1 Mɔnɔɔnungawu Ɔzhizɔsi a wɔ kwudu mogba a ka ŋɔ mu kenzu ungwu risu kaa laa zɔ ɛzu. 2 Akwɛyi enzu riba o gyirima munyi wu, akwɛyi e fye mɛmi iyi kwoda a ŋɔ ma enzu lɛɛbi ba o ri mu kenzu unga embyi.

3 Akwɛyi e so mbo iso ribariba mu aba tee: <<Ɔnɛgba a wɔ kwudu iyi kaa le to eyi iyi ewiri wu. 4 Tabɔkɔ e yi mu eyi itomo, iyifo i fu mu ɔgwuzɛ, akwɛyi afyi o bo o koyimo. 5 Iyifo ba i fu mu ɔzɔ, mɔmɔ umbwuru u yi gyɔɔ mo. I biyi efyefya, kwuwongu umbwuru u yi fulefule bi. 6 Kwuye ungwu ɔnu u yama bɔkɔ u la yi ma, akwɛyi i shirima kwuwongu akpa yi i ka mɛzhi mu kindo mo. 7 Eyi iyifo i fu mu awula, kwuyengwu i biyi, awula i ri yi mo. 8 Iyifo ba i fu mu ɛzhi iyesheshi akwɛyi i wa la imuma gyɔɔ; iyifo i wala imuma uwo ekpuwo, iyifo uwo ɛkpɛrɛnyi, iyifo ba uwo ɛkpɛla.>>

9 Akwɛyi Ɔzhizɔsi a mbwa iso wu ma akwɛyi a za mba tee, <<Onzu uwu e yi alu, la pwa!>>

10 Akwɛyi Wa vɔngɔ kiya wu o bo munyi wu akwɛyi o yo wu tee, <<Kimbe ki shi ba ŋɔ so enzu iso mu aba?>>

11 Ɔzhizɔsi a gba mba opwu tee, <<Iyitu iyi kwunvyeru iyi irɛsu iyi oshi o shi yi, moo akwu umba mo. 12 Onzu uwu bɔkɔ e yi kiya, oo kyo wu ngyi mo kaa le yi ngyi duduu; onzu uwu bɔkɔ e yi kiya kinyinyi mo ba, kɛkɛɛkyi ingyi bɔkɔ e yi ngyi awu lala o na wu ngyi ma. 13 Akwu kwuwo kwɔlɛ gba mi so mbo iso mu aba le moo o yi mu iyesemo, ba tete o ma ɛbɛ mo, o yi mu alu ingbɛma ba tete o pwa mo ba o zɔngɔma mo. 14 Iso iyi bɔkɔ anukenzu Azaya e so awu ba i wɔ mamba tototo tee:

<<Enzu mbɔlɛ o ngbalu ba o ngbalu, tete o zɔngɔma mo;

o yese ba o yese, tete o ma mo,

15 kwuwongu egbo iyi enzu mbɔlɛ i nzhirima-a,

o se alu mba ma akwɛyi i pwama ɔnyɛnyɛ mo

ba o kpala eyi mbo mo-o.

Moo o bo ma ɛbɛ mu eyi mbo,

o bo pwa mu alu mba,

o bo zɔngɔma mu egbo mbo,

akwɛyi oo fulo biri

akwɛyi mii bo mbo ofya ma mo.>

16 <<Lunyi ba, ɔnyɛ akwu uwayi! Kwuwongwu eyi yi i ma ɛbɛ, alu yi ba i pwama. 17 Mi so yi ongbulolo tee, anukenzu gyɔɔ mbala enzu umba ototo o gyikpɔ tee lo ma kiya ingyi lu ma le umba ba o mangyi mo, lo pwa iyi lu pwa le ba o pwa mo.

18 <<La lu ngbɛ alu ŋa nɛ kaa lu pwa iluma iyi kwoba ungwu ɔnɛgba u to eyi iyi ewiri. 19 Onzu uwu bɔkɔ a pwa iso iyi irɛsu iyi oshi ba a zɔngɔ yi ma mo, onzu awu e yi kyamate ewiri iyi bɔkɔ i fu mu ɔgwuzɛ tayi. Akwɛyi onzu uwoyi e bo akwɛyi a wa kiya ingyi o so mawu awu ma. 20 Eyi iyi bɔkɔ i fu mu ɔzɔ awu i yi kyamate onzu uwu bɔkɔ a pwa iso ɛnyi akwɛyi mu kwotota a na yi ma laa ɔnyɛ. 21 Kwuwongwu a kɔ akpa ma mo, e to kwuye gyɔɔ mo. Gba kwuyengwu wɔnu kwu bo naa o lo wu inyashi kwuwongu iso ɛlɛ, a gba kembo efyefya. 22 Eyi iyi bɔkɔ i fu mu awula awu i yi kyamate onzu uwu bɔkɔ a pwa iso ɛnyi; ɔbulɛ idu gididi iyi kwudu kwɔlɛ mbala ekweyi iyi kiya ingyi kwuwo i kpo yi ɛndu akwɛyi imuma mo. 23 Eyi iyi bɔkɔ i fu mɛzhi iyesheshi awu i yi kyamate onzu uwu bɔkɔ a pwa iso ɛlɛ ba a zɔngɔ yi ma: A wala imwuma, iyifo uwo ekpuwo, iyifo uwo ɛkpɛrɛnyi iyifo ba uwo ekpela.>>

24 Ɔzhizɔsi a ba mba kwoba ungufo kpɔ tee: <<Irɛsu iyi oshi iyi kyamate onzu uwu e so ewiri iyesheshi mu utu wu tayi. 25 Kwuye ungwu enzu o yi mu ondo, ogewa wu e fyemo akwɛyi e so igbɛpɛ mɛmi iyi ewiri akwɛyi a ka ma iyawu. 26 Kwuye ungwu bɔkɔ ewiri i le mu imwuma akwɛyi igbɛpɛ tete i wɔ meka yi. 27 << Ɛmɛgba mba ɔnɛgba awu o bo mbaa wu akwɛyi o za wu tee, <Ada kwogba, akwu eyi iyesheshi gba ŋɔ so le mo re? Muna bɔkɔ igbɛpɛ i wɔ?> 28 A gba mba opwu tee, << <Akwu ɔgɛwa uwufo gba e wo ɛlɛ le,> akwɛyi o yo wu tee, <Ŋɔ gyi tee la ki so kaa la ki ngbɛ ikpɛpɛ ɛnyi ma re?> 29 A gba mba opwu tee, <Ayimo,> <moo kwuyengwu bɔkɔ lu bu le mu igbɛpɛ ingbɛma awu lu bu ngbɛ ewiri lu kyo mbala yi mo. 30 La lu shi yi li bulɔma kya li gbo la kwuye ungwu o lɔ ewiri ma. Kwuye kwɔngwu gba mi za la walɔma tee: La lu kwu igbɛpɛ ma keyi ka la lu mayima mu ikpo ikpo ka la lu puyi mo mɔyi; ewiri ba la lu kpala yi ɛlu ka la lu fu yi mu kɛnɛ mi.> >>

31 Ɔzhizɔsi a ba mba kwoba ungufo kpɔ tee: <<Irɛsu iyi oshi i yi mate eyi iyi omusita iyi bɔkɔ onzu e so mutu wu tayi. 32 Eyi yi i yi iyɛri i ka eyi iyinayina ma, tetete kwuye ungwu kwu bulɔma kwuu vindɔ uwɛyi uwu u ka uwunawuna ma utu ɔnwu, afyi umba oshi oo kwu mu ende wu akwɛyi oo ndo rigu mbo mɔmɔ.>>

33 Ɔzhizɔsi a gba a ba mba kwoba kpɔ tee: <<Irɛsu iyi oshi i yi kyamate otutu kɛkyi uwu bɔkɔ okokpayi e to e kyo mu emudu ɛla iyi umbwu uwu akara akwɛyi a za mbu ma nzhii ba u fye mesu.>>

34 Ɔzhizɔsi e so iso ɛlɛ lɛɛbi laa riba ingyi enzu mu aba; ingyinangyina bɔkɔ e so mbo akwu mu aba. 35 E wo ɛlɛ kaa iso iyi anukenzu e so awu li wɔma tee:

Mu aba gba mi siso mbala mba le;

Mi so mbo apula iyi o nvye yi mo ngba tabɔkɔ o wo kwudu kwɔlɛ le.>>

36 Kwuye ungwu Ɔzhizɔsi a lafya laa riba ingyi enzu mbamba akwɛyi e fye mogba, Wa vɔngɔ kiya wu o bo munyi wu akwɛyi o za wu tee, <<La nzu kwoba ungwu igbɛpɛ iyi i yi mɛmi iyi utu awu ma.>>

37 Ɔzhizɔsi a gba opwu tee, <<Onzu uwu bɔkɔ e so eyi iyesheshi awu akwu Umɛ uwu Onzu; 38 utu ɔnwu akwu kwudu kwɔlɛ; eyi iyesheshi ɛnyi ba akwu enzu umba irɛsu iyi Ukpo; igbɛpɛ ba akwu enzu umba Onzu Uwoyi; 39 ɔgɛwa uwu e so igbɛpɛ awu ba akwu Onzu Uwoyi. Kwuye ungwu ilɔma ba akwu imbwama iyi kwushi kwɔlɛ, wa lɔma ba akwu alɔgbulɔ umba Ukpo. 40 <<Kyamate bɔkɔ o kpala igbɛpɛ ɛlu akwɛyi o pwu yi mo awu, tatayi gba i yi le mu imbwama iyi kwushi kwɔlɛ; 41 Umɛ uwu Onzu a lɔ alɔgbulɔ wu ma, kaa lo kpala enzu umba bɔkɔ o shi enzu o ngbomo mbala enzu umba bɔkɔ o wo apula iyira ɛlu, 42 akwɛyi o kwu mbo oo fu mu kwoba ungwu ɔyi, mɔmɔ gba oga ilomo mbala ɛnyi ilamesu i yi le. 43 Kwuye kwɔngwu enzu umba Ukpo ba o lemo kyamate ɔnu tayi mu irɛsu iyi Ete mbo. Onzu uwu e yi alu ba laa pwa!

44 <<Irɛsu iyoshi iyi mate kiya ingyi kwuwo ingyi ki nvyemo mɛzhi tayi. Onzu uwufo a ma ngyi akwɛyi a gba ngyi la invyemo. Kwuwongwu ɔnyɛ a gawu ma akwɛyi a ka ya apula iyi bɔkɔ e yi yi lɛɛbi ma akwɛyi a ya ɛzhi ɛnyi ma.

45 <<Irɛsu iyi oshi i gba i yi mate u wo rishi uwu a gagyi ekyi iyi abwa. 46 Kwuye ungwu a fya kwukpɛnyi ungwu abwa, a ka ma akwɛyi akwu ingyinangyina wu ma ndii a yama akwɛyi a ya kwokyi kwɔngu.

47 Tete kpɔ, Irɛsu iyoshi i yi mate eya iyi o fu mu risu akwɛyi i yi emu ikikɔ ikikɔ. 48 Kwuye ungwu bɔkɔ eya ɛnyi i nyɔlɔma, wa yi emu o pyipyi yi o bo yi mu kenzu unga embyi. Akwɛyi o ŋɔma o tɛ emu umbesheshi ma o fu mu lubiri, umbira ba o fu mbo mo. 49 Tegba i yi le mu imbwama iyi kwushi kwɔlɛ: alɔgbulɔ umbu Ukpo o nyɔ akwɛyi o ka enzu umbira mbala umbesheshi ma. 50 akwɛyi o to mbo pyo o fu mbo mu kwoba ungwu ɔyi, mɔmɔ gba ɔga ilomo mbala ɛnyi ilamamesu i yi le.

51 Ɔzhizɔsi e yo mbo tee, <<Apula ɛlɛ lu zɔngɔ yi ma ndii?>>

O gba opwu tee, <<Ee.>>

52 Akwɛyi a za mba tee, <<Kwuwo kwɔngwu, u zɔ ɛzu iyi ɛrama iyi Omosisi uwunawuna uwu bɔkɔ o zɔ wu ɛzu iyi Irɛsu iyoshi e yi mate ɔkwu uwu kwogba uwu bɔkɔ a wala kiya ingyi kwuwo wu mu kɛnɛ wu ingyepo mbala ingyekyi tayi.>>

53 Kwuye ungwu Ɔzhizɔsi a mbwa mba aba ɛnyi ibama, a lafya laa kizɛ ngyɛngyi 54 akwɛyi a gba a ka mu kwuse wu. A zɔ ɛzu mu udaba uwu ɛlu ikpalama uwu Azhu akwɛyi enzu umba bɔkɔ o pwa wu, i shi mbo kenzu iyama. O yo tee, <<Muna bɔkɔ onzu ele a fya ilukwu ɛlɛ te mbala ekpasu iyi apula iwomo iyi kenzu iyama wu ɛlɛ?>> 55 <<Akwu umɛ uwu okapita ele mo re? Ɛnyi iyi anyi wu akwu Omeri mo re? Ɛmanyi wu ba akwu Ozhemisi, Ɔzhɔsɛfu, Ɔsamɔ mbala Ozhudasi mo re? 56 Ɛmanyi wu ekokpayi lɛɛbi o ŋɔ mbala nzu ele mo re? Muna ba onzu ele a fya ɛlɛ lɛɛbi?>> 57 Akwɛyi o to la amba mbala wu akwɛyi o towu mo.

Ɔzhizɔsi ba a za mba tee, <<Mu kwuse wu mbala mogba wu kɛɛkyi gba anukenzu e yi umwɔ mo le.>> 58 E wo apula iyi kenzu iyama mɔmɔ gyɔɔ mo, kwuwongu o kwu idu o fulo mawu mo.