtɛpu, a vungɔma e kyo Ukpo uwu e yi mu Ɔtɛpu awu; 22 onzu uwu a vungɔma e to laa oshi, a vungɔma e to laa ukpa uwɛsu uwu Ukpo mbala Ukpo uwu a ŋɔ mawu awu.

23 <<Inyashi iyɛku i rigbo yi, lunyi wazɔ ɛrama iyi Omosisi mbala Afarisi, lunyi wamwangba! Lu to ikpɛnyi meka iyi uwo iyi: imadu, okwonu mbala epwu iyɛri iyɛri iyi utu yi lu ka laa Ukpo, lunyi ba lu lafya laa iyi i ka le mu ɛrama iyi Ukpo - ongbulolo, eyembembyi mbala ikwu idu lu fulo mu Ukpo. I fate la lu wo ɛlɛ tete ba la lu lafya laa iyi kwonze ɛnyi mo. 24 Lunyi epeyi umba o zɔ epeyi ɔgwuzɛ mbɔlɛ! Lu sɛ ezhizhiri ma mu embyi yi umba lu wo, ba lu mbiri onyakurumi ma.

25 <<Inyashi iyɛku i rigbo yi, lunyi wazɔ ɛrama iyi Omosisi mbala lunyi Afarisi, lunyi wamwangba mbɔlɛ! Lunyi lu gbɔ kwudu unga kagɔ mbala kaatu ma, mɛmi ba akwu enzu iwiwomo mbala igyɛyɛyi. 26 Uŋɔ Ofarisi upeyi ele! Gbɔ ɛmi iyi kagɔ mbala kaatu ma keyi dɛ akwɛyi kwudu ba kwu wulu ma tete.

27 <<Inyashi iyɛku i rigbo yi lunyi wa zɔ ɛrama iyi Omosisi mbala lunyi Afarisi, lunyi wamwangba mbɔlɛ! Lu yi kyamate agariwu iyi o kpa yi ɔgɔ uruwu, akwɛyi i sheshi mu kwudu, mɛmi ba inyɔlɔma duduu laa ekwu iyi enzu mbala ɛkpɛzhi umba o vama-a tayi. 28 Tatayi gba lu yi le. Mu kwudu lu zɔ tee lu kwu enzu umbeshi, mɛmi ba lu nyɔlɔma duduu laa angba imuma mbala ira.

29 <<Inyashi iyɛku i rigbo yi, lunyi wazɔ ɛrama iyi Omosisi mbala lunyi Afarisi, lunyi wamwangba mbɔlɛ! Lu mbo agariwu iyesheshi laa anukenzu umba Ukpo, lu nɔngɔ Ogariwu iyi enzu umba ototo ma, 30 akwɛyi lu zɔ tee, <Kwuye ungwu asɔkwu nzu o fu ɛnzhi umba anukenzu umba Ukpo ma awu, gba la ki yi mɔmɔ, ki lo kwuwo mbala mba mu ɛnzhi ifumo iyi anukenzu umba Ukpo mo.> 31 Mu ɛlɛ, i zɔ tee lu nyama tee lu wɔ mu ɛdɔ iyi enzu umba bɔkɔ o ngbɛ anukenzu umba Ukpo ma awu. 32 La lu kyakpɔ nɛ kaa la lu nyɔlɔ ingbomo iyi bɔkɔ asɔkwu yi o ye kambu awu ma!

33 <<Lunyi akwu mbɔlɛ! Lunyi ɛdɔ iyi agbazhi mbɔlɛ! Lu wo la ba lu vuluma mu ombu uwu Ukpo? 34 Kwuwo ngwɔlɛ, mi lɔ yi laa anukenzu umba Ukpo mbala enzu umba ilukwu mbala wa zɔ ɛzu. Umbafo mba lu ngbɛ mba ma, umbafo lu kpa mba mu kwuwɛyi ungwu lukwu, akwɛyi umbafo ba lu kpa mba ikpa mu idaba iyi ɛlu ikpalama yi, lu mbwalu mba mese mese. 35 Kwuwo ngwɔlɛ, ɛnzhi umba enzu umba ɔsɛkɛnɛ umba bɔkɔ o fu mbo mo mu kwudu kwɔlɛ lɛɛbi, i gwu mu ɛnzhi umba Ɛbɛlu onzu ɔsɛkɛnɛ, nzhii ba ɛnzhi umba Ozakaraya umɛ uwu Oberekiya, uwu lu ngbɛ wu ma mu kwudeka ungwu Ɔtɛpu mbala kwɔla ungwu isabɔ awu, o yi mu reshi yi lɛɛbi. 36 Mi so yi ongbulolo, inyashi iyi o lo wa ngbɛ enzu mbɔlɛ, i du enzu umba ɔyi ɔlɛ lɛɛbi tete!

37 <<Ɔzhɛrusalɛ ye! Ɔzhɛrusalɛ ye! Lunyi lu ngbɛ anukenzu umba Ukpo ma akwɛyi lu to umba o lɔmba ma munyi yi ekyi. Izhɛvɔ bɔkɔ mi gyi tee la mi kpala ɛmɛ ŋɔ ɛlu, kyamate ɛnu uwu a kpala ɛmɛ wu ɛlu mu idu wu tayi, ba lu to mo. 38 Kwuwo ngwɔlɛ o lafya laa Ɔtɛpu yi uwidɔ. 39 La mi so yi mɛɛ, lu ma mi gbee fo nzhii ba ɔnu uwu lu bu zɔ te, <Iduma akwiyi onzu uwu e yi mu inyɔma mu ɛnyi iyi Ɔkwu.> >>