1 <<La lu ngbɛndu kaa la lu wo ɛduma iyeshi gedegede kwuwongu enzu lo ma yi mo. Gba lu wo tayi, lu na rigbɛ mbaa Ete yi uwoshi mo.

2 <<Kwuwo kwɔlɛ gba ŋɔɔ wo rɛshi laa ɔyirewa, ki kpa kwɔzɔ mo, moo te gba wamwangba o-oo wo le mu idaba iyi ɛlu ikpalama iyi Azhu mbala mu ɛgwuzɛ, kaa enzu lɔ pwɔ mba ma. Mi so yi ongbulolo tee o na rigbɛ mba ma ndii-e. 3 Gba ŋɔɔ wo rɛshi laa ɔyirewa ba, ki nyama tee umɛza ŋa uwu kasɛkɛ lala le yitu mo. 4 Akwɛyi rɛshi iwomo ŋɔ aakwu kyokyokyo. Akwɛyi Ete yi, uwu bɔkɔ a ma iyi ŋɔ wo kyokyokyo awu, e shi ŋɔ rigbɛ.

5 <<Kwuye ungwu lu lɛ Ukpo, la lu yi ma te wamwangba mo! Umba ɔ gyi Ukpo ilɛma mu irima mu idaba iyi ɛlu ikpalama iyi Azhu mbala ɛgwuzɛ kaa onzu uwunawuna laa ma mba. Mi so yi ongbulolo tee, o na rigbɛ mba ma ndii-e. 6 Gba ba luu lɛ Ukpo, la lu fye mu ugu yi, la lu koko riku mo akwɛyi luu lɛ Ete yi, uwu bɔkɔ o ma wu mo awu. Akwɛyi Ete yi, uwu a ma iyi bɔkɔ o wo kyokyokyo awu, ee shi yi rigbɛ.

7 Kwuye ungwu lu lɛ Ukpo, la lu ri mu iso ikpɛnyi iyi umbwa mo, kyamate wa byi eshi oo wo tayi, imama mba eshi mbo i pwa kwɔya mba kwuwongu iso isomo mbo gbulɔlɔ. 8 La lu yi mate umba mo. Ete yi e yitu iyi kiya ingyi bɔkɔ lu gyi-e dɛ ishi lu nda wu le. 9 Kwuwo kwɔlɛ, gba luu lɛ Ukpo la lu zɔ tee:

<Ete nzu uwu e yi moshi,

Ɛnyi ŋɔ ɛkɛrikɛri lo du yi ma;

10 Irɛsu ŋɔ li bo; iyi bɔkɔ ŋɔ gyi yi awu li wo

mu kwudu kwɔlɛ kyamate ii wo moshi tayi.

11 Shi nzu kiya ingyirimo nzu ingyi ɔnɛ.

12 Gba laa ingbomo nzu kpa nzu,

kyamate bɔkɔ kinzu ki gba yi kpa umba bɔkɔ o ngbo nzu mo tayi.

13 Ki so nzu mbaa ipwama iyi ii ga nzu ma mo,

uŋɔ ba sa nzu ma mbaa Onzu uwoyi.>

14 <<Gba lu gbayi lu kpa enzu umba o ngbo yi mo, Ete yi uwoshi aa gba laa ingbomo yi aa kpa yi tete. 15 Gba lu gbayi lu kpa enzu umba o ngbo yi mo mo, Ete yi ba aa gba laa ingbomo yi aa kpa yi mo.

16 <<Kwuye ungwu lu ra laa kenyo, la lu shishi eyi kyamate enzu wamwangba o wo mo. Umba o yese mbaa emba mo kaka kaa onzu uwunawuna laa ma tee o ra laa kenyo. Mi so yi ongbulolo tee, o na rigbɛ mba ma ndii-e. 17 Kwuye ungwu lu ra laa kenyo, la lu vye eyi yi mo, la lu fyii inyi yi mo, 18 kaa enzu lo zɔngɔma tee lu ra laa kenyo mo - kaa Ete yi kɛɛkyi, uwu o ma wu mo awu e yitu. Ete yi uwu ba a ma iyi bɔkɔ oo wo kyokyokyo awu, ee shi yi rigbɛ.

19 <<La lu kpala kiya ingyi kwuwo yi ɛlu mu kwudu kwɔlɛ mo, mbaa ela mbala akazhi i fye ma yi akwɛyi i tutu yi mo mo, mbaa awɛlɔ o fye akwɛyi o to ngyimo mo. 20 Lunyi ba la lu kpala kiya ingyi kwuwo yi ɛlu moshi, mbaa ela mbala akazhi i fye mo, mbaa awɛlɔ o do ifyemo kaa lo to kiya mo. 21 Mbaa bɔkɔ kiya ingyi kwuwo ŋɔ ki yi le, gba ba egbo ŋɔ i yi le tete.

22 <<Eyi i yi mate kambwu ɔyi unga ke shi ɛbɛ laa ɛnwu tayi. Gba eyi ŋɔ ishoshi, ɛnwu ŋɔ kpɛkpɛyi akwu ɛbɛ; 23 gba eyi ŋɔ ba ishoshi mo, ɛnwu ŋɔ lɛɛbi akwu ipu kpakiri. Gba ɛbɛ iyi bɔkɔ i yi mu ɛnwu ŋɔ le akwu ipu, de ba ipu ɛnyi akwu iyɛku!

24 <<Onzu ukpɛnyi akwu unye uwu ada umba kwogba wepo mo; moo e towo ukpɛnyi ma akwɛyi ba e pwu idɛnyi iyi ukpɛnyi; naa e lo ukpɛnyi mo akwɛyi aa zhi uwufo ma. Ŋɔ do te ŋɔ kwu umɛgba uwu Ukpo mbala uwu eduwo mo.

25 <<Kwuwo kwɔlɛ mi so yi tee la lu ta aka kwuwongu kiya ingyirimo ingyi bɔkɔ lu ri naa embyi umba lu wo naa ekpayi iyi lu kpo mɛnwu mo. Kwunyɔ ku sheshi ku ka kiya ingyirimo moo? Ɛnwu ba isheshi i ka ekpayi ma moo? 26 La lu yese afyi umba oshi: o gbama mo, ba ɔ lɔ kaa lo fu mu lunɛ mo; tete Ete yi uwoshi gba ee fye mbo le! Lunyi lu koshi laa afyi moo? 27 Uwe meka yi, kwuwongu aka itama wu e do tee ee kyo kwunyɔ wu wɔzhi ma?

28 <<Kwuwongwu mbɛ ba lu ta aka iyi ekpayi iyi ilomo? La lu yɛsɛ ibulɔma iyi edodo mu akata: i wo ɛduma mo ba i fu ekpayi iyi ikpo mu ɛnwu mo. 29 Tetete mi so yi tee, Osolomonu laa kiya ingyi kwuwo wu lɛɛbi lala e kpo ekpayi iyesheshi mate edodo ɛlɛ mo. 30 Ukpo gba ee kpo ɔsɛ mu akata ekpayi le - ɔsɔ uwu bɔkɔ o ma wu ɔnɛ kwɔnyikwɔlɛ o ma yi fo, o pwuyimo mɔyi. Uwu ba e do tee e yese mba yi moo? Kimbe ki shi lu yi ikwidu fulo iyɛri te?

31 <<Kwuwo kwɔlɛ la lu ta aka tee: <Kimbe ba ki ri? Naa kimbe ba ki wo? Naa kimbe ba ki kpo mu ɛnwu?> mo. 32 (Moo wa yi Ukpo mo tete o yi mu apula ɛlɛ igagyima.) Ete yi uwoshi e yitu tee lu yi ugɔ uwu apula ɛlɛ lɛɛbi. 33 Lunyi ba la lu gagyi ɛsu irimo iyi Ukpo mbala iyi bɔkɔ a gyi keyi dɛ, akwɛyi iyi lu gagyi yi awu lɛɛbi o shi yi yi. 34 Kwuwo kwɔlɛ la lu ta aka iyi kwɔnyi mo, moo kwɔnyi ku yi aka ngwu. Kwɔfyi ngwunangwuna ku yi ira ngwu.