1 Akwɛyi Ɔzhizɔsi a zɔ te, << Irɛsu iyi oshi i yi mate ɔkwu uwu utu uwu a kyiwɔma mu kwoto kaa le to enzu lo wo wu ɛduma mu utu. 2 A nyama tee e shi onzonzu eduwo osiliva ukpɛnyi mu kwɔfyi kwukpɛnyi, akwɛyi a lɔ mba ɔ ka mu utu uwu ovanyi wu. 3 <<Mu ekerefe erendo iyi kwoto, a wɔ kwudu kpɔ akwɛyi a ma enzu umbafo mu rishi o yi mu kiya kyinyinyi iwomo mo. 4 Akwɛyi a za mba tee <Lunyi tete la lu so lu wo mi ɛduma mu utu, akwɛyi mi-i shi yi rigbɛ, kyakya laa ɛduma iyi lu wo.> 5 Akwɛyi o ka. <<A gba a wɔ kwudu kpɔ mu ekerefe uwo laa epo iyi ɔnɔnda mbala ekerefe ɛla iyi onoyo akwɛyi e wo mate bɔkɔ e wo kwonze tayi. 6 Mu ekerefe ɛlɔ iyi onoyo a gba a wɔ kwudu akwɛyi e du enzu umbafo ɔ rima iya mba shaa. E yo mbo tee <Lu ri iyi kwuwongumbe mune ngbaa mu kwoto ba lu yi mu kiya kinyinyi iwomo mo le?> 7 O gba wu opwu tee << <Kidi fya onzu uwu e shi nzu ɛduma mo.> Akwɛyi a za mba tee, <Lunyi tete la lu so lu wo ɛduma mu utu mi.>

8 <<Mu onoyo, ɔkwu uwu utu a za la u to keyi uwu utu wu tee, <Ya umba ɛduma ma kaa shi onzonzu rigbɛ wu, i gwu mu umba o to mbo mizhikembo i gba kadu.> 9 << Enzu umba ɛduma umba o to mbo kembo mu ekerefe ɛlɔ iyi onoyo, onzonzu a na osiliva ukpɛnyi. 10 Enzu umba ɛduma umba o to mbo keyi awu, o bo, o fulo eyi tee rigbɛ mba ri ka le. Umba tete o na osiliva ukpɛnyi ukpɛnyi. 11 Tabɔkɔ o na yi ma, o kwo mu kwuzhini ikpomo, 12 O zɔ tee, <Enzu mbɔlɛ umba o to mbo kembo le o wo ɛduma iyi awa ikpɛnyi bi,> <ba ŋɔ shi mbo kyakya mbala kinzu umba ki wo ɛduma ngbaa mu kwoto ba ɔnu u la nzu ma te le!> 13 <<Akwɛyi a gba ukpɛnyi mba opwu, a za wu tee, < Umɛza mi, mi wo ŋɔ iwiwomo mo. Ki nyama kyaa tee ŋɔ na osiliva ukpɛnyi mo re? 14 Na rigbɛ ŋɔ ka sheyimo. Mi gyi tee mi shi onzu uwu o to wu kembo le kyakya mbala iyi mi shi ŋɔ. 15 Nana mi do te mi wo ingyi mi gyi mu eduwo mi mo ŋa? Nana ŋɔ wo rise mi kwuwongu mi shi ari le ŋa?> >>

16 Akwɛyi Ɔzhizɔsi a mbwa yi tee <<Kwuwo kwɔngwu enzu umba o mbwa kembo akwu wa to keyi, enzu wa to keyi ba akwu wa mbwa kembo.>>

17 Kwuye ungwu Ɔzhizɔsi e sheye mu Ɔzhɛrusalɛ, a ya Wavɔngɔkiya wu wewo la wepo ma mu ɛmba akwɛyi a za mba tee, 18 <<La lu pwa,>> <<tabɔkɔ ki sheye mu Ɔzhɛrusalɛ le, Umɛ uwu onzu o-oo ra wu o-oo shi ebwoshi umbakɔ mbala wa zɔ ɛrama iyi Ukpo. O-oo fu ombu uwu lukwu o lo wu 19 akwɛyi o ra wu o shi enzu umba akwu azhu mo, o-oo wo wu ɛnɛ, o kpa wu ikpa akwɛyi o-oo kpa wu mu kwuwɛyi ungwu lukwu. Ɔnuwu kwɔfyi ungwola ba o-oo gba wa laa iyimo la kwunyɔ.>>

20 Akwɛyi anyi wu ɛmɛ umba Ɔzɛbɛdi e bo mbaa Ɔzhizɔsi mbala ɛmɛ wu wepo, e kwumo mu idu wu, akwɛyi a nda wu kwɔya.

21 Ɔzhizɔsi e yo wu tee <<Kimbe bɔ ŋɔ gyi?>>.

Akwɛyi a za wu tee, <<Shɔkɔ nyama kaa ɛmɛ mi wepo mbɔlɛ, ukpɛnyi la ŋɔ mu kwuwo ungwu ungyi ŋɔ uwufo ba la ŋɔ mu kwuwo ungwu ɔzu ŋɔ kwuye ungwu ŋɔ bi kwu ɔsu awu.>>

22 Ɔzhizɔsi ba a gba opwu laa ɛmɛ mbamba a za mba tee, <<Lu yitu iyi kiya ingyi lu yi mu indama mo.>> <<Lu do te lu wo ago iyi inyashi iyi mi ŋi wo le?>>

O gba wu opwu tee <<Ee ki do iwomo.>>

23 Akwɛyi Ɔzhizɔsi a za mba tee <<Ee lu do te lu wo ago mi iyi inyashi iyi mi ŋi wo bi, iŋɔma mu ungyi mi mbala ɔzu mi ba mi shi le mo. Riyi ngyɛlɛ akwu ingyi bɔkɔ Ada mi a nɔngɔ laa enzu umba wa ŋa le.>>

24 Tabɔkɔ Wavɔngɔkiya wewo umba o shimo awu o pwa iso ɛlɛ, o wo amba gyɔɔ mbala ɛmɛnɛ wepo mbamba. 25 Akwɛyi Ɔzhizɔsi a ya mba ma lɛɛbi akwɛyi a za mba tee, <<Lu yitu tee asu umba kwudu kwɔlɛ o lo enzu mba inyashi, enzu umbakwu mba ba o zɔ mba idomo. 26 I yi tayi mbala yi mo. Onzu uwu a gyi tee lakwu onzu uwakwu mekeka yi de ba mɛga lakwu umɛgba yi, 27 onzu uwu a gyi te lakwu uwu kwonze mekeka yi de ba mɛga lakwu unye yi - 28 kyamate Umɛ uwu Onzu uwu e bo tee lo gbo wu rinye mo, uwu gba e gbo rinye laa enzu le kaa le shi kwunyɔ wu kaa lakwu sa enzu gyɔɔ ma.>>

29 kwuye ungwu Ɔzhizɔsi mbala Wavɔngɔkiya wu o lafya laa Ozheriko, riba ingyi enzu ri mbwalu mba. 30 Epeyi wepo umba ɔ ŋɔ mu kenzu unga ɔgwuzɛ, ɔ pwa tee Ɔzhizɔsi e yi mu ikakama, akwɛyi o ta opwu kpaa mu iyama tee, <<Ɔkwu, Umɛ uwu Odevidi, shɔɔkɔ ma eyembembyi nzu nɛ!>>

31 Riba ingyi enzu ba ri kpa mba ɛyi tee lo kpala kenzu mo. Umba ba o kyakpɔ mu iyama mu opwu uwɔkwu tee, <<Ɔkwu, Umɛ uwu Odevidi, shɔɔkɔ ma eyembembyi nzu!>>

32 Akwɛyi Ɔzhizɔsi a rima, a ya mba ma akwɛyi e yo mbo tee << Kimbe ba lu gyi te la mi wo yi?>>

33 O gba wu opwu tee, <<Ɔkwu,>> <<ki gyi tee la ki gba laa ɛbɛ imama!>>

34 Ɔzhizɔsi a ma eyembembyi mbo akwɛyi a pwu mba afyi mu eyi. Mɔmɔɔmɔ, eyi mbo i wuma, o kwo mu ɛbɛ imama akwɛyi o mbwalu wu.