1 Mu kwuye kwɔngu Ɔzhɔnu u wo Obatisima e bo mu ɛzhi ɛngbarara ungwu Ozhudiya, laa anu itama iyi iso iyi Ukpo. 2 A zɔ tee, <<La lu kwu ira yi ɔsu,>> <<moo ɛsu irimo iyi oshi, inda fo!>> 3 Ɔzhɔnu gba akwu uwu bɔkɔ anukenzu Azaya e siso wu le tee:

<<Onzu uwufo e yi mu iyama mu opwu uwɔkwu mu ɛzhi ɛngbarara tee.

<Nɔngɔ ɔgwuzɛ ma laa Ɔkwu;

bɔ ɔgwuzɛ shɛ kaa laa zɛ mawu.> >>

4 Ɛkpayi iyi Ɔzhɔnu o fu mu inyi iyi onyakurumi; a ma kwɔbɛti ungwu kwokpo mu uzhi. Kiya ingyirimo wu ba akwu eko mbala lotu undu ɔsɛ. 5 Enzu o wɔ mu Ɔzhɛrusalɛ, mbala ɛzhi iyi Ozhudiya lɛɛbi, mbala kamba unga ɔkwu uwu Ɔzhɔda lɛɛbi o ka mbaa wu. 6 O zɔ ingbomo mbo akwɛyi Ɔzhɔnu e wo mbo obatisima mu ɔkwu uwu Ɔzhɔda.

7 Tabɔkɔ Ɔzhɔnu a ma Afarisi mbala Asadusi te o yi mu inyɔma mbaa wu kaa lo wo mbo obatisima, akwɛyi a za mba tee, <<Lunyi agbazhi mbɔlɛ - uwe e lo yi ilutu mu alu te, la lu rɛnya la lu shi wɔnu umbu u yi mu inyɔma awu? 8 La lu wo ɛduma iyi bi zɔ tee lu ku ira yi ɔsu-o. 9 La lu kwɛnwu te lu kwu ɛmɛ umba Aburamu mo mɛɛ, moo Ukpo e do te ee shi ekyi ɛlɛ i wala ɛmɛ laa Aburamu! 10 Keko ke yi mɛzhi-e unga ke kpolo ɛwɛyi ma laa akpa lɛɛbi; uwɛyi uwu bɔkɔ u wala imwuma iyeshi mo o kpolo wu o ta mu ɔyi. 11 Imi mi wo yi obatisima uwu embyi uwu a zɔ te lunyi lu ku ira yi ɔsu-o, onzu uwu bɔkɔ a ka mi ma uwu bɔkɔ ekpoyata wu lala mi do yi ishimo mo ba e yi mu inyɔma. Ee wo yi obatisima mu Kwundu uwu Ukpo, mbala ɔyi. 12 Kwɔta wu kwu yi mu ɔwu wu ungwu a fya ɔngbɔ ma kaa li shi eyi. Akwɛyi akwu eyi ee fu mu kɛnɛ, ɔngbɔ ba ee fu wu mɔyi uwu bɔkɔ u pwu u nyima mo awu.>>

13 Akwɛyi Ɔzhizɔsi a wɔ mu Ogalili e bo mu Ɔzhɔda kaa, Ɔzhɔnu le wo wu obatisima. 14 Ɔzhɔnu ba a gyi tee le wo wu mo. Akwɛyi a za wu tee, <<Uŋɔ gba ifate wo mi obatisima le, ɔbulɛ Ŋɔ bo mbaa mi tee la mi wo obatisima?>>

15 Ɔzhizɔsi ba a za wu tee, Nyama kaa wo yi tayi kwuye ngwɔlɛ, moo mu ɔgwuzɛ ɔlɛ gba kii wo lɛɛbi iyi bɔkɔ Ukpo a gyi le. Akwɛyi Ɔzhɔnu a nyama e wo wu obatisima.>>

16 Tabɔkɔ o mbwa Ɔzhizɔsi obatisima iwomo, akwɛyi a wɔma mu embyi. Akwɛyi oshi u wuma gboo, akwɛyi a ma Kwundu uwu Ukpo a wɔ moshi mate ogarikwokwo tayi akwɛyi e kwu mawu. 17 Akwɛyi opwu u wɔ moshi u zɔ tee, <<Ele akwu umɛ mi uwu idɛnyi mi, mi mwɔnyɛ mbala wu gyɔɔ.>>