1 Tabɔkɔ Ɔzhizɔsi a mbwa iso ɛlɛ isomo lɛɛbi, akwɛyi a za laa Wavɔngɔkiya wu tee, 2 <<Kyamate bɔkɔ lu yitu, odumudumu uwu ikalama e shi afyi epo bi ŋa, akwɛyi o ra laa Umɛ uwu Onzu o shi kaa lo kpa wu mu kuwɛyi ungwu lukwu.>>

3 Akwɛyi ebwoshi umbakɔ mbala enzu umbakɔ umba Azhu o bo o kpala ɛlu mu ufiri uwu u to keyi uwu ebwoshi uwu bɔkɔ o ya wu tee Okayafasi awu, 4 akwɛyi o wo amasa iyi kaa lo yi Ɔzhizɔsi mo kyokyokyo kaa lɔ ngbɛ wu ma. 5 O zɔ tee, <<ki wo yi kwuyengwu odumudumu ele mo,>> <<kwuwongu enzu o bo wo ovyo mo.>>

6 Ɔzhizɔsi e fye mu Ɔbɛtani mu kwogba ungwu onzu uwu bɔkɔ o ya wu tee Ɔsamɔ uwu e yi ofya umbu embyi umbɔyi dɛ-ɛ awu. 7 Kwuye ungwu Ɔzhizɔsi e yi mu kiya irimo, akwɛyi okokpayi ɛnyi e bo munyi wu laa ogya uwu anyi umba abwa gyɔɔ, akwɛyi e fulo mbo e fu wu mu reshi.

8 Kwuye ungwu bɔkɔ Wavɔngɔkiya wu o ma ɛlɛ, o wo amba. O yo tee, <<Kimbe ki bo laa ishi ɛlɛ?>> 9 <<Anyi mbɔlɛ lo bo ya mba ma mu abwa iyɛku kaa lo ra laa eduwo ɛnyi lo shi yi ayirewa!>>

10 Ɔzhizɔsi ba e yitu iyi bɔkɔ o yi mu isomo, akwɛyi a za mba tee, <<Kimbe ki wo ba oko ele lu wo wu egbo gidigidi tee? Kiya ingyi e wo mi ele akwu kiya ingyesheshi. 11 Lunyi lu yi mbala ayirewa kwuyengwunanguna, Imi ba mi yi mbala yi kwuyengwunanguna mo. 12 Anyi umba bɔkɔ e fu mi mɛnwu ele, e wo ɛlɛ kaa la nɔngɔ ukpɛzhi mi ma kaa le gbo laa ipwumo mi. 13 Ongbulolo gba mi so yi, muna muna bɔkɔ o tanu iyi ilɔ iyesheshi ɛlɛ mu kwudu kwɔlɛ lɛɛbi o so kiya ingyi okpayi ele e wo, kaa lakwu ilolo mo wu.>>

14 Akwɛyi ukpenyi mekeka iyi Wavɔngɔkiya wewo la wepo mbamba uwu bɔkɔ o ya wu tee Ozhuda Isikariyɔ awu ka mbaa ebwoshi umbakɔ 15 akwɛyi e yo mbo tee, <<Kimbe ba lu shi mi, gba mi ra laa Ɔzhizɔsi mi shi yi?>> Akwɛyi o wala esiliva uwekpela o shi wu. 16 I na mu kwuye kwɔngu i sheye keyi Ozhuda e le mu ɔgwuzɛ igagyima kaa laa ra laa Ɔzhizɔsi le shi mbo.

17 Mu kwɔfyi ungwu kwonze mu afyi iyi Odumudumu uwu Oburedi uwu bɔkɔ e yi otutu mo, Wavɔngɔkiya o bo mbaa Ɔzhizɔsi akwɛyi o yo wu tee, <<Muna bɔkɔ ŋɔ gyi te la ki nɔngɔ kizɛ ingyi kaa ri kiya ingyirimo ingyi Odumudumu uwu ikalama?>>

18 Akwɛyi a za mba tee, <<La lu so mɛmi iyi kwuse mbaa onzu uwufo,>> <<kaa la lu za wu tee: <U zɔ kiya a zɔ tee, Kwuye mi kwu bo-o; mi gyi tee la mi mu ɔnyɛ uwu odumudu uwu ikalama mbala Wavɔngɔkiya mi mogba ŋa.>>>

19 Akwɛyi Wavɔngɔkiya wu o wo mate Ɔzhizɔsi e so mbo awu akwɛyi o nɔngɔ kiya ingyirimo ingyi Odumudumu uwu ikalama.

20 Kwuye ungwu eyikpomo, akwɛyi Ɔzhizɔsi a ŋɔma akwɛyi e ri kiya mbala Wavɔngɔkiya wewo la wepo mamba. 21 Mate bɔ o yi mu kiya irimo, Ɔzhizɔsi a zɔ tee, <<Mi so yi ongbulolo, onzu ukpɛnyi meka yi e to mi a ya ma.>>

22 Idu mbo i tutumo iyɛkɛkɔ akwɛyi o le wo mu kwuyo iyomo kɛnyi, kɛnyi tee, <<Ɔkwu, mi yitu akwu Imi gba ŋɔ so le mo amoo?>>

23 Ɔzhizɔsi a gba opwu tee, <<Onzu uwu bɔkɔ e lo kwuwo wu mu kaatu mbala mi gba e to mi a yama le. 24 Umɛ uwu Onzu e kpomo mate bɔkɔ iso iyi Ukpo i so mu reshi wu awu, ikpɛdɔma ba akwiyi onzu uwu bɔkɔ e to Umɛ wu Onzu a ya ma awu! Lo mba wu mo lala ba i bi koshi!>>

25 Akwɛyi Ozhuda uwu bɔkɔ e be to wu a ya ma awu, e yo tee, <<U zɔ kiya, mi yitu te, akwu Imi gba ŋɔ so le mo amoo?>>

Ɔzhizɔsi a gba opwu tee, <<Ee, akwu uŋɔ.>>

26 Tabɔkɔ o yi mu kiya irimo, akwɛyi Ɔzhizɔsi e to kwoburedi, a gbɛlɛ Ukpo ɛnyi akwɛyi a mu ngwu ma akwɛyi e shi Wavɔngɔkiya wu. Akwɛyi a zɔ tee; <<La lu na kaa lu ri,>> <<ɛlɛ akwu ɛnwu mi.>>

27 Akwɛyi e to ago, a gbɛlɛ Ukpo ɛnyi akwɛyi e to e shi mbo. Akwɛyi a zɔ tee; <<La lu wo lɛɛbi yi; 28 mbɔlɛ akwu ɛnzhi mi umba o ka o shi mɛzhi, umba bɔkɔ o fumo kwuwongu enzu riba kaa lo fya igbɔma iyi ingbomo. 29 Mi za yi tee, mi gba mi wo owanyi mbɔlɛ fo, nzhii ba mi bi wo umbepo mbala yi kwuyengwu Irɛsu iyi Ada mi.>>

30 Akwɛyi o so kwɔmu, o wo kwudu o ka mu lɔwa undu Olifu.

31 Akwɛyi Ɔzhizɔsi a za mba tee, mu utu ɔlɛ lɛɛbi yi lu rɛnya luu shi mi, moo iso iyi Ukpo i zɔ tee, <Ukpo a ngbɛ u gbo ilɔ ma, akwɛyi uzhi uwu ilɔ u kpashaa.> 32 Mizhikembo iyi bɔkɔ mi yimo mu lukwu ba, mi to keyi la yi mu Ogalili.>>

33 Opita ba a za wu tee, <<Gba enzu lɛɛbi o rɛnya o shi ŋɔ lala, mi lu ŋɔ afyima gbee mo.>>

34 Ɔzhizɔsi ba a za la Opita tee, <<Ongbulolo gba mi so ŋɔ le te, mutu uwu ɔnɛnɛ ŋɔ zɔ kwu zɔ mi izhɛla dɛ gba Okwuru e tɛyi le.>>

35 Opita ba a gba opwu tee, <<Akwiyi mi kpomo mbala ŋa lala, mi zɔ kwu zɔ ŋɔ mo!>>

Tegba Wavɔngɔkiya umba bɔkɔ o shimo awu o so le tete.

36 Akwɛyi Ɔzhizɔsi a zɛ mbala Wavɔngɔkiya wu o ka mu riyi ingyi bɔkɔ o ya ngyi tee Ɔgɛsɛmani awu akwɛyi a za mba tee, <<La lu ŋɔma munɛ kaa la mi so tayi kaa la mi lɛ Ukpo.>> 37 E to Opita mbala ɛmɛ umba Ɔzɛbɛdi wepo mbamba akwɛyi o kama mbala wu. Akwɛyi e le mu ubu ugyi iwomo, egbo wu i fomo gyɔɔ, 38 akwɛyi a za mba tee <<Ubu ugyi uwu e yi mami ele, a ŋaa ka mi la lukwu. La lu ŋɔ munɛ kaa lu gbomo mbala mi.>>

39 Tabɔkɔ e turu a ka keyi bwɛ, akwɛyi e kpo eyi mɛzhi akwɛyi a lɛ Ukpo tee, <<Ada mi, gba iwomo, ki shi kaa la mi wo ago iyi inyashi ɛlɛ mo! Tetete akwu iyi mi gyi gba li wo le mo, iyi ŋɔ gyi gba li wo le.>>

40 Akwɛyi a gbama e bo mbaa Wavɔngɔkiya wu wala mbamba ba e du mbo tee o yi mu ondo ikpolomo; akwɛyi e yo Opita tee,<<Lu do tee luu gbomo mbala mi iyi awa ikpɛnyi shoo moo? 41 <<La lu rima mu igbomo akwɛyi la lu lɛ Ukpo kaa la lu fye meka iyi imondomo mo. Kwundu kwu gyi kpɔɔ ɛnwu ba i funyashi.>>

42 Ɔzhizɔsi a gba a kama ungwu opo akwɛyi a lɛ Ukpo tee, <<Ada mi, gba iwomo te ago iyi inyashi ɛlɛ ŋɔ to yi mo mo, shi akwu mega tee la mi wo yi, ba iyi ŋɔ gyi gba li wo le.>>

43 Tabɔkɔ a gbama kpɔ, e du Wavɔngɔkiya mbamba mu ondo; kwuwongu ondo u ra mba gyɔɔ.

44 Akwɛyi Ɔzhizɔsi a lu mba afyima a gba a kama kpɔ a ka lɛ Ukpo izhi ungwola, a gba e siso inyinyi.

45 Akwɛyi a gbama e bo mbaa Wavɔngɔkiya wu akwɛyi a za mba tee, <<Lu degbo mu ondo ikpolomo mbala ɛnwu igbomo? La lu yese! Kwuye kwu bo kɛlɛ-ɛ bɔkɔ o to Umɛ uwu Onzu o shi enzu umba ingbomo. 46 La lu yimo la ki sheyimo! La lu yese, onzu uwu bɔkɔ e to mi ee shi mbo le a ŋɔ le!>>

47 Tabɔkɔ Ɔzhizɔsi e degbo mu iso isomo bɛnɛ, akwɛyi u vɔngɔ kiya ukpɛnyi meka iyi Wavɔngɔkiya we wo la wepo mbamba uwu o ya wu tee Ozhuda awu e ngyi mbala riba ingyi enzu. O za la ikpandɛrɛ mbala engbule. Eboshi umbakɔ mbala enzu umbakɔ gba ɔ lɔ mba le. 48 U to onzu u yama awu e shi riba ingyi enzu mbamba kɛzɔ kpeke tee: <<Onzu uwu bɔkɔ mi kpa wu idu, uwu gba a ŋa wu. La lu yi wu mo!>>

49 Ozhuda a ngbɛ ngbulolo mbaa Ɔzhizɔsi akwɛyi a zɔ te, <<Gbɛgyɛ loo u zɔ kiya,>> akwɛyi a kpa wu idu.

50 Ɔzhizɔsi a gba wu opwu tee, <<Umɛza mi, wo ingyi ki bo ŋɔ efyefya!>>

Akwɛyi enzu mbamba o bo o yi Ɔzhizɔsi mo akwɛyi o ra wu. 51 Onzu ukpɛnyi uwu bɔkɔ e yi mbala enzu umba o yi mbala Ɔzhizɔsi awu a wa la ukpandɛrɛ wu akwɛyi e kpolo kwɔlu ungwu unye uwu Oboshi Uwakɔ ma.

52 Ɔzhizɔsi ba a za wu tee, <<Gba la ukpandɛrɛ ŋɔ lo mu ayuwɛ wu.>> <<Onzu uwunawuna uwu bɔkɔ e to ukpandɛrɛ, ukpandɛrɛ gba a ngbɛ wu le. 53 Lu yitu te mi do te mi ya Ada mi ma kaa la mbwa mi ma akwɛyi kɛlɛlɛ a lɔ alɔgbulɔ wu umba bɔkɔ riba mba ri pika uzhi uwu asozha uwo la epo ma kaa lo gbo mi mo moo? 54 Moo ii wo te bɔkɔ iso iyi Ukpo i nyɔlɔma, iyi bɔkɔ o so te, ɛlɛ te gba ii wo le mɛga?>>

55 Akwɛyi Ɔzhizɔsi a za la riba ingyi enzu mbamba te, <<Mi kwu onzu uwu ovyo re bɔkɔ lu wa la ikpandɛrɛ mbala engbule bɔkɔ lu bo te lu yi mi mo le? Mi ŋɔ mu Ɔtɛpu kwɔfyi kwɔfyi mi zɔ enzu kiya ba lu yi mi mo. 56 Ɛlɛ lɛɛbi i wo tee kaa iso iyi anukenzu o ka mu kwokpo ungwu iso iyi Ukpo li nyɔlɔma.>>

Akwɛyi Wavɔngɔkiya lɛɛbi o rɛnya o lu wu afyima.

57 Akwɛyi enzu umba bɔkɔ o yi Ɔzhizɔsi mo le o ka wu mbaa Oboshi Uwakɔ Okayafasi mbaa bɔkɔ wa zɔ ɛrɛma iyi Omosis mbala enzu umbakɔ o kpala ɛlu. 58 Opita ba a mbwalu wu shaaru nzhii ba a ka mu udaba uwu Oboshi Uwakɔ. E fyemo mu udaba akwɛyi a ka ŋɔma mbala wa gbomo kaa la ma iyi i bi wo.

59 Eboshi umbakɔ mbala Odudu uwu Asayɛndiri lɛɛbi o gagyi azɔgɔ umba bɔkɔ o mu o lo Ɔzhizɔsi kaa lo ngbɛ wu ma; 60 Enzu gyɔɔ ɔ wɔ o shi izɔgɔ, tetete o fya onzu ukpukpɛnyi te mo. Mizhikembo iyi ɛnyi azɔgɔ wepo o wɔ, 61 akwɛyi o zɔ tee, <<Onzu ele a zɔ tee <Mi do te mi shiri Ɔtɛpu uwu Ukpo mo, akwɛyi mii gba wa la imbomo mu afyi ela.>>>

62 Akwɛyi Oboshi Uwakɔ e yimo a za la Ɔzhizɔsi tee, <<Ŋɔ gba opwu mu iso iyi bɔkɔ o mu o lo ŋɔ le mo re?>> 63 Ɔzhizɔsi ba a gba opwu mo. Oboshi Uwakɔ a gba e so kpɔ tee, <<Mu ɛnyi iyi Ukpo ureyi: so nzu akwiyi uŋɔ gba ŋɔ kwu Omezaya, Umɛ uwu Ukpo le.>>

64 Ɔzhizɔsi a gba wu opwu tee, <<Ee i yi mate bɔkɔ ŋɔ so awu. Imi ba mi so yi lɛɛbi tee: ina mu kwuye kwɔlɛ i sheye keyi, lu ma Umɛ uwu Onzu te a ŋɔma mu kwuwo ungwu ungyi ungwu Ukpo a gba e yi mu inyɔma mu amu iyi oshi!>>

65 Akwɛyi Oboshi Uwakɔ a tara origa wu ma akwɛyi a zɔ tee, <<E pye Ukpo ari ee! Ki yi ugɔ uwu azɔgɔ umbafo fo! Yese, kekelele lu pwa mate bɔkɔ e pye Ukpo ari ee! 66 Lunyi lu mate?>>

Akwɛyi o gba wu opwu tee, <<E do lukwu mo, lɔ ngbɛ wu ma.>>

67 Akwɛyi o kpo wu ɔtɛ meyi akwɛyi o kpa wu ɛmwu; umbafo mbo ba o shi wu afyi mu angba 68 laa isomo tee, <<So nzu ŋa nɛ, Omezaya! Uwe bɔkɔ a kpa ŋa afyi?>>

69 Opita a ŋɔma mu ufiri akwɛyi umɛgba okokpayi uwu Oboshi Uwakɔ e bo munyi wu akwɛyi a za wu tee, << Uŋɔ tete ŋɔ yi mbala Ɔzhizɔsi uwu Ogalili.>>

70 Opita ba a zɔma mu keyi mbo lɛɛbi. A za wu tee, <<Mi yitu iyi iso iyi bɔkɔ ŋɔ so le mo ndii,>>

71 akwɛyi a wɔ kwudu a ka mu kenzugwu. Akwɛyi umɛgba okokpayi uwufo a ma wu akwɛyi a za laa enzu umba bɔkɔ o yi mɔmɔ tee, <<Onzu ele e yi mbala Ɔzhizɔsi uwu Ɔnazarɛti.>>

72 Opita a zɔma kpɔ a zɔ tee, <<Mi vungɔma, mi yi onzu awu mo!>>

73 Mizhikembo iyi kwuye bwɛ akwɛyi enzu ba o rima mɔmɔ o ka mbaa Opita akwɛyi o za wu tee, <<Iyesheshi uŋɔ ŋɔ yi mbala mba tete.>> <<Moo opwu uwu iso ŋɔ isomo u ta ŋa undu kwudu!>>

74 Akwɛyi Opita e le mu ivungɔma tee, <<Ongbulolo gba mi yi mu isomo le! Iyi mi so ele gba i yi tayi mo, Ukpo laa ka mi ingyira! Onzu awu mi yi wu mo!>>

Mu kwotata kwɔngu akwɛyi okwuru e to ɛyi, 75 akwɛyi Opita e lolo iso iyi bɔkɔ Ɔzhizɔsi e so wu awu tee: <<Ŋɔ zɔ kwu zɔ mi izhɛla dɛ gba okwuru e to ɛyi le.>> Akwɛyi a wɔ kwudu la oga ilomo iyɛkɔkɔ.