1 Mizhikembo iyi Ɔzhizɔsi a lafya laa Ɔtɛpu e yi mu luzɛ akwɛyi Wavɔngɔkiya wu o bo munyi wu o zɔ wu woshi umbu agba iyi Ɔtɛpu. 2 Uwu ba e yo mbo tee, <<Lu ma ɛlɛ lɛɛbi? La mi so yi ongbulolo tee, ekyi ɛlɛ kpɛkpɛyi o shiriyimo; kwokyi kwukpukpɛnyi tee kwu fulo mu kadu unga kwokyi ungufo mo.>>

3 Tabɔkɔ Ɔzhizɔsi a ŋɔma mu lɔwa ungwu Olifu akwɛyi wa vɔngɔ kiya wu o bo munyi wu kyo kyo. Akwɛyi ɔ za wu tee, <<So nzu kwuyengwuna ba ɛlɛ i bi wo,>> kimbe bɔkɔ akwu kɛzɔ unga igbama ŋa mbala ibomo iyi kwudu kwɔlɛ?>>

4 Ɔzhizɔsi a gba mba opwu tee: <<La lu ngbɛndu, kaa onzu uwunawuna le kyoro yimo mo. 5 Moo enzu gyɔɔ ɔ wɔ mu ɛnyi mi, ɔ zɔ tee, <Imi gba mi kwu Omezaya le!> akwɛyi o kyoro enzu gyɔɔ ma. 6 Luu pwa eza iyi ewa mbala kwɔdu ungwu ewa itomo, ɛlɛ li lo yi iyi mo. Apula ɛlɛ te i wo mega, tetete, ibomo iyi kwudu kwɔlɛ i di bo mo bɛnɛ. 7 Ɛzhi iyifo i wa laa ewa i fo laa iyifo, tatayi kwuse ungufo kwu wala ungufo laa ewa. Lonzu iyama mbala ishirimo iyi ɛzhi i kpo fyɛɛ mu kizɛ ikikɔ ikikɔ. 8 Apula ɛlɛ lɛɛbi i yi kyamate kambu iyemo unga ɛnyi iyimo iyi kwɔmba iwomo bɛnɛ.

9 <<Akwɛyi, o ra yi o shi enzu kaa lo lo yi inyashi, lɔ ngbɛ yi ma, o towo yi mo kwuwo mi. 10 Mu kwuye kwɔngu enzu gyɔɔ oo gba kembo mu imbwaluma mi; enzu o rutu uwesu, o gyi esu mo. 11 Anukenzu umba angba gyɔɔ o wɔ, o kyoro enzu guruguru ma. 12 Idɛnyi ipumo iyi enzu gyɔɔ i gyima kwuwongu ikyomo iyi inzumbira. 13 Tetete, onzu uwu e yidu a rima nzhii ba ibomo iyi kwudu kɔlɛ, a fya isama ma. 14 Akwɛyi Iso iyesheshi iyi ɛsu irimo iyi oshi ɛlɛ o ta yi anu munamuna kaa la kwu izɔgɔ laa enzu lɛɛbi, akwɛyi kwudu kwɔlɛ kwu bo mo.

15 <<Gba lu ma <Apula iyi kashi iyi ingbomo> tee i rima mu Ɔtɛpu ɔkɛrikɛri, kyamate anukenzu Ɔdaniyɛ e so awu,>> <Onzu uwunawuna uwu a wa ɛzu ɛlɛ la ngbɛndu kaa laa zɔngɔ yi ma!> 16 Enzu umba bɔkɔ o yi mu Ozhudiya lo ri lo so mu lɔwa. 17 Onzu uwu e yi mu kɛnu unga kwogba wu, la kalama le bo mɛzhi te e to kiya mogba mo. 18 Onzu uwu e yi mu utu, le so mogba te le to ɔmu mo. 19 Afyi ɛnyi akwu afyi iyi inyashi laa eko umba rifo mbala eko umba o ra laa ɛmɛ umbelu mu kwuwo! 20 La lu lɛ Ukpo kaa ɛnya irima yi lakwu mu iwo mo ba lakwu ɔnu uwu kwɔfyi ungwu ɛnwu igbomo mo! 21 Moo aakwu kwuyengwu inyashi iyɛku i yi o dɔ ma yi dɛ mo ngba mu iyemo iyi kwudu kwɔlɛ, ba o gba o ma ɛlɛ te fo. 22 Gba afyi ɛnyi o gyi yi wɔzhi ma mo, onzu uwu e do irima e yi mo; tetete ba kwuwongu enzu umba Ukpo a ŋa mba, afyi ɛnyi o gyi yi wɔzhi ma. 23 Mu kwuye kwɔngu gba onzu uwunawuna a za yi tee <La lu yese, Omezaya a ŋɔ munɛ le! Nana a za yi tee a ŋɔ aawu! La lu nyama mo>. 24 Moo Amezaya umba angba mbala anukenzu umba angba oo wɔ, oo wo lɔzɔ undɔkwuu mbala apula iyi kenzu iyama kaka kaa lo kyoro enzu mo, gba i wo mbo enzu umba bɔkɔ Ukpo a ŋa mba lala oo kyoro mbo mo tete. 25 La lu yese, gba mi so yi kpeke-e awu mɛɛ!

26 <<Kwuwo ngwɔlɛ, gba onzu uwunawuna a za yi tee, <A ŋɔ aawu, mu ɛzhi ɛngbarara, la lu wɔ kwudu mo; nana a za yi tee, e nvyemo munɛ!> La lu nyama mo. 27 Moo kwɔfyi ungwu umɛ uwu onzu a ba gbama awu, kwu yi kyamate kawu izɛma unga Ukpo bɔkɔ ka wɔ mu ɔnu uwukwoto ba o ma nga mu ononoyo awu, tatayi gba inyɔma iyi Umɛ uwu Onzu iyi le. 28 <<Munamuna mbaa abwu i yi le gba eperemi o kpala ɛlu le.

29 <<Mizhikembo iyi inyashi iyɛku ɛnyi, akwɛyi mu kwotota: << <Ɔnu u shipwu, ɔvya ba u lemo fo, elovyo i kala ii fu mɛzhi, akwɛyi apula iyi oshi lɛɛbi o wo yi akpa zhigizhigi.>

30 <<Mu kwuye kwɔngu kɛzɔ unga Umɛ uwu Onzu ka wɔ moshi, akwɛyi enzu umba kwudu kwɔlɛ lɛɛbi o wo ubugyi. O ma Umɛ uwu Onzu e yi mu inyɔma a wɔ mu amu iyi oshi, laa ekpasu, mbala inzumbɛku iyɛkuu. 31 Akwɛyi a lɔ alɔgbulɔ wu o ngyi kwongangaraki gbogbogbo, akwɛyi a lɔ alɔgbulɔ mu eko ekpendo iyi kwudu kwɔlɛ, akwɛyi o kpala enzu umba a ŋa mba ɛlu i wɔ mu kwuko ungwu kwudu kwɔlɛ i so mu imbwama ngwu.>>

32 <<La lu vɔngɔ kiya mu uwɛyi uwu oboriyo. Gba u le mu epu itumo akwɛyi epu i le mu iwɔma la lu yitu tee iwo inda fo. 33 Tatayi gba lu ma apula ɛlɛ lɛɛbi, la lu yitu tee kwuye kwu bo-o, a ndama fo, e yi mu kenzugwu-o. 34 Mi so yi ongbulolo tee, apula ɛlɛ lɛɛbi i wo dɛ gba ɔyi ɔlɛ u rimo le. 35 Oshi mbala ɛzhi i tomo, iso mi ba i tomo mo.

36 <<Onzu uwunawuna e yitu iyi kwɔfyi mbala kwuye kwɔngu mo - alɔgbulɔ umba Ukpo mu oshi lala o yitu mo, Umɛ tete e yitu mo. Ada kɛɛkyi gba e yitu le. 37 Kyamate i wo mu kwuyengwu Onowa awu, tatayi gba i wo le mu kwuyengwu igbama iyi Umɛ uwu Onzu. 38 Kwuye ungwu embyi o do lomo mo, enzu o yi mu kiya irimo mbala iwomo, eko itomo mbala anu iyama, nzhii ba ɔnu uwu Onowa e fye mu kwoda; 39 ba o yitu iyi bɔkɔ i yembo mu inyɔma awu mo nzhii ba embyi o ri mbo mo lɛɛbi. Tatayi gba i wo le mu ɔnu uwu igbama iyi Umɛ uwu Onzu. 40 Mu kwuye kwɔngu anzɔnu wepo o yi mu utu; o to ukpɛnyi ma akwɛyi o lafya laa ukpɛnyi. 41 Eko wepo o yi mu ikpomo mu riko; o to ukpɛnyi ma akwɛyi o lafya laa ukpɛnyi.

42 Kwuwo kwɔngu la lu ngbɛndu, moo lu yitu iyi kwɔfyi ungwu Ɔkwu yi a ba gbama mo. 43 Lunyi ba la lu yitu iyi ɛlɛ tee, gba ada uwu kwogba le yitu iyi kwuyengwu uwɛlɔ a nyɔ mogba wu, ba le be gbomo ka uwɛlɔ la fya le fyemo mogba wu mo. 44 Kwuwo kwɔngu lunyi tete la lu yi ɛnwu ma, moo Umɛ uwu Onzu a gbama mu kwuyengwu lu fulo eyi wu mo.

45 <<Uwe ba akwu umɛgba uwu kwuyi mbala ilukwu? Akwu uwu bɔkɔ ada kwogba wu e shi wu tee la bɔ eyi mu agba wu kaa le shi mbo kiya ingyirimo mu kwuyengwu i kpo. 46 Ɔnyɛ akwu uwu umɛgba awu uwu bɔkɔ ada kwogba wu a gbama akwɛyi e du wu mu ɛduma iwomo iyi bɔkɔ e lo wu te le wo awu! 47 Imi mi so yi ongbulolo, ada kwogba wu e lo wu ingyinangyina ingyi e yi ngyi mɔwu. 48 Gba umɛgba awu akwu onzu uwura, a za la ɛnwu mu egbo tee, <Ada kwogba mi a gbama kekelele mo,> 49 akwɛyi e le mu ɛmɛgba ɛmanyi wu ɛmu ikpama mbala apula irimo mbala iwomo mbala enzu wa wo atɛ gyɔɔ. 50 Ada kwogba uwu umɛgba awu a gbama mu kwɔfyi ungwu Umɛgba awu e fulo eyi mo mbala kwuyengwu e yitu mo. 51 E kpolo wu kpɔkpɔ akwɛyi a ta wu mu kizɛ ingyi inyashi mbaa bɔkɔ o fu wa mwangba, mɔmɔ gba e loga mbala ɛnyi ilamesu le.