1 Mu kwuye kwɔngwu Wavɔngɔkiya o bo mbaa Ɔzhizɔsi o yo wu tee, <<Uwe ba a ka mu Irɛsu iyi oshi?>>

2 Akwɛyi Ɔzhizɔsi a ya umɛshɛri ma e shi wu a rima mu keyi mba, 3 akwɛyi a za mba tee, <<Ongbulolo gba mi so yi le tee, gba lu kwu ira ɔsu kaa lu yi mate ɛmɛshɛri mo, lu fye mu Irɛsu iyi oshi gbee mo. 4 Onzu uwunawuna uwu bɔkɔ e bo laa ɛnwu wu mɛzhi mate umɛshɛri ele, uwu gba a ka le mu Irɛsu iyi oshi. 5 <<Tatayi onzu uwunawuna uwu a na umɛshɛri ma kyamate ele a kpa mu idu kwuwongu ɛnyi mi, Imi gba a na mi le.

6 <<Onzu uwunawuna uwu bɔkɔ e shi umɛshɛri ukpɛnyi meka iyi mbɔlɛ umba bɔkɔ o kwu idu lu fulo ma mi a tama, i ka wu woshi tee lo ma wu riko ingyɛkwu mu kɔrɔ kaa lo ta wu mu risu kaa embyi lo riwu mo. 7 <<Inyashi akwu iyi kwudu kwɔlɛ kwuwongu apula iyi ii shi enzu o la ɛfyi! Apula iyi ii shi enzu o la ɛfi i nyɔ mega, inyashi ba akwu iyi onzu uwu bɔkɔ i zɛ ma wu!

8 <<Gba kwuwo ŋɔ nana kwɔlɛ ŋɔ kwuu shi ŋɔ kaa ngbomo, kpolo ngwu mo kaa tama. I fye mu kwunyɔ ungwɔkpɔ laa kwuwo kwukpɛnyi nana kwɔlɛ kwukpɛnyi i koshi laa iyi bɔkɔ oo ta ŋa mu kwoba ungwu ɔyi ungwu ɔkpɔɔ laa alɛ epo nana ewo epo. 9 Tatayi gba kwuyi ŋɔ kwuu shi ŋɔ kaa ngbomo, wala ngwu ma kaa tama. I fye mu kwunyɔ ungwu ɔkpɔ laa kwuyi kwukpɛnyi i koshi laa iyi bɔkɔ oo ta ŋa mu kwoba ungwu ɔyi ungwu ɔkpɔɔ laa eyi epo.

10 <<La lu ngbɛndu kaa la lu zhi ukpɛnyi meka iyi ɛmɛshɛri mbɔlɛ ma mo. Moo mi so yi ele, alɔgbulɔ mba moshi o koko ma eyi iyi Adami moshi. 11 Umɛ uwu Onzu e bo te la sa enzu ma lɛɛbi umba bɔkɔ o tomo.

12 <<I yi te mu eyi yi? Gba onzu e yi ilɔ oderi akwɛyi ukpɛnyi e tomo onzu awu a lafya laa uwekperendo la werendo mbamba kaa laa gagyi uwu e tomo awu moo? 13 Gba e fye wu mo, ongbulolo gba mi so yi le, ɔnyɛ wu a ka uwu wekperendo la werendo umba bɔkɔ o tomo mo awu ma. 14 Tatayi gba i yi le, Ete yi uwu e yi moshi awu aa nyama tee umɛshɛri ukpɛnyi kaa le tomo mo.

15 <<Gba umɛnɛ ŋɔ e ngbo ŋɔ mo so kaa zɔ wu ingbomo iyi e ngbo ŋɔ awu lunyi wepo. Gba e shi alu mu iso ŋɔ, de ba ŋɔ gba wu ŋɔ bo mu ɔgwuzɛ sawu. 16 Gba ba a pwa iso ŋɔ mo, gagyi onzu ɛnyi nana enzu wepo ka kyo mbala ɛŋɔ, <moo izɔgɔ iyi enzu wepo nana enzu wala i shi iso iyinayina i rima shɛ.> 17 Gba e to iso mbo mo, ka yi laa ɔshɔshi. Gba ɔshɔshi lala a pwa mba mo, yese wu mate u byi eshi naa onzu uwu e yi Ukpo mo tayi.

18 Ongbulolo gba mi so yi le tee: kiya ingyinangyina ingyi lu towo ngyimo mu kwudu kwɔlɛ o towo ngyi mo moshi tete, tatayi kiya ingyinangyina ingyi lu nyama la ngyi mu kwudu kwɔlɛ o nyama la ngyi tete moshi.

19 Mi gba mi so yi kpɔ tee: gba lunyi wepo mu kwudu kwɔlɛ lu nyama la kiya ingyinangyina ingyi lu nda, Ada mi uwoshi e wo yi ngyi mo. 20 <<Moo munamuna mbaa bɔkɔ enzu wepo nana wala o kpala ɛlu mu ɛnyi mi, mi yi mbala mba.>>

21 Akwɛyi Opita e bo mbaa Ɔzhizɔsi akwɛyi e yo wu tee, <<Ɔkwu, izhɛvɔ ba mi-i gba la ingbomo mi-i kpa laa umɛnɛ mi uwu e ngbo mi mo? Izherewo?>>

22 Ɔzhizɔsi a gba wu opwu tee <<Akwu izherewo mo, akwu uwekperewo izhi erewo. 23 <<Kwuwo kwɔlɛ Irɛsu iyi oshi i yi mate ɔsu ukpɛnyi uwu bɔkɔ a gyi te la ta amasa iyi eduwo wu mbala ɛmɛgba wu tayi. 24 Kwuye ungwu bɔkɔ ɔsu awu e gwo laa iyesemo, akwɛyi o ka wu laa onzu uwu a ra wu laa kwɔkpa ungwu eduwo edinari ɛmiliyɔ guruguru. 25 Kwuwongwu e yi ɔgwuzɛ uwu iwama mo, ada kwogba wu e shi kaza tee, uwu ikyo oko wu, ɛmɛ wu mbala kiya ingyi e yi ngyi lɛɛbi lo ya ngyi ma kaa lo wa kwɔkpa kwɔngwu ma. s 26 Umɛgba awu a la epunu mɛzhi mu idu iyi ada kwogba wu a kpa wu ɛshɛku, a za wu tee, <Shɔɔkɔ yi idu mbala mi, <moo mi wa ŋa kwɔkpa ŋa ma ndii!> 27 Ada kwogba wu a ma eyembembyi wu, akwɛyi a gba laa kwɔkpa kwɔngu a kpa wu akwɛyi a lu wu afyima.

28 Tabɔkɔ umɛgba awu a wɔ kwudu, akwɛyi a ma umɛgba uwufo uwu akwu umɛgba kyamate uwu tete uwu e kwola kwɔkpa wu ugu eduwo edinari oderi. E yi wu mu ɔriga akwɛyi a gɔ wu ma a za wu tee, <Wa mi kwɔkpa mi ma!> 29 Umɛgba umanyi wu awu a la epunu le mɛzhi a kpa wu ɛshɛku a za wu tee, <Shɔɔkɔ yi idu mbala mi, moo mi wa ŋa kwɔkpa ŋa ma ndii!> 30 Onzu ele ba e tomo akwɛyi a ka ta wu mu ugu ugyi nzhii ba a wa wu kwɔkpa kwɔngu ma dɛ. 31 Kwuye ungwu ɛmɛgba umbafo mbamba o ma kiya ingyi ki wo, egbo mbo i tutumo iiyɛkɔkɔ akwɛyi o ko so ada kwogba mba iyi i wo lɛɛbi. 32 <<Akwɛyi ada kwogba awu a lɔ la wu le bo, akwɛyi a za wu tee <Uŋɔ umɛgba uwura ele, mi gba laa kwokpa ŋa lɛɛbi mi kpa ŋa kwuwongu ŋɔ kpa mi ɛshɛku. 33 Ishoshi tee ma eyembembyi iyi onzu uwopo ŋɔ kyamate bɔkɔ mi ma iyaŋa awu moo?> 34 Ada kwogba wu e wo amba gyɔɔ akwɛyi a ra wu e shi wa gbo ugu ugyi kaa lo lo wu inyashi nzhii ba a wa kwokpa kwɔngu ma dɛ.>>

35 Akwɛyi Ɔzhizɔsi a mbwa yi tee, <<Tatayi gba Ada mi uwu e yi moshi awu e wo mbala yi le tete, gba onzu a gba laa ingbomo iyi umanyiwu a kpa wu mu egbo lɛɛbi mo.>>