1 Kwuye ungwu bɔkɔ Ɔzhizɔsi a mbwa Wavɔngɔkiya wu wewo la wepo kaza ishimo, e yimo mɔmɔ akwɛyi e fye mu ese iyi Ogalili laa ɛzu izɔma mbala anu itama iyi iso iyi Ukpo.

2 Kwuye ungwu Ɔzhɔnu uwo Obatisima uwu e yi mu Ugugyi a pwa iyi bɔkɔ Okrasi e yi mu iwomo, akwɛyi a lɔ Wavɔngɔkiya wu ma mbaa wu. 3 O yo Okrasi kwuyo tee, <<So nzu,>> <<uŋɔ gba Ɔzhɔnu a zɔ te ŋɔ yi mu inyɔma le naa la ki fulo eyi mu onzu awa ŋa?>>

4 Ɔzhizɔsi a gba mba opwu tee, <<La lu so kaa la lu lu so Ɔzhɔnu kiya ingyi lu pwa mbala ingyi lu ma: 5 epeyi o gba la ɛbɛ imama, umba o yi alɛ mo o yi mu luzɛ, umba o yi ofya umbu embyi umba ɔyi, ofya mba u bo mo, wa salu o pwama, umba o kpomo o gba mba la iyimo, ayirewa o ta mba anu iyi Iso Iyi Esheshi. 6 Ɔnyɛ akwu uwu onzu uwu bɔkɔ e yi egbo epo ma mi mo!>>

7 Tabɔkɔ Wavɔngɔkiya umba Ɔzhɔnu o fulomo, akwɛyi Ɔzhizɔsi e le mu enzu umba o kpala ɛlu awu iso isomo mekeka iyi Ɔzhɔnu. E yo mbo tee: <<Kwuye ungwu lu ka mu ɛzhi ɛngbarara awu, lu ka tee kaa la lu yese kwuwongu mbe? Anga iyi bɔkɔ kwokpo kwu wo yi akpa awu re? 8 Naa lu ku yese kwuwongu mbe? Onzu uwu e kpo ekpayi iyi esheshi re? Ayimo, enzu umba o kpo ekpayi iyi esheshi o yi mu agba iyi asu! 9 Ba lu ka te kaa la lu yese kwuwongu mbe? Anukenzu uwu Ukpo re? Ee, mi so yi, Ɔzhɔnu a ka anukenzu uwu Ukpo uwunawuna ma. 10 Moo Ɔzhɔnu gba akwu onzu bɔkɔ iso iyi Ukpo i zɔ tee: <Ukpo a zɔ te, mi lɔ ɔlɔgbulɔ mi mu keyi ŋɔ kaa la nɔngɔ ŋɔ ɔgwuzɛ ma.> 11 Mi so yi ongbulolo mɛɛ, mekeka iyi enzu lɛɛbi umba bɔkɔ o mbamba mu kwudu kwɔlɛ uwu bɔkɔ a ka Ɔzhɔnu u wo obatisima ma e yi mo. Tetete onzu u mbwambwa mu Irɛsu Iyoshi a ka Ɔzhɔnu ma. 12 I na ngbaa mu kwuyengwu bɔkɔ Ɔzhɔnu U wo obatisima e ye la anu itama nzhii ba mu kwuye kwɔlɛ, Irɛsu Iyoshi i yi mu inyashi imama gyɔɔ moo enzu umba ovyo o gyi te lo nyi yi isheye keyi ma. 13 Anukenzu lɛɛbi mbala Ɛrama iyi Omosisi o siso mu reshi ingyi Irɛsu ɛlɛ dɛ gba Ɔzhɔnu e bo le. 14 Shi lu yi egbo iyi lu na, ba la lu na moo Ɔzhɔnu gba akwu Elazha uwu bɔkɔ anukenzu o so tee a nyɔlɔ le 15 Onzu uwu e yi alu iyi ipwama ba la pwa!

16 <<Kimbe ba mi masa ngyi mbala enzu umba ɔyi ɔlɛ? O yi kyamate ɛmɛshɛri umba o ŋɔma mu rishi o ya esu ma tee, 17 <Ki so yi amwu iyi okopo itomo, lunyi ba lu komo mo! Ki so amwu iyi obobyi, lunyi ba lo ɔga mo!> 18 Kwuye ungwu Ɔzhɔnu e bo e wo kenyo ba e wo owanyi mo, akwɛyi uwewe a zɔ tee,< E yi kwundu ungwura!> 19 Umɛ uwu Onzu e bo e ri e wo, akwɛyi uwewe a zɔ tee, <Lo yese onzu ele! Akwu u ri kwuri ungwu ubu mbala u wo owanyi, umɛza uwu wa na oba uwɛzhi mbala enzu umba ingbomo!> Ilukwu iyi Ukpo ba o zɔngɔ yi ma mu i womo yi.>>

20 Akwɛyi Ɔzhizɔsi e le mu ese iyi bɔkɔ e wo ɛduma iyi amɛ ma yi itumo, kwuwongu o towo ikwu ira mba ɔsu. 21 <<Ikpɛdɔma akwu iya yi Okorazi! Ikpɛdɔma akwu iya yi tete Ɔbɛsayida! Lɔ zɔ tee ɛduma iyi kenzu iyama iyi bɔkɔ o wo mekeka yi ele, gba lo wo yi mu Otaya mbala Ɔsidɔ, diridiri enzu mɔmɔ lo bo kwu ira ɔsu laa ashɔgiri mbala kwulɔ ikpomo mɛnwu! 22 La mi so yi ongbulolo mɛɛ, ɔnuwu Kwɔfyi ungwu Ombwu izɔma, eyembembyi iyi Ukpo a ba ma iyi Otaya mbala Ɔsidɔ i ka iyayi ma! 23 Lunyi enzu umba Okapanawu, lu mate lu fya ipwɔma moshi re? Ayimo, mu aleku gba o fu yi le. Apula iyi kenzu iyama iyi o wo mekeka yi ele gba lo wo yi mu Ɔsɔdɔmu, ba lo bo degbo kwɔfyi ungwu ɔnɛ te! 24 La mi so yi ongbulolo mɛɛ, ɔnuwu Kwɔfyi ungwu Ombwu izɔma, eyembembyi iyi Ukpo a ba ma iyi Ɔsɔdɔmu i ka iyayi ma!>>

25 Kwuye kwɔngu Ɔzhizɔsi a lɛ Ukpo a zɔ tee, <<Mi du ŋɔ ma, Ada, Ɔkwu uwoshi mbala ɛzhi, kwuwongu ŋɔ nvye apula ɛlɛ ma lɛɛbi laa enzu umba ilukwu mbala umba iyitu, akwɛyi ŋɔ wuyima laa ɛmɛshɛri. 26 Ee, Ada, ɛlɛ gba i she ŋɔ woshi le.

27 <<Apula lɛɛbi Ada mi e lo mi yi mɔwu. Onzu uwu e yi Umɛ ele e yi mo, Ada kɛɛkyi gba e yi wu le, tatayi onzu uwu e yi Ada ele e yi mo, Umɛ kɛɛkyi mbala umba bɔkɔ Umɛ a ŋa te laa zɔ wu mba.

28 <<La lu bo mbaa mi, lɛɛbi yi umba lu yi mu inyashi imama iyi ewulo iyi ɔlu ishimo akwɛyi mi shi yi ɛnwu igbomo. 29 La lu bo lu gbo mi rinye kaa la lu vɔngɔ mbaa mi, kwuwongu mi ku onzu uwu egbo mbala ugyi ɛmi ma, akwɛyi luu fya ɛnwu igbomo ma. 30 Moo rinye mi ri yi fule fule te, ewulo iyi bɔkɔ mi bi shi yi ba i yi ɔlu mo.>>