1 Akwɛyi Ɔzhizɔsi e fye mu kwoda ungwu embyi, a sama a ka mu kwuse wu. 2 Enzu umbafo o ka wu laa onzu ukpokapiya mu ɔkyɔ. Tabɔkɔ Ɔzhizɔsi a ma ikwu idu lu fulo mba, akwɛyi a za laa ukpokapiya awu tee, << Umɛ mi, mwɔnyɛ; ingbomo ŋɔ o gba yi kpa ŋa.>>

3 Akwɛyi wazɔ ɛrama iyi Ukpo o za laa esu tee, <<Onzu ele e wo oya!>>

4 Ɔzhizɔsi ba e yi iyi egbo mbo awu, akwɛyi e yo mbo tee, <<Kwuwongwu kwuwongumbe lu bi egbo iyira mu akɔ yi te? 5 Iyina i kɔma i ka: ka lo za ŋa tee, <Ingbomo ŋɔ o gba yi kpa ŋa,> naa, <yimo ka zɛma ŋa.> 6 Kaa la lu yitu tee Umɛ uwu Onzu e yi idomo iyi bɔkɔ a gba laa ingbomo iyi onzu a kpa wu mu kwudu kwɔlɛ,>> akwɛyi a za laa onzu ukpokapiya awu tee, <<Yimo, to ɔkyɔ ŋɔ ma kaa so mogba!>>

7 Akwɛyi onzu awu e yimo a ka mogba. 8 Kwuye ungwu enzu o ma ɛlɛ, iyi i wo mbo mo, akwɛyi o du Ukpo ma, uwu bɔkɔ e shi enzu idomo ɛlɛ.

9 Tabɔkɔ Ɔzhizɔsi e turu a gba keyi, akwɛyi a ma onzu uwufo uwu o ya wu tee Omatiyu a ŋɔma mu riyi ingyi oba uwɛzhi inama. Akwɛyi Ɔzhizɔsi a za wu tee, <<Mbwalu mi.>>

Omatiyu e yimo akwɛyi a mbwalu wu.

10 Ɔnu uwufo Ɔzhizɔsi e yi mu kiya irimo mogba uwu Omatiyu, akwɛyi enzu wa na oba uwɛzhi mbala enzu umba <<Ingbomo>> gyɔɔ o bo o du wu mbala Wavɔngɔkiya wu akwɛyi o ri kiya kyaa. 11 Tabɔkɔ Afarisi o ma ɛlɛ, akwɛyi o yo Wavɔngɔkiya wu tee, <<Kwuwongwu kwuwongu mbe u zɔ yi kiya e ri kiya mbala enzu umba ingbomo?>>

12 Tabɔkɔ Ɔzhizɔsi a pwa iso ɛlɛ, akwɛyi a zɔ tee, <<Enzu umba bɔkɔ o yi okpara uwɛmu o yi ugɔ uwu onzu u lo epu mo, umba bɔkɔ o yi okpara uwu ɛnwu mo gba o yi ugɔ uwu onzu u lo epu le. 13 La lu so kaa la lu vɔngɔ iluma iyi iso iyi Ukpo i so tee: <Eyembembyi gba mi gyi le, moo akwu isabɔ iwomo uwu izɔfyi mo.> Mi bo kwuwongu enzu umba ingbomo lo fya isama, moo mi bo kwuwongu enzu umba ototo mo.>>

14 Akwɛyi Wavɔngɔkiya umba Ɔzhɔnu u wo obatisima o bo mbaa Ɔzhizɔsi, akwɛyi o yo wu tee, << kwuwongu mbe bɔkɔ kinzu mbala Afarisi ki koko ki ra la kenyo, Wavɔngɔkiya ŋa ba o ra la kenyo mo?>>

15 Ɔzhizɔsi a gba mba opwu tee, <<Ɛmɛza umba ɔnu uwu okopo o wo ubugyi kwuyengwu ɔnu okopo e yi mbala mba? Kwuye kwu yi mu inyɔma ungwu o to ɔnu uwu okopo mbo mo; akwɛyi o wo kenyo.

16 <<Onzu e to okpayi uwu epo e se kwɔtu ungwu kushɔgiri ma mo, kwuwongu okpayi uwu epo a tara uwekyi ma akwɛyi e shi kwɔtu ungwɔkwu ungwu kwu ka ungwu kenze mo. 17 Tatayi enzu o fu embyi umba inyima umbepo mu ogya uwekyi mo. Gba o fu mbo, ogya awu e kpo kpaa, embyi umba inyima umbepo mbamba o fu mo, ogya awu ba e tutu mo. O fu owanyi umbepo mu ogya uwepo, gba epepo yi i ri ɛsɛ le.>>

18 Tabɔkɔ Ɔzhizɔsi e yi mu iso ɛlɛ isomo bɛnɛ, akwɛyi utokeyi uwufo uwu Azhu e bo e kwumo mu idu wu akwɛyi a zɔ tee, <<Umɛ mi okokpayi a ta kwunyɔma kekelele; shɔɔkɔ bo kaa fulo wu kwuwo ŋɔ mawu, akwɛyi a gba laa iyimo.>>

19 Akwɛyi Ɔzhizɔsi e yimo mbala Wavɔngɔkiya wu akwɛyi o mbwalu wu.

20 Akwɛyi okokpayi uwufo uwu e wo lɔri luwo laa lopo mu ɛnzhi ifumo, a mbwalu Ɔzhizɔsi mizhikembo akwɛyi a pwu osaka uwu okpayi wu afyi. 21 A byi egbo mu akɔ wu tee, <<Gba mi pwa o saka uwu okpayi wu afyi lala, ofya mi u bomo.>>

22 Ɔzhizɔsi e geleyi a ma wu akwɛyi a za wu tee, <<Umɛ mi, shi egbo ŋɔ mɛzhi! Ikwidufulo ŋɔ i bo ŋɔ ofya ma-a. Mu kwuye kwɔngwɔngwu oko ele ofya wu u bo mo.

23 Tabɔkɔ Ɔzhizɔsi e fye mu kwogba ungwu utokeyi uwu Azhu awu, a ma enzu wa ta amu iyi odumudumu uwu lukwu mbala umba o yi mu uzhi iwomo le, 24 akwɛyi a za mba tee, <<Uwewe La wɔ kwudu! Umoko ele e kpomo mo - ondo gba e yi mu ikpolomo le byi!>> Akwɛyi enzu lɛɛbi o nyɔngɔ wu ma. 25 Tabɔkɔ o wa la enzu mo lɛɛbi mu kwudu, akwɛyi Ɔzhizɔsi e fyemo memi, e yi wu mu kwuwo, akwɛyi umoko le e yimo 26 Ɛza ɛlɛ i fulama mu ɛzhi ɛnyi lɛɛbi.

27 Mizhikembo iyi Ɔzhizɔsi a lafya la kizɛ ngyɛngyi , wa peyi wepo o mbwalu wu la iyama tee, << Umɛ uwu Odevidi, ma eyembembyi nzu!>>

28 Kwuye ungwu Ɔzhizɔsi e fye mu kwogba ungufo, akwɛyi epeyi wepo mbamba o bo mbaa wu, akwɛyi e yo mbo tee, <<

Lu yi ikwidufulo te mi do yi ofya ibomo?>> O gba wu opwu tee, <<Ee, Ɔkwu.>>

29 Akwɛyi a pwu mba afyi mu eyi, a za mba tee, <<Li wo yi tayi kwuwongu ikwu idu fulo yi>> - 30 akwɛyi eyi mbo i wuma. Ɔzhizɔsi e yi mbo mu alu tee, <<La lu so onzu uwunawuna iso ɛlɛ mo mɛɛ!>>

31 Umba ba o wɔ kwudu o fu enzu oga uwu Ɔzhizɔsi mu ɛzhi mba lɛɛbi.

32 Tabɔkɔ o yi mu iwɔ kwudu, akwɛyi enzu umbafo o ka la Ɔzhizɔsi onzu uwu e yi kwundu ungwura ba e siso kego mo. 33 Mizhikembo iyi bɔkɔ o wala kwundu ungwura ma mɛnwu wu, akwɛyi onzu ele e le mu isisomo. Enzu umba bɔkɔ o yi mɔmɔ lɛɛbi, Izirɛ i yi mbo mo akwɛyi o ya kenzu tee, <<Ki di ma ɛlɛ dɛ mo mu ɛzhi iyi Isirɛ!>>

34 Afarisi ba o zɔ tee, akwu mu ekpasu iyi utokeyi uwu ɛndu iyira gba Ɔzhizɔsi a wa la kwundu ungwura ma le.>>

35 Ɔzhizɔsi a kpa ɛvyɛ mu ese iyɛri mbala iyɛku lɛɛbi, laa ɛzu izɔma mu idaba iyi ɛlu ikpalama iyi Azhu, a ta mba anu iyi iso iyesheshi iyi irɛsu iyi Oshi mbala ofya umbunambuna ibomo. 36 Tabɔkɔ Ɔzhizɔsi a ma riba ngyi enzu, akwɛyi eyembembyi mbo i wo wu mo, kwuwongu o kpo igbashi ba o yi onzu uwu imbwama mo, mate ilɔ umba o yi onzu uwu ipyama mo tayi. 37 Akwɛyi a za la Wavɔngɔkiya wu tee, <<Ewiri iyi ilɔma i yi gyɔɔ, enzu umba ilɔma ba o yi bwɛ. 38 Kwuwongwu ɔlɛ, la lu kpa ɛshɛku la Ɔkwu uwu utu, kaa la lɔ la enzu umba ɛduma mu utu wu.>>