1 Mizhikembo iyi kwɔmba ungwu Ɔzhizɔsi, mu Ɔbɛtilɛhɛ uwu Ozhudiya, mu ɔyi uwu ɔsu Ɛrɔdu, wayitu ɔ wɔ mu ɔnu uwu kwoto o bo mu Ɔzhɛrusalɛ 2 akwɛyi o yo tee <<Umɛ uwelu uwu o mba wu kaa la kwu Ɔsu uwu Azhu le, e yi mu na? Moo ki ma kwulovyo wu mu ɔnu uwu kwoto gba ki bo tee la ki gbo wu ɔya le.>>

3 Kwuye ungwu ɔsu Ɛrɔdu a pwa iso ɛlɛ, uwu mbala enzu umba Ɔzhɛrusalɛ lɛɛbi, ubwu mbo e fomo gyɔɔ. 4 Akwɛyi Ɔsu a ya eboshi umbakɔ ma, mbala wa zɔ Ɛrama. Akwɛyi e yo mbo tee, <<Muna ba o zɔ tee o mba Okrasi?>>

5 O gba wu opwu tee, <<Mu Ɔbɛtilɛhɛ mu ɛzhi iyi Ozhudiya. Tegba gba anukenzu a ka yi le tee,

6 <Ɔbɛtilɛhɛ ɔshɛshɛkɛ ele,

akwu uŋɔ gba ŋɔ kwu umbwambwa le mo mu ɛzhi iyi Ozhudiya;

moo mbaa ŋa gba u to keyi a ŋaa wɔ le

u zɔ enzu mi umba Izirɛ, ɔgwuzɛ.>>

7 Ɛrɔdu a ya wayitu mbamba ma mɛmba kaa lo so wu kwuyengwu bɔkɔ umba o gwo la kwulovyo kwɔngu imama shɛ. 8 Akwɛyi a ta mba okpa tee: <<La lu so mu Ɔbɛtilɛhɛ kaa la lu gagyi mbaa bɔkɔ umɛ awu e yi; akwiyi gba lu ma wu, la lu gba yi lu ka mi, kaa mi tete la mi so la mi gbo wu oya.>>

9 Mizhikembo iyi ɛnyi, akwɛyi o kwu luzɛ mba. Tabɔkɔ o yi mu luze akwɛyi o gba o ma kwulovyo ungwu bɔkɔ o gwo ngwu laa imama mu ɔnu uwu kwoto awu kpɔ. Akwɛyi kwu to mbo keyi nzhii ba mbaa umɛ awu e yi. 10 Tabɔkɔ o ma kwulovyo kwɔngu, akwɛyi ɔnyɛ a ga mba ma. 11 O fyemo mogba, akwɛyi o du umɛ awu mbala anyi wu Omeri, akwɛyi o kwu mo o gbo wu ɔya. Akwɛyi o vuvu ewulo mbo mo akwɛyi o wa la rɛshi mba ingyi egolu, mbala ɛfurakisɛ mbala ɛmira akwɛyi o shi wu.

12 Ukpo a ta mba ɔkpa mu ondo kpeke-e te lo zɛ mbaa Ɛrɔdu fo. Kwuwo kwɔngwu o zɛ mu ɔgwuzɛ owa o ka mu ɛzhi mba.

13 Mizhikembo iyi wa yitu mbamba o gba o kama, ɔlɔgbulɔ uwu Ɔkwu e bo mbaa Ɔzhɔsɛfu mu ondo akwɛyi a za wu te, <<Yi mo kaa to umɛ awu ma mbala anyi wu kaa la lu so mu Izhipiti, la lu ŋɔ mɔmɔ la lu gbo kwuyengwu mi bi za yi tee la lu yi mo mɔmɔ; moo Ɛrɔdu e yi mu ɔgwuzɛ igagyima kaa la ngbɛ umɛ awu ma.>>

14 Akwɛyi Ɔzhɔsɛfu e yimo e to umɛ awu ma mbala anyi wu mu utuweka akwu luzɛ mba undu Izhipiti. 15 Ɔ ŋɔ mɔmɔ nzhii ba Ɛrɔdu e kpo mo dɛ. Ɛlɛ i wo tee kaa li nyɔlɔ iyi bɔkɔ Ɔkwu a zɔ mu kenzu unga anukenzu tee, <<Mi ya Umɛ mi a wɔma mu Izhipiti.>>

16 Kwuye ungwu Ɛrɔdu a zɔngɔma te wayitu mbamba o kyoro wu mo, amba o wo wu mo gyɔɔ. A ta ɔkpa te ɛmɛ anzɔnu umba bɔkɔ o yi lɔri lopo i gba mɛzhi, mu Ɔbɛtilɛhɛ mbala wanɔkpa ngwu lo ngbɛ mba ma. E so tayi kwuwo ungwu lɔri ndɔndu lu zɛ kya mbala kwuyengwu bɔkɔ kwulovyo ungwu bɔkɔ wayitu mbamba o ma, kwu gwo laa iwɔma.

17 Mu ɔgwuze ɔlɛ gba iso iyi anukenzu Ozheremaya e so i nyɔlɔma le tee:

18 <<O pwa opwu mu Ɔrama.

opwu uwu ɔga mbala inyima iyɛkuu,

Ɔrɛshɛ e yi mu ɔga ilomo uwu ɛmɛ wu;

o byi wu ɛyi ba e tomo,

moo ɛmɛ wu o kpomo-o.>>

19 Mizhikembo iyi lukwu undu Ɛrɔdu, Ɔzhɔsɛfu a gba e wolo ondo umbu ɔlɔgbulɔ uwu Ɔkwu e du wu mu Izhipiti 20 akwɛyi a za wu tee, <<Yimo, to umɛ awu ma mbala anyi wu, kaa gbama so mu ɛzhi iyi Izirɛ, moo enzu umba o gyi tee lo ngbɛ umɛ awu ma o kpomo-o.>> 21 Akwɛyi Ɔzhɔsɛfu e yimo e to umɛ awu ma mbala anyi wu, akwɛyi o ka mu ɛzhi iyi Izirɛ.

22 Tabɔkɔ Ɔzhɔsɛfu a pwa te Akɛlayusu, umɛ uwu Ɛrɔdu, gba akwu ɔsu mu Ozhudiya le ŋa, a wiyi iyi isomo mɔmɔ. O gba o kyo o ta wu ɔkpa kpɔ mu ondo, akwɛyi a ka mu ɛzhi iyi Ogalili ŋa, 23 a ka ŋɔ mu kwuse ungwu ɔ ya ngwu te Ɔnazarɛti awu. Ɛlɛ i nyɔlɔ iyi bɔkɔ anukenzu o so awu tee, <<Oo kpo wu ɛnyi tee, Onazari.>> .