1 Ɔnuwu kwɔfyi ungwu ɛnwu igbomo ungufo, Ɔzhizɔsi e yi mu luzɛ mu itu iyi ewiri. Lonzu lu wo Wavɔngɔkiya wu ma akwɛyi o mu eshi iyi ewiri o le mu ikwu mo. 2 Tabɔkɔ Afarisi o ma ɛlɛ, akwɛyi o za la Ɔzhizɔsi tee, << Yese, Wavɔngɔkiya ŋa o fo ɛrama iyi kwɔfyi ungwu ɛnwu igbomo mo!>>

3 Akwɛyi Ɔzhizɔsi a gba mba opwu tee, << Lu du wa yi dɛ mo re kiya ingyi bɔkɔ Odevidi e wo kwuyengwu bɔkɔ lonzu lu wo wu mo uwu mbala enzu umba luzɛ wu? 4 E fye mu Ɔtɛpu, uwu mbala enzu umba luzɛ wu o ri kiya ingyi ɛrama ingyi ki kpo tee umba lo ri mo, ebwoshi kɛɛkyi gba o ri le. 5 Naa lu du wa mu ɛrama iyi Omosisi dɛ mo re tee ebwoshi bɔkɔ o wo ɛduma mu Ɔtɛpu ɔnuwu kwɔfyi ungwu ɛnwu igbomo awu o fo ɛrama ngwu ma, tetete ba o yi mbo ombu mo mo? 6 Imi ba mi so yi tee onzu uwu bɔkɔ a ka Ɔtɛpu ma e yi munɛ. 7 Gba la lu yi iluma iyi iso iyi Ukpo iyi i zɔ tee, <Mi gyi isabɔ iyi izɔfyi mo, eyembembyi gba mi gyi le> le, ba la lu bi ngbɛ onzu ɔsɛkɛnɛ ombu uwoyi mo; 8 moo Umɛ uwu Onzu gba akwu Ɔkwu uwu Kwɔfyi ungwu ɛnwu igbomo le.>>

9 Ɔzhizɔsi a lafya laa mɔmɔ akwɛyi e fye mu udaba uwu ɛlu ikpalama uwu Azhu, 10 onzu uwu kwuwo wu kwu kpokapiya e yi mu mɔmɔ. Kwuwongwu bɔkɔ o gyi tee lo fya kwuyi ungwu bɔkɔ o yi Ɔzhizɔsi ombu, akwɛyi o yo wu kwuyo tee, <<Ishoshi tee lo bo onzu ofya ma ɔnu uwu kwɔfyi ungwu ɛnwu igbomo?>>

11 Akwɛyi e yo mbo tee, <<Uwe mekeka yi bɔkɔ ilɔ wu a ta mu kwuvɔ ɔnu uwu kwɔfyi ungwu ɛnwu igbomo ba e ri a ba wawuma mo? 12 Onzu e yi umwɔ a ka ilɔ ma! Kwuwo ngwɔlɛ akwu ɛrama ifomo mo tee lo wo iyeshi ɔnu uwu kwɔfyi ungwu ɛnwu igbomo.>>

13 Akwɛyi a za la onzu awu tee, <<Nda kwuwo ŋɔ ma.>> A nda ngwu ma, akwɛyi kwu gba odedengwu kyamate ungufo kwɔngu. 14 Akwɛyi Afarisi o wɔ kwudu o ta amasa mu reshi wu kaa lo ngbɛ wu ma.

15 Tabɔkɔ Ɔzhizɔsi a pwa ɛlɛ akwɛyi a lafya laa riyi ngyɛngyi. Enzu gyɔɔ o mbwalu wu, akwɛyi umba bɔkɔ o yi efya, e bo yi mbo mo lɛɛbi, 16 akwɛyi e lo mbo ilutu malu tee lo ba enzu ɛza iyawu mo. 17 E wo ɛlɛ kaa li nyɔlɔma iso iyi anukenzu Azaya e so tee:

18 <<Ele gba akwu unye mi uwu bɔkɔ mi Ŋa le,

uwu mi pwu idɛnyi wu, uwu ubwu uruwu mi.

Mi lo wu Kwundu mi,

akwɛyi a zɔ ombu uwu enzu umba kwudu kwɔlɛ lɛɛbi.

19 E tumo mo ba a kpɛyi mo;

onzonzu ɛnyi te a pwa opwu wu mu ɔgwuzɛ mo.

20 Kwonga ungwu kwu sele mo, a mu ngu ma mo,

ba a nyi ɔyi uwu ututula uwu a wa la uwu ma mo.

nzhii ba e shi enzu o nyama la ongbulolo,

21 ma wu gba enzu lɛɛbi o fulo eyi le.>>

22 Akwɛyi enzu umbafo o ka laa Ɔzhizɔsi onzu upeyi u tukenzu kwuwongu e yi kwundu ungwura. Ɔzhizɔsi e bo onzu le ofya ma, akwɛyi a gba laa isisomo mbala ɛbɛ imama. 23 Akwɛyi enzu lɛɛbi izele i yi mbo mo, akwɛyi o yo tee, <<Naa ele gba akwu umɛ uwu Odevidi le Ŋa?>>

24 Tabɔkɔ Afarisi o pwa ɛlɛ, akwɛyi o zɔ tee, <<Akwu Obelezebu, ɔsu uwu ɛndu iyira gba e shi wu ekpasu gba e wo ɛlɛ le.>>

25 Ɔzhizɔsi ba e yitu iyi egbo mbo akwɛyi a za mba tee, <<Ɛzhi iyinayina iyi i ka epo kaa li to ewa mbala esu, i kpɛdɔma. Kwuse naa kwogba ungwunanguna ungwu kwu ka epo kaa li to ewa mbala esu, kwu rima mo. 26 Gba onzu uwoyi a ra laa onzu uwoyi mo, i zɔ tee ɛzhi wu i ka epo-o, uwu akwu ogewa uwu ɛnwu wu. O wo tee bɔkɔ ɛzhi wu ii rima? 27 Gba akwu mu ekpasu iyi Obelezebu gba mi ra laa ɛndu iyira ma le, mu ekpasu iyi uwe bɔkɔ enzu yi o ra mba ma awu? Kwuwo ngɔlɛ, enzu yi lo zɔ ombu yi. 28 Gba akwu mu ekpasu iyi Kwundu uwu Ukpo gba mi ra laa ɛndu iyira ma le,de ba i zɔ tee irɛsu iyi Ukpo i bo munyi yi-e.

29 <<Naa i wo tee bɔkɔ onzu e fye mu kwogba ungwu onzu uwu ekpasu akwɛyi a kwu wu ewulo mo ba a ma onzu uwu ekpasu ele ma dɛ gba a kwu wu ewulo mo le mo?

30 << Onzu uwunawuna uwu bɔkɔ e yi mbala mi mo, akwu ogewa mi, onzu uwunawuna uwu bɔkɔ a kpala ɛlu mbala mi mo, akwu u sɛma. 31 Kwuwo ngwɔlɛ gba mi so yi ele, ingbomo mbala iso isomo iyira iyinayina iyi enzu o so, o gba yi o kpa mba; onzu uwunawuna uwu bɔkɔ e so iso iyira laa Kwundu uwu Ukpo ba o gba yi o kpawu mo. 32 Onzu uwunawuna uwu bɔkɔ e siso iyira mu reshi ingyi Umɛ uwu Onzu o-oo gba yi kpa wu; onzu uwunawuna uwu bɔkɔ e siso iyira mu reshi ingyi Kwundu uwu Ukpo ba o gba yi kpa wu mo, mu ɔyi ɔlɛ laa ɔyi uwu u bu nyɔ awu.

33 <<Uwɛyi, o zɔngɔ wu ma mu imwuma wu. Uwɛyi uwesheshi u wa laa imwuma iyesheshi. Uwɛyi uwura, u wa laa imwuma iyira. 34 Lunyi ɛdɔ iyi agbazhi mbɔlɛ - lu wo tee bɔkɔ lu siso iyeshi lunyi umba bɔkɔ lu yi ira te? Moo kiya ingyi ki nyɔlɔ akɔ ma gba kenzu ke so le. 35 Onzu uwoshi a wala apula iyeshi iyi bɔkɔ iyi mu akɔ wu, onzu uwura tete a wa laa iyira iyi bɔkɔ iyi mu akɔ wu.

36 Gba mi so yi ongbulolo le tee, uwewe e fulo ata mu kenzu wu ɔnu uwu Kwɔfyi ungwu Ombwu izɔma iyi iso iyira iyi bɔkɔ e so lɛɛbi. 37 Moo akwu iso isomo iyi kenzu ŋɔ gba o zɔ nɔ ombu le - tee ŋɔ kwu onzu ɔsɛkɛnɛ naa ŋɔ kwu onzu ɔsɛkɛnɛ mo le.>>

38 Akwɛyi Afarisi umbafo mbala wa zɔ ɛzu iyi ɛrama o yo Ɔzhizɔsi kwuyo tee, <<U zɔ kiya,>> <<ki gyi tee zɔ nzu kɛzɔ unga kenzu iyama kaa la ki ma.>>

39 Ɔzhizɔsi ba a gba opwu tee, <<Enzu umba ɔyi uwura mbala umba o yitu iyi Ukpo mo kɛɛkyi gba o yo kwuyo ungwu kɛzɔ unga kenzu iyama le! O zɔ yi kɛzɔ unganangana mo, kɛzɔ unga anukenzu Ozhona kɛɛkyi gba o zɔ yi nga le. 40 Kyamate bɔkɔ Ozhona a ŋɔ mu ubwu uwu Umu uwakwu afyi ɛla laa utu laa ɔnu awu, tatayi gba Umɛ uwu Onzu a ba nɔ le mɛzhi afyi ɛla laa utu laa ɔnu. 41 Ɔnuwu Kwɔfyi ungwu Ombwu izɔma, enzu umba Ɔninɛvɛ o rima mbala yi o ngbɛ yi ombu uwoyi, moo ɔ kwu ira mba ɔsu kwuyengwu o pwa anu itama iyi Ozhona; onzu uwu a ka Ozhona ma ba e yi munɛ! 42 Ɔnuwu Kwɔfyi ungwu Ombwu izɔma Omakazhiya uwu Osheba e yimo a rima a ngbɛ yi ombu uwoyi; moo a wɔ ngbaa mu ɛzhi wu iyi indama tee kaa la pwa ɛzu izɔma iyi ilukwu iyi Ɔsɔlɔmɔ. Onzu uwu bɔkɔ a ka Ɔsɔlɔmɔ ma ba e yi munɛ!

43 <<Kwuye ungwu kwundu ungwura kwu wɔma mu ɛnwu iyi onzu, kwu kpa ɛvyɛ mu akata tee kaa lakwu fya riyi ingyi ɛnwu gbomo. Gba kwu fya mo, 44 kwu za laa ɛngwu tee, <Mi gba mi re mu kwogba ungwu mi wɔ awu.> Akwɛyi kwuu gbama kwuu du te kwogba kwɔngu kwu yi onzu mɛmi mo, o vyɛ ngwu ma kwu yi sɛsɛsɛ. 45 Akwɛyi kwu gba kwu ri kwu bi ngye laa ɛndu iyira iyifo ekperewo iyi bɔkɔ i ka yi ira ma. Akwɛyi o fyemo mɛmi o ŋɔma mɔmɔ. Imbwama iyi onzu awu i ka ira la iyekyi. Ɛlɛ te gba i bi du enzu umba ɔyi uwura ɔlɛ le.>>

46 Tabɔkɔ Ɔzhizɔsi e yi mu iso isomo mbala enzu umba o gyirima, akwɛyi anyi wu mbala ɛmanyi wu o bo ri kwudu o gyi tee lo so iso mbala wu. 47 Akwɛyi onzu uwufo mɔmɔ a za wu tee, <<Ɛnɛ ŋɔ mbala Ɛmɛnɛ ŋɔ o yi kwudu o rigbo ŋɔ, o gyi tee lo siso mbala ŋa.>>

48 Ɔzhizɔsi ba e yo mbo tee, <<Uwe ba akwu Ɛnɛ mi? Umbana ba akwu ɛmɛnɛ mi?>> 49 Akwɛyi a zɔ ɛfyi mba Wavɔngɔkiya wu, akwɛyi a zɔ tee, <<La lu yese! Mbɔlɛ gba akwu Ɛnɛ mi mbala ɛmɛnɛ mi le! 50 Onzu uwunawuna uwu bɔkɔ e wo iyi Adami uwu bɔkɔ e yi moshi a gyi gba akwu umɛnɛ mi ɔnzɔnu mbala umɛnɛ mi oko mbala ɛnɛ mi le.>>