1 Kwuye ungwu Ɔzhizɔsi a mbwa iso ɛlɛ isomo akwɛyi a lafya laa Ogalili a ka mu kuko ungwu Ozhudiya mu ɛsɛnyi iyi ɔkwu uwu Ozhoda. 2 Riba ingyi enzu o mbwalu wu mɔmɔ akwɛyi e bo mbo efya ma.

3 Afarisi umbafo o bo te lo pwa wu ma akwɛyi o yo wu tee, <<Ɛrama nzu i nyama kaa onzu la ra laa oko wu ma kwuwongu kiya ingyinangyina bɔkɔ e wo ɔnuwu ba a gyi moo?>>

4 Ɔzhizɔsi ba a gba mba opwu tee, <<Lu wa mu kwokpo ungwu Ukpo mo re tee mu igwumo Ukpo e wo mbo oko mbala ɔnzɔnu? 5 Akwɛyi a zɔ tee, <Kwuwo ngwɔlɛ ɔnzɔnu a lafya laa ete wu mbala anyi wu kaa le to oko uwawu akwɛyi umba wepo oo yi kyamate onzu ukpɛnyi tayi> 6 Kwuwo kwɔlɛ umba o yi wepo fo, o kwu ukpɛnyi ŋa. Kwuwo kwɔlɛ, kiya ingyi Ukpo e kyo ngyi mesu onzu laa ka ngyi ma mo.>>

7 Akwɛyi Afarisi o yo wu tee <<Ba i zɛ te bɔkɔ Omosisi a ta ɔkpa tee onzu le shi oko wu kwupwu ungwu ikama kaa la rawu ma?>>

8 Ɔzhizɔsi a gba mba opwu tee, <<Omosisi a nya yi ma kaa onzu la ra la oko wu ma kwuwongu egbo yi i kɔma. I yi tayi mu igwumo mo. 9 Imi ba mi za yi tee onzu uwunawuna uwu bɔkɔ a ra laa oko ma, ba akwu kwuwongu kaya itomo mo, akwɛyi e to oko awa, e yi mu kaya itomo.>>

10 Akwɛyi Wavɔngɔkiya wu o za wu tee, <<Gba iso iyi ɔnu mbala oko i yi te, de ba i to oko mo i koshi.>>

11 Ɔzhizɔsi a gba mba opwu tee, <Akwu onzu uwunawuna gba aa nyama laa iso ɛlɛ le mo, enzu umba Ukpo e shi mbo kɛɛkyi. 12 Moo eyi i yi ikikɔ ikikɔ iyi bɔkɔ i shi umbafo o to oko mo: umbafo o mba mba inozhi; umbafo ba enzu gba o wo mbo; umbafo o towo oko itomo kwuwongu Irɛsu iyi oshi. Onzu uwu e do ɛzɔ ɛlɛ inama ba laa na yi.>>

13 Akwɛyi enzu umbafo o bo laa ɛmɛshɛri mberi mbaa Ɔzhizɔsi kaa le fulo mbo ewo kaa la lɛmba Ukpo. Wa vɔngɔ kiya ba o kpa umba bɔkɔ o bo mbo awu ɛyi. 14 Akwɛyi Ɔzhizɔsi a za mba tee <<La lu shi ɛmɛshɛri lo bo mbaa mi, la lu nyi mba ma mo, moo Irɛsu iyi oshi akwiyi mbɔlɛ te.>>

15 Akwɛyi e fulo mbo ewo mu reshi, a akwɛyi a ka ma iyawu.

16 Ɔnu uwufo ɔnzɔnu uwufo e bo mbaa Ɔzhizɔsi akwɛyi e yo wu tee,<< U zɔ kiya, kiya ingyesheshi ingyina ba mi wo mega kaa la mi fya kwunyɔ ungwu ɔkpɔɔ ma?>>

17 Ɔzhizɔsi e yo wu tee, <<Kwuwongwu mbe bɔkɔ ŋɔ yo mi kwuyo meka iyi kiya ingyesheshi?>> <<Onzu ukpɛnyi kɛɛkyi gba e sheshi le. Gba ŋɔ gyi tee kaa fya kwunyɔ ungwu ɔkpɔɔ de ba mbwalu ɛrama iyi Ukpo.>>

18 Akwɛyi Onzu awu e yo Ɔzhizɔsi tee, <<Ɛrama iyina?>>

Ɔzhizɔsi a gba wu opwu tee, <<Ki ngbɛ onzu mo; ki to kaya mo; ki wu ɛlɔ mo; ki na izɔgɔ iyi iso iyira mo; 19 lo ada ŋa ma mbala ɛnɛ ŋɔ; pwu idɛnyi iyi onzu uwu a nɔ a kpa ŋa te ɛŋɔ tayi.>>

20 Akwɛyi Ulugbaga awu a gba opwu tee <<Ɛlɛ lɛɛbi mi wo yi-e. <<Kimbe ba ki shimo kpɔɔ?>>

21 Ɔzhizɔsi a za wu tee, <<Gba ŋɔ gyi tee kaa wo iyi bɔkɔ Ukpo a gyi, so kaa ya apula ŋa ma lɛɛbi kaa shi ayirewa eduwo enyi, akwɛyi ŋɔ yi kiya ingyi kwuwo moshi dɛ kaa bo kaa mbwalu mi.>>

22 Kwuye ungwu Ulugbaga awa a pwa iso ɛlɛ, a ka ma laa egbo itutumo kwuwongu e yi kiya ingyi kwuwo gyɔɔ.

23 Akwɛyi Ɔzhizɔsi a za laa Wavɔngɔkiya wu tee, << Mi so yi ongbulolo: i kɔma kaa onzu uwu e yi kiya ingyi kwuwo le fye mu Irɛsu iyi oshi. 24 Mi gba mi so yi kpɔ tee: i yi fulele i shi Onyakurumi kaa le fye mu ɔtu uwu keyi i ka onzu uwu e yi kiya ingyi kwuwo le fye mu Irɛsu iyi oshi mo.>>

25 Kwuye ungwu Wavɔngɔkiya o pwa ɛlɛ, i shi mbo kenzu iyama gyɔɔ akwɛyi o yo tee, <<Uwe ba aa fya isama fo?>>

26 Ɔzhizɔsi e yese mbo akwɛyi a zɔ tee, <<Ɛlɛ i womo mbaa uwu onzu mo, mbaa Ukpo ba kiya ingyinangyina kii wo mo.>>

27 Akwɛyi Opita e to koro. A za wu tee, <<Yese,>> <<ki lafya laa kiya ingyinangyina kaa la ki mbwalu ŋɔ! Kimbe ba akwu ogbo nzu?>>

28 Ɔzhizɔsi a gba mba opwu tee, <<Ongbulolo gba mi so yi le tee, lunyi umba lu mbwalu mi ele, mu kwudu kwɔlɛ ungwu epo , kwuyengwu Umɛ uwu Onzu aa ŋɔma mu ukpa uwu inzumbɛku wu, lunyi tete luu ŋɔma mu ikpa iyɛsu uwo la epo mu ombu uwu lunzu luwo laa lopo iyi Izirɛ izɔma. 29 Onzu uwunawuna uwu bɔkɔ a lafya laa agba wu, naa ɛmanyi wu anzɔnu naa ɛmanyi wu eko, ete wu naa anyi wu naa ɛmɛ wu naa ɛzhi iyi utu wu, kwuwo mi, aa na iyi i ka ɛlɛ ma izhi oderi, a gba e ri ogu uwu kwunyɔ ungwu ɔkpɔɔ. 30 Enzu gyɔɔ umba o to keyi kekelele o gba akwu umba kembo, umbafo gyɔɔ bɔkɔ akwu umba kembo kekelele ba a gba akwu umba keyi ŋa.