1 Kwuye ungwu Ɔzhizɔsi mbala Wavɔngɔkiya wu o nda laa Ɔzhɛrusalɛ fo, o bo mu kwuse ungwu Obetafage mu Lɔwa undu Olifu, akwɛyi Ɔzhizɔsi a lɔ Wavɔngɔkiya wu wepo ma. 2 A za mba tee, <<La lu so mu kwuse ungwu keyi kwɔngu akwɛyi lu ma ɔzɛki o mawu ma mbala umɛ wu mɔmɔ. La lu vuvu mba ma kaa la lu ka mi. 3 Gba onzu e so yi iso, la lu za wu tee Ɔkwu e yi ugɔ mba. A ngbɛ kwuye mo a lɔ mba ɔ nya mba efyefya.>>

4 Ɛlɛ i wo te ka li nyɔlɔ iso iyi anukenzu e so tee:

5 <<La lu za la kwuse ungwu Ɔzayɔ,

<Yese, ɔsu yi e yi mu inyɔma munyi yi!

E to ɛwu tee wakwu kiya kinyinyi mo, a zɛ mu ɔzɛki,

ɔzɛki uwu bɔkɔ o do ya mawu dɛ mo.> >>

6 Akwɛyi Wavɔngɔkiya wu ɔ ka o wo iyi bɔkɔ Ɔzhizɔsi a lɔ mba tee lo wo. 7 O bo la ɔzɛki mbala umɛ wu, o fulo ekpayi mba mu ɔzɛki awu akwɛyi Ɔzhizɔsi a ŋɔ ma yi. 8 Enzu guruguru umba ɔ mbwalu wu o fu ekpayi mba mɛzhi, umbafo o kpolo ende iyi ɛwɛyi o fu mu ɔgwuzɛ. 9 Riba ingyi enzu umba o yi mu keyi mbala umba bɔkɔ o yi mizhikembo o le wu mu ɛnyi itomo mu opwu uwɔkwu, ɔ zɔ tee, <<Osana la Umɛ uwu Odevidi!>> <<Esheshi akwiyi onzu uwu e yi mu inyɔma mu ɛnyi iyi Ɔkwu! Ukpo lɔ duwuma!>>

10 Kwuse ungwu Ɔzhɛrusalɛ ku fulowa kwuye ungwu Ɔzhizɔsi e fye mangwu. Kwuwongwu ɛlɛ, umbafo o yo tee, <<Ele akwu uwe te?>>

11 Riba ingyi enzu umba ɔ mbwalu wu ɔ gba mba opwu tee, <<Ele akwu Ɔzhizɔsi, anukenzu uwu a wɔ mu ɛzhi iyi Onazareti uwu Ɔgalili.>>

12 Akwɛyi Ɔzhizɔsi e fye mu ɔtɛpu akwɛyi a ra laa enzu lɛɛbi ma umba o yi mu rishi iyama mɔmɔ. Eteburu iyi wa ŋanga eduwo mbala abɛ iyi iŋɔma iyi enzu wa ya atatabiri ma e fulo ye mbwe, 13 akwɛyi za mba tee, << Ɔ ka yi ma mu kwokpo ungwu Ukpo tee, <Ɔtɛpu mi o ya wu tee kwogba ungwu Ukpo ilɛma.> Ɔbulɛ lunyi lu wo ungwu kwogba ungwu awɛlɔ!>>

14 Epeyi mbala umba kinyɛ o bo munyi wu mu ɔtɛpu akwɛyi e bo mbo efya ma. 15 Tabɔkɔ ebwoshi umbakɔ mbala wazɔ ɛrama iyi Ukpo ɔ ma apula iyi izele iyi bɔkɔ Ɔzhizɔsi e yi mu iwomo, ikyo mbala uzhi duruduru uwu ɛmɛshɛri o wo mu ɔtɛpu o zɔ tee, <<Osana akwiyi Umɛ uwu Odevidi,>> akwɛyi o le mu amba iwomo.

16 Akwɛyi o yo Ɔzhizɔsi tee, <<Ŋɔ pwa iso iyi ɛmɛshɛri mbɔlɛ o yi mu isomo?>> Ɔzhizɔsi a gba mba opwu tee, <<Ee mi pwa, lu du wa yi dɛ mo re mu kwokpo ungwu Ukpo tee? <Ŋɔ zɔ ɛmɛshɛri mbala ɛmɛ umba elu kaa lɔ duŋɔma?> >>

17 Akwɛyi Ɔzhizɔsi a lumba afyima, a ka mu Ɔbɛtani, mɔmɔ gba a nama le.

18 Ɔzhizɔsi a wɔ mu kwoto mu kwoto a gba e sheye mu kwuse, lonzu ba lu wo wu mo. 19 A ma uwɛyi uwu oboriyo mu kenzu unga ɔgwuzɛ akwɛyi a ka mba wu. E du epwepu bi moo u muma mo. Akwɛyi a za laa uwɛyi ɔnwu tee <<Ŋɔ muma gbee fo!>> Mɔmɔɔmɔ uwɛyi ɔnwu u shirima.

20 Tabɔkɔ Wavɔngɔkiya o ma ɛlɛ izele i yi mbo mo akwɛyi o yo tee, <<I wo la bɔkɔ uwɛyi uwu oboriyo ɔlɛ u shirima efyefya te?>>

21 Akwɛyi Ɔzhizɔsi a gba mba opwu tee <<Mi so yi ongbulolo, gba lu yi ikwu idu lu fulo akwɛyi lu yi egbo epo mo, lu do tee lu wo iyi bɔkɔ mi wo uwɛyi uwu oboriyo ɔlɛ. Akwu iyi i wo uwɛyi uwu oboriyo le kɛɛkyi mo, lu do te luu za laa lɔwa kwɔlɛ tee, <Yimo, so kaa ta mu risu,> ba ii wo tayi. 22 Gba lu kwu idu lu fulo mu Ukpo, kiya ingyinangyina ingyi lu nda wu, lu fya ngyi ma.>>

23 Ɔzhizɔsi a gbama e fye mu ɔtɛpu akwɛyi kwuye ungwu e yi mu enzu ɛzu izɔma, ebwoshi umbakɔ mbala enzu umbakɔ umba kwuse o bo o du wu. Akwɛyi o yo wu tee, <<Mu idomo iyi uwe ba ŋɔ wo apula ɛlɛ?>> << Uwe e shi ŋɔ idomo ɛlɛ?>>

24 Ɔzhizɔsi a gba mba opwu tee <<Imi tete mi yo yi kwuyo kwukpɛnyi, gba lu gba mi opwu, Imi tete mi so yi mbaa mi fya idomo iyi apula ɛlɛ iwomo: 25 Idomo iyi obatisima iwomo iyi Ɔzhɔnu i ngyi mu na: i ngyi mbaa Ukpo naa i ngyi mbaa enzu ŋa?>>

Akwɛyi o le mu amasa itama mbala esu tee, <<Inyete ki zɔ te? Gba ki zɔ tee <I ngyi mbaa Ukpo,> e yo nzu tee <Kimbe ki shi lu mbwalu iso iyi Ɔzhɔnu mo?> 26 Gba ba ki zɔ tee <I ingyi mbaa enzu,> ɛlɛ tete i lo nzu iyi moo enzu lɛɛbi ɔ nyama tee Ɔzhɔnu akwu anukenzu uwu Ukpo.>>

27 Kwuwo kwɔngwu, ɔ gba Ɔzhizɔsi opwu tee, << Ki yitu mo.>> Akwɛyi a za mba tee, <<I mi tete mi zɔ yi mbaa mi fya idomo iyi apula ɛlɛ iwomo mo.

28 Akwɛyi e yo ebwoshi umbakɔ mbala enzu umbakɔ tee <<Lunyi lu ma te mu kwoba ngwɔlɛ? Onzu uwufo e yi ɛmɛ anzɔnu wepo. A ka mbaa umɛ uwakɔ akwɛyi a za wu tee, <Umɛ mi, ɔnɛ so kaa wo mi ɛduma mu utu.>> 29 Umɛ awu a gba wu opwu tee, <Ada mi ri mo,> mizhikembo iyi ɛlɛ a ŋanga egbo mo akwɛyi a ka biŋa. 30 Akwɛyi a gba a ka mbaa umɛ uwopo a ke so wu tete. Umɛ awu a gba wu opwu tee, <Ada, mi ri,> ba a ka mo.

31 <<Mu ɛmɛ wepo mbɔlɛ uwe e wo kiya ingyi ete wu a gyi?>> Ɔ gba wu opwu tee <<Umɛ uwakɔ>>

Akwɛyi Ɔzhizɔsi a za mba tee, <<Mi so yi ongbulolo, wa na oba uwɛzhi mbala eko umba o to kaya o fye mu Irɛsu iyi Ukpo keyi la lunyi. 32 Moo Ɔzhɔnu e bo a zɔ yi ɔgwuzɛ uwu ototo, lu nyama laa iso wu mo. Wa na oba uwɛzhi mbala eko umba o to kaya ba o nyama laa iso wu. Tabɔkɔ lu ma ɛlɛ lala i fulo yi egbo mo kaa lu ta mɛzhi kaa lu mbwalu wu mo.

33 <<La lu ngbɛ alu mbaa kwoba ungufo: Onzu uwufo a gba utu uwu ɛwɛyi. A wɛ wu ma mu ɔbɛ, a vu kizɛ ingyi bɔkɔ o tu imuma iyi uwɛyi akwɛyi e mbo ugu uwu onzu uwu igbomo. Akwɛyi a ra la utu ɔwu e shi asukpo akwɛyi a ka luzɛ. 34 Kwuye ungwu ewiri ilɔma, a lɔ ɛmɛgba wu tee lo so mbaa asukpo mbamba kaa lo na ogbo wu lo ka wu. 35 <<Asukpo mbamba o yi ɛmɛgba wu mbɔlɛ ma, o byi ukpɛnyi ɛmu, o ngbɛ uwufo mo, onzu uwɔla ba o to wu ekyi. 36 Ada uwu utu ɔwu a gba a lɔ ɛmɛgba umbafo kpɔ, o ka umba kwonze riba ma, asukpo o wo mbo kyamate o wo umba kwonze awu. 37 Imbwama yi akwɛyi a lɔ umɛ wu munyi mbo ŋa. A byi egbo tee, <Enzu mbamba o lo umɛ mi ma.> 38 << Kwuye ungwu bɔkɔ asukpo mbamba o ma umɛ uwu ada uwu utu tee e yi mu inyɔma, akwɛyi o le mu esu isomo tee, <Ele gba akwu u ri ogu wu le. Bo la ki ngbɛ wu ma kaa utu lu ŋa nzu!> 39 Akwɛyi o yi wu ɔ wawu ma mu utu ɔwu akwɛyi ɔ ngbɛ wu ma.

40 Akwɛyi Ɔzhizɔsi e yo tee, <<Kwuye ungwu ada uwu utu ɔwu a ba gbama awu ba e wo asukpo mbamba te?>>

41 O gba wu opwu tee <<Enzu umbira mbamba a ngbɛ mba lukwu undura,>> <<akwɛyi a ra la utu ɔwu e shi enzu mbawa, umba o koko o ka wu laa ogbo wu kyaa kwuyengwu ewiri ilɔma.>>

42 Akwɛyi Ɔzhizɔsi e yo mbo tee, << Lu du wa yi dɛ mo re mu kwokpo ungwu Ukpo tee:

<Kwokyi ungwu ola ungwu bɔkɔ wa mbo ugu o towo ngwu mo

gba ku gba ku kwu ola uwu ugu le,

ɛlɛ akwu iwomo iyi Ɔkwu,

kinzu ba

a kwa nzu iyi kenzu iyama!>

43 <<Kwuwo kwɔngu la mi so yi te oo na ɛsu irimo iyi oshi mu ewo yi ma, akwɛyi oo shi yi enzu umba o walaa imuma iyesheshi.>> 44 Onzu uwu a ta mu kwokyi ngwɔlɛ, a muma kpɛrɛ kpɛrɛ, onzu uwu ba kwokyi ngwɔlɛ ku ta ma wu, a shɛkɛma pwutuu.>> 45 Eboshi umbakɔ mbala Afarisi o pwa aba iyi Ɔzhizɔsi ɛlɛ, akwɛyi o dama tee iso ɛlɛ e so mbo. 46 Akwɛyi o gagyi ɔgwuzɛ tee lo yi wu mo, iyi ba i wo mbo mo kwuwongu riba ingyi enzu moo enzu o nyama tee Ɔzhizɔsi akwu anukenzu.