1 Akwɛyi Kwundu uwu Ukpo e to Ɔzhizɔsi a kawa mu ɛzhi ɛngbarara kaa Osheta laa pwa wu ma. 2 Mizhikembo iyi Ɔzhizɔsi e wo kenyo afyi uwekpendo, lutu lɔnu, akwɛyi lonzu lu wo wu mo. 3 Akwɛyi Osheta e bo mbaa wu akwɛyi a za wu tee <<Gba ŋɔ kwu Umɛ uwu Ukpo ngboro de, ba za laa ekyi ɛlɛ tee li vindɔ kiya ingyirimo nɛ.>>

4 Ɔzhizɔsi ba a gba wu opwu tee, <<O ka yi ma mu kwokpo ungwu iso iyi Ukpo tee, Akwu mu kiya ingyirimo kɛɛkyi gba onzu ee yi kwunyɔ le mo, i kyo mbala iso iyinayina iyi i wɔ mu kenzu unga Ukpo tete.>>

5 Akwɛyi Osheta a gba e to Ɔzhizɔsi a kawa mu Ɔzhɛrusalɛ kwuse kwɔ kɛrikɛri kwɔngu, a ka e shi wu a rima mu ikperembe iyi Ɔtɛpu, 6 akwɛyi a za wu tee, <<Gba ŋɔ kwu Umɛ uwu Ukpo ngboro de ba, << yimo piriri kaa la mɛzhi nɛ, moo o ka yi ma lo mu kwokpo ungwu iso iyi Ukpo tee:

<< <Ukpo aa ta alɔgbulɔ wu ɔkpa tee,

lo shi ewo mbo kaa lo na ŋa,

kaa ki la ɛfyi mu kwoki mo.> >>

7 Ɔzhizɔsi a gba wu opwu tee, <<O ka yi ma mu kwokpo ungwu iso iyi Ukpo tete lo tee, <Ki pwa Ɔkwu Ukpo ŋɔ ma mo.> >>

8 Akwɛyi Osheta a gba e to Ɔzhizɔsi a kawa mu ikperembe iyi lɔwa akwɛyi a zɔ wu ɛzhi iyi kwudu kwɔlɛ lɛɛbi mbala woshi yi.>> 9 Akwɛyi Osheta a za wu tee, <<Gba ŋɔ kwumo, ŋɔ gbo mi ɔya, iyi mi zɔ ŋɔ yi ele lɛɛbi, mi ra yi mi shi ŋɔ.>>

10 Akwɛyi Ɔzhizɔsi a za wu tee, <<Ɔshɛta yimo munɛ! O ka yi ma mu kwokpo ungwu iso iyi Ukpo tee, Ɔkwu Ukpo ŋɔ kɛɛkyi gba ŋɔɔ gbo wu ɔya, ŋɔ gbo wu rinye le!> >>

11 Akwɛyi Ɔshɛta a lu Ɔzhizɔsi afyima, akwɛyi alɔgbulɔ umba Ukpo o bo o mbwa wu ma.

12 Kwuye ungwu Ɔzhizɔsi a pwa tee Ɔzhɔnu o ta wu mu ugu ugyi, a gba a ka mu Ogalili. 13 A ka ŋɔ mu Ɔnazarɛti dɛ, akwɛyi a lafya laa mɔmɔ akwɛyi a ka ŋɔ mu Ɔkapanawu, kwuse ungwu kwu yi kɛlɛ mbala risu ingyi Ogalili mu ɛzhi iyi Ɔzɛbulu mbala Onafitali awu. 14 Ɛlɛ i wo tee kaa li nyɔlɔma iyi anukenzu Azaya e so tee:

15 <<Ɛzhi iyi Ɔzɛbulu mbala ɛzhi iyi Onafitali,

mu ɔgwuzɛ u sheye mu risu, mu ɔsɔwu uwu Ɔzhɔda,

Ogalili, ɛzhi iyi enzu umba bɔkɔ akwu Azhu mo!

16 Enzu umba o yi mu ipwu,

O ma ɛbɛ iyɛku.

Umba o ŋɔ mu ɛzhi iyi ipwu iyi lukwu,

ɛbɛ i lemo mɔmɔ memowu.>>

17 I na mu kwuye kwɔngwu, Ɔzhizɔsi e gwo laa anu itama, tee: <<La lu kwu ira yi ɔsu, moo Irɛsu iyi Oshi i bo kɛlɛ-ɛ!>>

18 Ɔnu uwufo Ɔzhizɔsi e yi mu luzɛ mɛmba iyi Risu ingyi Ogalili te akwɛyi e gele ɛmɛnɛ wepo wa yi emu Ɔsayimɔ(uwu o ya wu tee Opita) mbala umanyi wu, Anduru, o yi mu eya ifumo mu embyi moo umba akwu wa yi emu. 19 Ɔzhizɔsi a za mba tee, <<La lu mbwalu mi, akwɛyi mi zɔ yi enzu iyimo ŋa.>> 20 Kɛlɛlɛ o la afyi laa iya mba akwɛyi o mbwalu wu.

21 Tabɔkɔ Ɔzhizɔsi e turu a gba keyi bwɛɛ te, akwɛyi a gba e du ɛmɛnɛ wepo kpɔ, Ozhemisi, umɛ uwu Ɔzɛbɛdi, mbala Ɔzhɔnu umanyiwu. O yi mu kwoda mbala ete mbo, Ɔzɛbɛdi, mu iya mba inɔngɔma. Ɔzhizɔsi a ya mba ma tee lo bo, 22 Akwɛyi o yimo kpara, o lafya laa kwoda mbala ete mbo, akwɛyi o mbwalu wu.

23 Ɔzhizɔsi e le mu igɔma mu ɛzhi iyi Ogalili lɛɛbi, laa ɛzu izɔma mu idaba iyi ɛlu ikpalama, mu anu itama iyi Iso Iyeshi iyi irɛsu iyi Ukpo, mbala enzu umba efya ikikɔ – ikikɔ ibomo. 24 Ɛza wu i fulama munamuna mu ɛzhi iyi Osiriya, akwɛyi enzu o ka wu laa enzu umba efya ikikɔ – ikikɔ: umba bɔkɔ o yi ɛndu iyira, mbala umba o yi ofya umbu ookpo, mbala umba o kpokapiya - akwɛyi Ɔzhizɔsi e bo mbo efya ma lɛɛbi. 25 Enzu riba umba o wɔ mu Ogalili, Ɔdikapɔli, Ɔzhɛrusalɛ, Ozhudiya mbala Onya uwu ɔsɔwu uwu ɔkwu uwu Ɔzhɔda, o mbwalu wu.