1 Ɔnu uwufo Afarisi mbala Asadusi umbafo o bo mbaa Ɔzhizɔsi kaa lo pwa wu ma, akwɛyi o za wu tee, la zɔ mba kɛzɔ unga ke ngyi moshi kaa lo yitu tee Ukpo e yi mbala wu. 2 Ɔzhizɔsi ba a gba mba opwu tee, <<Kwuye ungwu ɔnu u gbomo, lu zɔ tee, <Oshi u ŋɔ yɔɔ le kizɛ ki ŋii shoshi.> 3 Mu kwoto mu kwoto ba lu zɔ tee, <Ɔnɛnɛ Ukpo e tumo moo oshi u ŋɔ yɔɔ mbala amu duruduru.> Lunyi lu yese oshi ba lu yitu iluma wu ba lu yitu iluma iyi lɔzɔ undu kwuye kwɔlɛ mo!.

4 Ɔyi uwu enzu umbira mbala wa yitu iyi Ukpo mo mbɔlɛ! Lunyi luu gagyi kɛzɔ unga amɛ munyi mi? Kakpɛkpɛnyi te oo shi yi mo! Kɛzɔ unga amɛ unga Ozhona kɛɛkyi gba oo shi yi le.>> Akwɛyi Ɔzhizɔsi a lumba afyi ma a kama iyawu.

5 Kwuye unga bɔkɔ Wavɔngɔkiya o sa risu ma, o ka la kwuleyi o za laa kwoburedi kukpɛnyi te mo. 6 Ɔzhizɔsi a za mba tee, <<La lu wo bɛtɛ; la lu gbo ɛnwu yi ma mbaa otutu uwu Afarisi mbala Asadusi.>>

7 Akwɛyi o kwo mu esu isomo tee, <<Akwu kwuwongu ki za la eburodi mo le gba e so ɛlɛ le.>>

8 Ɔzhizɔsi ba e yi egbo mbo awu, akwɛyi e yo mbo tee, <<Lunyi umba ikwu idu lu fulo kɛɛkyi mbɔlɛ! <<Kimbe ki shi ba lu so esu tee akwu kwuwongu lu za laa eburodi mo gba mi siso ɛlɛ le? 9 Lu du zɔngɔ yi ma mo kpɔɔ? Lu lolo eburodi ɛlɔ bɔkɔ mi fye enzu anzɔnu edubu ɛlɔ ma yi akwɛyi iyi bɔkɔ i shimo akwu lubiri luwo la lopo mo re? 10 Nana eburodi erewo iyi bɔkɔ o shi enzu edubu endo o ri, lubiri lɔvɔ bɔkɔ o ri lu shimo? 11 I wote ba lu zɔngɔ yi ma mo tee akwu iso iyi eburodi gba mi so yi le mo? <<La lu wo bɛtɛ; la lu gbo ɛnwu yi ma mbaa otutu uwu Afarisi mbala Asadusi!>>

12 Akwɛyi Wavɔngɔkiya o zɔngɔma tee, a za mba tee lo gbo ɛnwu mba ma mbaa otutu uwu o fu mu eburodi awu mo, akwu meka iyi ɛzɔ iyi Afarisi mbala Asadusi gba lo gbo ɛnwu mba ma le.

13 Kwuye ungwu Ɔzhizɔsi e bo mu ɛzhi iyi Oseseriya Ofilipi, e yo Wavɔngɔkiya wu tee, <<Enzu ɔ zɔ tee Umɛ uwu Onzu akwu uwe?>>

14 O gba opwu, o zɔ tee, <<Umbafo mbo o zɔ tee akwu Ɔzhɔnu u wo obatisima, umbafo o zɔ tee akwu Elazha, umbafo ba o zɔ tee akwu Ozheremaya nana anukenzu uwu Ukpo uwufo.>>

15 Akwɛyi e yo mbo tee <<Lunyi kɔ?>> <<Lunyi ba lu zɔ te mi kwu uwe?>>

16 Akwɛyi Ɔsamɔ Opita a gba wu opwu tee, <<Uŋɔ gba ŋɔ kwu Okrasi le, Umɛ uwu Ukpo ureyi.>>

17 Ɔzhizɔsi a gba wu opwu tee, <<Ɔnyɛ akwu uwaŋa Ɔsamɔ umɛ uwu Ɔzhɔnu!>> Moo akwu onzu gba a wu ŋɔ ongbulolo ele ma le mo, Ada mi uwu e yi moshi awu gba a wu ŋɔ wu ma le.>> 18 Mi so ŋɔ, Opita: ŋɔ kwu ɔzɔ, mu ɔzɔ ɔlɛ gba mii mbo ɔshɔshi mi le, onzu uwoyi ba e do wu ishirimo mo. 19 Imi mii shi ŋɔ anu iyi Irɛsu iyoshi. Kiya ingyinangyina ingyi ŋɔ towo ngyi mo mu kwudu kwɔlɛ, o towo ngyi mo tete moshi; kiya ingyinangyina ingyi bɔkɔ ŋɔ nyama laa ngyi mu kwudu kwɔlɛ, moshi ba ɔɔ nyama laa ngyi tete.>>

20 Akwɛyi e yi Wavɔngɔkiya wu mu alu tee lo so onzonzu ɛnyi tee uwu gba akwu Okrasi le mo.

21 Te i na mɔnu mawu Ɔzhizɔsi e le mu Wavɔngɔkiya wu isomo gedegede tee, <<Mega mi re mu Ɔzhɛrusalɛ akwɛyi mi ma inyashi gyɔɔ mu ewo iyi enzu umbakɔ, mbala ebwoshi umbakɔ, mbala wa zɔ ɛrama iyi Omosis. O ngbɛ mi ma, ba ɔnu uwu kwɔfyi ungwola Ukpo aa gba mi laa iyimo.>>

22 Opita e to wu a ka wu mɛmba akwɛyi e towumo. A za wu tee, <<Ukpo le so yi mo, ɛlɛ i du ŋɔ mo ndii, Ɔkwu!>>

23 Ɔzhizɔsi e gele eyi e yese Opita akwɛyi a za wu tee, <<Fyama kaa shemi kize, Osheta! Ŋɔ kwu kwokyi ungwu ɛfyi ilama; moo egbo ŋɔ ɛlɛ i ngyi mbaa Ukpo mo, akwiyi onzu.>>

24 Akwɛyi Ɔzhizɔsi a za la Wavɔngɔkiya wu tee, <<Gba onzu a gyi tee la mbwalu mi, mega a zɔ kwu zɔ ungwu ɛnwu wu, akwɛyi e to kwuwɛyi ungwu lukwu wu kaa la mbwalu mi. 25 Moo onzu uwunawuna uwu a gyi tee la sa kwunyɔ wu ma, kwuu tomo; onzu uwunawuna uwu bɔkɔ kwunyɔ wu kwu tomo kwuwo mi, aa fya ngwu ma. 26 Kimbe ba akwu kule ungwu onzu uwu a fya mu kwudu kwɔlɛ ma lɛɛbi akwɛyi kwunyɔ wu ba kwu tomo? Kiya kinyinyi mo! Naa kimbe ba onzu a ra ngyi a ŋanga mbala kwunyɔ wu? 27 Moo Umɛ uwu Onzu a nyɔ mbala alɔgbulɔ wu mu inzumbɛku iyi Ete wu, akwɛyi ee shi uwewe rigbɛ kyakya mbala ɛduma iyi bɔkɔ e wo. 28 Mi so yi ongbulolo tee, umbafo o yi munɛ o ma lukwu dɛ ishi o ma Umɛ uwu Onzu a nyɔ mu irɛsu wu mo.